Dimanya-mukanda—Tumika nadi bua kusamuna Yehowa
“Muntu udi wakula [ku lungenyi luende, NW] yeye nkayende udi ukeba bua bamutumbishe. Kadi, udi ukeba lumu lua Udi mumutume, awu udi wamba bulelela.”—YOWANESE 7:18, MMM.
1. Ntshikondo kayi ne mmunyi muakatuadija malonga?
MALONGA akatuadija kukadi tshikondo tshiletshile. Bivua katupa kîpi kunyima kua Yehowa Nzambi, Mulongeshi ne Mushidimunyi Munene, mumane kufuka Muanabute wende wa balume ke malonga kutuadijawu. (Yeshaya 30:20; Kolosai 1:15) Uvua Eu uvua mua kulongela kudi Mushidimunyi Munene yeye nkayende! Munkatshi mua binunu bia bidimu bikena kubadika bia malanda mashême ne Tatu, Muana au—wakalua kumanyika bu Yezu Kristo—wakapeta malongesha akena kutua mushinga pa ngikadilu, midimu, ne malongolola bia Yehowa Nzambi. Panyima, bu muntu pa buloba, Yezu wakamba ne: “Tshiena ngenza tshintu nansha tshimue ku budisuile buanyi nkayanyi; kadi, ndi nngamba malu aa amu bu mudi Tatu muandongeshe.”—Yone 8:28, NW.
2-4. (a) Bilondeshile Yone nshapita wa 7, ntshinyi tshiakadianjila kuenzeka kumpala kua dilua dia Yezu mu Difesto dia Tabernakle mu 32 B.B.? (b) Bua tshinyi bena Yuda bavua bakema pa bidi bitangila nzanzu ya dilongesha ya Yezu?
2 Mmunyi muakatumika Yezu ne malongesha akapetaye? Mu bule bua mudimu wende wa bidimu bisatu ne tshitupa pa buloba, wakabanyangana ne bakuabu kayi upungila tshivuaye mulonge. Pabi, ebi bivua bienjibue bua kukumbaja dilongolola dia mushinga mukole. Ne tshivua tshinyi atshi? Tuanjibi kukonkonona mêyi a Yezu adi mu Yone nshapita wa 7, muvuaye mumvuije mpokolo ne tshipatshila bia dilongesha diende.
3 Anjibi kutangila tshiakadianjila kuenzeka. Bivua mu muvu wa automne mu 32 B.B., bidimu bitue ku bisatu kunyima kua batismo wa Yezu. Bena Yuda bavua badisangishe mu Yeruzaleme bua Difesto dia Tabernakle. Munkatshi mua matuku makese a kumpala a difesto, kuvua miyuki mivule ivua itangila Yezu. Pakafika difesto pankatshi, Yezu wakaya ku ntempelu ne kutuadija kulongesha. (Yone 7:2, 10-14) Anu bu pa tshibidilu, wakadijadika muvuaye Mulongeshi munene.—Matayo 13:54; Luka 4:22.
4 Mvese wa 15 wa Yone nshapita wa 7 (NW) udi wamba ne: “Nunku bena Yuda bakatuadija kudiebeja, bamba ne: ‘Mmunyi mudi muntu eu ne dimanya dia mikanda, pende kayi mulonge mu tulasa?’” Udi umvua bua tshinyi bavua bakema anyi? Yezu kavua mubuele mu kamue ka ku tulasa tua ba-Rabi nansha, nunku uvua mupangi wa mukanda—bilondeshile mmuenenu wabu! Pabi, Yezu uvua usokolola muaba uvua bitupa bia Mifundu Minsantu ne ubibala kakuyi lutatu. (Luka 4:16-21) Ee, muena mudimu wa mabaya eu muena Ngalileya uvua mene ubashidimuna mu Mikenji ya Mozese! (Yone 7:19-23) Mmunyi muvuabi mua kuenzeka?
5, 6. (a) Mmunyi muakumvuija Yezu mpokolo wa dilongesha diende? (b) Mmushindu kayi wakatumika Yezu ne dimanya-mukanda diende?
