Ikala mutabale ne muena mitalu!

“Nanku ikalayi batabale, bualu kanuena bamanye dituku ne diba.”​—MATEWUSE 25:13, MMM.

1. Ntshinyi tshivua mupostolo Yone muindile?

MU DIYUKI dia ndekelu didi mu Bible, Yezu wakalaya ne: “Ndi ndua lubilu.” Mupostolo wende Yone wakandamuna ne: ‘Amen; lua, Mukalenge Yezu.’ Yone kavua welakana bua dilua dia Yezu nansha; uvua munkatshi mua bapostolo bavua bebeje Yezu ne: “Ntshikondo kayi tshikala malu aa, ne ntshinyi tshikala tshimanyinu tshia dikalaku [parousia mu tshiena-Greke] diebe ne tshia nkomenu wa ndongoluelu eu wa malu?” Bushuwa, ne dishindika Yone uvua muindile dikalaku dia Yezu ditshivua kumpala.​—Buakabuluibua 22:20; Matayo 24:3, NW.

2. Nsombelu udi mushindu kayi bua dikalaku dia Yezu mu ekleziya mivule?

² Bantu bakese ke batu ne dishindika dia nunku lelu’eu. Mu ekleziya mivule mudi dilongesha ditangalake dia “dilua” dia Yezu, kadi bena kuitabuja bakese ke badi menemene batekemena dilua edi. Nsombelu wabu kêna uleja ne: mbindile dilua diende nansha. Mukanda kampanda udi wamba ne: “Ditekemena dia Parousia didi ne buenzeji bukese mu nsombelu, mu meji ne mu bienzedi bia ekleziya. . . . Mitalu mikole idi ekleziya ne bua kuenza nayi midimu yende ya dinyingalala ne dituma bantu bua kumanyisha evanjeliyo, mmikepe anyi mmijimine yonso.” (The Parousia in the New Testament) Kadi ki mmijimine kudi bantu bonso nansha!

3. (a) Mmunyi mudi bena Kristo balelela bumvua bua parousia? (b) Mbualu kayi butudi nangananga ne bua kukonkonona mpindieu?

³ Bayidi balelela ba Yezu mbindile ne muoyo kuulu kuulu nshikidilu wa ndongoluelu eu mubi wa malu. Nansha mutudi bindile nenku ne bulamatshi, tudi ne bua kulama mmuenenu muakane bua bionso bidi bitangila dikalaku dia Yezu ne kuenza malu mumvuangane ne dikalaku edi. Abi nebituambuluishe bua ‘kunanukila too ne ku nshikidilu ne kusungidibua.’ (Matayo 24:13) Pavuaye umanyisha mulayi utudi tusangana mu Matayo nshapita wa 24 ne wa 25, Yezu wakafila mubelu wa meji utudi mua kutumikila bua disanka dietu dia tshiendelele. Mu nshapita wa 25 mudi mifuanu iudi pamu’apa mumanye, ne mufuanu udi wakula bua bansongakaji dikumi (ba meji ne batshimbakane), ne mufuanu wa ntalanta. (Matayo 25:1-30) Mmunyi mudi mifuanu eyi mua kutukuatshisha?

Ikala mutabale bu bansongakaji batanu!

4. Ndungenyi lunene kayi ludi mu mufuanu wa bansongakaji?

⁴ Udi mua kubalulula mufuanu wa bansongakaji mu Matayo (Matewuse) 25:1-13 (MMM). Badi bakulamu bua tshibilu tshinene tshia dibaka. Mubaki udi uya kua tatuende wa mukaji bua kuangata mukaji ne kulua nende kuende (anyi kua tatuende). Mu tshisumbu etshi mudi mua kuikala bimbi ba mijiki ne ba misambu, ne dîba didibu bafika ki ndimanyike bimpe menemene to. Bilondeshile mufuanu eu, bansongakaji dikumi bavua bindile dilua dia mubaki butuku. Mu butshimbakane buabu, batanu kabavua balue ne manyi makumbane a kuela mu miendu yabu ne bavua ne bua kuya kusumba makuabu. Bakuabu batanu bavua ne meji, bavua balue ne manyi makuabu mu tukopo bua se: mu dishala bindile, bavua mua kuela mu miendu yabu pavuabi bikengedibua. Anu batanu aba ke bavua pabuipi ne badiakaje pakafika mubaki. Pa nanku, anu buobu ke bakanyishilabu bua kubuela mu difesto. Pakapingana bansongakaji batanu batshimbakane, dîba dikavua dipite bua buobu kubuela.

