Udi mupangadije bua kuidikija Yezu anyi?

‘Wakatangila tshisumbu tshinene tshia bantu, wakadi nabu luse, bualu bua buobu bakadi bu mikoko yakadi kayiyi ne mulami; yeye wakabanga kubayisha.’​—MÂKO 6:34.

1. Bua tshinyi kabiena bikemesha bua mudi bantu bikale ne ngikadilu itudi tuanyisha?

MU BIKONDO bishilangane bantu ba bungi mbaleje ngikadilu milenga. Udi mua kumvua bua tshinyi mbayileje. Yehowa Nzambi udi ne dinanga, bulenga, kalolo ne ngikadilu mikuabu itutu tuanyisha. Ne bu mudi bantu bafukibue mu tshimfuanyi tshia Nzambi, tudi mua kumvua bua tshinyi ba bungi batu ne ndambu wa dinanga, bulenga, luse ne ngikadilu mikuabu ya Nzambi, anu mutu bantu bavule baleja ne: badi ne kuondo ka muoyo. (Genese 1:26; Lomo 2:14, 15) Kadi anu bu muudi mua kumona, bamue bantu batu baleja ngikadilu eyi bipepele kupita bakuabu.

2. Ng’amue malu mimpe kayi adi bantu mua kuenza, pamu’apa bela meji ne: badi bidikija Kristo?

² Bumue udi mumanye bantu balume ne bakaji batu misangu mivule basamba anyi bambuluisha babedi, bumvuila balema luse peshi babanyina bapele bintu ne kalolo. Ela kabidi meji bua bantu badi, bua luse, bitabe bua kuenza mudimu mu nzubu itubu balamina bena nsudi anyi bana ba nshiya, mu mpitadi anyi mu nzubu ya dilamina bena masama a lufu, peshi bantu badi badienzeja bua kuambuluisha binabu badi kabayi ne nzubu anyi bena tshimuangi. Pamu’apa bamue ba kudibu badi bela meji ne: badi balonda tshilejilu tshivua Yezu mushile bena Kristo. Evanjeliyo idi yamba ne: Kristo wakuondapa babedi ne wakapesha bavua ne nzala biakudia. (Mâko 1:34; 8:1-9; Luka 4:40) Dinanga, malu mimpe ne luse bivua nabi Yezu bidi bileja ‘meji a Kristo,’ uvua yeye muine widikija Tatuende wa mu diulu.​—1 Kolinto 2:16.

3. Ntshinyi tshitudi ne bua kukonkonona bua kumona mua kumvua bimpe malu malenga akenza Yezu?

³ Kadi kuenaku mumone ne: lelu bantu ba bungi bavua dinanga ne luse lua Yezu bilenge ku muoyo badi balengulula ngikadilu munene wa meji a Kristo anyi? Tudi mua kujingulula muanda eu pa kukonkonona bimpe-bimpe Mâko nshapita 6. Tudi tubalamu ne: bantu bakalua ne babedi kudi Yezu bua kubuondapaye. Tudi tumvua kabidi muaba eu ne: pakamonaye bantu binunu ne binunu bavua balue kudiye bikale ne nzala, Yezu wakabapesha biakudia bia mu tshishima. (Mâko 6:35-44, 54-56) Kuondapa babedi ne kupesha bantu bavua ne nzala biakudia avua malu a pa buawu avua aleja dinanga ne luse, kadi malu aa ke avua Yezu ujinga kuenzela bantu kumpala anyi? Ne mmunyi mutudi mua kuidikija bimpe tshilejilu tshiende tshipuangane tshia dinanga, bulenga ne luse, anu muakidikijaye pende Yehowa?