5 Yezu wakumvuija, bu mutudi tubala mu mvese ya 16 ne 17 (MMM) ne: “Dilongesha dindi ndongesha ki ndianyi meme to, ndifume kudi Udi muntume. Pikala muntu muitabe bua kuenza mudi [Nzambi, NW] musue, neamanye ne: dilongesha edi ndifume kudi [Nzambi, NW], anyi ndi ngakula [ku lungenyi luanyi, NW] meme nkayanyi.” Bavua basue kumanya eu uvua mulongeshe Yezu, ne wakabambila patoke ne: dimanya-mukanda diende divua dia kudi Nzambi!—Yone 12:49; 14:10.
6 Mmunyi muakatumika Yezu ne dimanya-mukanda diende? Anu bu mudibi bifunda mu Yowanese 7:18 (MMM), Yezu wakamba ne: “Muntu udi wakula [ku lungenyi luende, NW] yeye nkayende udi ukeba bua bamutumbishe. Kadi, udi ukeba lumu lua Udi mumutume, awu udi wamba bulelela, kena udinga to.” Mmushindu kayipu uvuabi biakanyine bua Yezu kutumika ne dimanya-mukanda diende bua kutumbisha Yehowa, “Muena dimanya dia tshishiki”!—Yobe 37:16, MMM.
7, 8. (a) Mmunyi mutudi ne bua kutumika ne dimanya-mukanda? (b) Bipatshila bia nshindamenu binayi bia dimanya-mukanda dia nkatshinkatshi mbinganyi?
7 Nunku tudi tupetela dilongesha dia mushinga kudi Yezu—dimanya-mukanda tudi ne bua kutumika nadi, ki mbua kuditumbisha tuetu nkayetu, kadi bua kusamuna Yehowa. Kakuena munga mushindu mutambe bulenga wa kutumika ne dimanya-mukanda. Nunku, mmunyi muudi mua kutumika ne dimanya-mukanda bua kusamuna Yehowa?
8 Kulongesha kudi kumvuija “kukela ku diambuluisha dia dishidimuna dilongolola ne dibidija nangananga mu nzanzu, bungenda, peshi mudimu mukuabu.” Tuanjibi mpindieu kukonkonona bipatshila bia nshindamenu binayi bia dimanya-mukanda dia nkatshinkatshi ne mushindu udi tshionso tshia kudibi mua kuambuluisha bua kusamuna Yehowa. Dimanya-mukanda dia nkatshinkatshi didi ne bua kutuambuluisha (1) bua kubala bimpe, (2) bua kufunda bintu bidi mua kubadibua, (3) bua kudiunda mu lungenyi ne mu malu a tshitembu, ne (4) bua kupeta dikela dikuatshishi didi dikengedibua mu nsombelu wa dituku dionso.
Kulonga bua kubala bimpe
9. Bua tshinyi bidi bia mushinga bua kuikala mubadi muimpe?
9 Tshidi tshitedibue kumpala nkulonga bua kubala bimpe. Bua tshinyi bidi ne mushinga bua kuikala mubadi muimpe? Tshibungu tshia The World Book Encyclopedia tshidi tshiumvuija ne: “Kubala . . . ntshintu tshia nshindamenu bua dilonga ne ng’umue wa ku nzanzu ya mushinga mutambe bukole mu nsombelu wa dituku dionso. . . . Babadi ba nzanzu badi bakumbaja tshiabu tshitupa mu dienza nsangilu wa bantu udi ulubuluka, upatula bipeta bimpe. Eku, buobu bine badi balabula nsombelu ya dimanyamanya mianda ne disankishibua dikole.”