5. Ntshinyi tshidi tshituambuluisha bua kujingulula diumvuija dia mu tshimfuanyi dia mufuanu wa bansongakaji?

⁵ Malu a bungi a mu mufuanu eu adi umvuika a mu tshimfuanyi. Tshilejilu, Mifundu idi yakula bua Yezu bu mubaki wa mukaji. (Yone 3:28-30) Yezu wakadifuanyikija ne muana wa mukalenge uvuabu balongoluele difesto dia dibaka. (Matayo 22:1-14) Ne Bible udi ufuanyikija Kristo ne mulume. (Efeso 5:23) Tumanye ne: nansha mudibu bakule bua bena Kristo bela manyi munga muaba bu ‘mukaji’ wa Kristo, kadi ki mbatele mukaji wa kusela mu mufuanu eu nansha. (Yone 3:29; Buakabuluibua 19:7; 21:2, 9) Kadi mufuanu eu udi wakula bua bansongakaji batshidi tumama dikumi, ne muaba mukuabu badi bafuanyikija bela manyi ne mukaji utshidi kamama mubangila kudi Kristo.​—2 Kolinto 11:2.a

6. Mmubelu kayi wakafila Yezu pavuaye ujikija mufuanu wa bansongakaji?

⁶ Pa kumbusha mumvuija aa ne malu makuabu onso a tshiprofete, bushuwa kudi mêyi-maludiki malenga atudi mua kulongela ku mufuanu eu. Tshilejilu, tangila ne: Yezu wakaujikija ne mêyi aa: “Nanku ikalayi batabale, bualu kanuena bamanye dituku ne diba.” Nenku mufuanu eu udi uleja mudibi bikengela bua yonso wa kutudi kuikalaye mutabale ne mudimuke bu mudi nshikidilu wa ndongoluelu eu mubi usemena pabuipi. Nansha mutudi katuyi mua kufunkuna dituku dijalame, kakuyi mpata nshikidilu eu udi ulua. Bua muanda eu, tangila mmuenenu muleja kudi bisumbu ebi bibidi bia bansongakaji.

7. Mmu ngumvuilu kayi muvua bansongakaji batanu ba mu mufuanu bamueneke batshimbakane?

⁷ Yezu wakamba ne: “Batanu bavua batshimbakane.” Bavua batshimbakane bualu kabavua bitaba ne: mubaki uvua ulua anyi? Bavua baye mu dikeba dia masanka anyi? Peshi bavua babashime? Diandamuna didi ne: tòo. Yezu wakamba ne: batanu aba bavua “baye kuakidila musedianganyi.” Bavua bamanye ne: uvua ulua, ne bavua basue kuya nende, nansha mene bua kubuela mu “tshibilu tshia dibaka.” Kadi bavuaku badilongolole bimpe menemene anyi? Bakamuindila mutantshi, too ne “mundankulu,” kadi kabavua badilongolole bua kuitaba dilua diende dîba dionso divuaye mua kufika​—nansha kumpala kua dîba divuabu belele meji, peshi kushoo.

