‘Batu bakula bua malu mimpe ne bua dinanga’

BAVUA bashiminyine Bantemu ba Yehowa ba mu ditunga dia France malu a bungi bidimu bishale ebi. Baluishi ba Bantemu bakamba malu a mafi ne bakakonyangaja makuabu bua kubanyangila lumu. Ku ntuadijilu wa tshidimu tshia 1999, Bantemu ba Yehowa ba mu ditunga dijima dia France bakabanya tubeji miliyo 12 tuvua ne tshiena-bualu tshia se: Bena France, badi banushima! Tubeji etu tuvua tuleja patoke malu avuabu babashiminyina.

Matuku makese kunyima kua diabanya tubeji etu, Muena-muabu Jean Bonhomme (munganga uvua tshipuita-munua-mfuanka kale), wakatumina bafundi ba tshikandakanda kampanda mukanda. Wakafunda ne: “Imue misangu, Bantemu ba Yehowa batu balua kuanyi. Batu balua kungambila bua malu mimpe ne bua dinangangana buloba bujima. . . . Kabatu bangenzeja bua kubateleja ku bukole nansha. Batu bakula ne lutulu ne banteleja bimpe pandi mbelesha mpata.”

Muena-muabu Bonhomme wakamba bua malu a mu nyuma a Bantemu ba Yehowa ne: “Bua bidi bibatangila, dibenga kulonda malu a panu kadiena mua kuenzela bantu bibi nansha. Kadi bua bamue bena tshididi, dibenga kulonda malu a panu mbualu budi bufuanyike kunyanga menemene ditalala ne diumvuangana bidi mu bantu.”