Bakandika kudi ba-Koministe bidimu bipite pa 40

BU MUDIBI BILONDA KUDI MIKHAIL VASILEVICH SAVITSKII

Tshibumba tshia Nsentedi tshia dia 1 Tshisanga 1956 (Angl.) tshiakamanyisha ne: “dikezula dinene” dia Bantemu ba Yehowa divua dienza mu dia 1, dia 7 ne dia 8 Tshisanga 1951. Tshibumba tshia Nsentedi etshi tshiakumvuija kabidi ne: “Aa mmatuku adi Bantemu ba Yehowa ba mu ditunga dia Russie kabayi mua kupua muoyo. Mu matuku asatu aa Bantemu ba Yehowa bonso bakasanganabu ku Ouest kua ditunga dia Ukraine, Russie Blanche [Bélarus], Bessarabie, Moldavie, Lettonie, Lituanie ne mu Estonie​—balume ne bakaji bapite pa binunu muanda-mutekete . . . bakabela mu mashinyi, batangile nabu ku ngala ya mazuwa, ne kuine aku kubelabu mu makadika atubu bambuila nyama ne kubatumabu mutantshi mule.”

MU DIA 8 Tshisanga 1951, mukajanyi, muananyi wa balume wa ngondo muanda-mukulu, baledi banyi, muakunyanyi wa balume, ne Bantemu bakuabu ba bungi bavua babumbushe mu nzubu yabu ne mu tshimenga tshia Ternopol, mu Ukraine. Panyima pa bamane kubela mu makadika, bakenza luendu lua mbingu mitue ku ibidi. Ndekelu wa bionso, bakabatulula mu ditu dia muaba mubikila ne: Sibérie (tshitupa tshia mashika makole) ku Ouest kua Dijiba dia Baïkal.

Bua tshinyi tshivua mu dikezula edi? Kumpala kua meme kunulondela muaba umvua tshikondo atshi ne tshiakatufikila tuetu bonso pashishe, lekelayi nnulondele mundi mufike ku dikala Ntemu wa Yehowa.

Bulelela bua mu Bible budi bufika kutudi

Mu Kabitende 1947, pamvua ne bidimu 15 patupu, Bantemu ba Yehowa babidi bakalua ku nzubu kuetu mu musoko mukese wa Slaviansk, mutantshi wa kilometre 50 ne Ternopol. Patuvua basombe, meme ne mamu, tuteleja nsongakaji eyi​—umue wa kudibu diende uvua Maria—​ngakamona ne: etshi tshivua tshitendelelu tshia pa buatshi. Bakumvuija malongesha abu ne bakandamuna nkonko ituvua bele pa Bible mu mushindu mutoke.

Mvua ngitaba ne: Bible n’Dîyi dia Nzambi, kadi ekleziya wetu uvua mungele mâyi ku makasa. Tatuende wa Mamu uvua ne tshibidilu tshia kuamba ne: “Bansaserdose badi bakuatshisha bantu buôwa ne dilongesha dia makenga a mu inferno wa kapia, kadi buobu kabatu batshina bualu nansha bumue to. Batu amu biiba ne bashima bapele.” Ndi mvuluka malu a tshikisu ne diosha nzubu ya bena mu Pologne bavua basombele mu musoko wetu ku ntuadijilu kua Mvita Mibidi ya Buloba bujima. Bualu buvua butonda mbua se: diluishangana edi divua dilongolola kudi nsaserdose wa Katolike ka bena Grèce. Panyima ngakamona bantu ba bungi bashipa, ne mvua ne disumpakana bua kumanya bua tshinyi kuvua tshikisu tshia mushindu’eu.

Pamvua ndonga Bible ne Bantemu, ngakatuadija kumvua. Ngakalonga malelela a nshindamenu a mu Bible; meme kulonga ne: inferno wa kapia katuku to, ne se: Satana Diabolo udi wenza mudimu ne bitendelelu bia dishima bua kukankamija mvita ne diela mashi panshi. Ku musangu ne ku musangu, mvua ngimana katantshi pamvua ndilongela ne nsambila ne muoyo mujima bua kusakidila Yehowa bua malu amvua ndonga. Ngakatuadija kumanyisha muakunyanyi wa balume Stakh malelela aa a mu Bible, ne mvua ne disanka dia bungi pakaitabaye.

