Masambila ebe ‘mmalongolola bu musenga wa kamonya’ anyi?
“Disambila dianyi dikale dilongolola bu musenga wa kamonya kumpala kuebe.”—MUSAMBU 141:2, NW.
1, 2. Diosha musenga wa kamonya divua tshimfuanyi tshia tshinyi?
YEHOWA NZAMBI wakatumina muprofete wende Mose dîyi bua ikale ne musenga wa kamonya wa tshijila mulongolola bua kuenza nawu mudimu mu tabernakle wa ntendelelu mu Izalele. Nzambi uvua ulomba bua kuwenzabu pa kusambakaja bintu binayi bia mupuya muimpe. (Ekesode 30:34-38) Bushuwa uvua ne dipembu dimpe.
2 Tshipungidi tshia Mikenji tshivua tshisamba tshia Izalele tshidie tshivua tshilongolole diosha dia musenga wa kamonya dituku dionso. (Ekesode 30:7, 8) Dienza mudimu ne musenga wa kamonya eu divua ne diumvuija dia pa buadi anyi? Eyowa, bualu mufundi wa misambu wakimba ne: “Disambila dianyi dikale dilongolola bu musenga wa kamonya kumpala kuebe [Yehowa Nzambi], ne diela bianza bianyi muulu dikale bu mulambu wa ntete wa dilolo.” (Musambu 141:2, NW) Mu mukanda wa Buakabuluibua, mupostolo Yone udi umvuija bantu badi banyunguluke nkuasa wa bumfumu wa Nzambi mu diulu bu badi ne bibakudi bia ngolo biûle ne musenga wa kamonya. Bible udi wamba ne: “Ne musenga wa kamonya udi umvuija masambila a bansantu.” (Buakabuluibua 5:8, NW) Nenku, diosha musenga wa kamonya wa dipembu dimpe divua tshimfuanyi tshia masambila manyisha adi basadidi ba Yehowa benza butuku ne munya.—1 Tesalonike 3:10; Ebelu 5:7.
3. Ntshinyi tshidi ne bua kutuambuluisha bua ‘kulongolola masambila etu bu musenga wa kamonya kumpala kua Nzambi’?
3 Bua Nzambi kuanyishaye masambila etu, tudi ne bua kumusambila mu dîna dia Yezu Kristo. (Yone 16:23, 24) Kadi mmunyi mutudi mua kulengeja masambila etu? Bushuwa, dikonkonona bimue bilejilu bia mu Mifundu didi ne bua kutuambuluisha bua kulongolola masambila etu bu musenga wa kamonya kumpala kua Yehowa.—Nsumuinu 15:8.
Enza masambila ne ditabuja
4. Mmunyi mudi ditabuja disuikakane ne masambila adi Nzambi wanyisha?
4 Bua masambila etu kubandawu kudi Nzambi bu musenga wa kamonya wa dipembu dimpe, tudi ne bua kusambila ne ditabuja. (Ebelu 11:6) Padi bakulu bena Kristo basangana muntu usama mu nyuma ne witaba diambuluisha diabu dia mu Mifundu, “disambila [diabu dienza] ne ditaba nedipandishe mubedi.” (Yakobe 5:15, Mukanda wa Mvidi Mukulu) Masambila menza ne ditabuja adi asankisha Tatu wetu wa mu diulu, nansha kabidi dilonga Dîyi dia Nzambi ne muoyo mujima. Mufundi wa misambu wakaleja mmuenenu mulenga pakimbaye ne: “Nengolole bianza bianyi kabidi ku mikenji yebe, indi nnanga. Nengelangane meji a mikenji yebe mifunda. Unyishe dijingulula dimpe dia malu ne meji, bualu bua nakueyemena mikenji yebe.” (Musambu 119:48, 66) ‘Tuelayi bianza muulu’ mu masambila menza ne budipuekeshi ne tulejayi ditabuja mu ditumikila mêyi a Nzambi.