Wakapangadija bua kukumbaja majinga a mu nyuma a bantu

4. Mmalu kayi adi mu muyuki wa mu Mâko 6:30-34?

⁴ Yezu wakumvuila bantu bavua bamunyunguluke luse, tshia kumpala bua majinga abu a mu nyuma. Majinga au avua ne mushinga wa bungi kupita a bintu bia ku mubidi. Tangila muyuki udi mu Mâko 6:30-34. Bualu budibu balondemu buakenzekela ku muelelu kua Dijiba dia Galela, pabuipi ne tshikondo tshia Pasaka wa mu 32 B.B. Bapostolo bavua ne tshiji, kadi tshiji atshi katshivua tshia patupu to. Bu muvuabu bafuma ku luendu lule, bakalua kudi Yezu bajinga kumulondela malu avuabu bapete. Kadi bantu tshisumbu bakunguila. Bua bungi buabu, Yezu ne bapostolo bende kabavua mua kudia anyi kuikisha to. Ke Yezu kuambila bapostolo ne: “Tuyayi mu muaba mupengame bua nuenu kuikisha tshitupa.” (Mâko 6:31, MML) Kubuelabu mu buatu, bivua bu pabuipi ne Kapênuma, kuyabu muaba wa pa nkaya dishiya dia Dijiba dia Galela. Kadi bantu bakanyema lubilu benda balonda ku muelelu wa mâyi, kufikilabu buatu kumpala. Ntshinyi tshivua Yezu mua kuenza? Uvuaku mumvue tshiji bua muvua bantu bamupangishe bua kuikisha anyi? Tòo!

5. Yezu wakumvua tshinyi bua bisumbu bia bantu bakalua kudiye, ne ntshinyi tshiakabenzelaye?

⁵ Pakamonaye tshisumbu tshia bantu aba binunu ne binunu, pamue ne babedi, bavua bamutekemene ne muoyo mujima, Yezu wakumvua bimusama ku muoyo. (Matayo 14:14; Mâko 6:44) Mâko wakumvuija tshiakasaka Yezu bua kubumvuila luse ne mushindu wakabambuluishaye, wamba ne: ‘Wakatangila tshisumbu tshinene tshia bantu, wakadi nabu luse, bualu bua buobu bakadi bu mikoko yakadi kayiyi ne mulami; yeye wakabanga kubayisha malu a bungi.’ (Mâko 6:34) Yezu kavua mumone anu tshisumbu tshia bantu mu tshi-bungi to. Wakamona muntu ne muntu ne majinga ende a mu nyuma. Bavua bu mikoko mipambuke kakuyi muntu wa kuyambuluisha, kayiyi ne mulami bua kuyilombola ku mpata ya bisonsa bibishi anyi bua kuyikuba. Yezu uvua mumanye ne: bamfumu ba bitendelelu kabayi luse bavua bapetula bantu ne balengulula majinga abu a mu nyuma, pamutu pa kuikalabu balami ba dinanga. (Yehezekele 34:2-4; Yone 7:47-49) Yezu yeye kavua mua kubenzela malu a muomumue to, uvua musue kubenzela malu mimpe menemene. Wakabanga kubalongesha malu a Bukalenge bua Nzambi.

6, 7. (a) Pavua Yezu ukumbajila bantu majinga abu, mbualu kayi bua mushinga budi Evanjeliyo ileja buvuaye wenza kumpala? (b) Bua tshinyi Yezu uvua uyisha ne ulongesha?

⁶ Tangila mudi muyuki mukuabu wa muomumue uleja dilondangana dia malu ne tshidiwu umvuija pa bidi bitangila tshintu tshidi ne mushinga munene. Muyuki eu uvua mufunda kudi Luka, munganga uvua utamba kujinga bua bakuabu bikale ne makanda a mubidi. ‘Bantu ba bungi bakalonda [Yezu]; yeye wakabakidila, wakabambila bualu bua bukalenge bua Nzambi, wakakolesha bakadi ne mabedi.’ (Luka 9:11, disendamija miaku ndietu; Kolosai 4:14) Nansha mudi malu kaayi a muomumue mu muyuki wonso udi wakula bua bishima, kadi mmuanda kayi udibu baleje kumpala muaba eu mu muyuki wa Luka eu mufundisha ku nyuma? Mmuanda wa se: Yezu wakalongesha bantu.