Ditumikila malu angakalonga

Ngakajingulula mushinga wa kuenza mashintuluka ne kulekela diakamue dinua makanya. Ngakajingulula kabidi mushinga wa kudisangisha pa tshibidilu ne bakuabu bua dilonga dia Bible divuabu balongolole. Bua kudisangisha mushindu’eu mvua ngendela mu ditu mutantshi wa kilometre mitue ku 10 bua kufika muaba musokome uvuabu benzela bisangilu. Ku misangu bantu bakaji bakese patupu ke bavua ne mushindu wa kulua mu bisangilu, ne nansha mumvua tshiyi muanji kutambula, bavua bangambila bua kubilombola.

Kuikala ne mikanda idi yumvuija Bible kuvua ne njiwu, ne pavuabu bakukuate nayi bivua mua kufikisha ku tshibawu tshia buloko tshia bidimu bitue ku 25. Nansha nanku, mvua njinga kuikala ne yanyi mikanda. Muena mutumba netu kampanda uvua mulonge ne Bantemu ba Yehowa, kadi bua buôwa, wakalekela ne kujiikaye mikanda mu budimi buende. Mmunyipu mungakasakidila Yehowa pavua muntu eu mupatule mikanda yende yonso ne bibejibeji mu buloba ne muitabe bua meme kubiangata! Ngakayisokoka mu tuzubu tuvua Tatu muenzele mbulubulu, muaba uvua bakuabu bantu kabayi mua kufika ku dikala.

Mu Kashipu 1949, ngakalambula muoyo wanyi kudi Yehowa ne ngakatambula bu tshimanyinu tshia didilambula dianyi. Divua dituku dia disanka ditambe bunene mu nsombelu wanyi. Ntemu wakantambuisha mu musokoko wakela kashonyi pa muanda wa se: ki mbipepele bua kuikala muena Kristo mulelela to, ne se: mateta a bungi mmatuindile. Katupa kakese ngakitaba ne: mêyi ende avua malelela! Nansha nanku, nsombelu wanyi bu Ntemu mutambule wakatuadija ne disanka. Ngondo ibidi kunyima kua batismo wanyi, ngakasela Maria, umue wa ku Bantemu babidi bavua batulongeshe bulelela, meme ne Mamu.

Diteta dianyi dia kumpala divua dia tshimpitshimpi

Mu dia 16 Tshisanga 1950, mu diya kumbelu mfumina mu tshimenga tshikese tshia Podgaitsi, ngakasambakena mu tshimpitshimpi ne basalayi ne kunsanganabu ne imue mikanda idi yumvuija Bible imvua nya nayi mu dilonga dietu dia mu kasumbu. Bakankuata. Mu matuku makese a kumpala a dikuatshibua, bavua bantuta ne lukodi, ne bavua babenga bua meme kudia anyi kulala. Bangambila kabidi bua kuikala kuzonzama, kuimana, kuzonzama, kuimana misangu lukama milondangane, ne bianza biteka mu mutu. Tshivua ne bukole bua kubikumbaja nansha. Panyima pa dinyoka edi bakangela mu nzubu wa mashika wa muinshi mua buloba muikale ne tshitalela, munkatshi mua mêba 24.

Bavua bankengesha ne tshipatshila tshia kuntekesha bua bafike ku dimanya amue malu kundi bipepele. Bakangebeja ne: “Uvua mupete mikanda eyi penyi, ne uvua uyituadila nganyi?” Ngakabenga bua kubasokoluela bualu nansha bumue. Pashishe bakambadila tshitupa tshia mukenji uvuabu ne bua kundumbuluisha nawu. Uvua wamba ne: dimuangalaja ne dilama mikanda idi ibengangana ne bukokeshi bua ditunga dia U.R.S.S. bavua babishipela muntu anyi bamukosela bidimu 25 bia buloko.

Bakankonka ne: “Ndinyoka kayi diudi musue?”

Ngakandamuna ne: “Nansha dimue, kadi dieyemena dianyi didi kudi Yehowa, ne ku diambuluisha diende nengitabe bualu buonso budiye witaba bua buenzeke.”

Bualu buakankemesha, bakandekela panyima pa matuku muanda-mutekete. Bualu abu buakangambuluisha bua meme kujingulula bulelela bua dilaya dia Yehowa dia se: ‘Tshiena nkulekela, nansha kakese, tshiena nkushiya tshianana.’​—Ebelu 13:5.