8. Mmunyi muvua bansongakaji batanu ba mu mufuanu bamueneke badimuke?

⁸ Batanu bakuabu​—bakabikila Yezu ne: badimuke—​bakaya pabu ne miendu yabu mitemesha, bindile dilua dia mubaki. Buobu pabu bavua ne bua kuindila, kadi bavua “badimuke.” Muaku wa tshiena-Greke mukudimuna ne: “badimuke” udi mua kumvuija dikala “ne budimu, mbabi, dikala ne meji adi ne dikuatshisha.” Bansongakaji batanu aba bakaleja ne: bavua badimuke pa kulua ne tukopo tuikale ne manyi makuabu bua kuela mu miendu yabu, pavuabi bikengedibua. Bushuwa, lungenyi luabu luvua lushindamene pa dikala badilongolole bua mubaki mu mushindu wa se: kabavua mua kupeshangana manyi abu nansha. Budimu bua mushindu’eu kabuvua bubi to, bualu pakalua mubaki wakabasangana ne bavua badilongolole bimpe. Buobu ‘bavua badilongolole bakabuela nende mu nzubu wa tshibilu tshia dibaka, kuinjilabu tshiibi.’

9, 10. Mmuanda munene kayi udi mu mufuanu wa bansongakaji, ne nnkonko kayi itudi ne bua kudiela?

⁹ Yezu kavua ulongesha tshikadilu tshimpe tshidi tshikengedibua mu tshibilu tshia dibaka nansha, peshi kavua ubela bua kuabanyinangana bitudi nabi to. Lungenyi luende lunene ludi se: “Nanku ikalayi batabale, bualu kanuena bamanye dituku ne diba.” Diebeja ne: ‘Ndi bushuwa mutabale pa bidi bitangila dikalaku dia Yezu anyi?’ Tudi tuitaba ne: Yezu udi ukokesha mpindieu mu diulu, kadi mmunyi mudi lungenyi luetu lushindamene pa bulelela bua se: ‘Muana wa muntu nealue pa matutu a mu diulu ne bukole buende ne butumbi buende bunene’? (Matayo 24:30) Pabuipi ne “mundankulu,” difika dia mubaki divua disemene pabuipi bikole kupita dîba diakaya bansongakaji bua kumuakidila. Bia muomumue, difika dia Muana wa muntu bua kubutula ndongoluelu eu mubi didi pabuipi menemene kupita tshikondo tshituakabanga kuindila dilua diende. (Lomo 13:11-14) Tudiku bashale batabale, batabale bikole bu mudi tshikondo atshi tshia dilua diende tshienda tshisemena pabuipi menemene anyi?

¹⁰ Kutumikila dîyi dia ‘kuikala batabale’ kudi kulomba budimu misangu yonso. Bansongakaji batanu bakalekela manyi abu ajika ne bakaya kusumba makuabu. Lelu’eu muena Kristo udi mua kuikala mu ditanaji dia muomumue, mu mushindu wa se: ki mmudilongolole bimpe menemene bua dilua dia Yezu dikadi pabuipi to. Biakafikila bamue bena Kristo ba mu siekele wa kumpala. Bidi mua kufikila bamue lelu’eu. Nenku tudiebeje ne: ‘Bidiku bimfikila meme anyi?’​—1 Tesalonike 5:6-8; Ebelu 2:1; 3:12; 12:3; Buakabuluibua 16:15.

Ikala muena mitalu bu mukadi nshikidilu pabuipi

11. Mmufuanu kayi mukuabu wakafila Yezu, ne uvua mufuanangane ne tshinyi?

¹¹ Mu mufuanu wende wakalonda, Yezu kakabela patupu bayidi bende bua kuikala batabale. Yeye mumane kubambila bua bansongakaji ba meji ne batshimbakane, wakabalondela mufuanu wa ntalanta. (Bala Matayo 25:14-30.) Mu malu a bungi mufuanu eu mmufuanangane ne mufuanu wende wa kumpala wa mpalata, uvua Yezu mufile bualu bantu ba bungi ‘bakadi belangana meji ne: Bukalenge bua Nzambi bukadi pa kulua katataka.’​—Luka 19:11-27.

