Newikale muena lulamatu bu Eliya anyi?
“Nennutumine Eliya muprofete diambedi dituku dia Yehowa kadiyi dianji kulua, dituku adi dinene ne didi dikuatshisha bantu buowa.”—MALAKI 4:5.
1. Ndikenga kayi didi dimueneka bidimu bu 500 Izalele mumane kuikala mu Buloba Bulaya?
“BULOBA budi ne mabele ne buitshi bia bungi.” (Ekesode 3:7, 8) Atshi ke tshivua Yehowa Nzambi mupeshe bena Izalele kunyima kua dibapikula ku bupika bua bena Ejipitu mu siekele wa 16 K.B.B. Kadi monayi! Siekele itanu mmimane kupita, ne mpindieu bukalenge bua Izalele bua bisa dikumi budi mu tshiyole tshikole tshia nzala. Mbikole bua kupeta nansha bisosa bibishi. Nyama idi yenda ifua, ne mvula ki mmuloke kukadi bidimu bisatu ne tshitupa. (1 Bakelenge 18:5; Luka 4:25) Ntshinyi tshidi tshikebeshe tshiyole etshi?
2. Ntshinyi tshidi tshikebeshe dikenga dia Izalele mujima?
2 Butontolodi ke budi bukebeshe dikenga edi. Mu kunyanga Mikenji ya Nzambi, Mukalenge Ahaba mmusele Yezabele, muana wa mukalenge wa bena Kanana, ne mmumulekele ubueja ntendelelu wa Baala mu Izalele. Kadi bipite bubi, mmuibakile nzambi eu wa dishima ntempelo mu Samariya, tshimamuende wa bukalenge. Ee, mbafikishe bena Izalele ku ditaba ne: ntendelelu wa Baala neabatuadile bia pa madimi bivulavulayi! Kadi, anu bu mukadi Yehowa mudimuije, badi mpindieu mu njiwu ya ‘kujimijibua mu buloba buabu buimpe.’—Dutelonome 7:3, 4; 11:16, 17; 1 Bakelenge 16:30-33.
Diteta dia dikema dia Bunzambi
3. Mmunyi mudi muprofete Eliya ukoka ntema ku lutatu lulelela lua Izalele?
3 Padi nzala ituadija, Eliya muprofete wa lulamatu wa Nzambi udi wambila Mukalenge Ahaba ne: ‘Bu mudi Yehowa, Nzambi wa Izalele, ne muoyo, undi ngimana kumpala kuende, nansha mume nansha mvula kabiena bimueneka bidimu ebi anu ku dîyi dianyi.’ (1 Bakelenge 17:1) Mumane kumona dikumbana dikuate buôwa dia dimanyisha edi, mukalenge udi udiula Eliya ne: yeye ke udi mutumine bena Izalele tshipupu. Kadi Eliya udi ukudimuna ne: Ahaba ne ba mu nzubu muende ke ba kudiula bua butontolodi buabu, bua mudibu batendeledi ba Baala. Bua kujikija tshilumbu etshi, muprofete wa Yehowa udi ulomba Mukalenge Ahaba bua asangishe bena Izalele bonso ku Mukuna wa Karmele pamue ne baprofete 450 ba Baala ne baprofete 400 ba dikunji dia tshijila. Ahaba ne bena diende badi basangila kuine aku, pamu’apa batekemene se: muanda eu neujikije munanga. Kadi Eliya udi ukoka ntema ku tshilumbu tshinene tshidiku. Udi ukonka ne: ‘Nudi nuenda nuzobela pankatshi pa nseke ibidi mutantshi bule munyi? Bikala Yehowa Nzambi, numulonde; kadi bikala Baala Nzambi, numulonde.’ Bena Izalele kabena ne tshia kuamba.—1 Bakelenge 18:18-21.