5. Ntshinyi tshitudi ne bua kuenza bituikala katuyi ne meji?
5 Tufuanyikijabi ne: tudi bapangile meji adi akengedibua bua kutshimuna diteta kampanda. Pamu’apa katuena bajadike ne: mulayi kansanga musunguluke wa mu Bible udi wenda ukumbana mpindieu. Pamutu pa kulekela bualu ebu bututenkakaja mu nyuma, tulombayi meji mu disambila. (Galatia 5:7, 8; Yakobo 1:5-8) Bushuwa, katuena mua kutekemena bua Nzambi kutuandamunaye mu tshishima nansha. Tudi ne bua kuleja ne: masambila etu nga muoyo umue mu dienza malu adiye ulomba bua bantu bende bonso benze. Mbia mushinga bua tuetu kudifila mu dilonga dia Mifundu didi dikolesha ditabuja ku diambuluisha dia mikanda mifila ku butuangaji bua “mupika wa lulamatu ne wa budimu.” (Matayo 24:45-47, NW; Yoshua 1:7, 8) Tudi kabidi ne bua kuvudija dimanya mu dibuela pa tshibidilu mu bisangilu bia bantu ba Nzambi.—Ebelu 10:24, 25.
6. (a) Ntshinyi tshitudi ne bua kujingulula buonso buetu bua tshikondo tshietu etshi ne bua dikumbana dia milayi ya mu Bible? (b) Kusakidila ku disambila dietu bua dîna dia Yehowa ditumbe, ntshinyi tshitudi ne bua kuenza?
6 Lelu’eu, bamue bena Kristo badi benza malu ne midimu idi ileja ne: mbapue muoyo bua se: mpindieu tukadi basemene bikole ku ‘tshikondo tshia ku nshikidilu.’ (Danyele 12:4) Mu mushindu muakanyine, bena kuitabuja netu badi mua kusambila bua bantu ba nunku batemeshilule anyi bakoleshe ditabuja diabu mu tshijadiki tshia mu Mifundu tshia se: dikalaku dia Kristo diakatuadija mu 1914 pakamujadika Yehowa bu Mukalenge wa mu diulu ne se: udi ukokesha munkatshi mua baluishi bende. (Musambu 110:1, 2; Matayo 24:3) Tuetu bonso tudi ne bua kujingulula ne: malu madianjila kuamba bu mudi kabutu ka bitendelelu bia dishima—‘Babulona Munene’—diluisha bantu ba Yehowa kudi Satana, Gog wa ku Magog, ne dibapikula kudi Nzambi Wa-Bukole-Buonso ku mvita ya Armagedone, adi mua kuenzeka mu tshimpitshimpi tshia dikema, ne onso adi mua kuenzeka mu lupolo lua tshikondo luipi menemene. (Buakabuluibua 16:14, 16; 18:1-5; Yehezekele 38:18-23) Nenku tulombayi diambuluisha kudi Nzambi mu disambila bua kushala batabale mu nyuma. Tuetu bonso tusambile ne muoyo mujima bua dîna dia Yehowa ditumbe, bua Bukalenge buende bulue, ne bua disua diende dienzeke pa buloba bu mudidi dienzeka mu diulu. Nenku tutungunukayi ne kuleja ditabuja ne kufila tshijadiki tshia se: masambila etu mmenza ne muoyo umue. (Matayo 6:9, 10) Bushuwa, bonso badi banange Yehowa bakebe kumpala Bukalenge ne buakane buende ne batambe kudifila bikole mu diyisha lumu luimpe kumpala kua nshikidilu kuluaye.—Matayo 6:33; 24:14.
Utumbishe ne usakidile Yehowa
7. Ntshinyi tshidi tshikukemesha bua disambila dia Davidi difunda mu 1 Kulondolola 29:10-13?
7 Mushindu wa mushinga wa tuetu ‘kulongolola masambila etu bu musenga wa kamonya’ ng’wa kutumbisha Nzambi ne kumuleja dianyisha dia mu mutshima. Mukalenge Davidi wakenza disambila dia nunku pavuaye yeye ne tshisamba tshia Izalele bambuluishe bua kuibaka ntempelo wa Yehowa. Davidi wakasambila ne: ‘Yehowa, Nzambi wa Izalele tatu wetu, wikale ne disanka tshiendelele. Yehowa, bunene ne bukole ne butumbi ne kutamba ne bulengele butambe mbiebe; bualu bua bintu bionso bia mu diulu ne bia pa buloba mbiebe; Yehowa, bukalenge mbuebe, ne wewe udi ubandishibua ku mutu kua bionso. Bubanji ne butumbi bidi bifuma kuudi, wewe udi ukokesha bionso; bukole ne bunene bidi mu tshianza tshiebe; tshianza tshiebe tshidi tshivuija bantu banene ne bakole. Nunku, Nzambi wetu, tudi tukusakidila, tudi tutumbisha dîna diebe dia butumbi.’—1 Kulondolola 29:10-13.