12. Ntshinyi tshidi lungenyi lunene lua mufuanu wa ntalanta?

¹² Mu mufuanu wa ntalanta, Yezu wakakula bua muntu kampanda wakabikila bapika basatu kumpala kua kuyaye ku luendu. Wakapesha umue ntalanta itanu, mukuabu ibidi, ne kupeshaye wa ndekelu ntalanta anu umue​—‘muntu bu lungenyi luende muntu bu lungenyi luende.’ Pamu’apa eyi ivua ntalanta ya tshiamu tshia argent, bungi bujadika buvua mu tshikondo atshi buikale ne mushinga wa makuta avua muena mudimu mua kupeta mu bidimu 14​—makuta a bungi a dikema! Pakapingana muntu eu, wakenza konte ne bapika bende bua kumanya bivuabu bashale kuenza munkatshi mua “musangu mule” uvuaye mushale ku luendu. Bapika babidi ba kumpala bavua bapete makuta bungi bua avuabu babapeshe. Muntu eu wakamba ne: “Bimpe,” wakalaya yonso wa kudibu bujitu bunene, ne wakakoma ne: ‘Buelayi mu disanka dia mukalenge wenu.’ Mupika uvua ne ntalanta umue kavua muenze nende mudimu to, uvua wamba mudi mfumuende ulombangana bintu bipitshidile. Uvua musokoke makuta au, kayi nansha muafile kudi basombeshanganyi bua kupeta tshia-kasombela. Mfumuende wakamuamba ne: mupika ‘mubi ne mufuba’ bualu uvua muenze bualu buvua mua kutshiombesha mfumuende. Nanku bakamunyenga ntalanta au, ne bakamukupa pambelu ‘pavuaye ne bua kudila ne kusumakana mênu.’

13. Mmunyi muvua Yezu mufuanangane ne mfumu wa mu mufuanu, kadi ndîyi-diludiki kayi dinene ditudi mua kufika ku dijingulula?

¹³ Kabidi, malu a mu mufuanu eu adi mua kumvuika a mu tshimfuanyi. Tshilejilu, Yezu, muleja mu tshimfuanyi kudi muntu wakaya ku ba bende, uvua ne bua kushiya bayidi bende kuya mu diulu, ne kuindila mutantshi mule too ne pavuaye upeta bukokeshi bua bukalenge.b (Musambu 110:1-4; Bienzedi 2:34-36; Lomo 8:34; Ebelu 10:12, 13) Kadi, tudi kabidi mua kupeta dilongesha anyi dîyi-diludiki dinene ditudi tuetu bonso ne bua kutumikila mu nsombelu wetu. Ndîyi-diludiki kayi adi?

14. Mbualu kayi bua mushinga budi mufuanu wa ntalanta uleja?

¹⁴ Nansha tuetu bikale ne ditekemena dia muoyo udi kauyi kufua mu diulu anyi dia muoyo wa kashidi mu mparadizu pa buloba, ku diambuluisha dia mufuanu wa Yezu tudi tumvua bimpe ne: tudi ne bua kudifila ne muoyo mujima mu midimu ya bena Kristo. Bushuwa, tudi mua kuleja lungenyi lunene lua mufuanu eu mu muaku umue ne: mitalu. Bapostolo bakafila tshilejilu kubangila anu mu Pentekoste wa mu 33 B.B. Tudi tubala ne: ‘[Petelo] wakabambila mêyi makuabu a bungi, wakabadimuija ne: Disungilayi kudi ba mu tshikondo etshi tshia tshitshu.’ (Bienzedi 2:40-42) Ne wakapatula bipeta bilenga bua madikolela ende. Pakadisangisha bantu bakuabu ne bapostolo mu mudimu wa buambi wa bena Kristo, buobu pabu bavua ne mitalu, ne lumu luimpe luvua luenda ‘lutangalaka buloba bujima.’​—Kolosai 1:3-6, 23, MML; 1 Kolinto 3:5-9.