10. Mmunyi mudi dibala Dîyi dia Nzambi dituambuluisha bua kulabula nsombelu ya dimanyamanya ne disankishibua dikole?
10 Bikala dibala mu ka-bujima mua kutuambuluisha bua kulabula “nsombelu wa dimanyamanya ne disankishibua dikole,” mmushindu kayipu udi dibala Dîyi dia Nzambi ne bua kuikala dipite ne kule! Dibala dia mushindu’eu didi diunzuluila ngenyi ne malongolola bia Yehowa njila mu bieledi bietu bia ngenyi ne mitshima, ne dijingulula ditokesha dia malu aa didi dipetesha mioyo yetu tshipatshila. Kupita apu, “Dîyi dia Nzambi didi ne muoyo ne bukole,” ke mudi Ebelu 4:12 (NW) wamba. Patudi tubala Dîyi dia Nzambi ne tueleelapu meji, tudi tusemejibua pabuipi ne Mudifundishi, ne tudi tusakibua ku dienza mashintuluka mu nsombelu yetu bua kulua bantu badi batamba kumusankisha. (Galatia 5:22, 23; Efeso 4:22-24) Tudi kabidi tusakibua bua kuabanyangana ne bakuabu malelela a mushinga atudi tubala. Bionso ebi bidi bisamuna Mulongeshi Munene, Yehowa Nzambi. Eyowa, kakuena mushindu mukuabu mutambe buimpe wa kutumika ne nzanzu yetu ya dibala!
11. Ntshinyi tshidi ne bua kubuejibua mu programe mutshintshikila wa dilonga dia muntu pa nkayende?
11 Nansha bikale bansonga peshi bakulakaje, tudi bakankamijibue bua kulonga mua kubala bimpe, bualu dibala didi diambuluisha bikole mu nsombelu wetu wa Buena-nkristo. Kusakidila ku dibala dia pa tshibidilu dia Dîyi dia Nzambi, programe mutshintshikila wa dilonga dia muntu pa nkayende udi ne bua kuikala muenza ne dikonkonona dia mvese wa mu Bible wa dituku dionso muangata mu Tukonkononayi Mifundu dituku dionso, ditumika ne Tshibumba tshia Nsentedi ne Réveillez-vous!, ne dilongolola bisangilu bia Buena-nkristo. Ne netuambe tshinyi bua mudimu wa Buena-nkristo? Mbimueneke patoke ne: bumanyishi bua patoke, dikumbulula basankididi ba bulelela, ne dilombola malonga a Bible ku nzubu bidi bionso bilomba nzanzu mimpe ya dibala.
Kulonga mua kufunda bintu bidi mua kubadibua
12. (a) Bua tshinyi bidi bia mushinga bua kulonga mua kufunda bintu bidi mua kubadibua? (b) Ndifunda kayi didi dipite wonso bunene?
12 Tshipatshila tshibidi ntshia se: dimanya-mukanda dia nkatshinkatshi didi ne bua kutuambuluisha bua kulonga mua kufunda bintu bidi mua kubadibua. Kufunda kakuena anu kusambuluja mêyi ne ngenyi bietu kadi kudi kabidi kubilama. Kukadi siekele mivulavulayi, bena Yuda batue ku 40 bakafunda pa nyandu (papyrus) anyi pa parchemin miaku yakalua kuenza Mifundu mifundisha ku spiritu. (2 Timote 3:16) Bushuwa, edi divua difunda dipite wonso bunene! Kakuyi mpata, Yehowa wakalombola ditentula ne ditentulula bia mêyi mansantu aa mu bule bua siekele, bua se: atufikile mu mushindu udi muakanyine dieyemena. Katuenaku ne dianyisha bua muakafundishisha Yehowa mêyi ende, pamutu pa kueyemena diasambuluja ku dîyi dia mukana anyi?—Fuanyikija ne Ekesode 34:27, 28.
13. Ntshinyi tshidi tshileja ne: bena Izalele bavua bamanye mua kufunda?
13 Mu bikondo bia kale, anu bamue bena diese ne muabi, bu mudi ba-skribe mu Mésopotamie ne Ejipitu, ke bavua bamanyi ba mukanda. Bishilangane menemene ne matunga, mu Izalele muntu yonso uvua mukankamijibue bua kuikala mumanyi wa mukanda. Dîyi-dituma didi mu Dutelonome 6:8, 9 bua bena Izalele kufunda ku makunji a biibi bia nzubu yabu, nansha mudidi dimueneka bu dia mu tshimfuanyi, divua diumvuija ne: bavua bamanye mua kufunda. Ku buana menemene, bana bavua balongeshibua mua kufunda. Badi bela meji kudi bamue bashikuluji ne: kalandrié ka Gezer, tshimue tshia ku bilejilu bikulukulu bia mifundu ya kale ya bena Ebelu, kavua bua dibidijibua dia tshivulukilu tshia bana bena mu kalasa.