Mvua nsama bikole pangakapingana kumbelu, kadi Tatu wakaya nanyi kudi doktere, ne ngakumvua bimpe musangu umue. Nansha muvua Tatu kayi ne mitabuja a muomumue ne a bena mu dîku bakuabu bonso, uvua utuambuluisha mu ntendelelu wetu.

Badi bangela mu buloko ne bangipata mu ditunga

Panyima pa ngondo mikese bakafunda dîna dianyi ku bukole bua kubuela mu tshiluilu tshia U.R.S.S. Ngakumvuija tubingila tua malu a Nzambi tumvua mubengele. (Yeshaya 2:4) Nansha nanku, mu Luishi 1951, bakankosela tshibawu tshia bidimu binayi ne bakantuma mu buloko bua mu Ternopol. Pashishe bakantuma mu bukuabu buloko bua mu tshimenga tshinene tshia L’viv, mutantshi wa kilometre mitue ku 120. Pamvua mu buloko amu, ngakumvua ne: bavua baye ne Bantemu ba bungi ku tshitupa tshia Sibérie.

Mu muvu wa été wa mu 1951, bakatutuma tshisumbu mutantshi mule ku Extrême-Orient, mutantshi mule kupita Sibérie. Tuakenda ngondo mujima​—kilometre mitue ku 11 000​—tuakasambuka bitupa bia buloba bia mêba mashilangane misangu 11! Tuakimana amu musangu umue panyima pa mbingu mipite pa ibidi ne kawulu, muaba wakatuitabilabu bua kuowa mâyi. Uvua muaba mualabale uvua bantu buowela mâyi mu tshimenga tshia Novosibirk, mu Sibérie.

Munkatshi mua musumba munene wa bena buloko, ngakumvua muntu wambamu ne dîyi dikole ne: “Wa mu dîku dia Yonadaba muaba eu nnganyi?” Tshikondo atshi bavua bakuata mudimu ne muaku “Yonadaba” bua kusunguluja bantu bavua ne ditekemena dia kuikala ne muoyo wa kashidi pa buloba. (2 Bakelenge 10:15-17; Musambu 37:11, 29) Diakamue bena buloko ba bungi bakadileja bu Bantemu. Tuakelangana muoyo ne disanka!

Midimu ya mu nyuma mu buloko

Patuvua mu Novosibirk tuakumvuangana pa mushindu uvua mua kutuambuluisha bua kumanyangana patuvua tufika kutuvua tuya. Bakatuela tuetu bonso mu kamponya ka buloko kamue ku Mbuu wa Japon, pabuipi ne Vladivostok. Tuakalongololamu bisangilu bia pa tshibidilu bua kulonga Bible. Dikala ne bana betu aba bapie ne bakulumpe, bavuabu bakosele tshibawu tshia buloko tshia matuku a bungi diakankolesha bushuwa mu nyuma. Bavua bashilangana matuku bua kulombola bisangilu bietu, benza mudimu ne mvese ya mu Bible ne balonda malu a mu tshibejibeji tshia Tshibumba tshia Nsentedi avuabu bavuluka.

Bavua bela nkonko, ne bana betu bakuabu bavua bandamuna. Bavule ba kutudi bavua bakosa bitupa bia mabeji a bibombi bia sima bia munda mutupu ne bafundilapu mumvuija avuabu bafila. Tuvua tulama mabeji aa ne tualamakaja pamue bua kuenza nawu mudimu bu wetu mukanda wa kubala. Kunyima kua ngondo mikese, bakatuma bantu bavua ne bibawu bia matuku a bungi mu tumponya tua ku Nord kua Sibérie, mutantshi mule. Bakatutuma meme ne bansonga babidi ba munkatshi muetu mu Nakhodka, tshimenga tshia pabuipi apu, mutantshi wa kilometre mishadile ku 650 ne Japon. Ngakenza bidimu bibidi mu buloko amu.

Imue misangu tuvua tupeta nimero wa Tshibumba tshia Nsentedi. Tshivua tshituambuluisha bu biakudia bia mu nyuma munkatshi mua ngondo ya bungi. Pashishe tuvua tupeta kabidi mikanda ivuabu batufundila. Mukanda wa kumpala ungakapeta wa kudi dîku dianyi (dîba adi dipata mu ditunga) wakampuekeshisha binsonji. Uvua ulonda bu mudibi biumvuija mu Tshibumba tshia Nsentedi tshitela ku ntuadijilu ne: basalayi bavua babuele mu nzubu ya Bantemu ne bavua bapeshe mêku mêba abidi patupu bua kumuangala.

