‘Ditumika bilenga ne dîyi dia bulelela’

DÎYI dia Nzambi ntshilaminu tshia mêyi-maludiki adi ne mushinga bua kusonga nkele mu nsombelu. Didi mua kuambuluisha ministre kampanda bua kulongesha, kukanyina, ne kululamija. (2 Timote 3:16, 17) Kadi, bua kubabidila tshishiki tshiludiki etshi tshipetesha kudi Nzambi, tudi ne bua kulonda mubelu eu wa mupostolo Paulo kudi Timote: “Enza muebe muonso mua kuenza bua udileje kudi Nzambi bu muntu muanyishibue, muena mudimu udi kayi mua kukunjija mêsu pa bualu nansha bumue, udi utumika bilenga ne dîyi dia bulelela.”​—2 Timote 2:15, NW.

Dîyi dia Nzambi ndifuanyikijibue ne bintu bikuabu bu mudi mabele madiishi, biakudia bikole, mâyi matalaji ne makezudi, lumuenu, ne muele wa mvita mutue. Kujingulula tshidi mbikidilu eyi yumvuija kudi kuambuluisha ministre kampanda bua kutumika ne Bible ne nzanzu yonso.

Dipetesha mabele a Dîyi dia Nzambi

Mabele ntshiakudia tshidi bana badi bafuma ku diledibua bakengela. Padi muana wenda ukola, biakudia bikole bidi bienda bibuejibua ku kakese ku kakese mu ndilu wende, kadi ku ntuadijilu, tshifu tshiende tshidi mua kuandamuna anu mabele. Mu nsombelu mivule, aba badi bamanye bikese pa Dîyi dia Nzambi mbafuane bana ba tutoto. Muntu nansha yeye muikale musankididi mupiamupia wa Dîyi dia Nzambi anyi muibidilangane nadi kukadi tshikondo kampanda, bikalaye anu ne ngumvuilu wa ku mbangilu wa tshidi Bible wamba, udi muana wa katoto mu nyuma ne udi ukengela biakudia bipepele bua kuandamunyibua kudi tshifu​—“mabele” a mu nyuma. Ki mmuanji kukumbana bua kuandamuna ‘biakudia bikole,’ bintu biondoke bia Dîyi dia Nzambi.​—Ebelu 5:12.

Eu ke nsombelu uvuaku mu tshisumbu tshipiatshipia tshivua tshitshifuma ku dienjibua mu Kolinto pakabafundila Paulo ne: “Mvua munupeshe mabele bua kunua, kadi ki ntshintu tshikole tshia kudia, bualu kanuvua banji kukola menemene to.” (1 Kolinto 3:2, NW) Bena Kolinto batshivua diambedi bakengela bua kulonga “mayisha a kumudilu a tshibangidilu tshia mei mamba kudi Nzambi.” (Ebelu 5:12) Ku tshidia atshi tshia dilubuluka, tshifu tshiabu katshivua tshikumbane bua kuandamuna “bintu biondoke bia Nzambi.”​—1 Kolinto 2:10, NW.

Anu bu Paulo, ba-ministre bena nkristo lelu’eu badi baleja diditatshisha diabu bua bàdì bana ba tutoto mu nyuma pa kubapetesha “mabele,” mbuena kuamba se: pa kubambuluisha bua kuluabu bashindamane bikole mu malongesha a nshindamenu a Buena-nkristo. Badi bakankamija bapiabapia ba mushindu’eu anyi aba bakena bapie bua ‘kujinga mabele a muoyo, kaayi masambakaja ne tshintu.’ (1 Petro 2:2, MMM) Mupostolo Paulo wakaleja ne: uvua musunguluje ntema ya muntu pa nkayende ìdì bapiabapia bakengela pakafundaye ne: “Bualu, yonso udi ukengela mabele kêna muanji kumanya dîyi dia buakane, bualu utshidi muana mutekete.” (Ebelu 5:13, NW) Lutulu, kanemu, diumvuilangana, ne bupole-malu mbilombibue bua ba-ministre ba Nzambi padibu babanyangana mabele makezuke a Dîyi ne bapiabapia [kabidi] ne aba bakena ne dimonamona malu ku diambuluisha dia malonga a Bible a ku mbelu ne mu tshisumbu.

Ditumika ne biakudia bikole bia Dîyi dia Nzambi

Bua dikola didi difikisha ku lupandu, muena nkristo udi ukengela tshintu kampanda tshipite ne kule “mabele.” Diakamue padi malelela a nshindamenu umvuibua bimpe ne itabibua, mmudiakaje bua kulondakaja ne ‘biakudia bikole bidi bua bantu bakole.’ (Ebelu 5:14, NW) Mmunyi mudiye mua kuenza nunku? Nangananga, ku diambuluisha dia dilonga dia pa tshibidilu dia muntu pa nkayende ne didisangisha mu bisangilu bia bena nkristo. Bibidilu bimpe bia mushindu’eu nebiambuluishe muena nkristo bua kulua muntu mukole mu nyuma, mupie, ne udi upatula bipeta bimpe mu mudimu. (2 Petelo 1:8) Katupu muoyo ne: kusakidila ku dimanya, dienza dia disua dia Yehowa didi padi tshimue tshitupa tshia biakudia bia mu nyuma.​—Yone 4:34.