4. Bua kujikija tshilumbu tshia Bunzambi, ndungenyi kayi ludi Eliya ufila?
4 Munkatshi mua bidimu bivule, bena Izalele mbatete bua kusambakaja ntendelelu wa Yehowa ne wa Baala. Bua kujikija tshilumbu tshia Bunzambi, Eliya udi ufila mpindieu lungenyi lua ditembangana. Udi ne bua kulongolola muana umue wa ngombe bua kulambula, ne baprofete ba Baala pabu badi ne bua kulongolola mukuabu. Pashishe Eliya udi wamba ne: ‘Buobu babikile dîna dia nzambi wabu, meme nembikile dîna dia Yehowa: ne Nzambi udi witaba ne kapia ikale Nzambi mulelela.’ (1 Bakelenge 18:23, 24) Ela meji: kapia kafumina mu diulu bu diandamuna ku disambila!
5. Mmunyi mudibu batandula ne: ntendelelu wa Baala ng’wa patupu?
5 Eliya udi ulomba baprofete ba Baala bua batuadije. Badi balongolola ngombe wa kulambula ne bamuteka pa tshioshelu. Pashishe badi banyunguluka ku tshioshelu, basambila ne: ‘O Baala, utumvuile!’ Muanda eu udi utungunuka katshia ‘ku dinda too ne ku munda munya.’ ‘Elayi dîyi dikole,’ ke mudi Eliya ubaseka. Baala udi ne bua kuikala ne bualu budi bumutonde, anyi ‘yeye udi ulala tulu ne budibu nabu mbua kumubisha!’ Baprofete ba Baala bumvua nanku, bupâle e kubakuata. Monayi! Badi baditapa ne tuele tuabu, ne mashi adi apatuka mu mputa yabu. Ne ndiyoyo kayipu padi baprofete bonso 450 bela mbila ne dîyi dikole menemene! Kadi kakuena diandamuna.—1 Bakelenge 18:26-29.
6. Ndilongolola kayi didi Eliya wenza bua diteta dia Bunzambi?
6 Mpindieu Eliya ke udi wenza. Udi wibakulula tshioshelu tshia Yehowa, umbula munkoloji mutshinyunguluke, ne ulongolola mulambu. Pashishe udi upongoluesha mâyi pa nkunyi ne pa mulambu. Badi bapongolola milondo minene dikumi ne ibidi ya mâyi pa tshioshelu too ne padibu buuja munkoloji muine tente. Elabi meji bua ngelakanyi idiku padi Eliya usambila ne: ‘Yehowa, Nzambi wa Abrahama ne wa Izaka ne wa Izalele, [“lelu’eu,” NW] bantu bamanye ne: Wewe udi Nzambi wa mu Izalele, ne meme muntu webe ngakenza malu aa onso anu ku dîyi diebe. Ungumvuile, Yehowa, ungumvuile bua bantu aba bamanye ne: Wewe, Yehowa, udi Nzambi [“mulelela,” NW], ne wewe wakakudimuija mitshima yabu kabidi.’—1 Bakelenge 18:30-37.
7, 8. (a) Mmunyi mudi Yehowa wandamuna ku disambila dia Eliya? (b) Ntshinyi tshidi malu adi menzeke ku Mukuna wa Karmele akumbaja?
7 Mu diandamuna ku disambila dia Eliya, ‘kapia ka Yehowa kadi kapona panshi, kuosha mulambu ne nkunyi ne mabue ne dimfuenkenya ne kakamisha mâyi adi mu mutubu.’ Bantu badi batua mpala yabu panshi, bamba ne: “Yehowa yeye udi Nzambi [“mulelela,” NW]; Yehowa yeye udi Nzambi [“mulelela,” NW]”! (1 Bakelenge 18:38, 39) Eliya udi wangata mpindieu dipangadika dinene. Udi utuma dîyi ne: ‘Kuatayi baprofete ba Baala! Nansha umue wabu kanyemi!’ Kunyima kua bamane kubashipela mu tshibandabanda tshia Kishona, diulu didi difiika ne matutu. Ndekelu wa bionso, mvula wa bungi udi uloka ujikija munanga!—1 Bakelenge 18:40-45; fuanyikija ne Dutelonome 13:1-5.
