Udi mumanye tshidi bumpaka-manga anyi?

MBIKOLE bua kumvuija bumpaka-manga bua matuku etu aa. Bidi nanku bualu bampaka-manga mbashilangane bikole. Kabena bitaba ne: badi ne mfumu ku mutu peshi malongesha a nshindamenu anyi mukanda munsantu bua kukeba buobumue mu malongesha abu nansha. Mbashilangane kabidi ku bilele, ku ndongoluelu ya malu, ku mikiya ne ku nzambi idibu basue kukukuila. Mufundi kampanda udi uleja ne: “Malu a dialu adi apetesha muntu ‘mushindu wa kudisunguila’ ngenyi.” Mufundi mukuabu udi wamba ne: “Batendeledi bavule ba nzambi ya kumpala kua Buena-Kristo kabena bumvuangana mu malu a bungi to.”

Bua ba bungi ba kudibu, dibenga kumvuangana edi kadiena ne bualu to. Mukanda kampanda udi ulongesha malu a bu-mpaka udi wamba ne: “Paudi kumpala kua malu adi amueneka bu adi abengangana, konkonona malu au ne udiangatshile dipangadika dia tshiudi mua kulonda. Londa tshiudi umona tshilelela. Tudi mua kuamba munga mushindu ne: kuelakanyi bua kusungula mikiya ne mikanda ya malu a mikiya ikadibu bapatule bua kumanya idi mikuakanyine munkatshi muayi to.”

Bua bantu badi bamanye tshidi bulelela, malu aa adi aleja dibenga kumvuangana adi ajula lutatu. Bulelela mbualu bua bushuwa budi bujalame. Malu kaatu malelela anu bualu muntu udi uamona peshi wela meji ta witaba ne: mmalelela nansha. Tshilejilu, tshikondo kampanda ba-minganga bavua bamba muvuabu mua kuondapa disama dia bisulusulu pa kukosa nzolo bipesa bibidi ne kubiteka pa tshiadi tshia mubedi. Babedi bavule bavua bitaba ne muoyo mujima ne: luondapu alu luvua lujikija disama diabu. Kadi luondapu elu kaluena lulelela to, kaluena mua kujikija disama dia bisulusulu nansha. Bantu kabatu badienzela bulelela to; kadi batu badienzeja bua kubumvua.

Bible udi ujadika mudiye ne bulelela bua malu a mu nyuma. Patshivua Yezu Kristo pa buloba, wakambila Tatuende mu disambila ne: ‘Dîyi diebe mbulelela.’ (Yone 17:17) Mupostolo Paulo wakafunda ne: ‘Dîyi dionso dia mu Mukanda wa Nzambi didi difume munda mua Nzambi bu mupuya wende.’ (2 Timote 3:16) Bantu bavule badi ne manga kabatu bitaba bualu ebu to. Kadi batu bakeba ngenyi ne mibelu mu mianu, mu bitendelelu bia kale, nansha mu malu mafuikakaja. Nenku mbimpe kukonkonona tshidi Bible wamba pa bualu ebu. Kabidi, bantu pabuipi ne bonso badi bamuangata bu mukanda munsantu. Udi kabidi umue wa ku mikanda ya kalekale ya malu a Nzambi udi mushale too ne lelu. Nansha muakafundabu Bible munkatshi mua bidimu 1 600, malongesha onso adimu adi umvuangana. Tuanjibi kufuanyikija malongesha a mu Bible ne amue mitabuja a badi basue malu a bumpaka-manga.

Mbanganyi badi muaba wa mu nyuma?

Lukonko lunene mu dikeba bua kumvua malu a mu nyuma ludi nenku: Mbanganyi badi muaba wa mu nyuma? Padi eku bampaka-manga ba bungi ba matuku etu aa balonda ditabuja didi dishindamene pa ditendelela bintu bia bungi, bamue badi batendelela nzambi-mamu udibu bapesha midimu isatu: wa bunsongakaji, wa bumamu ne wa mukaji mukulakaje, udi uleja bikondo binene bia muoyo wa muntu. Bayende udi ne nsengu. Bampaka-manga bakuabu badi batendelela nzambi-mulume ne nzambi-mukaji kaba kamue. Mufundi mukuabu udi wamba ne: “nzambi-mukaji ne nzambi-mulume mmiangata bua kuleja makole a bukaji ne bulume. Nzambi yonso [muikale ne] yende ngikadilu misunguluke idi ifikisha ku difuka muoyo bimpe padibu bayisangisha pamue.” Mufundi mukuabu udi wamba ne: “Tshimue tshia ku bintu bia mushinga wa bungi biudi mua kusungula mu malu a tshianda nnzambi (Nzambi milume anyi Nzambi-mikaji) iwenza nayi mudimu. . . . Muanda eu udi ukupesha budikadidi bua kudisunguila yebe Nzambi ne pashishe kuyikukuila.”