14, 15. Ng’imue mishindu kayi mimpe ne miakane itudi mua kutumika ne nzanzu ya difunda?
14 Kadi mmunyi mutudi mua kutumika mu mushindu muimpe ne muakane ne nzanzu yetu ya difunda? Eyowa, mpa kuangata note mu bisangilu bia Buena-nkristo, mu mpuilu mikese, ne mpuilu minene. Mukanda, nansha wuowu mufunda “mu mêyi makese,” udi upetesha dikankamija kudi eu udi ne disama anyi uleja dianyisha kudi muanetu kampanda wa mu nyuma uvua mutuleje bulenga anyi mutuakidile. (1 Petelo 5:12) Bikala muntu kampanda mu tshisumbu mujimije munangibue kampanda mu lufu, mukanda muîpi anyi kalata bidi mua “kuakula mêyi a disambangana nawu” kudi muntu au buetu. (1 Tesalonike 5:14, NW) Muanetu kampanda wa bakaji muena nkristo wakajimija mamuende ku disama dia kansere wakumvuija ne: “Mulunda umue wakamfundila mukanda muimpe. Biakangambuluisha bualu mvua mua kuubalulula misangu mivule.”
15 Mushindu mutambe buimpe wa kutumika ne nzanzu ya difunda nkusamuna Yehowa pa kufunda mukanda bua kufila bumanyishi pa Bukalenge. Imue misangu bidi mua kukengela bua kutungunuka ne kumvuangana ne basankididi bapiabapia ba bulelela badi basombele mu miaba miditole ya kulekule. Disama didi bua musangu muîpi mua kukukoleshila diya ku nzubu ne ku nzubu. Pamu’apa mukanda udi mua kumanyisha tshiuvua mua kuamba wewe nkayebe.
16, 17. (a) Mbualu kayi buenzeke budi buleja mushinga wa difunda mukanda bua kufila bumanyishi pa Bukalenge? (b) Udiku mua kulonda bualu bumona bua muomumue anyi?
16 Anjibi kutangila bualu bumona bumue. Kukadi bidimu bivule katshia Ntemu kampanda wafunda mukanda bua kufila bumanyishi pa Bukalenge kudi mukamba muena mulume uvua lufu lumanyisha mu tshikandakanda tshia muaba au. Kakuvua diandamuna to. Pashishe, mu Kasuabanga 1994, bidimu bipite pa 21 kunyima, Ntemu eu wakapeta mukanda mutuma kudi muana wa bakaji wa mukaji eu. Muana wa bakaji eu uvua mufunde ne:
17 “Mu Tshisanga 1973, wakafundila mamu mukanda bua kumusamba kunyima kua lufu lua tatu. Mvua ne bidimu tshitema tshikondo atshi. Mamu wakalonga Bible, kadi too ne ku mpindieu kêna musadidi wa Yehowa to. Kadi, dilonga diende diakamfikisha ndekelu wa bionso ku dipetangana ne bulelela. Mu 1988, ngakatuadija dilonga dianyi dia Bible—bidimu 15 kunyima kua dipeta mukanda webe. Mu dia 9 Luabanya 1990, ngakabatijibua. Ndi ne dianyisha dikole bua mukanda webe mufunda kukadi bidimu bivule ne ndi ne disanka dikole bua kukumanyisha ne: mamiinu awu awakakuna mmakole ku diambuluisha dia Yehowa. Mamu wakampesha mukanda webe bua kuulama, ne ndi musue kukumanya. Ndi mutekemene se: mukanda eu neukupete.” Mukanda wa muana wa bakaji eu, uvua ne nimero wende wa kashete ka mikanda ne wa kumubikila nende ku nshinga, wakafikila bushuwa Ntemu eu uvua mufunde kukadi bidimu bivule nunku. Fuanyikija dikatamuka dia mukaji eu nsonga pakabikidibuaye ku nshinga kudi Ntemu eu—udi mutungunuke ne difunda mikanda bua kuabanyangana ditekemena dia Bukalenge ne bakuabu!