Ndi mpetangana kabidi ne dîku dianyi

Bakandekela mu Tshisua-munene 1952, kunyima kua meme mumane kuenza bidimu bibidi bia tshibawu tshivuabu bankosele tshia bidimu binayi. Ngakapetangana ne dîku dianyi mu musoko mukese wa Gadaley pabuipi ne tshimenga tshia Tulun, ku Sibérie, kuvuabu baye nabu. Bushuwa, bivua bualu bulenga bua kusomba kabidi nabu​—muananyi wa balume Ivan ukavua ne bidimu bitue ku bisatu, ne muananyi wa bakaji Anna uvua ne bidimu bu bibidi. Kadi budikadidi buanyi buvua ne mikalu. Bakokeshi ba muaba au bavua banyenge mukanda wanyi wa njila, ne bavua bandondakaja ne dîsu dikole. Tshivua mua kuya mutantshi wa kilometre mipite pa isatu ne kumbelu to. Panyima, bakangitabila bua kuendela pa kabalu bua kuya mu tshisalu tshia mu Tulun. Mu dienza mudimu ne budimu, ngakapetangana ne Bantemu nanyi.

Tshikondo atshi tuvua ne bana ba bakaji babidi, Anna ne Nadia, ne ba balume babidi, Ivan ne Kolya. Mu 1958 tuakapeta muana mukuabu wa balume, Volodya. Ne pashishe, mu 1961, tuakapeta muana mukuabu wa bakaji, Galia.

Misangu mivule bena KGB (Kasumbu ka kale ka bukubi bua mbulamatadi) bavua bankuata ne bangela nkonko. Tshipatshila tshiabu katshivua anu tshia kumfikisha ku disokolola malu avua atangila tshisumbu to, kadi tshivua kabidi tshia kujula manunganyi se: mvua ngumvuangana nabu. Nunku bavua baya nanyi mu nzubu wa tshidiilu mutambe buimpe ne bakeba kunkuata foto muikale mfukisha mimuemue ne njikija nabu lutetuku. Kadi ngakajingulula meji abu, ne madikolela a muoyo mujima, ngakashala anu munyenge mpala. Dîba dionso divuabu bankuata, mvua ngambila bana betu malu anu muvuawu menzeke. Nenku, kabavua banji kuela mpata bua lulamatu luanyi nansha.

Dimonangana ne bavua mu tumponya

Munkatshi mua bidimu bia bungi, bavua bele Bantemu nkama mivule mu tumponya tuvua maloko. Tshikondo atshi tuvua tumonangana pa tshibidilu ne bana betu bavuabu bakuate, tuvua tubapesha mikanda. Mmunyi mutuvua tuenza bualu ebu? Pavuabu bapatula bana betu ba balume anyi ba bakaji mu kamponya kampanda, bavua batuleja njila ituvua mua kulonda bua kubueja mikanda mu musokoko nansha muvuaku kontololo mukole. Munkatshi mua bidimu bitue ku dikumi, tuvua tutuadila bana betu ba mu tumponya etu bibejibeji ne mikanda ituvua tupeta ifumina mu Pologne ne mu matunga makuabu.

Bana betu ba bakaji ba bungi bena Kristo bavua benza mêba mavule batentula mikanda ne tshianza tshikese menemene mu mushindu wa se: tshibejibeji tshijima bavua mua kutshisokoka nansha mu kantu kakese bu mudi tshizubu tshia alameta, ne mudimu eu uvua utshiokesha! Mu 1991, patukavua katutshiyi mu dikandika ne bikale tupeta bibejibeji bilenga bia mêkala anayi, muanetu wa bakaji kampanda wakamba ne: “Mpindieu nebatupue muoyo.” Tshiakambaye katshivua tshilelela to. Nansha mudi bantu mua kupua muoyo, Yehowa kakupua muoyo mudimu wa bena lulamatu aba nansha!​—Ebelu 6:10.