Bible kêna ulongesha nansha bumue bua ku malu aa to. Mudimu wakenza Yezu Kristo uvua anu wa kulongesha bakuabu malu a Yehowa ‘Nzambi umuepele mulelela.’ (Yone 17:3) Bible udi wamba ne: ‘Yehowa udi munene, budiye nabu mbua kutumbishibua bikole; budiye nabu mbua kunemeshibua pa mutu pa nzambi yonso ya patupu. Bualu bua nzambi yonso ya bantu ba bende idi mpingu.’​—1 Kulondolola 16:25, 26.

Kadi netuambe tshinyi bua Diabolo? Nkonga-miaku kampanda udi umvuija muaku utudi bakudimune ne: bumpaka-manga bu “dipetangana ne diabolo.” (Webster’s Ninth New Collegiate Dictionary) Mbikole bua kupeta mpaka-manga lelu’eu udi mua kuitaba diumvuija edi, bualu bavule kabatu nansha bitaba ne: Satana Diabolo utuku to. Nsongakaji mukuabu udibu bumvuije bualu buende mu tshikandakanda kansanga bu “munene wa bampaka-manga ne mulombodi wa tshimue tshia ku bisumbu biabu binene mu ditunga dia Irlande” udi wamba nenku: “Kuitaba ne: Diabolo utuku nkuitaba Buena-Kristo . . . [Diabolo] kêna mua kusombela muaba udi kauyi Nzambi to.”​—The Irish Times.

Bible yeye udi ujadika mudi Diabolo kuoku ne wamba mudiye ukebesha makenga ne bimvundu bivule bidi pa buloba. (Buakabuluibua 12:12) Yezu kakalongesha anu bua se: Diabolo udiku to, kadi wakaleja kabidi mudi muntu mua kuenza disua dia Diabolo kayi mumanye. Tshilejilu, pavua Yezu pa buloba, kuvua balombodi ba bitendelelu bavua badimona bu bakane, bu bana ba Nzambi ne badiangata bu bantu bavua benza disua dia Nzambi. Bu muvua Yezu umona malu a mu mitshima yabu, kakitaba ne: bavua bana ba Nzambi to. Wakabambila patoke ne: “Nuenu nudi bana ba Diabolo, tatu wenu, nudi basue kuenza bu mudi nkuka ya tatu wenu.” (Yone 8:44) Pashishe, mukanda wa Buakabuluibua udi wamba ne: Diabolo ‘mmudingi wa ba pa buloba bonso.’​—Buakabuluibua 12:9.

Kutu amue majimbu mimpe anyi?

Majimbu atu misangu yonso umvuangana ne malu a dialu. Bantu bavule ba kale ne ba lelu badi bamba ne: majimbu adi nawu bampaka-manga nga kukengesha nawu bantu bakuabu. Batu bamba mudi bampaka-manga ne bena mupongo bikale ne bukole bua kutuangana masama makole nansha lufu luine mu majimbu abu. Pa tshibidilu batu bamba ne: bena mupongo ke batu bakebelangana ntatu mishilangane: masama, nansha lufu ne dinyanguka dia bia pa madimi.

Lelu bena mupongo ne bampaka-manga badi bavila malu adibu babamba aa. Nansha mudibu bitaba ne: kudi bena mupongo bakese batu benzelangana bibi, ba bungi badi bajadika ne: majimbu abu nga kuambuluishangana nawu, ki nga kuenzelangana nawu bibi to. Bampangano batendeledi ba bifukibua badi balongesha ne: makenga adi muena majimbu ukebelangana neamualukidile misangu isatu, ne badi bamba kabidi ne: ebu ke bualu bunene budi bubapangisha bua kuelangana milawu. Munkatshi mua majimbu adibu bamba mudiwu mimpe mudi kabidi bizaba bia kudilama nabi, bia kuipata nabi nyuma mibi idibu bashiye mu lubanza kudi bantu bavuamu kumpala, bizaba bia kukoka nabi balume peshi bakaji, bia kudiondapa nabi ne kulama nabi makanda a mubidi ne mudimu, ne bia kupeta nabi mfranga. Pa kumona bungi bua malu adibu bamba adi manga mua kuenza, kabiena bikemesha bua mudi bantu ba bungi balue kuananga.

Kadi Bible kêna ufila dishilangana pankatshi pa majimbu adi mimpe ne adi mabi nansha. Mu Mikenji ivuaye mupeshe Mose, Nzambi wakaleja patoke tshidiye musue. Wakamba ne: “Kanuenji malu a bena dialu [anyi bena majimbu].” (Lewitiki 19:26, Mukanda wa Mvidi Mukulu) Tudi tubalamu kabidi ne: ‘Muntu kikadi munkatshi muenu udi muena dijimbu nansha muena bilengulengu, nansha muena buloji, nansha musesuishi wa bantu ne milowu yende, nansha mutendeledi wa bakishi.’​—Dutelonome 18:10, 11.