8. (a) Mmêyi kayi a ditumbisha nawu Nzambi adi mu Misambu 148 too ne 150 adi nangananga alenga mutshima webe? (b) Bituikala ne mmuenenu muleja mu Musambu 27:4, mbualu kayi butuenza?
8 Mmêyi kayipu malenga a ditumbisha ne diela nawu Nzambi tuasakidila! Masambila etu adi mua kuikala kaayi menza mu ngakuilu wa mpatshi, kadi adi mua kuikala menza ne muoyo mujima. Mukanda wa Misambu mmûle ne masambila a disakidila ne ditumbisha nawu Nzambi. Mêyi malengele a ditumbisha nawu Nzambi adi mu Misambu 148 too ne 150. Dianyisha kudi Nzambi ndileja mu misambu ya bungi. Davidi wakimba ne: ‘Ngakalomba Yehowa bualu bumuepele, mbuobu bundi nkebakeba: bua meme kushikama mu nzubu wa Yehowa matuku onso a muoyo wanyi, bua kumona buimpe bua Yehowa ne bua kuelangana meji a malu a mu ntempelo wende.’ (Musambu 27:4) Tuenzayi malu mumvuangane ne masambila a mushindu’eu pa kudifila ne lukunukunu mu midimu yonso ya bantu ba Yehowa basangile pamue. (Musambu 26:12) Dienza nenku ne dielangana meji pa Dîyi dia Nzambi dituku dionso nebitupeshe tubingila tuvule bua kusemena kudi Yehowa bua kumutumbisha ne muoyo mujima ne kumuleja dianyisha.
Ne budipuekeshi, keba diambuluisha dia Yehowa
9. Mmunyi muakasambila Mukalenge Asa, ne kuakapatuka tshipeta kayi?
9 Bituikala tuenzela Yehowa mudimu ne muoyo mujima bu Bantemu bende, tudi mua kuikala bashindike ne: udi uteleja patudi tusambila bua kumulomba diambuluisha. (Yeshaya 43:10-12) Angata tshilejilu tshia Mukalenge Asa wa mu Yuda. Bidimu 10 bia kumpala bia bukokeshi buende bua bidimu 41 (977-937 K.B.B.) bivua bia ditalala. Pashishe tshiluilu tshia bantu muliyo mujima tshilombola kudi Zela muena Etiopia tshiakalua kuluisha Yuda. Nansha muvua baluishi batambe kubapita ku bungi, Asa ne bantu bende bakapatuka bua kuluangana nabu. Kadi kumpala kua kuluangana, Asa wakenza disambila dia tshisumi. Wakitaba ne: Yehowa uvua ne bukole bua kubapikula. Pavuaye ulomba diambuluisha, mukalenge Asa wakamba ne: ‘Tuetu tudi tukueyemena, tuakuluila mu dîna diebe bua kuluangana ne tshisumbu etshi tshinene. Yehowa, wewe udi Nzambi wetu; kuitabuji bua bantu bakupite bukole.’ Yehowa wakapandisha Yuda bua dîna diende dinene ne nunku bakatshimuna baluishi babu bonso. (2 Kulondolola 14:1-15) Nansha Nzambi yeye mutupikule mu diteta anyi mutukoleshe bua kuditantamena, tudi bajadike bua se: udi uteleja milombu yetu bua kupeta dikuatshisha kudiye.
10. Patudi katuyi bamanye mua kutshimuna lutatu kampanda, mmunyi mudi disambila dia Mukalenge Yehoshafata dikale diambuluisha?