15. Mmu mushindu kayi wa pa buawu mutudi ne bua kutumikila lungenyi lunene lua mufuanu wa ntalanta?

¹⁵ Vuluka lungenyi lunene ludi mu mufuanu eu: mulayi wa dikalaku dia Yezu. Tudi ne bijadiki bivule bidi bileja ne: parousia wa Yezu udi munkatshi mua dienzeka, ne mu katupa kîpi emu neatue mu katongobela. Vuluka diumvuangana diakaleja Yezu pankatshi pa “nshikidilu” ne mudimu udi bena Kristo ne bua kuenza: “Lumu luimpe elu lua bukalenge neluyishibue pa buloba buonso buasa bu bumanyishi kudi matunga onso; ne pashishe nshikidilu nealue.” (Matayo 24:14, NW) Bikale ne bualu ebu mu lungenyi, mmupika wa mushindu kayi utudi bafuane? Diebeja ne: ‘Kudiku kabingila ka kuambila ne: ndi mufuane mupika wakasokoka tshivuabu bamupeshe, pamu’apa pavuaye wenda wenza yende ivua mimutonde anyi? Peshi mbimueneke patoke ne: ndi mufuane bapika bavua bimpe ne ba lulamatu? Ndiku mudifile ne muoyo mujima bua kuvudija bintu bia Mfumu dîba dionso anyi?’

Batabale ne bena mitalu mu tshikondo tshia dikalaku diende

16. Mmukenji kayi udi mifuanu ibidi itudi bamone itupesha?

¹⁶ Bushuwa, pa kumbusha diumvuija diayi dia mu tshimfuanyi anyi dia tshiprofete, mifuanu ibidi eyi idi itupesha dikankamija ditoke didi difumina mukana mua Yezu nkayende. Mukenji wende udi nenku: Ikalayi batabale ne bena mitalu, nangananga padi tshimanyinu tshia parousia wa Kristo tshimueneka. Tshimanyinu atshi tshidi tshimueneka mpindieu. Nenku, tudiku bushuwa batabale ne bena mitalu anyi?

17, 18. Mmubelu kayi wakafila muyidi Yakobo bua dikalaku dia Yezu?

¹⁷ Yakobo muanabu ne Yezu kavua pa Mukuna wa Olive bua kumvua mulayi wa Yezu nansha; kadi wakalua kumvua bakula bualu buawu pashishe, ne wakajingulula bimpe diumvuija diawu. Wakafunda ne: ‘Nunku, bana betu, nuikale ne lutulu too ne [“ku dikalaku dia,” NW] Mukalenge. Monayi tshidime udi windila mamuma a mushinga mukole a pa buloba, muikale ne lutulu bua bualu buawu too ne palokelawu mvula ya diambedi ne yalua kunyima. Nuikale ne lutulu kabidi, nujadike mitshima yenu, bualu bua [“dikalaku,” NW] dia Mukalenge diakulua pabuipi.’​—Yakobo 5:7, 8, disendamija miaku ndietu.

¹⁸ Mumane kufila dishindika dia se: Nzambi neapishe bantu badi benza mudimu bibi ne bubanji buabu, Yakobo wakabela bena Kristo bua kabapangi kuleja lutulu mu dindila bua Yehowa akose tshilumbu. Muena Kristo udi kayi ne lutulu udi mua kulua mudisombuedi, bienze bu se: yeye ke udi ne bukenji bua kulongolola bilema bidi babanji aba benze. Kadi kabiena ne bua kuikala nanku to, bualu tshikondo tshia dilumbuluisha katshiakupanga kulua nansha. Tshilejilu tshia tshidime tshidi tshileja bualu abu, anu bu muakumvuija Yakobo.