8 Ndituku kayipu dinene! Yehowa mmutshimunyi mu diteta edi dia pa buadi dia Bunzambi. Kupita apu, malu aa adi akudimuija tshiakabidi mitshima ya bena Izalele bavule kudi Nzambi. Mu mushindu eu ne mu mikuabu mivule, Eliya udi ujadika mudiye muprofete wa lulamatu, ne yeye muine udi ne mushinga kampanda wa tshiprofete.
“Eliya muprofete” utshidi ne bua kulua anyi?
9. Mmulayi kayi wakamanyishabu mu Malaki 4:5, 6?
9 Pashishe, ku butuangaji bua Malaki, Nzambi wakadianjila kuamba ne: ‘Monayi, nennutumine Eliya muprofete diambedi dituku dia Yehowa kadiyi dianji kulua, dituku adi dinene ne didi dikuatshisha bantu buôwa. Yeye neakudimune mitshima ya batatu bua ipingane kudi bana babu, neakudimune mitshima ya bana bua ipingane kudi batatu babu; bua meme tshilu kubutula buloba ku mulawu.’ (Malaki 4:5, 6) Eliya uvua ne muoyo bidimu bu 500 kumpala kua mêyi aa kaayi manji kuamba. Bu muvua bualu ebu buikale mulayi, bena Yuda ba mu siekele wa kumpala B.B. bavua mu dindila dia dilua dia Eliya bua kuukumbaja.—Matayo 17:10.
10. Nnganyi uvua Eliya mudianjila kuamba, ne mmunyi mutudi bajadike nanku?
10 Nenku, nnganyi uvua Eliya eu uvua ne bua kulua? Yezu Kristo wakasokolola bumuntu buende pakambaye ne: “Kubangila mu matuku a Yone Mubatiji too ne mpindieu bukalenge bua mu diulu ke tshipatshila tshidi bantu basumpakena, ne aba badi basumpakana badi babukuata. Bualu bonso, Baprofete ne Mikenji, bakafila milayi too ne pa Yone; ne binuasua kuitaba bualu ebu, Yeye ke ‘Eliya udi ne bua kulua.’” Eyowa, Yone Mubatiji uvua mupinganyi mudianjila kuamba wa Eliya. (Matayo 11:12-14, NW; Mâko 9:11-13) Muanjelu uvua muambile Zakâya, tatuende wa Yone, se: Yone uvua ne bua kuikala ne “spiritu ne bukole bia Eliya” ne uvua ne bua “kulongoluela Yehowa bantu bakaja.” (Luka 1:17, NW) Batismo uvua Yone ufila uvua tshimanyinu tshia patoke tshia dinyingalala dia muntu bua mpekatu yende mienzela Mikenji, ivua ne bua kufikisha bena Yuda kudi Kristo. (Luka 3:3-6; Galatia 3:24) Pa nanku mudimu wa Yone ‘wakalongoluela Yehowa bantu bakaja.’
11. Mu Pentekoste, ntshinyi tshiakamba Petelo bua “dituku dia Yehowa,” ne ntshikondo kayi tshiakamuenekadi?
11 Mudimu wa Yone Mubatiji bu “Eliya” wakaleja ne: “dituku dia Yehowa” divua pabuipi. Mupostolo Petelo wakaleja kabidi disemena dia dituku adi divua Nzambi ne bua kujukila bena lukuna bende ne kulama bantu bende. Wakaleja ne: malu a dikema akenzeka mu Pentekoste wa 33 B.B. avua dikumbana dia mulayi wa Yoele uvua utangila ditshikija dia spiritu wa Nzambi. Petelo wakaleja ne: ebi bivua ne bua kuenzeka kumpala kua “dituku dinene ne dia kukema dia Yehowa.” (Bienzedi 2:16-21, NW; Yoele 2:28-32) Bivua mu 70 B.B. muakakumbaja Yehowa Dîyi diende pa kusaka biluilu bia bena Roma bua kukumbajabi dilumbuluisha dia Nzambi pa ditunga edi divua dibenge Muanende.—Danyele 9:24-27; Yone 19:15.
