Kudiku ditekemena dia lupandu anyi?

Mbabikile lukama lua 20 lua bidimu bu lumue lua ku nkama ya bidimu idibu bapite kuela mashi a bantu panshi. Dibunda bilumbu, mvita, diluishangana dia bisa, dinua dia diamba ne bintu bikuabu bidi bikuata, dibenga kuamba malu malulame, ne tshikisu bivua biambule mbuaya nangananga mu bidimu bikese bia ku ndekelu eku. Pa kumbusha malu aa, kuvua tunyinganyinga ne makenga bilela kudi masama, bukulakaje ne lufu. Nnganyi utu kayi ujinga bua ntatu idi pa buloba lelu’eu kujikayi? Patudi tutangila malu atshilualua, tudiku mua kuamba ne: kudiku ditekemena dia lupandu anyi?

TANGILA tshikena-kumona tshivuabu baleje mupostolo Yone kukadi bidimu bu 2 000 nanku. Wakafunda ne: ‘Tangilayi, nzubu wa tshilulu wa Nzambi udi munkatshi mua bantu, ne yeye neikale nabu, ne buobu nebikale bantu bende; ne Nzambi muine neikale nabu, neikale Nzambi wabu. Yeye neakupule tshinsonji tshionso ku mêsu kuabu; ne lufu kaluena luikalaku kabidi; madilu kaena ikalaku kabidi, nansha muadi, nansha kanyinganyinga kabidi; malu a kumudilu akumuka.’ (Buakabuluibua 21:3, 4) Muprofete Yeshaya wakamba bia muomumue ne: ‘Yeye neamine lufu tshiendelele; ne Mukalenge Yehowa neakupule binsonji ku mêsu kua bantu bonso; neumushe tshipendu tshidibu bapenda natshi bantu bende, utshiumusha pa buloba buonso; bualu bua Yehowa wakuamba dîyi edi.’​—Yeshaya 25:8.

Elabi meji tshienzeka pikala milayi ya Nzambi eyi mua kukumbana! Nzambi neapikule bantu ku tshinyangu ne ku tshikisu, ku malu adi akebesha ntatu ne dibungama. Nansha masama, bukulakaje ne lufu kabiakututatshisha kabidi to! Bible udi utulaya muoyo wa tshiendelele ne nsombelu mipuangane pa buloba. (Luka 23:43; Yone 17:3) Ne bantu bonso badi bajinga muoyo eu badi mua kuupeta. ‘Nzambi mmusue bantu bonso basungidibue, bafike ku dimanya dia malu malelela.’​—1 Timote 2:3, 4.

Kadi bua tuetu kupeta mabenesha adi Nzambi mulaye mu milayi yende eyi, tudi ne bua kumanya mudimu udi nawu Yezu mu lupandu luetu ne kabidi tudi ne bua kumuitabuja. Yezu nkayende wakamba ne: ‘Nzambi wakatamba kusua ba pa buloba, yeye wakabapa Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele.’ (Yone 3:16) Pavua mupostolo Petelo wakula bua mudimu munene udi nawu Yezu mu muanda eu, wakamba ne: ‘Mu munga muntu yonso kamuena lupandu, bualu bua kakuena dinga dîna muinshi mua diulu, dipa bantu, didi dimanye mua kutusungila.’ (Bienzedi 4:12) Mupostolo Paulo ne muinende wa mudimu Sila bakabela muntu mukuabu uvua mubele lukonko ne muoyo mujima ne: ‘Itabuja Mukalenge Yezu, neusungidibue ne ba mu nzubu muebe.’​—Bienzedi 16:30, 31.

Bushuwa, Yezu Kristo udi ‘Mukalenge wa muoyo,’ ne bantu nebapetele lupandu anu mu yeye. (Bienzedi 3:15) Kadi mmunyi mudi muntu umue mua kuikala ne mudimu munene nunku wa kutupandisha? Kujingulula mudimu wende eu bimpe menemene kudi ne bua kukolesha ditekemena dietu dia lupandu.

[Mêyi a dianyisha bua bimfuanyi mu dibeji 2]

Dibeji 3: Ndeke ya bombe: foto wa USAF; bana bafiototoke ne nzala: ONU/​J. FRAND; mazuwa a mvita makuate kapia: foto wa U.S. Navy