⁷ Bidi bipetangana menemene ne bualu bua mushinga wa bungi budi mu Mâko 6:34. Mvese eu udi uleja patoke mushindu wa kumpala uvua Yezu umvua muoyo umusaka bua kuleja luse. Wakalongesha bantu ne kubamanyisha malu a mu nyuma avuabu bajinga. Ku ntuadijilu wa mudimu wende, Yezu ukavua muambe ne: ‘Bundi nabu mbua kuambila misoko mikuabu lumu luimpe lua bukalenge bua Nzambi; buakantuminabu mbualu ebu.’ (Luka 4:43) Kadi tudi mua kudishima bituela meji ne: Yezu wakamanyisha mukenji wa Bukalenge bualu bavua bamusaka ku bukole, bienze bu se: buambi buende buvua bua tshidingishilu. Tòo, luse luvuaye umvuila bantu ke tshintu tshinene tshivua tshimusaka bua kubambila lumu luimpe. Bualu buimpe menemene buvua Yezu mua kuenzela bantu (nansha babedi, bavuabu bakengesha kudi ba-demon, bapele anyi bantu bavua ne nzala) buvua bua kubambuluisha bua kumanya, kuitaba ne kunanga bulelela bua Bukalenge bua Nzambi. Bulelela abu buvua ne mushinga wa bungi pa kutangila mudimu wenza Bukalenge abu: kubingisha bumfumu bua Yehowa ne kupesha bantu mabenesha a kashidi.

8. Mmunyi muvua Yezu wangata mudimu wende wa diyisha ne dilongesha?

⁸ Kuyisha Bukalenge ne tshisumi kuvua bumue bua ku malu manene avua Yezu muvuile pa buloba. Pabuipi ne ku ndekelu kua mudimu wende pa buloba, Yezu wakambila Pilato ne: ‘Ngakaledibua bua bualu ebu, ngakuluila pa buloba bualu ebu, ne bua kuamba malu malelela. Muntu yonso wa bulelela udi umvua dîyi dianyi.’ (Yone 18:37) Tudi bamone mu biena-bualu bibidi bishale ne: Yezu uvua muntu wa muoyo wa luse: uvua wambuluishangana, uvua muena bulunda, uvua ne ntema ku majinga a bakuabu, uvua weyemenangana, ne uvua nangananga ne dinanga. Tudi ne bua kumvua bitupa ebi bia bumuntu buende bituasua kujingulula meji a Kristo. Bidi kabidi ne mushinga bua kuvuluka bua se: meji a Kristo adi atuleja ne: Yezu wakateka mudimu wa kuyisha ne kulongesha malu a Nzambi pa muaba wa kumpala.

Wakabela bakuabu bua kuyisha

9. Mbanganyi bavua ne bua kuteka pabu diyisha ne dilongesha pa muaba wa kumpala?

⁹ Ki ng’anu Yezu nkayende uvua ne bua kuteka mudimu wa diyisha ne dilongesha pa muaba wa kumpala bua kuleja bantu dinanga ne luse to. Wakabela bayidi bende bua kuidikija malu avuaye wipatshila, malu avuaye muteke pa muaba wa kumpala ne kuidikija bienzedi biende. Tshilejilu, kunyima kua Yezu mumane kusungula bapostolo bende 12, ntshinyi tshivuabu ne bua kuenza? Mâko 3:14, 15 udi utuambila ne: ‘Yeye wakasungula dikumi ne babidi, bua kuikalabu nende ne bua kubatumaye bua kuambila bantu bualu bua Nzambi, ne bua kuikalabu ne bukole bua kumusha bademon.’ (Disendamija miaku ndietu.) Udiku mumone bualu buvua bapostolo ne bua kuenza kumpala anyi?

10, 11. (a) Mmalu kayi avua Yezu muambile bapostolo bua kuenza pakabatumaye? (b) Pakatumaye bapostolo, ntshinyi tshivua ne bua kuikala tshipatshila tshiabu?