10 Tuetu katuyi bamanye mua kujikija lutatu kampanda, tudi mua kuikala bashindike bua se: Yehowa neateleje milombu yetu bua kupeta diambuluisha diende. Muanda eu wakamueneka mu tshikondo tshia Yehoshafata Mukalenge wa Yuda, muena bukokeshi bua bidimu 25 buakatuadija mu 936 K.B.B. Pavuabu bamba kuluisha Yuda kudi biluilu bidisange bia bena Moaba, bena Amona ne bia bena ku mukuna wa Seî, Yehoshafata wakalomba ne: ‘Nzambi wetu, kuena ubalumbuluisha anyi? Bualu bua tuetu katuena ne bukole bua kuluangana ne tshisumbu etshi tshinene tshilualua kutuluisha; katuena bamanye mua kuenza; kadi mêsu etu adi kuudi.’ Yehowa wakandamuna disambila adi dienza ne budipuekeshi, kuluangenaye Yuda pa kukondakaja baluishi aba mu mushindu wa se: bakashipangana buobu nkayabu. Tshipeta tshivua se: bisamba bivua kumpenga biakumvua buôwa, ne ditalala diakabuela mu Yuda. (2 Kulondolola 20:1-30) Patudi katuyi ne meji adi akengedibua bua kujikija lutatu kampanda, anu bu Yehoshafata tudi mua kusambila ne: ‘Katuena bamanye mua kuenza; kadi mêsu etu adi kuudi, Yehowa.’ Spiritu munsantu udi mua kutusaka bua kuvuluka malu a mu Mifundu adi akengedibua bua kujikija lutatu, anyi Nzambi udi mua kutuambuluisha mu mushindu udi mupite meji a bantu.—Lomo 8:26, 27.
11. Ntshinyi tshitudi mua kulonga bua masambila ku diambuluisha dia malu akenza Nehemiya bua lumbu lua Yelushalema?
11 Pamu’apa bidi bitukengela kunanukila mu dilomba diambuluisha kudi Nzambi. Nehemiya wakabungama, kudila, kujila biakudia, ne wakasambila matuku a bungi bua lumbu lua Yelushalema lupula ne bua dikenga dikole dia bantu bavua basombe mu Yuda. (Nehemiya 1:1-11) Kakuyi mpata masambila ende akabanda kudi Nzambi bu musenga wa kamonya wa mupuya muimpe. Dimue edi, bu muvua Nehemiya mubungame, Mukalenge Atashasete wakamuebeja ne: “Udi ulomba tshinyi?” Nehemiya udi ulonda ne: “Nunku nakatendelela Nzambi wa mu diulu.” Disambila adi dîpi ne dia mundamunda diakapeta diandamuna, bualu bakapesha Nehemiya dianyisha dia kukumbaja dijinga dia mu mutshima wende pa kuya ku Yelushalema bua kuibakulula lumbu lua musoko eu luvuabu bupule.—Nehemiya 2:1-8.
Lekela Yezu akulongeshe mua kusambila
12. Mu mêyi ebe nkayebe, mmunyi muudi mua kuamba mu tshikoso malu manene a mu disambila dia Yezu dia tshilejilu?
12 Ku masambila onso mafunda mu Mifundu, didi nangananga dilongesha ndisambila dia tshilejilu dienza kudi Yezu Kristo bu musenga wa kamonya wa mupuya muimpe. Evanjeliyo wa Luka udi wamba ne: ‘Umue wa ku balongi [ba Yezu] e kumulomba ne: Mfumu, tulongeshe mua kusambila mudi Yowanese mulongeshe bende balongi. E kubambilaye ne: Panudi nusambila nuambe ne: Tatu, dina diebe ditumbe; bumfumu buebe bufike; dituku dionso utupe tshiakudia tshietu tshia ku dituku ku dituku; utulekele mibi yetu, bualu tuetu bine tudi tulekela yonso utudi nende dibanza; kutufidi mu ditetshibua.’ (Lukas 11:1-4, Mukenji Mulenga; Matayo 6:9-13) Tukonkononayi disambila edi, kabiyi bua tuetu kuikala tudiambulula, kadi bua dikale dituludika.
13. Mmunyi muudi mua kufila diumvuija dia mêyi aa: “Tatu, dîna diebe ditumbe”?
13 “Tatu, dina diebe ditumbe.” Kuyukila ne Yehowa bu Tatu ndiakalenga dia pa buadi bua basadidi bende badilambule. Bu bana badi ne lukasa luonso bakuatshila tatuabu muena luse bualu buonso budi bubatonde, tudi ne bua kudilamina dîba dia kusambila Nzambi pa tshibidilu ne bunême ne kanemu. (Musambu 103:13, 14) Masambila etu adi ne bua kuleja mutudi tuditatshisha bua dîna dia Yehowa ditumbe, bualu tudi tujinga kudimona diumbusha bipendu bionso bidibu badiele. Bushuwa, tudi basue bua dîna dia Yehowa disunguluke ne badiangate bu dinsantu anyi dia tshijila.—Musambu 5:11; 63:3, 4; 148:12, 13; Yehezekele 38:23.
