Bamanyishi ba Bukalenge badi balonda
Dinyemena ku bulongolodi bua teokrasi bua Yehowa
KUKADI mutantshi mule muprofete Yeshaya wakasakibua bua kuamba ne: ‘Badi ne bua kutumbisha Yehowa mu bidiila bia mbuu.’ (Yeshaya 24:15, NW) Bantemu ba Yehowa batu bamona bidiila bia mbuu bu tshitupa tshia “pa buloba buasa” tshivua Yezu muambe ne: “nebambile bisamba bionso lumu luimpe.”—Matayo 24:14, NW; Mâko 13:10.
Bidiila bia Marquises bidi bisanganyibua mu kilometre mitue ku 1 400 ku Nord-Est wa Tahiti. Ntshitupa tshia bisumbu bia bidiila bidi ku Sud wa Pasifike bidibu babikila ne: Polynésie française. Bidi ne bufuke, maloba a ku mikuna ya tupia ne mudi luya, kapepe katalale, mitshi idi ikola bimpe mu bidiila ebi. Kadi, bidiila bia Marquises bidi bikuama dimuma dia mushindu mukuabu. Tangila muanda wa dîku kampanda diakitaba mukenji wa Bukalenge mu tshidiila tshia Hiva Oa.
Jean ne mukajende, Nadine, kabavua ne disanka bua nsangilu udi ubikidibua ne: wa bantu bashidimuke ba ku Mputu wa ku Ouest muvuabu basombele. Nunku bakangata dipangadika dia kulekela nsombelu eu mûle ne midimu ne kuya pamue ne muanabu mulela mu bidiila bia Marquises. Nzubu wabu mupiamupia, muibaka ne nshiba, uvua muasa mu tshibanda tshia kulekule. Bua kufika kudi bena mutumba nabu ba pabuipi menemene, bavua ne bua kuendela mu kajila ka mukuna mulundamane munkatshi mua mêba abidi. Musoko wa pabuipi nabu muvua munganga, tulasa, ne magazen uvua mutantshi wa mêba asatu ku mashinyi a jeep.
Jean ne Nadine kabavua basankidila malu a Nzambi. Kadi, bavua bayukidilangana pa bidi bitangila ntuadijilu wa muoyo. Misangu mivule, bavua mua kuakula pa malongesha makodiakane a didimenena. Kadi dilongesha nansha dimue dia ku malongesha abu kadivua dibatuadile disankishibua.
Panyima pa bamane kusomba baditole munkatshi mua bidimu bisambombo, bakakemeshibua bua kupeta dikumbula dia Bantemu ba Yehowa babidi. Bantemu aba bavua bapetele lumu lua muaba uvua Jean ne Nadine basombele mu misoko ya pabuipi nabu. Bu pa tshibidilu, diyuki diakafikisha ku diyukidilangana dia dilongesha dia didimenena. Ku disanka dia bena dibaka aba, Bantemu bavua ne kopi wa mukanda wa La vie: Comment est-elle apparue? Évolution ou création?, mupatula kudi Bantemu ba Yehowa. Jean ne Nadine bavua ne disanka bua kupeta mukanda uvua uleja dikonkonona diondoke dia mushindu udi muoyo mufike ku dikalaku.
Panyima pa tshitupa tshîpi, dilonga dia Bible diakatuadija. Mu lupolo lua bidimu bipite pa bisatu, Jean ne Nadine bakenza dilubuluka dikole. Bakalua batuishibue ne: mu katupa kîpi emu buloba buvua ne bua kulua mparadizu. Panyima pa dîku diabu dimane kupeta bana basatu, dienza luendu munkatshi mua mêba anayi bua kubuela mu bisangilu bia bena nkristo ku Nzubu wa Bukalenge diakalua lutatu lukole. Kadi, abi kabiakabakanda bua kubuelamu. Ndekelu wa bionso Jean ne Nadine bakaleja patoke tshimanyinu tshia diditshipa diabu kudi Yehowa ku batismo wa mu mâyi. Bakenza bualu ebu mu mpuilu kampanda muenzela mu musoko munene, muvua bantu 38!
Bua kuambuluisha kasumbu kakese ka bamanyishi ba Bukalenge, dîku edi diakangata dipangadika dia kumbuka mu nzubu wabu muditole. Bakaya mu musoko uvua ne bantu pabuipi ne tshinunu, muaba udi Jean usadila mpindieu bu musadidi wa mudimu mu tshisumbu tshia Bantemu ba Yehowa tshia muaba au. Dîku edi, diakanyemena kumpala ku bidiila bua kuepuka nshidimukilu, didi diangata dinyema edi bu disanka mushindu udidi dipete sanktiwere umuepele mulelela, bulongolodi bua teokrasi bua Yehowa.