12. (a) Ntshinyi tshiakamba Paulo ne Petelo bua “dituku dia Yehowa” didi dilua? (b) Bua tshinyi bualu kampanda buvua bushuwa ne bua kuenzeka bu mudibi bileja kudi mudimu wa Eliya?
12 Kadi kutshivua bukuabu bualu buvua ne bua kulua panyima pa 70 B.B. Mupostolo Paulo wakasuikakaja “dituku dia Yehowa” didi dilua ne dikalaku dia Yezu Kristo. Kabidi, mupostolo Petelo wakakula bua dituku adi mu diumvuangana ne ‘diulu dipiadipia ne buloba bupiabupia’ bitshivua ne bua kulua. (2 Tesalonike 2:1, 2; 2 Petelo 3:10-13) Vuluka se: Yone Mubatiji wakenza mudimu mufuane wa Eliya kumpala kua “dituku dia Yehowa” kuluadi mu 70 B.B. Bionso ebi biangata pamue biakaleja patoke ne: bualu bukuabu buvua ne bua kuenzeka bu muvuabi bileja kudi mudimu uvua Eliya muenze. Mbualu kayi abu?
Badi ne spiritu wa Eliya
13, 14. (a) Midimu ya Eliya ne ya bena nkristo bela manyi ba lelu mmifuanangane ku tshinyi? (b) Ntshinyi tshidi batontolodi ba mu Bukua-buena-nkristo benze?
13 Mudimu wa Eliya kauvua mufuanangane anu ne midimu ya Yone Mubatiji, kadi uvua kabidi mufuanangane ne midimu ya bena nkristo bela manyi mu tshikondo etshi tshikole tshiafikisha ku “dituku dia Yehowa” didi dilua. (2 Timote 3:1-5) Bikale ne spiritu ne bukole bia Eliya, mbabingishi bena bulamatshi ba ntendelelu mulelela. Ne ebi bivua ne mushinga! Kunyima kua lufu lua bapostolo ba Kristo, kuakapatuka butontolodi ku Buena-nkristo bulelela, anu bu muakalubuluka ntendelelu wa Baala mu Izalele mu matuku a Eliya. (2 Petelo 2:1) Bena nkristo ba ku dîna bakatuadija kusambakaja Buena-nkristo ne malongesha pamue ne bilele bia malu a Nzambi bia dishima. Tshilejilu, bakangata dilongesha dia bampangano didi kadiyi mu Mifundu dia se: muntu udi ne anyima ukena ufua. (Muambi 9:5, 10; Yehezekele 18:4) Batontolodi ba mu Bukua-buena-nkristo mbalekele kutumika ne dîna dia Yehowa, Nzambi umue mulelela. Pamutu pende, badi batendelela Busatu Bunsantu. Mbangate kabidi tshilele tshia bena Baala tshia kutua binu kumpala kua bimfuanyi bia Yezu ne bia mamuende Mariya. (Lomo 1:23; 1 Yone 5:21) Kadi ki mbionso nansha.
14 Kubangila mu siekele wa 19, balombodi ba ekleziya ya Bukua-buena-nkristo bakatuadija kuela mpata pa bitupa bivule bia Bible. Tshilejilu, bakabenga muyuki wa bufuki wa mu Genese ne kutuila dilongesha dia didimenena binu, badibikila ne: “ndia bena sianse.” Ebi bivua bibengangane diakamue ne malongesha a Yezu Kristo ne a bapostolo bende. (Matayo 19:4, 5; 1 Kolinto 15:47) Kadi, anu bu Yezu ne balondi bende ba kumpala, lelu’eu bena nkristo bela manyi a spiritu badi basanyika muyuki wa bufuki wa mu Bible.—Genese 1:27.
15, 16. Bishilangane ne Bukua-buena-nkristo, mbanganyi badi bapete mishiki ya pa tshibidilu ya biakudia bia mu nyuma, ne nku diambuluisha dia tshinyi?
