“Dibenesha dia kudi Yehowa ke didi divuija muntu mubanji”

TUETU buonso tutu basue bua kupeta mabenesha. Mabenesha atu afila disanka, diakalengele, anyi dilubuluka. Bu mudi Yehowa Mufidi wa ‘kupa kuonso kuimpe ne dipa dionso diakane tshishiki,’ dibenesha dionso dilelela dia tshiendelele didi difumina kudi Mufuki wetu wa dinanga. (Yakobo 1:17) Udi usankisha bantu bonso ne mabenesha mavule, usankisha too ne badi kabayi bamumanye. Yezu wakamba bua Tatuende ne: ‘Yeye utu wabandishila bantu babi ne bimpe dîba, yeye kabidi utu watumina bantu bimpe ne babi mvula.’ (Matayo 5:45) Kadi, Yehowa utu nangananga utamba kuditatshisha bua bantu badi bamunange.​—Dutelonome 28:1-14; Yobo 1:1; 42:12.

Mufundi wa Misambu wakamba ne: ‘Yehowa kêna upala badi benda mu buakane tshintu tshimpe [nansha] tshimue.’ (Musambu 84:11) Bushuwa, bantu badi basadila Yehowa badi ne nsombelu muimpe mutambe, nsombelu wa nsongo. Mbajadike se: ‘Dibenesha dia kudi Yehowa ke didi divuija muntu mubanji, ne kêna usakidila kanyinganyinga pa mutu padi.’ Bible udi wamba kabidi ne: “Bantu badi [Yehowa] ubenesha ke bapiana buloba.” (Nsumuinu 10:22, NW; Musambu 37:22, 29, MMM) Netshikale dibenesha dia dikema!

Mmunyi mutudi mua kupeta dibenesha dia kudi Yehowa? Tshia kumpala: tudi ne bua kuenza bua kupeta ngikadilu idi imusankisha. (Dutelonome 30:16, 19, 20; Mika 6:8) Tudi tumuenena bualu ebu mu tshilejilu tshia bamue basadidi basatu ba Yehowa ba mu bikondo bia kale.

Yehowa udi ubenesha basadidi bende

Noa uvua musadidi munene wa Nzambi. Tudi tubala mu Genese 6:8 ne: “Noa wakasangana luse ku mesu kua Yehowa.” Mbua tshinyi? Bualu Noa uvua ne butumike. Bible udi utuambila ne: “Noa wakendakana ne Nzambi.” Noa uvua ulonda mêyi makane a Yehowa ne utumikila mikenji yende. Tshikondo tshivua buloba buwule ne malu a tshikisu ne bibidilu bibole, Noa yeye “wakenza mianda yonso yakamuambila Nzambi.” (Genese 6:9, 22) Ke bualu kayi Yehowa wakamuambila bua kuenza ‘buatu bua kusungila nabu ba mu nzubu muende.’ (Ebelu 11:7) Mushindu eu ke uvua Noa ne ba mu dîku diende bapanduke ku kabutu ka bantu ba mu tshikondo atshi, kupandishabu kabidi ne dîku dijima dia bukua-bantu. Nunku Noa wakafua ne ditekemena dia kubishibua bua kupeta muoyo wa kashidi pa buloba bukudimuna mparadizu. Mmabenesha bulengapu kayi nunku akapetaye!

Abalahama pende uvua ne ngikadilu ivua isankisha Yehowa. Ngikadilu wa kumpala mutambe bunene uvuaye nende uvua wa ditabuja. (Ebelu 11:8-10) Abalahama wakumbuka mu Ula, pashishe kulua kumbuka kabidi mu Halana (bimenga bivua ne bubanji buvule) bualu uvua ne ditabuja bua muanda uvua Yehowa mumulaye wa se: Diminu diende divua ne bua kuvulangana ne kulua dibenesha bua bisamba bionso bia bantu. (Genese 12:2, 3) Nansha muakapetaye mateta munkatshi mua bidimu bivule, ditabuja diende diakamupetesha disanka pakaledibua muanende Isaka. Ku diambuluisha dia muana eu, Abalahama wakalua nkambua wa tshisamba tshia Isalele tshivua Nzambi mudisunguile, ne ndekelu wa bionso wakalua kabidi nkambua wa Masiya. (Lomo 4:19-21) Kabidi, udi ‘nkambua wa bonso badi bitabuja,’ ne bakamubikila ne: “mulunda wa Nzambi.” (Lomo 4:11; Yakobo 2:23; Galatia 3:7, 29) Eu uvua nsombelu wa nsongo uvuaye nende, ne wakapeta mabenesha mavule a dikema!