¹⁰ Panyima, Yezu wakapesha bayidi 12 bukole bua kujikija masama a bantu ne kuipata ba-demon. (Matayo 10:1; Luka 9:1) Pashishe wakabatuma kudi ‘mikoko mijimine ya nzubu wa Isalele.’ Bua kuenza tshinyi? Yezu wakabambila ne: ‘Panutshidi nuya, nubambile ne: Bukalenge bua mu diulu budi pepi. Nukoleshe badi ne mabedi, nubishe bafue, nulengeje bena nsudi, numushe bademon.’ (Matayo 10:5-8; Luka 9:2) Kadi ntshinyi menemene tshiakenzabu? ‘Bakaya [1] bambila bantu bualu bua Nzambi ne: kudimunayi mitshima yenu. [2] Bakumusha bademon ba bungi, bakela manyi pa ba bungi bakadi ne mabedi, bakabakolesha.’​—Mâko 6:12, 13.

¹¹ Bu mudi muaba wonso kabayi batele dilongesha kumpala, dilondangana dia malu adi mu mvese udi kuulu eku kadienaku dituleja mudi tshilumbu tshia malu manene anyi bipatshila tshikale ne mushinga wa bungi anyi? (Luka 10:1-9) Nenku, katuena ne bua kupepeja bungi bua misangu idibu batele dilongesha kumpala kua diondapa nansha. Tangila malu adibu baleje muaba eu. Kumpala kua Yezu kutumaye bapostolo 12, ukavua mumvuile bantu luse bua lutatu luvuabu nalu. Tudi tubala ne: ‘Yezu wakendakana mu bimenga bionso ne mu misoko mikese, uyisha bantu mu nsunagoga yabu, ubambila bualu bua lumu luimpe lua bukalenge bua mu diulu, ukolesha bantu bakadi ne mabedi ne matekete onso. Kadi pakatangilaye bisumbu bia bantu, wakadi nabu luse, bualu bua buobu bakadi batata, bakadi bamuangalake bu mikoko idi kayiyi ne mulami. Yeye wakambila bayidi bende ne: Bulelela, bintu bia kunowa bidi bia bungi, kadi bena mudimu badi banya-banya. Nunku, nulombe Mukalenge wa bintu bia kunowa, atume biende bena mudimu mu kunowa kuende.’​—Matayo 9:35-38.

12. Bishima biakenza Yezu ne bapostolo biakakumbaja bualu kayi bukuabu?

¹² Bapostolo bavua mua kupeta ndambu wa meji a Kristo bualu bavua basomba nende. Bavua mua kumvua ne: dinanga ne luse lulelela bivuabu ne bua kuikala nabi kudi bantu bivua bibasaka bua kubayisha ne kubalongesha malu a Bukalenge, ne atshi ke tshivua ne bua kuikala tshitupa tshinene tshia bienzedi biabu bimpe. Mu diumvuangana ne muanda eu, malu malenga adi mubidi wa muntu ujinga bu mudi kuondapa babedi, kaavua anu mambuluishe patupu bantu bavua mu dikenga to. Anu muudi mua kubielela meji, diondapa babedi ne difila biakudia bia mu tshishima bivua mua kuikala bikoke bamue bantu. (Matayo 4:24, 25; 8:16; 9:32, 33; 14:35, 36; Yone 6:26) Kadi pa kumbusha diambuluisha dia ku mubidi, malu au akasaka bantu bavua baamone bua kuitaba ne: Yezu uvua Muana wa Nzambi ne “muprofete” uvua Mose mudianjile kumanyisha.​—Yone 6:14; Dutelonome 18:15.

13. Mmudimu kayi udibu baleje mu mulayi wa mu Dutelonome 18:18 uvua “muprofete” utshivua ulua ne bua kuenza?

¹³ Bua tshinyi bivua ne mushinga muvua Yezu muikale “muprofete”? Mmudimu munene kayi uvuabu bamanyishe uvua muprofete au ne bua kuenza? “Muprofete” au uvua ne bua kuenda lumu bua bishima bivuaye wenza bua kujikija masama peshi bua dipesha bavua ne nzala biakudia ne kubumvuila luse anyi? Dutelonome 18:18 wakamanyisha ne: ‘Meme nembabishile muprofete munkatshi mua bana babu bu wewe [Mose]; meme nenteke mêyi anyi onso mukana muende, ne yeye neabambile mêyi onso angamuambila.’ Nenku pavua bapostolo balonga mua kupeta ne kuikala ne muoyo wa luse, bavua bajingulula ne: meji a Kristo avua ne bua kumuenekela kabidi ku mudimu wabu wa diyisha ne dilongesha malu a Nzambi. Abu ke bualu butambe buimpe buvuabu mua kuenzela bantu. Ku diambuluisha dia mudimu eu, babedi ne bapele bavua mua kupeta masanka a kashidi, ki mmasanka adi ashikila ne muoyo eu wa tshitupa tshîpi anyi biakudia bia dituku dimue anyi abidi nansha.​—Yone 6:26-30.

