Bakenza disua dia Yehowa

Mariya udi usungula “luseke ludi luimpe”

MU TSHIKONDO tshia Yezu, ba-rabbi bavua belele bakaji bena Yuda mikandu ya bungi. Ke bua tshinyi bavua batekeshe bantu bakaji mu mikolo bua kulonga Mikenji. Pa bualu ebu, mukanda wa Mishnah mmutela lungenyi kampanda luvua luamba ne: “Tatu yeye mulongeshe muanende wa bakaji Mikenji, bidi amu bu mumulongeshe tshiendenda tshia masandi.”​—Sotah 3:4.

Ke bua tshinyi bantu bakaji ba bungi ba mu Yudeya ba mu bidimu lukama bia kumpala kabavua bamanye mukanda bimpe to. Nkonga-miaku kampanda udi wamba ne: “Kakuena tshijadiki tshidi tshileja ne: kumpala kua Yezu kutuadija mudimu wende, bavua mua kuanyishila bakaji bena Yuda bua kuikala balongi ba mulongeshi kampanda munene, anyi kuenza luendu ne mulongeshi eu peshi bua buobu kulongesha muntu mukuabu, pa kumbusha bana batekete.” (The Anchor Bible Dictionary) Bua kupuekesha kabidi bantu bakaji mushinga, bamue bamfumu ba bitendelelu bakela mukenji wa se: muntu mulume kavua ne tshia kuakula ne muntu mukaji patoke nansha.

Yezu kakalonda mmuenenu eyi mibi to. Wakalongesha bakaji ne balume, ne kabidi munkatshi mua bayidi bende muvua ne balume ne bakaji. (Luka 8:1-3) Musangu kampanda, Mâta ne Mariya bakakidila Yezu kuabu. (Luka 10:38) Bakaji babidi aba bavua bana babu ne Lazalo, ne bonso basatu bavua bayidi ne balunda banene ba Yezu. (Yone 11:5) Dîku edi divua pamu’apa dimanyike bikole pa kutangila bungi bua bantu bavua balue kusamba Mâta ne Mariya pavua Lazalo mufue. Bualu buakenzeka ku nzubu kuabu pavua Yezu muikale muenyi wabu budi bufila dilongesha dia mushinga ki ng’anu buabu buobu nkayabu, kadi ne buetu tuetu kabidi.

Udi uteleja, musomba ku makasa a Yezu

Kakuyi mpata, Mâta ne Mariya bavua ne dijinga dikole dia kupesha Yezu biakudia bia dinono, ne misangu mikuabu biakudia ebi bivua bilondeshile dimona diabu. (Fuanyikija ne Yone 12:1-3.) Kadi, pakafika muenyi wabu, Mariya ‘wakasomba ku makasa a Mfumu uteleja malu akadiye ulongesha.’ (Luka 10:39, MML) Mmuenenu ya bantu kayivua mua kupangisha Yezu bua kulongesha muntu mukaji eu wa muoyo muimpe uvua ne dijinga dia kumanya bivule nansha! Tudi mua kufuanyikija Mariya musombe kumpala kua Yezu amu bu mutu mulongi uteleja ne ntema bidi Mulongeshi wende wamba.​—Tangila Dutelonome 33:3; Bienzedi 22:3.

Kayi bu Mariya, Mâta “uvua yeye muditue ku midimu mivule ya mu nzubu.” Uvua bushuwa ne mudimu wa bungi bualu uvua ulamba biakudia bia dinono. Katantshi, Mâta kufikaye munda bua muvuabu bamushiye wenza midimu yonso nkayende eku muanabu wa bakaji musombe ku makasa a Yezu! Ke Mâta kukosaye bivua Yezu wambila Mariya pankatshi, misangu mikuabu mu tshimpitshimpi, wamba ne: “Mfumu, padi muanetu munshiye nkayanyi ne midimu apa, kuena umona bu bualu anyi? Umuambile bua alue kungambuluisha.”​—Luka 10:40, MMM.

Bua kuamba bualu pa bualu, dilomba dia Mâta kadivua dibi to. Kulambila tshisumbu tshia bantu biakudia mmudimu mukole ne ki mbujitu bua kuomekela muntu umue nansha. Kadi Yezu wakapeta mushindu wa kufila dilongesha dia mushinga bua miaku eyi yakamba Mâta. Wakamba ne: ‘Mâta, Mâta, udi utamba kuela meji a malu a bungi adi akutatshisha; tudi anu ne tshintu tshimue bualu; Mariya mmusungule luseke ludi luimpe, kabena bamanye mua kumunyengalu.’​—Luka 10:41, 42.

Yezu kavua usua kuamba ne: Mâta kavua munange malu a mu nyuma nansha. Kadi, uvua mumanye ne: uvua mukaji uvua ne bulamate kudi Nzambi.a Bushuwa, ngikadilu eu ke wakamusaka bua kubikila Yezu ku nzubu. Kadi, ku mubelu wende wa lutulu, Yezu uvua uleja ne: Mâta uvua mujimije mpunga muimpe wa kumvua malu kudi Muana wa Nzambi bua ditamba kuditatshisha bua biakudia.

Bushuwa, bilondeshile nshidimukilu wa tshikondo atshi, bantu bavua mua kuikala bamona se: mushinga wa mukaji uvua umuenekela bimpe ku bukole bua kuenza midimu ya nzubu. Kadi mêyi a Yezu akaleja ne: anu bu bantu balume, bantu bakaji bavua mua kusomba panshi ku makasa a Muana wa Nzambi bua kumvua miaku idi ifila muoyo! (Yone 4:7-15; Bienzedi 5:14) Bua bualu ebu, bivua mua kuikala bitambe buimpe bua Mâta kulamba biakudia bikese patupu​—anyi mene tshiakudia tshimuepele—​bua kupetaye mushindu wa kusomba ku makasa a Mfumu ne kumvua malu avuaye wamba.​—Tangila Matayo 6:25.

Dilongesha buetu tuetu

Lelu’eu, bakaji ne balume badi munkatshi mua bantu badi bitaba dibikila dia Yezu dia kulua ‘kuangata mâyi a muoyo tshianana.’ (Buakabuluibua 22:17) Bua mudibu basaka kudi dinanga, bamue​—amu bu Mâta—​badi benza muabu muonso bua kukumbaja majinga a bena kuitabuja nabu. Mbitabe bua kuambuluisha bakuabu ne badi ne lukasa mu dienza malu adi akengedibua, ne Yehowa mmulaye bua kubafuta bua midimu yabu mikole ya dinanga. (Ebelu 6:10; 13:16) Bakuabu batu imue misangu bafuanangane bikole ne Mariya. Badi ne lutulu ne banange malu a mu nyuma. Dijinga diabu dia kuelangana meji pa Dîyi dia Nzambi ke didi dibambuluisha bua kushala bashindame bikole mu ditabuja.​—Efeso 3:17-19.

Bantu ba mishindu ibidi eyi badi bakumbaja mudimu wa mushinga mukole mu tshisumbu tshia bena Kristo. Kadi kunyima kua bionso, bonso badi ne bua ‘kusungula luseke ludi luimpe’ pa kuteka malu a mu nyuma pa muaba wa kumpala. Bituajingulula malu adi ne mushinga mukole, Yehowa neatuanyishe ne neatubeneshe.​—Filipoi 1:9-11.

[Mêyi adi kuinshi]