Tuakulabi kabidi bua Mose muena lulamatu. Dianyisha divuaye nadi bua malu a mu nyuma ke divua ngikadilu mutambe kusunguluka uvuaye nende. Mose wakabenga mabanji onso a mu Ejipitu ne ‘wakashala mushindame bu uvua mumone Eu utu kayi umueneka.’ (Ebelu 11:27, NW) Pakenza Mose bidimu 40 mu Midiyana, wakapingana mu Ejipitu ukadi mukulakaje ne kuyaye bua kumonangana ne Palô, mukalenge mutambe bunene uvuaku tshikondo atshi, bua apatule bana babu mu bupika. (Ekesode 7:1-7) Wakadimuena bipupu dikumi, diabuluka dia mâyi a Mbuu mukunze ne dibutuka dia biluilu bia Palô. Yehowa wakamuangata bua kupeshaye Isalele Mikenji ne bua kuikalaye mutuangaji wa tshipungidi tshia Nzambi ne tshisamba tshipiatshipia etshi. Mose wakalombola tshisamba tshia Isalele bidimu 40 mu tshipela. Muoyo wende uvua ne tshipatshila tshilelela, ne wakapeta midimu milenga ya bungi.

Mabenesha a mu matuku etu aa

Miyuki eyi idi ileja se: mioyo ya basadidi ba Nzambi idi ne tshipatshila tshilelela. Padi bantu ba Yehowa bapeta ngikadilu bu mudi wa butumike, ditabuja ne dianyisha dia malu a mu nyuma, badi bapeta mabenesha mavule.

Mmabenesha kayi atudi tupeta? Bushuwa, padi eku bantu bavule ba mu Bukua-buena-Kristo bafiototoka ne nzala ya mu nyuma, tuetu tudi mua “kusanka bua buimpe bua Yehowa.” (Yelemiya 31:12) Ku butuangaji bua Yezu Kristo ne “mupika wa lulamatu ne wa budimu,” Yehowa mmutupeshe biakudia bia mu nyuma bia bungi menemene bidi bituambuluisha bua kutungunuka mu ‘njila wa ku muoyo.’ (Matayo 7:13, 14; 24:45, NW; Yone 17:3) Dibenesha dikuabu dinene ndia kusangila ne bana betu bena Kristo. Tudi tupeta disanka divule patudi mu bisangilu anyi miaba mikuabu ne batendeledi netu badi batuleja dinanga ne badienzeja ne muoyo mujima bua kuvuala ‘[bumuntu] bupiabupia.’ (Kolosai 3:8-10; Musambu 133:1) Kadi, dibenesha ditambe bunene ditudi nadi ndiakalenga dinene dia kuikala mu malanda a sungasunga ne Yehowa Nzambi ne dia kulonda mu makasa a Muanende Yezu Kristo.​—Lomo 5:1, 8; Filipoi 3:8.

Patudi tuela meji bua mabenesha aa, tudi tufika ku dijingulula mushindu udi mudimu utudi tuenzela Nzambi muikale ne mushinga mukole menemene. Pamu’apa tudi tuvuluka mufuanu wa Yezu wa ngenda-mushinga uvua ukeba mabue mimpe a mushinga mukole. Yezu wakamba bua muntu eu ne: ‘Pakasanganaye dibue dia mushinga mutambe bukole, wakaya, wakapana bintu biende bionso, wakadisumba.’ (Matayo 13:46) Bushuwa, eu ke mushindu utudi tumvua bua malanda etu ne Yehowa, bua diakalenga ditudi nadi dia kumusadila, bua bana betu bena Kristo, ditekemena dietu dia bena Kristo, ne mabenesha makuabu onso adi atangila ditabuja dietu. Kakuena tshintu tshikuabu tshidi ne mushinga mupite wa malu aa mu nsombelu wetu.