Ikala ne meji a Kristo lelu

14. Mmunyi mudi mudimu wetu wa buambi ulomba bua kuikala ne meji a Kristo?

¹⁴ Kakuena muntu nansha umue udi mua kuamba ne: meji a Kristo avuaku anu mu bidimu lukama bia kumpala, ne bavua nawu anu kudi Yezu ne bayidi bende ba kumpala bavua mupostolo Paulo mufunde bualu buabu ne: ‘Tudi ne meji a Kristo’ nansha. (1 Kolinto 2:16) Tudi tuitaba kakuyi dielakana ne: tudi ne bujitu bua kuyisha lumu luimpe ne kuvuija bantu bayidi. (Matayo 24:14; 28:19, 20) Nenku bidi ne mushinga bua tuetu kuela meji bua kumanya tshitudi tuipatshila patudi tuenza mudimu eu. Katuena ne bua kuwenza anu bualu mbambe bua kuwenza to. Dinanga ditudi nadi kudi Nzambi ke bualu bua kumpala butudi tuenzela mudimu wa buambi; ne bua kufuana Kristo, luse ludi ne bua kutusaka bua kuyisha bantu ne kubalongesha.​—Matayo 22:37-39.

15. Bua tshinyi luse nngikadilu wa mushinga mu mudimu wetu wa diambuluisha bantu?

¹⁵ Bushuwa, kabitu bitekete bua kumvuila badi kabayi mu tshitendelelu tshietu luse to, nangananga padibu batubuidia anyi batuipata peshi batuluisha. Kadi, tuetu katutshiyi banange bantu ne katutshiyi tubumvuila luse, tudi mua kujimija kenzela mene ka mudimu wa buambi. Kadi mmunyi mutudi mua kuikala ne luse? Tudi ne bua kumona bantu muvua Yezu ubamona, bu badi ‘batata, bamuangalake bu mikoko idi kayiyi ne mulami.’ (Matayo 9:36) Mêyi aa kaenaku atuleja nsombelu udi nende bantu ba bungi lelu’eu anyi? Mbabalengulule ne mbabafofomije mêsu mu nyuma kudi balami ba mu bitendelelu bia dishima. Ke bua tshinyi ki mbamanye mibelu mimpe idi mu Bible peshi malu mimpe ikala Bukalenge bua Nzambi mua kuenza pa buloba mu Mparadizu mu katupa kîpi emu. Dituku dionso edi badi ne ntatu bu mudi bupele, matandu mu dîku, masama ne lufu, kadi kabena ne ditekemena dia Bukalenge nansha. Tuetu tudi ne tshidibu bakeba: lumu luimpe ludi lupandisha bantu, ludi luakula bua Bukalenge bua Nzambi bujadika mu diulu.

16. Bua tshinyi tudi ne bua kujinga bua kuambila bantu bakuabu lumu luimpe?

¹⁶ Nenku paudi welangana meji pa malu a mu nyuma adi bantu badi bakunyunguluke bakengela, kuenaku umvua muoyo ukusaka bua kuenza muebe muonso bua kubambila malu mimpe adi Nzambi mulongolole anyi? Bushuwa, mudimu utudi tuenza udi uleja luse lutudi nalu. Patudi tumvuila bantu luse bu muakabumvuila Yezu luse, nebimuenekele ku dîyi dietu dia mukana, ku mpala wetu ne ku ndongeshilu wetu. Bionso abi nebienze bua mukenji wetu usankishe bantu badi “badiakaje bimpe bua muoyo wa kashidi.”​—Bienzedi 13:48, NW.