Dimuangala ne makenga

Ku ndekelu kua 1967 bakakalakasa mu nzubu wa muakunyanyi wa balume mu tshimenga tshia Irkutsk. Bakasanganamu filme ne mikanda idi yumvuija Bible. Bakamukuata ne kumukoselabu tshibawu tshia bidimu bisatu bia buloko. Kadi kabakasangana kantu nansha kamue pakakalakasabu mu nzubu muetu. Nansha nanku, bamfumu bavua batuishibue bua se: tuvua petu ne tshilumbu, nunku dîku dianyi divua ne bua kumbuka muaba au. Tuakaya mutantshi wa kilometre mitue ku 5 000 ku Ouest, batangile mu tshimenga tshia Nevinnomyssk, mu rejon wa Caucase. Tuakatungunukamu ne mudimu wa bungi wa buambi bua mu mpukapuka.

Muanda wa njiwu wakenzeka dituku dia kumpala dia diikisha dia tulasa mu Kabalashipu 1969. Pavuaye ukeba kuambula ndundu wa dinaya pabuipi ne muaba uvua nshinga ya nzembu ya bukole bua bungi, Kolya, muanetu wa balume wa bidimu 12, wakuoshika bikole ku nzembu. Tshitupa tshinene tshia mubidi wende tshivua tshioshike. Mu lupitadi, wakantangila e kuamba ne: “Netuye kabidi pamue mu tshidiila anyi?” (Uvua wakula bua tshidiila tshituvua ne tshibidilu tshia kuya kuendakanamu.) Ngakamuambila ne: “Eyowa, Kolya, netuye kabidi mu tshidiila atshi. Bushuwa netuye mu tshidiila atshi pikala Yezu Kristo mukujule bua kukupesha muoyo.” Mutshikale ne tshioyoyo, wakatungunuka ne kuimba musambu wa Bukalenge uvuaye munange bikole, musambu uvuaye munange kuimba ne mpungi wende pamue ne bimbi ba misambu ba mu tshisumbu. Wakafua panyima pa matuku, muikale ne dieyemena mu ditekemena dia dibiishibua.

Tshidimu tshiakalonda, bakafunda dîna dia Ivan, muanetu wa balume wa bidimu 20, bua kuenzaye mudimu wa busalayi ku bukole. Pakabengaye mudimu eu, bakamukuata ne wakenza bidimu bisatu mu buloko. Mu 1971, bakamfunda kabidi dîna ku bukole ne kumfunyinabu bua kungela mu buloko bua mumvua mubenge kuenza mudimu eu. Tshilumbu tshianyi tshiakanenga ngondo ya bungi. Tshikondo atshi disama dia kansere diakakuata mukajanyi ne bivua bikengela kumutabalela bikole. Bua kabingila aka bakalekela tshilumbu atshi. Maria wakafua mu 1972. Uvua muena mudimu nanyi wa lulamatu, muikale ne bulamatshi kudi Yehowa too ne ku lufu luende.

Dîku dietu diakatangalaka ku ba bende

Mu 1973, ngakasela Nina. Tatuende uvua mumuipate kumbelu mu 1960 bualu uvua mulue Ntemu. Uvua mumanyishi wa lukunukunu uvua munkatshi mua bana betu ba bakaji bavua benze mudimu mukole bua kutentuila bana betu ba mu tumponya bibejibeji. Bana banyi bakafika pabu ku dimunanga.

Mudimu wetu mu Nevinnomyssk wakabanga kutonda bakokeshi ne bakatuambila bua kumbuka muaba au. Nenku mu 1975, meme, mukajanyi ne bana banyi ba bakaji, tuakaya ku Sud kua Caucase, mu ditunga dia Géorgie. Tshine tshikondo atshi, bana banyi ba balume Ivan ne Volodya bakaya mu tshimenga tshia Dzhambul ku muelelu wa ku Sud kua Kazakhstan.

Mu Géorgie mudimu wa Bantemu ba Yehowa utshivua ku mbangilu. Tuakenza buambi bua mu mpukapuka munda ne pabuipi ne tshimenga tshia Gagra ne tshia Sukhumi ku Muelelu wa Mbuu Mufiike, ne panyima pa tshidimu tshijima, Bantemu bapiabapia dikumi bakatambula mu musulu wa pa mukuna. Matuku kaanji kulepa, bamfumu bakamba ne disuminyina bua tuetu kumbuka muaba au, ne tuakaya ku Est kua Géorgie. Bamane kufikaku, tuakenza madikolela a bungi bua kupeta bantu bavua bu mikoko, ne Yehowa wakatubenesha.