Pingajila Yehowa bintu

Bu mutudi tuangata Yehowa bu Mufidi wa dipa dionso dimpe, mioyo yetu idi itusaka bua kumuleja dianyisha bua mabenesha atudi tupeta. Mmunyi mutudi mua kuenza bualu ebu? Mushindu wa kumpala ngua kuambuluisha bakuabu bua kupetabu pabu mabenesha aa. (Matayo 28:19) Mu matunga mapite pa 230, Bantemu ba Yehowa mbaditue mu mudimu wa diendela bantu ku mabu bua kukumbaja anu muanda eu. Padibu benza mudimu eu, badi batula tuabu tukese tudibu natu, tuambe ne: dîba, bukole ne mpetu yabu, bua kuambuluisha bakuabu bua “bafike ku dimanya dia malu malelela.”​—1 Timote 2:4.

Angatabi tshilejilu tshia bampanda-njila ba mu tshimenga tshia Glendale, mu Californie (États-Unis). Disambombo dionso mu dinda batu benda mutantshi wa kilometre mitue ku 100 bua diya ne dipingana padibu baya kayisha bena buloko. Nansha mudibu kabayi mua kuenza mêba a bungi ne muena buloko yonso, ki mbatekete mu mikolo to. Umue wabu udi wamba ne: “Kuenza mudimu muaba wa pa buawu eu mbualu bua disanka dipite bungi. Tudi tuwenza ne disanka dia bungi. Tudi bapetamu bantu bapite bungi badi basue kumanya bulelela, nunku mbitukolele ne bua kutungunuka ne kumonangana nabu bonso. Mpindieu tudi tulonga ne bantu batanu, banayi bakuabu mbatulombe pabu bua tulonge nabu Bible.”

Bena Kristo bena mudimu ba tshisumi badi basanka bua kuenza mudimu eu wa dipandisha mioyo ya bantu kabayi balombangana difutu. Badi ne ngikadilu wa Yezu, wakamba ne: ‘Nuakangata bualu ebu tshianana, nubapabu tshianana.’ (Matayo 10:8) Bantu miliyo mivule pa buloba bujima mbaditue pabu mu dienza mudimu wa dinanga eu, ke padi bantu badi basue malu mimpe misumba ne misumba babateleja ne balua bayidi. Mu bidimu bitanu tshianana biashadi ebi, bantu batue ku 1 700 000 mbadilambule kudi Yehowa. Bua kukumbaja majinga adi amueneka mu mudimu eu udi utungunuka ne kuvulangana, bidi bikengela kupatula Bible ne mikanda ya kumulonga nayi, ne kuasa Nzubu ya Bukalenge mipiamipia ne miaba mikuabu ya bisangilu. Makuta a kukumbaja nawu malu aa adi afumina penyi? Onso atu afumina anu ku mapa a budisuile.

Bu mudi bupele buikale mu amue matunga, bantu bavule badimu badi baluangana bua kukebelaku mêku abu nansha bintu bikese bidiwu nabi dijinga. Tshikandakanda tshikuabu (New Scientist) tshidi tshileja ne: bantu muliyare mujima badi batula bia pa lukama nansha 70 bia diabu dikuta dionso didibu bapeta anu ku biakudia nkayabi. Bana betu bena Kristo bavule badi mu nsombelu eu. Buobu kabayi babambuluishe kudi bena kuitabuja nabu, kabena mua kukokesha mua kupeta nansha mikanda yetu ya bena Kristo anyi Nzubu ya Bukalenge mikumbane to.

Bushuwa, kabiena bisua kumvuija ne: bana betu aba badi basanka bua kutekela bakuabu bujitu buabu bua babambuilabu to. Kadi badi dijinga ne diambuluisha. Pavua Mose ukankamija bena Isalele bua kufilabu bintu bua kusakidila Yehowa bua mabenesha avuabu bapete, wakamba ne: ‘Kadi muntu yonso afile bintu bilondeshile bungi budi [Yehowa Nzambi] wenu munupeshe.’ (Dutelonome 16:17, MMM) Ke bualu kayi Yezu wakatumbisha mukaji mukamba kumpala kua balongi bende pakamumonaye wela “tukuta tubidi” tua mushinga mukese mu ntempelo. Mukamba au wakafila biende bionso bivuaye mukokeshe. (Luka 21:2, 3) Bia muomumue, bena Kristo badi mu matunga mapele badi pabu bafidila muabu mudibu bakokeshe. Padiku kupangika tshintu, badi mua kutshikumbaja kudi mapa adibu bafila kudi bena Kristo nabu badi kabayi mu bupele butambidile.​—2 Kolinto 8:13-15.

