Dîyi dia mulayi dia Nzambi didi difila ditekemena bua matuku atshilualua
KU DIAMBULUISHA dia Dîyi dia Nzambi, bena Kristo balelela badi ne ditabuja, ditekemena ne mmuenenu mulenga pa bidi bitangila matuku atshilualua. Bu mudibu ne malanda mimpe ne Yehowa Nzambi, mbatekemene malu malenga adi kumpala eku. Anu bu muvua muyuki wa diunzulula nawu tshialu mu Mpungilu ya Distrike ya “Dîyi dia mulayi dia Nzambi” mumvuije, Bantemu ba Yehowa badi balonga milayi ya mu Bible bimpebimpe kukadi bidimu bia bungi. Kadi mmalu kayi avua Yehowa mulamine bantu bende mu mpungilu eyi? Bu muvuabu badilongolole ne bikale ne Bible ku bianza, bivua bileja ne: bateleji bonso bavua ne dijinga dia kuamanya. Tshiena-bualu tshia dituku dionso dia mpungilu ntshifunda pa bule bu ka-tshiena-bualu mu bidi bilonda ebi.
DITUKU DIA KUMPALA: Tuendayi mu butoke bua Dîyi dia Nzambi
Muyuki wa: “Dîyi dia Nzambi nditulombole” uvua mumvuije ne: bantu ba Yehowa badi bu muntu udi utuadija luendu mu mîdima butuku. Padi dîba dienda dipatuka, ku mêsu kudi kuenda kutoka, kadi padidi dijalama, udi umona bionso bimpe bitambe. Bu muvuabi bimanyisha mu Nsumuinu 4:18, bantu ba Yehowa mbafike ku dimona njila wabu bimpe ku diambuluisha dia butoke bua bulelela budi bukenka, budi mu dîyi dia mulayi dia Nzambi. Ki mbabalekele benda batetuka mu mîdima ya mu nyuma nansha.
Muyuki wa nshindamenu wa: “Teyayi ntema ku dîyi dia mulayi dia Nzambi” wakavuluija bateleji ne: bantu badi beyemena Yehowa kabena babungama peshi bapambuka bu mutu bantu badi balonda ba-masiya ne baprofete ba dishima to. Bualu mene, malu adi ajadika ne: Yezu Kristo m’Masiya mulelela, mmapite bungi! Tshilejilu, dikudimuka dia mpala wa Yezu mu tshishima diakafila kadiosha ka tshikondo tshivuaye ne bua kulua Mukalenge wa Bukalenge bua Nzambi. Mu 1914, Yezu wakasomba mu nkuasa wa Bukalenge, ne wakalua kabidi “mutoto wa nkesha” mutela mu 2 Petelo 1:19. Ngamba-malu wakamba ne: “Bu mudiye Masiya ne Mutoto wa nkesha, udi umanyisha dituku dipiadipia, peshi tshikondo tshidi tshituadija bua bantu bonso bena butumike.”
Bua kutuadija tshitupa tshia mu mapingaja, muyuki wa: “Tukenkayi bu bimunyi” wakumvuija mu bule ne mu butshiame Efeso 5:8 (NW) mudi mupostolo Paulo utulomba bua ‘kutungunuka ne kuenda bu bana ba butoke.’ Bena Kristo badi bimunyi padibu bayisha bakuabu Dîyi dia Nzambi ne kabidi padibu batumikila Bible anu bu muakenza Yezu.
Bua kuikala bimunyi bia mushindu’eu, mbimpe “Tuikalayi ne disanka mu dibala Dîyi dia Nzambi.” Tshiena-bualu etshi bavua batshienze bu muyuki mukosolola mu bitupa bisatu. Kunyima kua ditela mêyi a Abraham Lincoln wakabikila Bible ne: “ndipa ditambe buimpe dia katshia ne katshia didi Nzambi mupeshe bantu,” ngamba-malu wa kumpala wakambila bateleji bua bakonkonone bibidilu biabu bia dibala bualu bidi bileja dianyisha didibu nadi bua Dîyi dia Yehowa. Wakakankamija bateleji bua kuikalabu ne ntema padibu babala Bible, kuanji kuimana mutantshi bua kufuanyikija mu lungenyi malu a mu Mifundu ne kumona diumvuangana didi pankatshi pa malu mapiamapia aa ne makuabu akadibu bamane kulonga.