14. Kusambila ne: “Bumfumu buebe bufike” kudi kumvuija tshinyi?
14 “Bumfumu buebe bufike.” Bumfumu mbukokeshi bua Yehowa bulombola ku butuangaji bua mbulamatadi wa mu diulu udi mu bianza bia Muanende Yezu ne banyanende ‘bantu bansantu.’ (Danyele 7:13, 14, 18, 27; Buakabuluibua 20:6) Mu katupa kîpi emu ‘nebulue’ bua kumbusha pa buloba baluishi bonso ba bumfumu bukulu bua Nzambi ne kubabutula. (Danyele 2:44) Dîba adi disua dia Nzambi nedienzeke pa buloba, anu bu mudidi dienzeka mu diulu. (Matayo 6:10) Ndisanka kayipu dikala bualu ebu mua kutuadila bifukibua bionso bidi bienzela Mfumu Mukulu pa bionso mudimu ne bulamatshi!
15. Kulomba Yehowa “tshiakudia tshietu tshia ku dituku ku dituku” kudi kuleja tshinyi?
15 “Dituku dionso utupe tshiakudia tshietu tshia ku dituku ku dituku.” Kulomba biakudia bia “ku dituku ku dituku” kudi Yehowa kudi kuleja ne: katuena tulomba bintu bia bungi menemene to, kadi anu bitudi nabi bualu ku dituku dionso. Nansha mutudi tueyemena Nzambi bua kutupeshaye bitudi nabi bualu, tudi kabidi tuenza mudimu ne tutumika ne mishindu yonso miakanyine itudi nayi bua kumona mua kupeta biakudia ne bintu bikuabu bidi bikengedibua. (2 Tesalonike 3:7-10) Bushuwa, tudi ne bua kusakidila Mutupeshi wa bintu bua dinanga diende, meji ne bukole bidi bimuenekela mu bintu ebi bidiye utupesha.—Bienzedi 14:15-17.
16. Mmunyi mutudi mua kupeta dibuikidila dia Nzambi?
16 ‘Utulekele mibi yetu, bualu tuetu bine tudi tulekela yonso utudi nende dibanza.’ Bu mutudi bapange bupuangane ne bena mpekatu, katuena mua kukumbaja tshishiki mêyi-makulu mapuangane a Yehowa nansha. Bua nanku tudi ne bua kusambila bua kulomba dibuikidila diende ku diambuluisha dia mulambu wa tshia-bupikudi wa Yezu. Kadi bituasua bua “Muteleji wa disambila” kukuataye mudimu ne mushinga wa mulambu au bua mpekatu yetu, tudi ne bua kunyingalala ne kudiakaja bua kuitaba dinyoka dionso didiye utupesha. (Musambu 65:2, NW; Lomo 5:8; 6:23; Ebelu 12:4-11) Kabidi, tudi mua kutekemena bua Nzambi kutubuikidila anu bituikale ‘tulekela bonso batudi nabu dibanza,’ aba badi batuenzela bibi.—Matayo 6:12, 14, 15.
17. Mêyi a se: “Kutufidi mu ditetshibua” adi umvuija tshinyi?
17 “Kutufidi mu ditetshibua.” Imue misangu Bible udi wamba ne: Yehowa udi wenza malu padiye muikale ualekela patupu. (Luta 1:20, 21) Nzambi kêna ututeta bua kuenza mpekatu nansha. (Yakobo 1:13) Matetshibua bua kuenza malu mabi adi afumina kudi Diabolo, ku mubidi wetu wa mpekatu ne kudi bulongolodi ebu. Satana ke Muteyi udi ututeta bua kutufikisha ku dienzela Nzambi mpekatu. (Matayo 4:3; 1 Tesalonike 3:5) Patudi tulomba bualu bu ebu: “Kutufidi mu ditetshibua,” tudi tulomba Nzambi bua katulekedi tupona padibu batusaka bua kubenga kumutumikila. Udi mua kutulombola bua katuteketshi ne bua Satana, “muena bubi,” katutshimunyi nansha.—Note kuinshi bua Matewuse 6:13, MMM; 1 Kolinto 10:13.