Patudi tupingajila Nzambi bintu mu mishindu eyi, mbimpe tuikale ne lungenyi luimpe. (2 Kolinto 8:12) Paulo wakamba ne: ‘Nunku muntu ne muntu afile bintu bu muakadisunguilaye mu mutshima wende; kafidi ne kanyinganyinga anyi bu muenzeja ku bukole; bualu bua Nzambi udi musue muena kupa udi ufila ne disanka.’ (2 Kolinto 9:7) Patudi tufila ne muoyo wetu mujima, tudi tuambuluisha bulongolodi bua Nzambi bua kuyabu kumpala anu mudibi bienzeka mpindieu, ne tudi tuvudija disanka dietu tuetu bine.​—Bienzedi 20:35.

Kuenza mudimu wa diyisha ne kufila mapa a budisuile ke mishindu ibidi itudi mua kupingajila Yehowa bintu bua mabenesha adiye utupesha. Ne bidi bitukankamija bikole patudi tumvua ne: Yehowa mmusue kubenesha kabidi bantu bakuabu bavule badi basue malu mimpe, badi pamu’apa kabayi banji kumumanya mpindieu! (2 Petelo 3:9) Nunku tutungunukayi ne kudifila ne mpetu yetu mu mudimu wa Nzambi bua kupeta bantu badi basue malu mimpe ne bua kubaleja mua kuikala ne ngikadilu wa butumike, ne ditabuja ne dianyisha. Nanku netuikale ne disanka dia kubambuluisha bua buobu ‘kulabula, kumvua ne: Yehowa udi muakane.’​—Musambu 34:8.

[Kazubu mu mabeji 28, 29]

Mishindu idi bamue bafila

MAPA BUA MUDIMU WA PA BULOBA BUJIMA

Bantu bavule batu bateka anyi balama ndambu wa mfranga itubu bela mu tushete tua mapa tudi ne miaku eyi: “Mapa bua mudimu wa pa buloba bujima wa Bantemu ba Yehowa​—Matayo 24:14.”

Ku ngondo yonso bisumbu bitu bituma mfranga eyi ku biro bia Bantemu ba Yehowa bidi ku Brooklyn mu New York bidi bilombola midimu yabu ya buloba bujima, peshi ku biro bia Bantemu bidi mu ditunga didibu basombele. Mfranga yenu ya ku budisuile eyi nudi mua kuyituma diakamue ku Biro bia Treasurer’s Office (Biro bia Mulami wa tshibutshilu) mu adrese eu: Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, anyi ku biro bia Bantemu bidi mu ditunga dinudi. Nudi mua kufila nansha bilengejilu peshi bintu bikuabu bia mushinga. Tudi tunulomba bua kutuma mapa aa pamue ne mukanda mufunda mu tshikoso udi uleja ne: aa mmapa a kashidi.

MAPA MAFILA NE DÎYI DITENTEKAPU

Muntu udi mua kupesha Société Watch Tower dipa dia mfranga ne kumvuangana nende bua se: udi mua kumupingajilayi pikalaye nayi dijinga. Bua kupeta mumvuija makuabu, suaku ufundile biro bia Treasurer’s Office (Biro bia Mulami wa tshibutshilu) mu adrese udi kuulu eku.

MAPA MALONGOLOLA

Pa kumusha mapa a mfranga mifila bua kashidi ne mapa mafila ne dîyi ditentekapu, kudi mishindu mikuabu ya kufila bintu bua kukuatshisha mudimu wa Bukalenge udi wenzeka pa buloba bujima. Mona imue mishindu:

Mfranga ya tshieya: Muntu udi mua kuenzela Société Watch Tower mikanda bua kuikalaye ne bukenji bua kuangata mfranga yende ya tshieya anyi ya pansio.