15 Pakabuela bulongolodi ebu mu ‘tshikondo tshia ku nshikidilu,’ tshiyole tshia nzala ya mu nyuma tshiakakuata Bukua-buena-nkristo. (Danyele 12:4; Amosa 8:11, 12) Kadi kasumbu kakese ka bena nkristo bela manyi kakapeta mishiki ya pa tshibidilu ya biakudia bia mu nyuma bifila kudi Nzambi “mu tshikondo tshiakanyine,” anu bu muakatabalela Yehowa bua Eliya kudishibuaye mu tshiyole tshia nzala tshia mu matuku ende. (Matayo 24:45, NW; 1 Bakelenge 17:6, 13-16) Bamanyike kale bu Balongi ba Bible ba mu Bukua-matunga, basadidi aba bena lulamatu ba Nzambi bakapeta pashishe dîna dia mu Mifundu dia Bantemu ba Yehowa.—Yeshaya 43:10.
16 Eliya uvua ne nsombelu mumvuangane ne dîna diende, didi diumvuija ne: “Nzambi wanyi n’Yehowa.” Bu muditshi tshikale tshibejibeji tshianyisha tshia basadidi ba Yehowa ba pa buloba, Tshibumba tshia Nsentedi ntshitumike misangu mivule ne dîna dia Nzambi. Bushuwa, nimero watshi muibidi (Tshimungu 1879) wakaleja dieyemena dia se: tshibejibeji etshi tshivua ne Yehowa bu mutshikuatshishi. Tshibejibeji etshi ne mikanda mikuabu ya Société Watch Tower bidi bitandula malongesha akena a mu Mifundu a Bukua-buena-nkristo ne a tshitupa tshikuabu tshia Babilone Munene, nsangilu wa pa buloba bujima wa bitendelelu bia dishima, eku mine mikanda eyi mikale isanyika bulelela bua mu Bible, Dîyi dia Nzambi.—2 Timote 3:16, 17; Buakabuluibua 18:1-5.
Bena lulamatu mu mateta
17, 18. Ntshinyi tshiakenza Yezabele mu diandamuna pakashipabu baprofete ba Baala, kadi mmunyi muakambuluishabu Eliya?
17 Diandamuna dia bamfumu ba bitendelelu ku ditandudibua diabu divua dia muomumue ne dia Yezabele pakamanyaye ne: Eliya uvua mushipe baprofete ba Baala. Wakatuma mukenji kudi muprofete muena lulamatu wa Yehowa, utshipa bua kumushipa. Eu kauvua mukanu wa patupu, bualu Yezabele ukavua mumane kushipa baprofete ba bungi ba Nzambi. Bua buôwa, Eliya wakanyemena ku luseke lua Sud-Ouest ku Beer-sheba. Ushiya musadidi wende kuine aku, wakaya kabidi kule menemene, mu tshipela, usambila bua kufuaye. Kadi Yehowa kavua mulekele muprofete wende nansha. Muanjelu wakamuenekela Eliya bua kumulongolola bua luendu lule lua ku Mukuna wa Horebe. Nenku wakapeta dikuatshisha bua luendu elu lua matuku 40 lua kilometre mipite pa 300. Ku Horebe, Nzambi wakakula nende kunyima kua dimuenesha dikuate ne buôwa dia bukole mu mvunde munene, tshikumina ne kapia. Yehowa kavua mu mishindu ya dimuenesha eyi nansha. Divua dimuenesha dia spiritu wende munsantu, peshi bukole buenzeji. Pashishe Yehowa wakakula ne muprofete wende. Elabi meji muvua bualu ebu bukoleshe Eliya. (1 Bakelenge 19:1-12) Ntshinyi tshitudi mua kuenza, anu bu Eliya, bu tuetu mua kukuatshika buôwa mu mushindu kampanda padi bena lukuna ba ntendelelu mulelela batutshingisha? Bualu bumona kudiye budi ne bua kutuambuluisha bua kujingulula se: Yehowa kêna ulekela bantu bende.—1 Samuele 12:22.