Tshitupa tshibidi tshiakaleja ne: bituikala basue bua kudia ‘biakudia bikole,’ tudi ne bua kulonga, pamutu pa kubala patupu malu pa mutu pa mutu. (Ebelu 5:13, 14) Ngamba-malu wakamba ne: bua dilonga kutambadi kutukolesha, tudi ne bua kudianjila ‘kulongolola mitshima yetu,’ bu muakenza Ezela, muakuidi muena Isalele. (Ezela 7:10, NW) Kadi bua tshinyi dilonga didi ne mushinga mukole nunku? Bualu dilonga ne malanda etu ne Yehowa bidi bienda pamue. Nunku, tuangatayi dilonga dia Bible ne mushinga mukole, tudivuijayi tshintu tshidi tshitusankisha ne nansha mudidi ditulomba madikolela ne dinana lungenyi, didi ne bua kuikala ditukankamija. Mmunyi mutudi tupeta dîba bua kuenza dilonga edi dia mushinga mukole? Ngamba-malu muisatu (wa ndekelu) wakamba ne: mpa ‘kudisumbila tshikondo tshiakanyine’ ku midimu ya mushinga mukese itudi tuenza. (Efeso 5:16) Eyowa, bua kupeta dîba bidi bikengela kuenza mudimu bimpe ne dîba ditudi nadi.
Muyuki wa: “Nzambi udi upesha udi mupungile bukole” wakaleja ne: bantu ba bungi lelu mbapungile. Nenku bua tuetu kupeta “bukole budi bupite bua pa tshibidilu” bua tuetu kumona mua kuenza mudimu wa bena Kristo, tudi ne bua kueyemena Yehowa, yeye “udi upesha badi bapungile bukole.” (2 Kolinto 4:7, NW; Yeshaya 40:29, Mukanda wa Mvidi Mukulu) Mu bintu bidi bituambuluisha bua kupeta bukole mudi: Dîyi dia Nzambi, masambila, tshisumbu tshia bena Kristo, kuyisha pa tshibidilu, batangidi bena Kristo ne tshilejilu tshia lulamatu tshia bakuabu. Tshiena-bualu tshia: “Ikalayi balongeshi pa kumona tshikondo” tshiakaleja mudibi bikengela bua bena Kristo kuikalabu balongeshi ne bayishi kabidi, ne kuenza muabu muonso bua kukolesha “dimanya kulongesha.”—2 Timote 4:2, NW.
Muyuki wa ndekelu wa dituku adi, “Badi baluisha Nzambi kabakutshimuna,” wakatela mushindu udibu bashima bantu matuku adi panshi aa mu amue matunga bua kuangatabu Bantemu ba Yehowa bu kasumbusumbu ka njiwu. Kadi katuena ne bua kutshina nansha, bualu Yeshaya 54:17 udi wamba ne: ‘Kakuena tshielelu tshia mvita tshidibu batula bua kukuluisha natshi tshidi mua kuikala ne diakalengele; wewe neutuishe ludimi luonso ludibu babandisha bua kukubanda nalu mu tshilumbu. Ebu mbupianyi bua badi bakuatshila Yehowa mudimu, ne eku nkubingishibua kuabu kudi kufuma kundi.’
DITUKU DIBIDI: Malu mamanyisha mu mifundu ya milayi
Kunyima kua dikonkonona mvese wa mu Bible wa dituku adi, bantu bakateleja muyuki muibidi mukosolola wa mu mpungilu, uvua ne mutu wa bualu ne: “Tutumbishayi Yehowa bu batuadi ba butoke.” Tshitupa tshia kumpala tshiakaleja ne: tshipatshila tshia muena Kristo ntshia kutumbisha Yehowa pa kuyisha miaba yonso. Mu tshitupa tshibidi bakakula bua mushinga wa kulombola bantu badi bitabuja ku bulongolodi bua Nzambi. Mushindu kayi? Pa kuangata minite itanu anyi dikumi, kumpala anyi panyima pa dilonga dionso dia Bible bua kuleja mushindu udi bulongolodi bua Nzambi buenda. Tshitupa tshisatu tshia muyuki eu tshiakaleja mudibi bikengela kutumbisha Nzambi ku bienzedi bilenga.
Muyuki wa: “Nangayi bikole mavuluija a Yehowa” wakumvuija imue mvese misungula mu Musambu wa 119. Bushuwa, tutu tujinga bua bikale batuvuluija malu, bualu tshipua-muoyo ntshia bantu bonso. Nunku, mmunyipu mudibi bia mushinga bua tuetu kukolesha dinanga bua malu adi Yehowa utuvuluija anu bu muakenza mufundi wa Misambu!