Konte ya ku banke: Muntu udi mua kufundisha konte yende ya ku banke, mikanda ya mfranga mitekesha ku banke anyi konte yende ya mfranga ya pansio mu dîna dia Société Watch Tower anyi kufunda bua kuyifutabu Société eu dîba dia lufu luende, bilondeshile mikenji ya banke ya muaba udiye.

Bukenji bua kupeta bintu ne mfranga misombesha: Badi mua kupesha Société bukenji bua kupeta bintu ne mfranga misombesha bu dipa dia kashidi.

Mpangu ne Nzubu: Muntu udi mua kupesha Société Watch Tower lupangu anyi nzubu wende pa kufila dipa dia kashidi, peshi kubishiya mu dîna dia Société kadi utungunuka ne kusombelamu patshidiye ne muoyo. Bidi bikengela kumanyisha biro bia Société bia mu ditunga dienu kumpala kua kumupesha lupangu ta nzubu.

Dipa dia kufuta ku tshidimu: Dipa dia kufuta ku tshidimu ndipa dia muntu wangata makuta anyi mikanda (idi ileja bukenji budiye nabu bua kupeta mfranga anyi bintu) ubifila kudi Société Watchtower. Pashishe muntu eu (anyi mukuabu udiye musungule) udi utuadija kupeta difutu kampanda ku tshidimu ku tshidimu patshidiye ne muoyo. Tshidimu tshidi muntu ufila dipa dia mushindu eu badi bamupuekeshila mushinga wa bitadi bivuaye ufuta bua lupetu luende.

Bintu bia bumpianyi ne bintu bitekesha: Muntu udi mua kufundisha dîna dia Société Watch Tower ku mikanda ya bumpianyi bua kuangataye bintu anyi mfranga yende, peshi kufundisha Société ku mikanda ya tshipungidi bua kumupa bukenji bua kuangata bintu bitekesha. Badi mua kukepesha mushinga wa bitadi padi bintu bitekesha mu dîna dia tshitendelelu.

Anu mudi miaku eyi: “mapa malongolola” ileja, mapa a mushindu eu atu alomba bua muafidi adianjile kudilongolola. Bua kuambuluisha bantu badi bajinga kukuatshisha mudimu udi Bantemu ba Yehowa benza pa buloba bujima ne mushindu kampanda wa mapa malongolola, Société mmupatule kakanda ka mu Anglais ne mu tshiena Espagne kadi ne tshiena-bualu tshia: Charitable Planning to Benefit Kingdom Service Worldwide (Mapa malongolola bua kukuatshisha mudimu wa Bukalenge wa pa buloba bujima). Bavua bafunde kakanda aka bua kuandamuna nkonko ya bungi idibu bele Société bua mapa, bintu bia bumpianyi ne bintu bitekesha. Kadi kabidi ne mumvuija makuabu mimpe bua mpangu ta nzubu, mfranga ne bitadi. Ne nkenza bua kuambuluisha bantu ba mu États-Unis badi badilongolola bua kupesha Société dipa dia pa buadi mpindieu anyi bua kumushila bintu dîba dia lufu, bua kusungula mushindu udi mutambe buimpe ne muakanyine bua kufila mapa aa bilondeshile mêku abu ne nsombelu yabu. Wewe dijinga ne kakanda aka, udi mua kukalomba buludiludi ku Biro bia Mapa Malongolola (Charitable Planning Office).

Kunyima kua bantu ba bungi bamane kubala kakanda aka ne bayikile ne aba badi benza mudimu ku Biro bia Mapa Malongolola, ba bungi mbafike ku dikuatshisha Bantemu ba Yehowa mu mudimu wabu wa buloba bujima, ne mbakepeshe kabidi bungi bua makuta a bitadi padibu bafile bintu ebi. Bidi bikengela kumanyisha Biro bia Mapa Malongolola ne kubitumina mukanda wonso udi utangila tshilumbu etshi. Biwikala mulongolole bua kufila mapa, udi ne bua kufundila Biro bia Mapa Malongolola anyi kuela nshinga mu adrese udi kuinshi eku, peshi ku biro bia Bantemu ba Yehowa bidi biambuluisha mu ditunga dienu.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive,

Patterson, New York 12563-9204

Telefone: (845) 306-0707