Bua tshinyi kuikala ne dianyisha?
DIMUPANDA dia muongo diakenzeja Harley bua kushintulula mudimu wende, kulekela mudimu wa biamu ne kushala muena mudimu wa mu biro. Pakamuebejabu muvuaye mumvue bua dishintuluka edi, Harley wakamba ne: “Ndi njinga kutumika ne biamu. Kadi, bua kuamba bualu pa bualu, ndi ne disanka divule mu mudimu wanyi wa mpindieu kupita dimvua nadi mu mudimu wanyi wa kumpala.”
Muikale ufila kabingila ka disanka diende, Harley udi ulonda ne: “Mmuenenu wa bantu bandi ngenza nabu mudimu. Bashilangane ne ba ku muaba wanyi wa mudimu wa kumpala, mfumuanyi wa mudimu wa mpindieu ne binanyi ba ku mudimu badi ne dianyisha bua bindi ngenza, ne kabena badikanda bua kungela ka-lumbandi. Muanda eu mmuleje dishilangana dinene.” Bu mudiye mudiumvue muikale ne mushinga ne bikale nende dijinga, mpindieu Harley mmuena mudimu udi ne disanka.
Mêyi a ka-lumbandi anyi a dianyisha, padiwu makanyine, adi bulelela asanguluja mutshima. Ku lukuabu luseke, bipeta bia dipanga dianyisha bidi mua kuikala bu diteta anu bu muakamba Shakespeare ne: “Pepa, pepa, wewe lupepele lua muvu wa hiver, kuena mutambe kulengela anu mutu dipanga dianyisha dia muntu.” Bia dibungama, mbaleje bantu bavule dipanga bulenga bu nunku.
Dikubayi ku dipanga dianyisha
Mu bulongolodi bua lelu, mêyi a dianyisha mamba ne muoyo umue adi enda ajimina. Tshilejilu, mufundi kampanda wakajula lukonko ne: “Biapeta mukaji musela dîba dia kufunda tubeji 200 tua dibikila bantu bua tshibilu tshia dibaka, bua tshinyi kêna mua kupeta dîba dia kufunda tulongo tukese tua diela tuasakidila bua mapa 163?” Misangu mivule bantu ba bungi kabatu nansha bamba tshiambilu tshipepele tshia: “tuasakidila.” Ku kakese ku kakese mmuenenu wa meme-diambedi udi wenda upingana pa muaba wa dianyisha. Nsombelu eu ntshimue tshia ku bimanyinu bidi bileja matuku a ku nshikidilu. Mupostolo Paulo wakadimuija ne: ‘Umanye bualu ebu ne: palua matuku a ku nshikidilu, malu makole nealue. Bantu nebikale badisui, kabayi ne kusakidila.’—2 Timote 3:1, 2.
Mu nsombelu mikuabu, dilabidila ndipingane pa muaba wa dianyisha. Mêyi a dianyisha atu afuma mu mutshima kakuyi lungenyi lua dipeta tshintu. Kadi dilabidila, pa tshibidilu kadiyi dia muoyo muimpe ne dinekesha, didi mua kujukila ku lungenyi lua dipeta muanzu anyi bintu kampanda. (Yuda 16) Mêyi a lubombo a nunku mmatangile ku dilua dimuma dia lutambishi ne didibandisha ne adi adinga udibu baambila. Nenku, nnganyi udi mua kusua bua kumulejabu dilabidila didi kadiyi dia muoyo muimpe? Kadi dianyisha dia bushuwa didi bulelela dikankamija.
Muntu udi uleja dianyisha udi upeta dikuatshisha mu dienza nanku. Musangelu udiye upeta bua dikala muena dianyisha didi difuma mu mutshima udi wambuluisha ku dipeta disanka ne ditalala diende. (Fuanyikija ne Nsumuinu 15:13, 15.) Ne bu mudidi ngikadilu mulenga, dianyisha didi dimukuba ku nyanji mibi bu mudi tshiji, mukawu, ne njiya.
“Ikalayi ne dianyisha”
Bible udi utubela bua kudima lungenyi lua dianyisha, anyi lua disakidila. Paulo wakafunda ne: “Mu malu onso ikalayi ne dianyisha. Nanku ke mudi [“Nzambi,” NW] musue bualu buenu [“mu buobumue ne,” NW] Kristo Yezu.” (1 Bena Tesalonyika 5:18, Mukenji Mulenga) Ne Paulo wakabela bena Kolosai ne: ‘[“Ditalala,” NW] dia Kristo dijame mu mioyo yenu. Ikalayi bena dianyisha!’ (Bena Kolose 3:15, MM) Misambu mivule idi ne mêyi a diela tuasakidila, aleja ne: dianyisha dileja ne muoyo mujima mbuimpe bua buena Nzambi. (Musambu 27:4; 75:1) Kakuyi mpata, Yehowa Nzambi udi usanka patudi tuleja dianyisha mu nsombelu wa dituku dionso.
Kadi mmalu kayi a mu bulongolodi ebu bupange dianyisha adi enza bua se: bitukolele bua kudima lungenyi lua dianyisha? Mmunyi mutudi mua kuleja mmuenenu wa dianyisha mu nsombelu wa matuku onso? Nkonko eyi netuyikonkonone mu tshiena-bualu tshidi tshilonda.