Lelu’eu, “mupika wa lulamatu ne wa budimu” mmutekibue bua kupetesha basadidi ba Nzambi biakudia tshikondo tshiakanyine ne kubambuluisha bua kumvua “me[j]i mavule a Nzambi.” Yehowa, ku spiritu wende, udi usokolola malelela muondoke ku diambuluisha dia mupika eu mulamatshi ku mikenji, udi upatula ne lulamatu “biakudia [bia mu nyuma] tshikondo tshiakanyine.” (Matayo 24:45-47, NW; Efeso 3:10, 11; fuanyikija ne Buakabuluibua 1:1, 2.) Muena nkristo yonso pa nkayende udi ne bujitu bua kutumika mu mushindu wa tshishiki ne bintu bipatula bia nunku.​—Buakabuluibua 1:3.

Bushuwa, amue malu mu Bible “adi makole pa kuajingulula,” nansha bua bena nkristo bapie. (2 Petelo 3:16) Kudi biambilu, milayi, ne mifuanu bijingakane bidi bikengela dilonga divule ne dieleela meji. Nunku, dilonga dia muntu pa nkayende didi dikonga diumbula mu Dîyi dia Nzambi. (Nsumuinu 1:5, 6; 2:1-5) Nangananga bakulu badi ne bujitu mu muand’eu padibu balongesha tshisumbu. Nansha padibu balombola Dilonga dia Mukanda dia Tshisumbu anyi Dilonga dia Tshibumba tshia Nsentedi, benza miyuki ya patoke, anyi basadila mu mudimu kayi wonso wa dilongesha, bakulu badi ne bua kuibidilangana menemene ne malongesha abu ne kuikala badiakaje bua kuteya ntema ku “tshipedi tshia bulongeshi” tshiabu padibu bapetesha tshisumbu biakudia ebi bikole.​—2 Timote 4:2, NW.

Mâyi adi atalaja ne akezula

Yezu wakambila mukaji muena Samariya ne: uvua mua kumupesha tshintu kampanda tshia kunua tshivua mua kulua munda muende “mpokolo wa mayi adi apetesha muoyo wa kashidi.” (Yowanese 4:13, 14; 17:3, MMM) Mâyi aa mafidi a muoyo adi akonga ndongoluelu ya Nzambi bua dipeta muoyo ku butuangaji bua Muan’a Mukoko wa Nzambi, ne ndongoluelu eyi mmiumvuija mu Bible. Bu bantu badi ne nyota ya “mâyi” aa, tudi tuanyisha dibikila difila kudi spiritu ne mukaji wa Kristo dia ‘kuangata mâyi a muoyo kaayi kusumba.’ (Buakabuluibua 22:17, NW) Kunua mâyi aa kudi mua kumvuija muoyo wa kashidi.

Kupita’apu, Bible udi ufila mêyi-makulu pa malu a tshitembu ne a mu nyuma bua bena nkristo balelela. Patudi tutumikila mêyi-makulu mafila aa, tudi tukezudibua kudi Dîyi dia Yehowa, “batokesha ne mâyi” ku bienzedi bidi Yehowa ukina. (1 Kolinto 6:9-11, NW) Bua kabingila aka, bulelela bùdì busanganyibua mu Dîyi difunda ku spiritu budi bubikidibua ne: ‘diowa mâyi.’ (Efeso 5:26, NW) Bituabenga kulekelela bulelela bua Nzambi bua kutukezulabu mu mushindu’eu, ntendelelu wetu kakuanyishibua kudiye.

Mu mushindu udi ujula ntema, bakulu bàdì ‘batumika biakane ne dîyi dia bulelela’ mbafuanyikijibue ne mâyi. Yeshaya udi wamba ne: badi “bu tusulu tua mayi tupueka mu buloba buume.” (Yeshaya 32:1, 2, MMM) Bakulu bena dinanga badi bakumbaja diumvuija edi padibu bakumbula bana babu bu balami ba mu nyuma, pa kutumika ne Dîyi ditalajanganyi dia Nzambi bua kupetesha mamanyisha a mu nyuma adi ibakangana, asambangana, adi akoleshangana ne asangulujangana.​—Fuanyikija ne Matayo 11:28, 29.a

Bena mu tshisumbu batu bindila ne luzuku makumbula a bakulu. “Ndi mumanye mudi bakulu mua kuikala bapoleshanganyi, ne ndi ne disanka divule bu mudi Yehowa muenze ndongoluelu’eu,” ke mudi Bonnie wamba. Lynda, mamu mujike, udi ufunda ne: “Ne dikankamija dia mu Mifundu, bakulu bakangambuluisha bua kumona mua kupita ne malu. Bakateleja ne kuleja luse.” Michael udi wamba ne: “Bakenza bua ngumvue ne: ndi muena mu bulongolodi budi butabalelangana.” “Makumbula a bakulu akangambuluisha bua kutshimuna mpolu ya tunyinganyinga tukole,” ke mudi mukuabu wamba. Dikumbula dìdì diibaka mu nyuma dia kudi mukulu kampanda ndifuane tshinuibua tshia mashika, tshitalaji. Bantu bafuane mikoko badi basambibua padibu bambuluishibua kudi bakulu bena dinanga bua kumona mudi mêyi-maludiki a mu Mifundu mua kutumika mu nsombelu wabu.​—Lomo 1:11, 12; Yakobo 5:14.