Enza malu mumvuangane ne masambila ebe
18. Mmunyi mutudi mua kuenza malu mumvuangane ne masambila etu bua kupeta dibaka ne nsombelu wa disanka mu dîku?
18 Disambila dia tshilejilu dia Yezu diakalenga malu manene, kadi tudi mua kusambila bua malu onso. Tshilejilu, tudi mua kusambila bua dijinga dietu dia kuenza dibaka dimpe. Bua kulama bunonoke too ne patuabuela mu dibaka, tudi mua kulomba didikanda. Kadi pashishe tuenze malu mumvuangane ne masambila etu pa kuepuka mikanda ne dijikija lutetuku bidi kabiyi bimpe. Tuikalayi kabidi bapangadije bua ‘kusela anu mu Mukalenge.’ (1 Kolinto 7:39; Dutelonome 7:3, 4) Tuetu bamane kubuela mu dibaka, nebitukengele bua kuenza malu mumvuangane ne masambila etu bua kupeta disanka mu ditumikila mibelu ya Nzambi. Ne bituikala ne bana, kusambila patupu bua bana balue basadidi ba lulamatu ba Yehowa ki nkukumbane to. Tudi ne bua kuenza muetu muonso bua kubueja malelela a Nzambi mu ngenyi yabu ku diambuluisha dia dilonga dia Bible ne pa kubuela nabu pa tshibidilu mu bisangilu bia bena Kristo.—Dutelonome 6:5-9; 31:12; Nsumuinu 22:6.
19. Ntshinyi tshitudi ne bua kuenza bituikala tusambila bua mudimu wetu wa buambi?
19 Tutu tusambila bua kupeta mabenesha mu mudimu wetu wa buambi anyi? Nanku tuenzayi malu mumvuangane ne masambila aa pa kuenza mudimu wa bungi wa diyisha Bukalenge. Bituasambila bua kupeta mishindu ya kuambuluisha bakuabu bua babuele mu njila udi ufikisha ku muoyo wa kashidi, tudi ne bua kulama note mimpe bua bantu badi basankidile bulelela ne kuikala badiakaje bua kulombola malonga a Bible. Netuambe tshinyi bituikala tujinga kuangata mudimu wa ku dîba ne ku dîba bu bampanda-njila? Nanku tuelayi bidia biumvuangane ne masambila etu mu divudija mudimu wetu wa buambi ne mu dipatuka pamue ne bampanda-njila. Diela bidia ebi nedileje ne: tudi tuenza malu mumvuangane ne masambila etu.
20. Mbualu kayi buakonkonona tshiena-bualu tshidi tshilonda?
20 Bituikala tuenzela Yehowa mudimu ne lulamatu, tudi mua kuikala ne dishindika dia se: neandamune masambila etu adi umvuangana ne disua diende. (1 Yone 5:14, 15) Bushuwa, tudi balonge malu a mushinga mu dikonkonona amue a ku masambila mafunda mu Bible. Tshiena-bualu tshietu tshidi tshilonda netshikonkonone mikuabu ngenyi-miludiki ya mu Mifundu bua aba badi bajinga ‘kulongolola masambila abu bu musenga wa kamonya kumpala kua Yehowa.’
Newandamune munyi?
◻ Bua tshinyi tudi ne bua kuenza masambila ne ditabuja?
◻ Ditumbisha ne disakidila bidi ne bua kuikala ne muaba kayi mu masambila etu?
◻ Bua tshinyi ne dishindika dionso tudi mua kukeba diambuluisha dia Yehowa mu masambila?
◻ Ng’amue malu manene kayi adi mu disambila dia tshilejilu?
◻ Mmunyi mutudi mua kuenza malu mumvuangane ne masambila etu?
[Tshimfuanyi mu dibeji 12]
Bu Mukalenge Yehoshafata, ku misangu bidi mua kutulomba bua kusambila ne: ‘Katuena bamanye mua kuenza, kadi mêsu etu adi kuudi, Yehowa’
[Tshimfuanyi mu dibeji 13]
Utu usambila biumvuangane ne disambila dia Yezu dia tshilejilu anyi?