17. (a) Mmu imue mishindu kayi mutudi mua kuleja bantu bakuabu dinanga ne luse? (b) Bua tshinyi ki ntshilumbu tshia kuenzela bantu malu mimpe peshi kuenza buambi bua kubambuluisha?

¹⁷ Dinanga ne luse bitudi nabi bidi ne bua kumueneka mu nsombelu wetu mujima. Mmumue ne: tudi ne bua kuenzela bakengi, babedi ne bapele malu malenga, malu makumbanyine adi mua kubapepejilaku dikenga diabu. Bidi biumvuija ne: tudi tudienzeja mu mêyi ne mu bienzedi bua kumbusha kanyinganyinga kadi kakuate bantu badi bafuishe bananga babu. (Luka 7:11-15; Yone 11:33-35) Kadi malu aa adi aleja dinanga, bulenga ne luse kaena ne bua kulua tshipatshila tshinene tshia bienzedi bietu bilenga to, bu mudibi bua bamue bena mudimu wa diambuluisha bakengi. Madikolela adi ne mushinga bua kashidi ng’adi ngikadilu yetu milenga itusaka bua kuenza, madikolela adi amuenekela ku mudimu wa bena Kristo wa diyisha ne dilongesha. Vuluka tshiakamba Yezu bua bamfumu ba bitendelelu bena Yuda ne: “Nudi [nufila] tshia dikumi tshia bikunyibue bu luenyi, tshidibua luenyi ne tshikote, kadi nudi nulengulula malongesha matambe bunene a mu Mikenji, bu buakane, luse ne lulamatu: abu ke bualu bunuakadi ne bua kuenza, kanuyi nulengulula bionso bidi bishala.” (Matayo 23:23, MML) Bua Yezu, katshivua tshilumbu tshia kusungula bualu bumue ku abidi aa: kuambuluisha bantu ne bintu bivuabu nabi dijinga peshi kubalongesha malu a mu nyuma adi afila muoyo. Yezu wakenza onso abidi. Kadi, mbiumvuike bimpe ne: mudimu wende wa dilongesha uvua wangata muaba wa kumpala bualu lumu luimpe luvuaye umanyisha luvua mua kuambuluisha bantu bua kashidi.​—Yone 20:16.

18. Dikonkonona meji a Kristo didi ne bua kutusaka ku tshinyi?

¹⁸ Tudi tuanyisha bikole bua mudi Yehowa mutuleje meji a Kristo. Ku diambuluisha dia Evanjeliyo, tudi mua kufika ku dimanya bimpe ngenyi, malu avua muoyo umvua, ngikadilu, midimu ne malu a mushinga a muntu mutambe bunene wa katshia ne katshia. Tshiashadi ntshia se: tubale, tuelangane meji ne tutumikile malu adi Bible uleja bua Yezu. Tuvulukayi ne: bituasua kuenza malu bu Yezu, tudi ne bua kuanji kulonga mua kumanya mua kuela meji, kumvua malu ne kukonkonona mianda anu muakenzaye, bilondeshile bukole butudi nabu (mutudi bantu bapange bupuangane). Nenku tupangadijayi bua kupeta ne kuleja meji a Kristo. Eu ke nsombelu muimpe ku yonso, mushindu muimpe wa tuetu kuenzela bakuabu malu ne wa tuetu ne bantu bakuabu kusemena pabuipi ne muntu uvua Yezu muleje bimpe menemene: Yehowa, Nzambi wetu wa dinanga.​—2 Kolinto 1:3; Ebelu 1:3.

Newandamune munyi?

• Ntshinyi tshidi Bible umvuija bua mushindu uvua Yezu wambuluisha bakengi?

• Yezu wakatamba kushindamena pa bualu kayi pakatumaye balongi bende?

• Mmunyi mutudi mua kuleja ‘meji a Kristo’ mu malu etu?

[Tshimfuanyi dibeji dijima mu dibeji 23]

[Tshimfuanyi mu dibeji 24]

Mbualu kayi buimpe menemene budi bena Kristo mua kuenzela bantu bakuabu?