18 Nzambi wakumvuija bimpe ne: Eliya utshivua ne mudimu wa kuenza bu muprofete. Kupita apu, nansha muakela Eliya meji ne: anu yeye nkayende ke uvua mutendeledi wa Nzambi mulelela mu Izalele, Yehowa wakamuleja ne: kuvua bantu 7 000 bavua kabayi batuile Baala binu. Nenku Nzambi wakatuma tshiakabidi Eliya mu mudimu wende. (1 Bakelenge 19:13-18) Anu bu Eliya, bena lukuna ba ntendelelu mulelela badi mua kutulondakaja. Badi mua kubanga kutukengesha bikole, bu muakadianjila Yezu kuamba. (Yone 15:17-20) Ku misangu, tudi mua kukuatshika buôwa. Kadi, tudi mua kuikala anu bu Eliya, eu wakapeta bijadiki bia kudi Nzambi ne pashishe kunanukilaye mu mudimu wa Yehowa.
19. Mbualu kayi buvua bena nkristo bela manyi bamone mu tshikondo tshia Mvita ya Kumpala ya Buloba bujima?
19 Bua dikengeshibua dikole munkatshi mua Mvita ya Kumpala ya Buloba bujima, bamue bena nkristo bela manyi bakakuatshika buôwa ne kulekelabu diyisha. Bakatupakana mu diela meji ne: mudimu wabu pa buloba ukavua mujike. Kadi Nzambi kakababenga. Kadi, ne luse luonso wakabakuatshisha, anu bu muakapeteshaye Eliya biakudia. Anu bu Eliya, bela manyi ba lulamatu bakanyisha dibalongolola dia kudi Nzambi ne kumbukabu mu nsombelu wa bukata. Mêsu abu akabululuka bua kumona disanka dinene dia mudimu dia kuyisha mukenji wa Bukalenge.
20. Lelu’eu, ndiakalenga kayi didibu bapeshe aba badi bena lulamatu bu Eliya?
20 Mu mulayi wa dikalaku diende, Yezu wakela kashonyi pa mudimu wa buloba bujima uvua ne bua kuenzeka kumpala kua nshikidilu wa ndongoluelu eu mubi wa malu. (Matayo 24:14) Lelu’eu, mudimu eu badi benda baukumbaja kudi bena nkristo bela manyi ne kudi miliyo ya balunda babu badi ne ditekemena dia kuikala ne muoyo pa buloba mu mparadizu. Dikumbaja mudimu wa diyisha Bukalenge too ne padiwu ujika ndiakalenga dipesha anu aba badi bena lulamatu bu Eliya.
Ikalayi bena lulamatu bu Eliya
21, 22. (a) Mmudimu kayi udi bena nkristo bela manyi balombola lelu’eu? (b) Mudimu wa diyisha udi wenda ukumbajibua ne diambuluisha kayi, ne bua tshinyi didi dikengedibua?
21 Ne lukunukunu bu lua Eliya, bashadile bakese ba ku bena nkristo balelela bela manyi mbakumbaje bujitu buabu bua kutabalela bipatshila bia pa buloba bia Mukalenge mujadika mu nkuasa, Yezu Kristo. (Matayo 24:47) Ne kukadi mpindieu bidimu bipite pa 60, Nzambi udi utumika ne bela manyi aba bua kulombola mudimu wa dienza bantu bayidi badiye mupeshe ditekemena dishême dia muoyo wa tshiendelele pa buloba mu mparadizu. (Matayo 28:19, 20) Mmunyipu mudi miliyo eyi ya bantu mua kuikala ne dianyisha bua mudi bashadile aba bakese ba ku bela manyi bikale batabalela majitu abu ne lukunukunu luonso ne lulamatu kabidi!