Kudiunda mu lungenyi, mu malu a tshitembu, ne mu nyuma
18. Mu bikondo bifundilebu Bible, mmunyi muvua baledi batabalela dishidimuna bana babu mu malu a lungenyi ne a tshitembu?
18 Tshipatshila tshisatu ntshia se: dimanya-mukanda dia nkatshinkatshi didi ne bua kuambuluisha bua kudiunda mu lungenyi ne mu malu a tshitembu. Mu bikondo bifundilebu Bible, dishidimuna bana mu malu a lungenyi ne a tshitembu divua diangatshibua bu umue wa ku midimu minene ya baledi. Bana bavua balongeshibua ki ng’anu mua kubala ne kufunda kadi, kupita bionso mushinga, bavua bashidimunyibua mu Mikenji ya Nzambi, ìvuà ikonga midimu yabu yonso ya mu nsombelu. Nunku, dikela divua dikonga dishidimuna didi ditangila majitu a malu a Nzambi ne mêyi-maludiki adi alombola dibaka, malanda mu mêku, ne malu a tshitembu pa bitupa bia lulelu, bia muomumue ne majitu abu kudi bantu nabu. Dishidimuna dia mushindu’eu divua dibambuluisha bua kudiunda ki ng’anu mu lungenyi ne mu malu a tshitembu apu kabidi ne mu malu a mu nyuma.—Dutelonome 6:4-9, 20, 21; 11:18-21.
19. Nkuepi kutudi mua kupeta dishidimuna didi dituleja manême matambe buimpe a kukumbaja ne adi atuambuluisha bua kudiunda mu nyuma?
19 Netuambe tshinyi lelu’eu? Dimanya-mukanda dimpe mu malu a ku mubidi didi ne mushinga. Didi dituambuluisha bua kudiunda mu lungenyi. Kadi nkuepi kutudi mua kukudimuka bua kupeta dishidimuna diatuleja manême matambe buimpe a malu a tshitembu a kukumbaja ne diatuambuluisha bua kudiunda mu nyuma? Mu tshisumbu tshia bena nkristo, tudi ne programe wa dishidimuna dia teokrasi udi kayi mua kupetshibua muaba mukuabu pa buloba. Ku diambuluisha dia dilonga dietu dia Bible dia muntu pa nkayende pamue ne mikanda mishindamene pa Bible ne malongesha mafila mu bisangilu bia tshisumbu, mu mpuilu mikese, ne mpuilu minene, tudi mua kupeta dishidimunyibua dikena kutua mushinga, didi dienda dienzeka—dishidimuna dia kudi Nzambi—kakuyi ditula mfranga! Ntshinyi tshididi ditulongesha?
20. Ntshinyi tshidi dishidimuna dia kudi Nzambi ditulongesha, ne mbipeta kayi bidi bifuminaku?
20 Patudi tutuadija kulonga Bible, tudi tumanya malongesha a nshindamenu a mu Mifundu, “malongesha a ntuadijilu.” (Ebelu 6:1, NW) Patudi tutungunuka, tudi tupùkila “bia kudia bikole”—mbuena kuamba ne: malelela matambe kuondoka. (Ebelu 5:14) Kadi, kupita apu, tudi tulonga mêyi-maludiki a Nzambi adi atulongesha mushindu wa kuikala ne nsombelu bilondeshile mudi Nzambi musue. Tshilejilu, tudi tulonga bua kuepuka bibidilu ne bienzedi bia ‘manyanu a mubidi’ ne kuikala ne kanemu bua bumfumu ne bua mubidi wa muntu ne bintu bia bakuabu. (2 Kolinto 7:1; Tito 3:1, 2; Ebelu 13:4) Kusakidila apu, tudi tufika ku dianyisha mushinga wa kuikala bena bululame ne bena disuminyina mu ditumika mudimu wetu ne mushinga wa kuikala ne nsombelu udi mu diumvuangana ne mêyi-matuma a mu Bible pa malu a tshitembu adi atangila bitupa bia lulelu. (1 Kolinto 6:9, 10; Efeso 4:28) Patudi tuenza malubuluka mu ditumikila mêyi-maludiki aa mu nsombelu yetu, tudi tukola mu nyuma, ne malanda etu ne Nzambi adi wondoka. Kupita apu, ngikadilu wetu wa buena-Nzambi udi utuvuija ba-muena-muabu bimpe, kabiyi kutangila muaba utudi basombele. Ne ebi bidi mua kusaka bakuabu bua kusamuna Mpokolo wa dishidimuna dia kudi Nzambi—Yehowa Nzambi.—1 Petelo 2:12.