Pashishe e kuluaku bualu ebu bunene: muyuki wa batismo uvua ne mutu wa bualu ne: “Kuteya ntema ku dîyi dia mulayi kudi kufikisha ku batismo.” Bakavuluija balumbidi ba batismo ne: badi bidikija Kristo pa kutambula ne pa kulonda bimpe mu makasa ende. (1 Petelo 2:21) Ndiakalenga kayipu didi nadi bapiabapia aba mu dikumbaja mêyi adi mu Yone 10:16, muvua Yezu mumanyishe ne: uvua ne bua kusangisha “mikoko mikuabo” bua kuenzayi mudimu pamue ne bayidi bende bela manyi a spiritu!
Bua kutuadija tshitupa tshia mu mapingaja, muyuki wa: “Umvua tshidi spiritu ne bua kuamba” wakumvuija ne: spiritu wa Yehowa udi wakula netu ku diambuluisha dia Bible, dia “mupika wa lulamatu ne wa budimu,” ne kuondo ketu ka muoyo kalongesha kudi Bible. (Matayo 24:45, NW) Nunku, bena Kristo kabena dijinga ne kumvua dîyi difuma mu diulu bua kumanya mua kuenza malu adi asankisha Nzambi nansha. Muyuki uvua ulonda wa: “Tubingishayi dilongesha didi diumvuangana ne bulamate kudi Nzambi,” wakabela bena Kristo bua kabakebikebi ngenyi idi bena panu bamuangalaja idi inyanga nsombelu. Eyowa, kujinga kunekesha bua kumanya malu kudi mua kutubueja mu mianda idi mua kutuenzela bibi idi batontolodi ne bakuabu bena mudimu ba Satana bamanyisha. Mbitambe buimpe menemene bua kuikala ne tshibidilu tshia kubala Bible ne biena-bualu bionso bidi mu Tshibumba tshia Nsentedi ne Réveillez-vous!
Muyuki uvua ulonda uvua ne mutu wa bualu ne: “Ulamate tshidikijilu tshia mêyi malenga” wakashindamena pa mushinga wa kuibidilangana ne “tshidikijilu” peshi tshilejilu tshia bulelela bua mu Mifundu. (2 Timote 1:13) Kukuata tshidikijilu etshi ke bualu bunene budi mua kutuambuluisha bua kushala balamate Nzambi ne kumanya kabidi mua kusunguluja malu adi kaayi umvuangana ne bulelela.
Tetabi kufuanyikija mu lungenyi Yehowa ukuangata bu muntu mulengele. Mmuanda kayipu au wa lumu! Muyuki wa: “ ‘Bintu bilengele’ bidi biuwula tente mu nzubu wa Yehowa,” uvua mushindamene pa mulayi wa Hagai, uvua ukankamija bantu bikole bualu wakajadikila bateleji ne: muntu yonso wa mu “musumba munene” udi bushuwa mulengele ku mêsu kua Yehowa. (Buakabuluibua 7:9, NW) Ke bua tshinyi Yehowa neabasungile mu “dinyukula” diende dia ndekelu dia bisamba mu tshikondo tshia “dikenga dinene” didi dilua. (Hagai 2:7, 21, 22, NW; Matayo 24:21) Kadi mu dindila tshikondo atshi, bantu ba Yehowa badi ne bua kushala batabale mu nyuma, bu muakumvuijabu mu muyuki wa: “Mifundu ya milayi idi itudimuija bua kuikala batabale.” Ngamba-malu wakatela mêyi a Yezu aa: “Nuikale batabale, bualu kanuena bamanye dituku diafika Mfumu wenu.” (Matayo 24:42, MMM) Mmunyi mutudi mua kushala batabale mu nyuma? Mpa kuikala ne bia bungi bia kuenza mu mudimu wa Yehowa, kusambila misangu ne misangu ne kushala bindile dituku dinene dia Yehowa.
Muyuki wa ndekelu wa dituku adi uvua ne mutu wa bualu ne: “Dîyi dia mulayi mu tshikondo tshia ku nshikidilu.” Netuuvuluke bidimu bia bungi kumpala eku. Bua tshinyi? Bualu ngamba-malu wakamanyisha dipatuka dia mukanda mupiamupia: Prêtons attention à la prophétie de Daniel! (Tuteyayi ntema ku mulayi wa Danyele!) Ngamba-malu wakamba ne: “Mukanda eu muenza ne bimfuanyi bilenga wa mabeji 320 udi wakula bua tshitupa tshionso tshia mukanda wa Danyele.” Ntshijadiki kayipu etshi tshidi tshikolesha ditabuja ne kabidi tshileja ne: Yehowa udi utokesha Dîyi diende dia mulayi!