Tuvua tudisangisha pamue mu tusumbu tukese. Tuvua ne lutatu lua muakulu, bualu katuvua bamanye tshiena-Géorgie ne bamue bena mu Géorgie kabavua bakula tshiena-Russie bimpe to. Kumpala, tuvua tulonga amu ne bena Russie. Kadi mutantshi mukese, mudimu wa diyisha ne dilongesha mu tshiena-Géorgie wakaya kumpala, ne mpindieu kudi binunu bivule bia bamanyishi ba Bukalenge mu Géorgie.

Mu 1979, muenzeja kudi bena KGB, mfumuanyi wa mudimu wakangambila ne: kabavua bitaba kabidi bua meme kushala mu ditunga diabu to. Tshikondo atshi ke tshivua muananyi wa bakaji Nadia mupetakane ne njiwu ya mashinyi. Yeye ne muanende mutekete wa bakaji bakafua mu njiwu ayi. Tshidimu tshimue kumpala, Mamu wakafuila mu Nevinnomyssk, muikale ne lulamatu kudi Yehowa, kushiyaye tatu ne muakunyanyi wa balume. Nunku tuakapangadija bua kupinganamu.

Mabenesha bua ditantamana

Mu Nevinnomyssk tuakatungunuka ne kupatula mikanda idi yumvuija Bible mu musokoko. Umue musangu munkatshi mua bidimu bia 1980 pavua bakokeshi bambikile, ngakabambila ne: mvua mulote nsokoka bibejibeji bietu. Bakaseka. Pankavua ngumbuka, umue wa kudibu wakamba ne: “Kulotshi kabidi mushindu uutu usokoka mikanda yenu to.” Wakajikija ne mêyi aa: “Mu katupa kakese emu neuteke mikanda mu bitekelu biebe bia mikanda, ne nenubange kuya mu bisangilu bakuatangane ku tshianza ne mukajebe bambule Bible wenu.”

Mu 1989 tuvua babungame pavua muananyi wa bakaji Anna mufue disama dia anévrisme cérébral (diûla dia mijilu ya mu buongo). Uvua ne bidimu 38 patupu. Tshidimu tshine atshi, mu Tshimungu, Bantemu ba mu Nevinnomyssk bakafutshila kawulu ne kuyabu ku Warsaw, ku Pologne, bua kubuela mu mpungilu wa bukua-matunga. Muvua bantu 60 366, bamue ba kudibu binunu bivule bafume mu U.R.S.S. wa kale. Bushuwa tuvua tuela meji ne: tuvua tulota! Panyima pa bidimu bu bibidi, mu dia 27 Luabanya 1991, mvua ne diakalenga dia kuikala umue wa ku bakulu batanu ba kale ba tshisumbu ba mu U.R.S.S. bakatua tshiala pa mukanda wa mushinga mukole mu tshimenga tshia Moscou uvua uleja dimanyika kudi mbulamatadi dia bulongolodi bua malu a Nzambi bua Bantemu ba Yehowa!

Ndi ne disanka dia bungi bua mudi bana banyi badi ne muoyo bikale benzela Nzambi mudimu ne lulamatu. Ne ndi muindile bulongolodi bupiabupia bua Nzambi pangikala mua kumona kabidi Anna, Nadia ne muanende wa bakaji, pamue ne Kolya. Pamubishabu ku lufu, nenkumbaje dilaya dianyi dia kuya nende mu tshidiila mutuvua ne tshibidilu tshia kuya kuendakana bikole kukadi bidimu bia bungi.

Mu dindila tshikondo atshi, ndisanka kayipu bua kumona mudi bulelela bua mu Bible budiunda lubilulubilu mu ditunga edi dialabale! Bulelela, ndi ne disanka bua nsombelu wanyi, ne ndi nsakidila Yehowa bua mudiye muitabe bua meme kulua Ntemu. Ndi mutuishibue ne: tshidi Musambu 34:8 wamba ntshilelela: ‘Teta, ulabule, umvue ne: Yehowa udi muakane; disanka didi kudi muntu udi unyemena kudiye!’

[Tshimfuanyi mu dibeji 25]

Tshidimu tshingakapetangana ne dîku dianyi mu Tulun

[Bimfuanyi mu dibeji 26]

Kuulu: Tatu ne bana banyi pambelu pa nzubu wetu wa mu Tulun, ku Sibérie

Kuulu ku dia balume: Muananyi wa bakaji Nadia ne muanende wa bakaji, bakafua bubidi buabu mu njiwu ya mashinyi

Ku dia balume: Foto muzola wa dîku mu 1968