Kupeta dikela dikuatshishi didi dikengedibua mu nsombelu wa dituku dionso
21. Ndikela kayi dikuatshishi divua bana bapeta mu bikondo bifundilebu Bible?
21 Tshipatshila tshinayi tshia dimanya-mukanda dia nkatshinkatshi ntshia kupetesha dikela dikuatshishi didi dikengedibua mu nsombelu wa dituku dionso. Dishidimuna dia kudi baledi mu bikondo bifundilebu Bible divua dikonga dikela dikuatshishi. Bana ba bakaji bavua balongeshibua midimu ya mu nzubu. Nshapita wa ndekelu wa Nsumuinu udi uleja ne: midimu eyi ivua mua kuikala mivule ne mishilashilangane. Nunku, bana ba bakaji bavua bavuijibua bakumbane bua kushinga manda, kuluka bilamba, ne kulamba ne kulombola kua nzubu mu ka-bujima, dienda mushinga, ne disumba dia malaba anyi nzubu. Bana ba balume bavua pa tshibidilu balongeshibua midimu ya ku mubidi ya ba-tatuabu, bu-tshidime anyi imue midimu ya bianza. Yezu wakalongela mudimu wa mabaya kudi tatuende mudishi, Yozefe; ke bua tshinyi, uvua ubikidibua ki ng’anu bu “muana wa muena mabaya” kadi kabidi bu “muena mabaya.”—Matayo 13:55; Mâko 6:3.
22, 23. (a) Dimanya-mukanda didi ne bua kulongolola bana ku tshinyi? (b) Ntshinyi tshidi ne bua kuikala disonsodibua dietu mu disungula malonga a pa mutu padibi bimueneka se: bidi bikengedibua?
22 Bia muomumue, lelu’eu, dimanya-mukanda dia nkatshinkatshi didi dikonga didilongolola bua kutabalela majinga a dîku aalua dimue dituku. Mêyi a mupostolo Paulo àdì asanganyibua mu 1 Timote 5:8 (NW) adi aleja ne: kukumbaja majinga a dîku mbujitu bua tshijila. Wakafunda ne: “Eu udi kayi utabalela bena diende, ne nangananga bena mu nzubu muende, mmuvile ditabuja ne mmubi kupita muntu udi kayi ne ditabuja.” Pashishe, dimanya-mukanda didi ne bua kulongolola bana bua majitu aluabu kuambula mu nsombelu pamue ne kubavuija bakumbane bua kulua bena mu nsangilu wa bantu badi benza mudimu ne disuminyina.
23 Ndimanya-mukanda dia ku mubidi dia bule kayi ditudi ne bua kuipatshila? Ebi bidi mua kushilangana bilondeshile ditunga ne ditunga. Kadi bikala dipeta mudimu dikengela dikela dia pa mutu disakidila ku bidi bilombibue kudi mikenji, mbujitu bua baledi bua kuludika bana babu mu diangata dipangadika pa bidi bitangila malonga a pa mutu anyi dikela, pa kutshinka mabika ne mala bia malonga a pa mutu a mushindu’eu. Kadi, ntshinyi tshidi ne bua kuikala tshipatshila tshia muntu padiye usungula bua kuenza malonga a pa mutu padibi bimueneka se: bidi bikengedibua? Bushuwa ki mmabanji, lumu lua muntu pa nkayende, anyi butumbi. (Nsumuinu 15:25; 1 Timote 6:17) Vuluka dilongesha dituvua bapetele ku tshilejilu tshia Yezu—dimanya-mukanda didi ne bua kuambuluisha bua kusamuna Yehowa. Bituasungula malonga a pa mutu, disonsodibua dietu didi ne bua kuikala dijinga dia kudiambuluisha biakane bua tumone mua kusadila Yehowa tshishiki mu mudimu wa bena nkristo.—Kolosai 3:23, 24.