Tumika ne Dîyi dia Nzambi bu lumuenu

Padi muntu udia biakudia bikole, tshipatshila katshiena anu tshia kumvua muenya patupu nansha. Bishilangane, udi utekemena bua kupeta bidiishi biapetesha mubidi wende mushindu wa kutumika. Bikalaye muana, udi utekemena se: biakudia nebimuambuluishe bua kukola ne kulua muntu mukulumpe. Bidi bia muomumue ne biakudia bia mu nyuma. Dilonga dia Bible dia muntu pa nkayende didi mua kuikala dishême, kadi aka ki nkabingila kamuepele kaadi nansha. Biakudia bia mu nyuma bidi ne bua kutushintulula. Bidi bituambuluisha bua kusunguluja ne kudima mamuma a spiritu ne kutukuatshisha bua kudivuadika “bumuntu bupiabupia, budi budienzulula ku dimanya dijalame pa tshimfuanyi tshia Eu wakabufuka.” (Kolosai 3:10, NW; Galatia 5:22-24) Biakudia bia mu nyuma bidi kabidi bituambuluisha bua kulua bantu bapie, pa kutuvuija bakumbane bua kutumikila mêyi-maludiki a mu Mifundu mu diakama ntatu yetu ne mu diambuluisha bakuabu bua kuakama yabu.

Mmunyi mutudi mua kumanya bikala Bible ne buenzeji kutudi? Tudi tutumika ne Bible bu lumuenu. Yakobo wakamba ne: “Nuvue benji ba dîyi, kanuikadi bateleji patupu . . . Bikala muntu kampanda muikale amu muteleji wa dîyi, kadi, kayi muenji, muntu eu mmufuanangane ne muntu udi utangila mpala wende mu lumuenu. Bualu, udi uditangila, uya, upua muoyo ne lukasa luonso kayi uvuluka ne udi muntu wa mushindu kayi. Kadi, eu udi uditangila mu mukenji mupuangane wa budikadidi, ne udi unanukilamu, muntu awu neikale wa diakalenga pa kuutumikila, bualu, kêna muteleji udi upua muoyo, kadi muenji wa mudimu.”​—Yakobo 1:22-25, NW.

Tudi ‘tutangila’ mu Dîyi dia Nzambi patudi tudikonkonona ne ntema ne tufuanyikija tshitudi ne tshituvua ne bua kuikala bilondeshile mêyi-makulu a Nzambi. Pa kuenza nunku, netulue ‘benji ba dîyi, bakena bateleji patupu.’ Bible neikale ne buenzeji buimpe kutudi.

Dîyi dia Nzambi bu muele wa mvita

Ndekelu wa bionso, mupostolo Paulo udi utuambuluisha bua kumona mushindu utudi mua kutumika ne Dîyi dia Nzambi bu muele wa mvita. Pa kutudimuija ku “mbulamatadi, ne bakokeshi, ne bamfumu ba buloba bujima ba mîdima eyi, ne makole a ba-spiritu babi badi mu miaba ya mu diulu,” udi utubela bua “kuanyisha . . . muele wa mvita wa spiritu, mbuena kuamba ne: Dîyi dia Nzambi,” (Efeso 6:12, 17, NW) Dîyi dia Nzambi didi tshia mvita tshidi ne mushinga tshitudi mua kutumika natshi bua kumbusha ngenyi kayi yonso idi ‘itombokela dimanya dia Nzambi.’​—2 Kolinto 10:3-5, NW.

Kakuyi mpata, “dîyi dia Nzambi didi ne muoyo ne bukole.” (Ebelu 4:12, NW) Yehowa udi wakula ne bukua-bantu ku butuangaji bua mabeji a Dîyi diende difunda ku spiritu. Tumika nadi bimpe mu dilongesha bakuabu ne mu diela malongesha a dishima patoke. Ikala nadi bua kukankamija, kuibaka, kukolesha, kusamba, kusaka, ne kusanguluja bakuabu mu nyuma. Ne Yehowa “akukumbaje tshishiki ne bintu bimpe bionso bua kuenza disua diende,” bua umone mua kuenza misangu yonso tshidi “tshilengele ku mêsu ende.”​—Ebelu 13:21, NW.

[Mêyi adi kuinshi]

[Tshimfuanyi mu dibeji 31]

Bakulu badi bakankamija bakuabu, ‘pa kutumika bilenga ne dîyi dia bulelela’