22 Mudimu eu wa diyisha Bukalenge badi baukumbaja kudi bantu bapange bupuangane ne anu bua bukole budi Yehowa upesha aba badi bamueyemena ne muoyo mujima. “Eliya uvua muntu bu tuetu,” ke muakamba muyidi Yakobo pakatelaye disambila dia muprofete eu bu tshilejilu, bua kuleja bukole bua disambila dia muntu muakane. (Yakobe 5:16-18, MMM) Eliya kavua misangu yonso umanyisha malu avua ne bua kulua anyi wenza anu bishima. Uvua ne nyanji ne matekete a bumuntu bu tuetu, kadi wakasadila Nzambi ne lulamatu luonso. Bu mutudi tuetu petu ne diambuluisha dia Nzambi ne bu mudiye utukolesha, tudi mua kuikala bena lulamatu bu Eliya.
23. Bua tshinyi tudi ne kabingila kimpe bua kuikala ne lulamatu ne mmuenenu muimpe wa malu?
23 Tudi ne kabingila kimpe bua kuikala ne lulamatu ne mmuenenu muimpe wa malu. Vuluka ne: Yone Mubatiji wakenza mudimu mufuane wa Eliya kumpala kua “dituku dia Yehowa” kubudikadi mu 70 B.B. Bikale ne spiritu ne bukole bia Eliya, bena nkristo bela manyi mbenze mu buloba bujima mudimu wa muomumue mufila kudi Nzambi. Ebi bidi bijadika patoke ne: “dituku [dinene] dia Yehowa” didi pabuipi.
Mmunyi muwandamuna?
◻ Mmunyi muakajadikabu Bunzambi bua Yehowa ku Mukuna wa Karmele?
◻ Nnganyi uvua ‘Eliya uvua ne bua kulua,’ ne ntshinyi tshiakenzaye?
◻ Mmunyi mudi bena nkristo bela manyi ba lelu baleje ne: badi ne spiritu wa Eliya?
◻ Bua tshinyi kudi mushindu wa tuetu kuikala bena lulamatu bu Eliya?
[Kazubu mu dibeji 15]
Mmu diulu kayi muakabanda Eliya?
‘PAKATSHIDIBU [Eliya ne Elisha] benda bayikila, monayi, dikalu dia kapia ne tubalu tua kapia biakamueneka, biakabapandulula, ne Eliya wakabandishibua mu diulu mu mvunde.’—2 Bakelenge 2:11.
Muaku “diulu” udi umvuija tshinyi muaba eu? Imue misangu muaku eu utu uleja muaba wa mu nyuma udi Nzambi musombele ne bana bende banjelu. (Matayo 6:9; 18:10) “Diulu” didi kabidi mua kufunkuna bukua-mabulunge. (Dutelonome 4:19) Ne Bible udi utumika ne muaku eu bua kuleja tshibuashibuashi tshietu etshi tshidi tshinyunguluke buloba, mudi nyunyu ibuuka ne mpepele ituta.—Musambu 78:26; Matayo 6:26.
Mmu diulu kayi dia ku adi apa muakabanda muprofete Eliya? Mbimueneke patoke se: bakamutentemuna mu tshibuashibuashi tshia buloba ne kumuteka mu tshitupa tshikuabu tshia dibulunge edi. Eliya utshivua pa buloba bidimu bivule pashishe, bualu wakafundila Mukalenge wa Yuda Yehorame mukanda. (2 Kulondolola 21:1, 12-15) Muanda wa se: Eliya kakabanda mu tshisombelu tshia mu nyuma tshia Yehowa Nzambi, bakaujadika pashishe kudi Yezu Kristo, wakamba ne: “Kakuena muntu muanji kubanda mu diulu, anu Muana wa muntu udi mufume mu diulu,” mmumue ne: Yezu muine. (Yowanese 3:13, MMM) Njila wa kupetela muoyo mu diulu uvua munzuluila diambedi bantu bapange bupuangane panyima pa lufu lua Yezu Kristo, dibiishibua ne dibanda diende mu diulu.—Yone 14:2, 3; Ebelu 9:24; 10:19, 20.