24. Ndilongesha kayi dipetela kudi Yezu ditudi katuyi ne bua kupua muoyo nansha kakese?
24 Nunku, tusuminyinayi mu madikolela etu bua kupeta dimanya-mukanda dia ku mubidi dia nkatshinkatshi. Tubabidilayi mu mushindu wa tshishiki programe wa dishidimuna dia kudi Nzambi udi wenda udiunda udi mupeteshibue mu bulongolodi bua Yehowa. Ne katupu nansha kakese muoyo dilongesha dia mushinga mukole dituvua bapetele kudi Yezu Kristo, mumanyi mupiluke wa mukanda mupite buonso—dimanya-mukanda didi ne bua kuambuluisha, ki mbua kuditumbisha tuetu nkayetu, kadi bua kusamuna Mulongeshi mutambe buonso bunene, Yehowa Nzambi!
Diandamuna diebe didi tshinyi?
◻ Mmunyi muakatumika Yezu ne dimanya-mukanda diende?
◻ Bua tshinyi bidi bia mushinga bua kulonga mua kubala bimpe?
◻ Mmunyi mutudi mua kutumika ne nzanzu ya difunda bua kusamuna Yehowa?
◻ Mmunyi mudi dishidimuna dia kudi Nzambi dituambuluisha bua kudiunda mu malu a tshitembu ne mu nyuma?
◻ Ndikela kayi dikuatshishi didi dimanya-mukanda dia nkatshinkatshi ne bua kukonga?
[Kazubu mu dibeji 13]
Diambuluisha dikuatshishi bua balongeshi
Mu mpuilu ya distrike ya: “Basamunyi bena disanka” munkatshi mua 1995/96, Société Watch Tower wakapatula broshire mupiamupia udi ne tshiena-bualu tshia Les Témoins de Jéhovah et l’instruction. Broshire eu wa mabeji 32, wa mekala mmupatudibue nangananga bua balongeshi. Ke bua tshinyi mmukudimunyibue mu miakulu 58.
Bua tshinyi broshire bua balongeshi? Mbua kubambuluisha bua kumvua mitabuja a balongi badi bikale bana ba Bantemu ba Yehowa. Ntshinyi tshidi munda mua broshire eu? Mu mushindu mupepele bua kumvua ne muibaki, udi umvuija mmuenenu wetu pa malu bu mudi malonga a pa mutu, mifikilu ya diledibua ne Nowele, ne dikosela dibendela mpala. Broshire eu udi kabidi upolesha balongeshi ne: tudi basue bua bana betu bababidile menemene malonga abu ne se: tudi badiakaje ne mutshima mujima bua kutumika pamue ne balongeshi, pa kutabalela ne ntema yonso malonga a bana betu.
Mmunyi mudibu mua kutumika ne broshire eu Les Témoins de Jéhovah et l’instruction? Bu muakalongolodibuaye bua balongeshi, tumuabanyangana ne balongeshi, balombodi, ne banene bakuabu ba tulasa. Broshire eu mupiamupia neambuluishe balongeshi ba mushindu’eu bua kumvua mmuenenu ne mitabuja bietu ne bua tshinyi imue misangu tutu tulomba dianyisha bua kuikala bashilangane ne bakuabu. Baledi mbakankamijibue bua kutumika ne broshire eu bu nshindamenu bua diyukidilangana dia muntu pa nkayende ne balongeshi ba bana babu.
[Tshimfuanyi mu dibeji 10]
Mu Izalele wa kale dimanya-mukanda divua diangatshibua ne mushinga mukole