Udilongolole bua Bidimu Tshinunu bidi ne mushinga!
BANTU nebapete mabenesha bungi kabuyi kubala mu Bukokeshi bua Bidimu Tshinunu bua Kristo. Pikala Yezu mua kukokesha ne dinanga, neumbushe bantu mu nsombelu eu wa kanyawu udibu nende ne neabafikishe ku nsombelu milenga ne mipuangane. Ela meji bua tshidi bualu ebu bumvuija. Makanda a mubidi mimpe! Ela meji ne: udi ujuka mu dinda dionso udiumvua bimpe kupita muuvua dituku dishale. Bantu balume, bakaji ne bana miliyo mivule mbindile ne muoyo kulukulu bua kuikala ne muoyo mu tshikondo atshi tshia disanka. Mbatshitekemene ne muoyo mujima ne badi basambila bua tshilue. Dilonga diabu dia Bible ndibatuishe ne: badi mua kupeta mabenesha aa.
Kadi bangabanga ne kutuadijaye Bukokeshi buende bua Bidimu Tshinunu, Yezu Kristo udi ne bua kuanji kumbusha bantu bonso badi babenga bukokeshi buende pa buloba. Neenze muanda eu mu mvita idi Bible ubikila ne: Armagedone. (Buakabuluibua 16:16) Bena Kristo balelela badi pa buloba kabakuluangana mvita ayi nansha. Ayi mmvita ya Nzambi. Ne kayakuenzekela anu muaba umuepele to. Bible udi wamba ne: neyifike too ne ku ntengu yonso ya buloba. Baluishi ba bukokeshi bua Kristo nebabutuke. Nansha umue kakupanduka to!—Yelemiya 25:33.
Pashishe Yezu neakudimukile Satana Diabolo ne ba-demon bende. Fuanyikija bualu ebu mu lungenyi, mushindu wakamona mufundi wa mukanda wa Buakabuluibua: ‘Ngakatangila muanjelu [Yezu Kristo] upueka panshi ufuma mu diulu, muikale ne luvungula lua ku dina didi kadiyi ne tshishikidilu, ne lukanu lunene mu tshianza tshiende. Yeye wakakuata dragon, nyoka au wa kale, udi Diabolo ne Satana, wakumusuika [bua] bidimu tshinunu.’ (Buakabuluibua 20:1, 2) Pashishe, Satana ne ba-demon bende nebabutudibue bua kashidi.—Matayo 25:41.
‘Musumba munene [udi] muntu nansha umue kayi mua kubala,’ neupanduke ku Armagedone. (Buakabuluibua 7:9, NW) Kristo nealombole bena mu musumba eu bua kupetabu masanka mavule a ku ‘mishimi ya mâyi a muoyo,’ anu bu mutu mulami ulombola mikoko yende ku mâyi adi apandisha muoyo. (Buakabuluibua 7:17) Bu muikala Satana ne ba-demon bende kabatshiyi babapangisha bua kudiunda mu nyuma, bantu aba bapanduka nebapete diambuluisha ku kakese ku kakese bua kumbushabu meji adi abasaka ku mpekatu too ne mualuabu bapuangane!
Mu bukokeshi bua Kristo bua dinanga, nsombelu neyilengele bua kashidi. Ku butuangaji bua Yezu Kristo, Yehowa Nzambi neumbushe bintu bionso bidi bilela makenga ne tunyinganyinga. ‘Neakupule tshinsonji tshionso ku mêsu kuabu; ne lufu kaluena luikalaku kabidi; madilu kaena ikalaku kabidi, nansha muadi, nansha kanyinganyinga kabidi.’ (Buakabuluibua 21:4) Muprofete Yeshaya udi ulengeja tshimfuanyi etshi wamba ne: ‘Mu dituku adi mêsu a mufofo neatabale, matshi a badi ne mapapa neajikuke. Mu dîba adi muntu mulema neatupike bu ngulungu, ludimi lua kamama neluimbe misambu.’ (Yeshaya 35:5, 6) Ne bafue, “banene ne bakese,” nebapetulule muoyo ne ditekemena dia kubenga kufua kabidi!—Buakabuluibua 20:12.
Nansha mpindieu, badi benda basangisha bantu ba mu “musumba munene” bapanduka ku Armagedone. Badi badilongolola bua kubuela mu Bukokeshi bua Bidimu Tshinunu bua Kristo. Nansha mudibu kabayi bamanye dîba diatuadija bukokeshi abu, mbashindike ne: Nzambi neabujadike mu tshikondo tshidiye mulongolole. Kadi wewe pebe udi ne bua kudilongolola bua kuikala munkatshi muabu—ki mpa kusumbisha bintu biebe ne kuya muaba kampanda to, kadi pa kulonga Bible bua kupeta dimanya dijalame dia Yehowa Nzambi ne malu adiye mulongolole. Bantemu ba Yehowa nebikale ne disanka dia kukuleja mushindu udi dilonga dia Bible mua kukuambuluisha wewe ne dîku diebe, kabayi bakufutshisha makuta peshi bakuenzeja to. Bafundi ba tshibejibeji etshi nebikale ne disanka dia kukupesha mamanyisha makuabu.
[Kazubu mu dibeji 7]
Mbidimu Tshinunu bietu bia bulelela ebi anyi?
Bu muvua tshitupa tshinene tshia mukanda wa mu Bible wa Buakabuluibua tshifunda mu ngakuilu wa mu tshimfuanyi, lukonko elu ludi mua kujuka: Bidi munyi bua Bukokeshi bua Kristo bua Bidimu Tshinunu butela mu Buakabuluibua? Ntshikondo tshia bushuwa anyi peshi ntshia mu tshimfuanyi?
Kudi bijadiki bivule bidi bileja ne: tshikondo atshi tshia bidimu tshinunu ntshilelela. Mona: Mupostolo Paulo udi wakula bua Bukokeshi bua Bidimu Tshinunu bua Kristo, muikalabu mua kulumbuluisha bantu, wamba ne: n’dituku. (Bienzedi 17:31; Buakabuluibua 20:4) Mupostolo Petelo wakafunda ne: bua Yehowa, dituku dimue (mêba 24) didi bu bidimu tshinunu. (2 Petelo 3:8) Abi bidi bijadika ne: “dituku” edi dia dilumbuluisha mbidimu tshinunu bia bushuwa. Kabidi, mu Buakabuluibua 20:3, 5-7 (NW), tudi tubala misangu inayi, kabiyi bua “bidimu tshinunu” kabiyi bijadika to, kadi bua “bidimu tshinunu” bishindika. Bidi bileja tshikondo tshia bule busunguluke.