Bua tshinganyi Nzambi wakamba nanku? Ki mbua se: mmusue kutupangisha masanka kampanda to. Yehowa wakapesha bantu bende mikenji eyi bualu uvua mubanange ne kavua musue bua bikale ne buôwa ne bikale balonda malu mafuikakaja nansha. Udi wambila basadidi bende bua kumulombabu bintu bidibu nabi dijinga. Nzambi m’Mufidi wa “dipa dilenga dionso [ne] dipa diakane dionso.” (Yakobo 1:17, MMM) Mupostolo Yone wakajadikila bena kuitabuja nende ne: ‘Bintu bionso bitudi tulomba [Nzambi], tudi tubiangata kudiye, bualu bua tudi tulama mikenji yende, tudi tuenza malu adi avuija disanka ku mêsu kuende.’​—1 Yone 3:22.

Tuambe tshinyi bua nyuma mibi?

Bena mupongo ne bampaka-manga ba bungi badi bamba ne: Nyuma mibi ituku, anu bu mutu Bible wamba. Muntu mukuabu mutangalaji wa ngenyi idi itangila bena mupongo ne bampaka-manga wakadimuija bantu pavuaye welangana nkonko ne: “Mikishi idi pambelu ponso apa: Idi kuoku, mu muaba udi kauyi umueneka mufuanangane ne utudi basombele eu, udi mûle tente ne bifukibua bidi ne muoyo. . . . Miaku bu mudi: ‘Mukishi,’ ‘Nyuma mubi’ ne ‘Demon’ idi yumvuija malu malelela. Nyuma eyi idi ne bukole bua bungi. . . . Nyuma ya lungenyi lua bungi . . . idi ne bukole (biwikala musue kuyunzuluila tshiibi) bua yoyi kubuela muaba utudi tuetu basombele eu. . . . Idi mua kukubuela munda . . . , idi mene mua kulombola malu ebe onso. Mbifuanangane bikole ne miyuki ya kale ya Ba-demon bavua babuelangana munda.”

Mu bikondo bia kale, ba-demon bavua bakengesha bantu mu mishindu ya bungi. Bamue bavuabu babuela munda bavua bashala tumama, bakuabu bampofo, bamue bapâla ne banga bapeta makanda a katshia ne katshia. (Matayo 9:32; 12:22; 17:15, 18; Mâko 5:2-5; Luka 8:29; 9:42; 11:14; Bienzedi 19:16) Imue misangu, dikenga divua dipita bukole pavua ba-demon ba bungi babuela muntu umue munda. (Luka 8:2, 30) Nenku ki mbua tshianana to padi Yehowa udimuija bantu bua kuepuka bumpaka-manga ne bilele bikuabu bia malu a mîdima.

Ntendelelu mushindamene pa bulelela

Lelu’eu bumpaka-manga budi bukoka bantu bavule bualu budi bumueneka bu ditendelela bifukibua didi kadiyi ne njiwu. Miaba mikuabu bantu mbalue kubuanyisha be. Kabena babutshina to. Kadi, misangu mivule bantu mbalue kubumona bu bualu bupepele. Muaba udi budikadidi bua ntendelelu bufikisha bantu ba bungi ku dilonda nansha bintu bia patupu, bantu mbabange kunemeka bumpaka-manga bikole.

Bitendelelu mbilue bu tshisalu, muaba udi bantu ne budikadidi bua kusungula tshitendelelu tshidi tshiakanyine majinga abu, anu mutu muntu usumba mukolo wa bisabata mu tshisalu. Kadi Yezu yeye wakakula bua bintu bia kusungula anu bibidi patupu. Wakamba ne: ‘Nubuele ku mushiku wa mbelu mubumbakane; bualu bua mushiku wa mbelu udi munene, ne njila wa kabutu udi munene, ne bantu ba bungi badi babuelamu. Mushiku wa mbelu udi mubumbakane, ne njila wa ku muoyo udi mubumbakane, ne bantu banya-banya badi bamumona.’ (Matayo 7:13, 14) Pa tshibidilu tutu ne budikadidi bua kusungula njila utudi basue. Kadi disungula edi didi ne mushinga wa bungi menemene bualu tudi mua kupeta masanka a tshiendelele peshi kuapangila. Bua kumvua malu a mu nyuma, tudi ne bua kulonda njila wa bulelela: njila utudi mua kupeta anu mu Bible.

[Tshimfuanyi mu dibeji 5]

Bantu bavule lelu badi bamona bumpaka-manga bu ditendelela bifukibua didi kadiyi ne njiwu

[Tshimfuanyi mu dibeji 6]

Majimbu atu misangu yonso apetangana ne malu a mîdima

[Tshimfuanyimu dibeji 6]

Bena mupongo ne bena manga batu benza disua dia Diabolo kabayi bamanye anyi?

[Bimfuanyi mu dibeji 7]

Bible udi uleja njila wa bulelela