DITUKU DISATU: Dîyi dia mulayi dia Nzambi kaditu dipanga kukumbana
Dituku dia ndekelu dia mpungilu diakatuadija ne muyuki mukosolola wa: “Mêyi a mulayi bua tshikondo tshijadika.” Bitupa bisatu bia muyuki eu biakakonkonona mamanyisha asatu a muprofete Habakuka adi aleja muvua Yehowa mukumbaje mapangadika avuaye muangate. Dia kumpala divua pa tshisamba tshia Yuda tshivua ne mutu mukole ne dibidi divua pa Babulona uvua ukengesha bantu. Dipangadika dia ndekelu divua ne bua kukumbana, ng’edi dikadi pa kulua bua kubutula bantu babi bonso. Mu diakula bua Armagedone, muanetu wakenza tshitupa tshisatu (tshia ndekelu) tshia muyuki eu wakajula munda mua bavua bamuteleje dipangadika diakanyine dia kutshina Nzambi pakambaye ne: “Bushuwa, nebikuatshishe bantu buôwa dîba diapatula Yehowa dikanda diende dionso dia bukole buende bunene.”
Drama wa mu Bible udi ulenga ku muoyo wa mu mpungilu eu uvua ne mutu wa bualu ne: “Tuanyishayi bumpianyi buetu bua mu nyuma.” Dinaya edi didi dikonkonona kuondo ka muoyo ka muntu ne muntu diakaleja mushindu uvua Yakoba ne Esau bangata malu a mu nyuma. Bu muvua Esau mupepeje bumpianyi buende bua mu nyuma, bakalua kubupesha Yakoba, uvua yeye ubuangata ne mushinga mukole. Bakakonka bantu bavua babuele mu mpungilu ne: “[Mbumpianyi kayi bua mu nyuma budi] Yehowa mutupe?” Ngamba-malu wakandamuna ne: “Bulelela bua mu Bible; ditekemena dia muoyo wa kashidi; ne diakalenga dia kuikala baleji-mpala bende badi bamba lumu luimpe.”
Muyuki uvua ulonda uvua ne mutu wa bualu ne: “Mmunyi muutu wangata bumpianyi buetu bua mushinga mukole?” Tudi tuleja mutudi tuangata bumpianyi buetu bua mu nyuma ne mushinga pa kuteka mudimu wa Yehowa ne masanka a mu nyuma kumpala kua malu makuabu anyi kumpala kua majinga etu nkayetu. Mushindu’eu tudi tuashila nsombelu wetu pa malanda atudi nawu ne Yehowa, ne katuakulonda Adama, Esau ne bena Isalele bavua bapange lulamatu to.
Muyuki wa patoke wa: “Bintu bionso mbivuija bipiabipia bu muakadianjilabu kumanyisha,” wakasangisha pamue milayi minene inayi idi yakula bua ‘diulu dipiadipia’ ne ‘buloba bupiabupia.’ (Yeshaya 65:17-25; 66:22-24; 2 Petelo 3:13; Buakabuluibua 21:1, 3-5) Bulelela Yehowa uvua mulongolole dikumbana dinene dia milayi eyi kupita edi divua dienzeke bua tshisamba tshiende tshiasulula mu 537 K.B.B. Eyowa, uvua mulongolole mbulamatadi wa Bukalenge buende (‘diulu dipiadipia’) ne bantu bikale pa buloba (peshi ‘buloba bupiabupia’) balua kusombela mu mparadizu mulengele wa pa buloba bujima.
Bua kujikija mpungilu bilenga ne kusaka bantu ku ditumikila malu onso au, kuvua muyuki wa: “Malu atudi batekemene patudi tulonda Dîyi dia Nzambi.” Wakavuluija bantu bonso ne: “diba didi diende dikepa” dia kujikija mudimu wa kumanyisha Bukalenge. (1 Kolinto 7:29, MMM) Bushuwa, tuasemenyi pabuipi menemene ne dîba diakumbana dipangadika didi Yehowa muangatshile Satana ne ndongoluelu wende mubi mujima. Tutuayi ku tshia mufundi wa Misambu wakimba ne: “Muoyo wetu udi windila Yehowa; yeye udi dikuatshisha dietu ne ngabu wetu.” (Musambu 33:20) Nditekemena kayipu dilenga didi dindile bantu badi batekemene malu adi mashindamene pa dîyi dia mulayi dia Nzambi!
[Tshimfuanyi mu dibeji 7]
Drama udi ulenga ku muoyo wakaleja dianyisha didi nadi basadidi ba Yehowa bua bumpianyi bua mu nyuma
[Tshimfuanyi mu dibeji 7]
Bantu ba bungi bavua bateye ntema ku Dîyi dia mulayi dia Nzambi bakatambula