19. Ndutulu lua mushindu kayi luvua tshidime muena Isalele ne bua kuikala nalu?

¹⁹ Tshidime muena Isalele uvua ukuna ntete uvua ne bua kuindila, tshia kumpala bua mabeji apatuke, pashishe bua bikunyibua bikole, ne ku ndekelu bua kunowa. (Luka 8:5-8; Yone 4:35) Mu ngondo ayi, kuvua tshikondo ne pamu’apa bintu bivua mua kumukebela tunyinganyinga kampanda. Mvula ya diambedi ivua mua kulua kumpala kua dîba ne kuikala ya bungi anyi? Mmunyi bua mvula ya ndekelu? Tuîshi anyi tshipepele tshikole tshivua mua kunyanga bikunyibua anyi? (Tangila Yoele 1:4; 2:23-25.) Nansha nanku, pa tshibidilu tshidime muena Isalele uvua weyemena Yehowa ne mivu ya ku tshifukilu Idiye mujadike. (Dutelonome 11:14; Yelemiya 5:24) Bushuwa lutulu lua tshidime luvua lumvuija ditekemena dishindika. Ne ditabuja, uvua mumanye ne: tshivuaye muindile tshivua ne bua kulua. Tshivua ne bua kulua bushuwa!

20. Mmunyi mutudi mua kuleja lutulu mu diumvuangana ne mubelu wa Yakobo?

²⁰ Nansha muvua tshidime mua kuikala ne ndambu wa dimanya dia tshikondo tshivua dinowa ne bua kuenzeka, bena Kristo ba mu siekele wa kumpala kabavua mua kuenza makumi bua kumanya tshikondo tshivua dikalaku dia Yezu ne bua kutuadija nansha. Kadi, divua ne bua kulua kakuyi mpata. Yakobo wakafunda ne: ‘Dikalaku [parousia mu tshiena-Greke] dia Mukalenge diakulua pabuipi.’ Dîba divua Yakobo mufunde mêyi aa, tshimanyinu tshitangalake miaba yonso pa buloba tshia dikalaku dia Kristo katshivua tshianji kumueneka nansha. Kadi mpindieu tshidi tshimueneka pa buloba bujima! Nenku, mmunyi mutudi ne bua kumvua mu tshikondo etshi? Tshimanyinu tshidi tshimueneka bushuwa. Tudi tutshimona. Tudi mua kuamba ne dishindika ne: ‘Ndi mmona tshimanyinu tshienda tshikumbana.’ Tudi mene mua kuamba ne dishindika kupita Yakobo ne: ‘Dikalaku dia Mukalenge diakulua pabuipi.’

21. Ntshinyi tshitudi bapangadije bua kuenza ne muoyo wetu mujima?

²¹ Bu mudibi nanku, tudi nangananga ne kabingila kakole bua kuteleja ne kutumikila malongesha a nshindamenu a mu mifuanu ibidi ya Yezu itudi bamone. Wakamba ne: “Nanku ikalayi batabale, bualu kanuena bamanye dituku ne diba.” (Matewuse 25:13, MMM) Kakuyi mpata, mpindieu ke tshikondo tshia tuetu kuikala ne lukunukunu mu mudimu wa buena Kristo. Dituku dionso tulejayi mu nsombelu wetu ne: tudi bumvue tshivua Yezu muambe. Tuikalayi batabale! Tuikalayi bena mitalu!

[Mêyi adi kuinshi]

Udi muvuluke anyi?

◻ Ndungenyi lunene kayi luudi mupete mu mufuanu wa bansongakaji ba meji ne batshimbakane?

◻ Ku diambuluisha dia mufuanu wa ntalanta, mmubelu kayi wa nshindamenu uvua Yezu ukupesha?

◻ Mmu ngumvuilu kayi mudi lutulu luebe bua parousia lufuanangane ne lua tshidime muena Isalele?

◻ Bua tshinyi tshikondo tshitudi etshi tshidi tshisankisha ne tshilomba madikolela a bungi mu mushindu wa pa buawu?

[Bimfuanyi mu dibeji 23]

Mmalongesha kayi audi upetela ku mufuanu wa bansongakaji ne wa ntalanta?