Bansonga wetu, Yehowa kakupua mudimu wenu muoyo to!

‘Nzambi kêna upanga buakane bua kupuaye muoyo wa mudimu wenu ne wa dinanga dinuakaleja bua dîna diende, panuakakuatshila bansantu mudimu ne panutshidi nubakuatshishau.’​—EBELU 6:10.

1. Mmunyi mudi mukanda wa mu Bible wa Ebelu ne wa Malaki ileja ne: Yehowa udi wanyisha mudimu webe?

UKADIKU muenzele mulunda webe kampanda bualu buimpe, kadi kayi mukuele tuasakidila anyi? Kabiyi mpata, bidi mua kututonda bikole padibu kabayi bangata muanda kampanda muenza ne kalolo konso ne mushinga, ne bidi mua kutamba kutonda padibu baupua wonso muoyo. Kadi kabiena nanku patudi tusadila Yehowa ne mutshima wetu mujima! Bible udi wamba ne: ‘Nzambi kêna upanga buakane bua kupuaye muoyo wa mudimu wenu ne wa dinanga dinuakaleja bua dîna diende, panuakakuatshila bansantu mudimu ne panutshidi nubakuatshishau.’ (Ebelu 6:10) Ela meji bua tshidi mêyi aa umvuija. Yehowa yeye mua kupua muoyo biudi muenze ne biudi utungunuka ne kuenza mu mudimu wende, neadimone bu mupange buakane anyi kuangata muanda eu bu mpekatu. Yehowa udi Nzambi wa dianyisha, ki mmuomu anyi?​—Malaki 3:10.

2. Tshidi tshivuija kusadila Yehowa muanda wa pa buawu ntshinyi?

² Udi ne diakalenga dia pa buadi dia kutendelela Nzambi wa dianyisha eu ne kumusadila. Bu mudiku anu bena Kristo miliyo isambombo patupu (bantu pa buloba bikale batue ku miliyare isambombo), wewe udi ne diakalenga dia pa buadi. Kabidi, bu muudi uteleja ne witaba mukenji wa lumu luimpe, bidi bileja ne: Yehowa udi ukutabalela. Yezu mene wakamba ne: ‘Kakuena muntu udi mumanye mua kudivuila kundi, bikala Tatu wakuntuma kayi mumukoke.’ (Yone 6:44) Bulelela, Yehowa udi wambuluisha bantu bende muntu pa nkayende bua kupeta masanka adi afuma ku mulambu wa Kristo.

Ikala ne dianyisha bua diakalenga dinene diudi nadi

3. Mmunyi muvua bana ba Kola baleje dianyisha diabu bua diakalenga divuabu nadi dia kusadila Yehowa?

³ Anu bu mutuvua bamone mu tshiena-bualu tshishale, udi ne mushindu wa pa buawu wa kusankisha mutshima wa Yehowa. (Nsumuinu 27:11) Ebu ki mbualu buudi ne bua kupepeja to. Mu umue wa ku Misambu mifundisha ne diambuluisha dia nyuma wa Nzambi, bana ba Kola bakaleja dianyisha diabu bua diakalenga divuabu nadi dia kukuatshila Yehowa mudimu. Tudi tubala ne: “Kusomba dituku dimue mu nzubu muebe, nkupite kusomba matuku tshinunu mu muaba mukuabo. Kushala ku mushiku wa mbelu wa nzubu wa [Nzambi] wanyi, nkupite kusomba mu nzubu wa ntenta wa muntu mubi.”​—Musambu 84:11 [10], MMM.

4. (a) Ntshinyi tshidi mua kufikisha bamue ku dimona ntendelelu wa Yehowa bu wa tukenjikenji tupitepite bungi? (b) Mmunyi mudi Yehowa udileja muikale ne dijinga dikole dia kumona basadidi bende ne kubafuta?

⁴ Ke mushindu uudi pebe umvua bua diakalenga diebe diudi nadi dia kusadila Tatuebe wa mu diulu anyi? Bushuwa, misangu mikuabu bidi mua kumueneka ne: ntendelelu wa Yehowa udi ukepesha budikadidi buebe. Mbia bulelela bua se: kuikala ne nsombelu udi upetangana ne mêyi a mu Bible kudi kulomba ndambu wa didifila. Kadi umanye ne: tshionso tshidi Yehowa ukulomba tshidi bua diakalenga diebe. (Musambu 1:1-3) Kabidi, Yehowa udi umona muudi udienzeja ne udi uleja dianyisha diende bua lulamatu luebe. Paulo wakafunda ne: Yehowa ‘udi mufutshi wa badi bamukeba.’ (Ebelu 11:6) Yehowa udi ukeba mishindu ya kukufuta. Muprofete muakane kampanda wa mu Isalele wa kale wakamba ne: ‘Mêsu a Yehowa adi akenzakana ku nseke yonso ya buloba bua kuleja bukole buende kudi bantu badi ne mitshima miakane kudiye.’​—2 Kulondolola 16:9.

5. (a) Tela umue mushindu mutambe buimpe uudi mua kuleja ne: mutshima webe wonso udi kudi Yehowa. (b) Bua tshinyi kuyukila ne bakuabu malu audi witabuja kudi mua kumueneka bu kudi kukole?

⁵ Umue wa ku mishindu mitambe buimpe iudi mua kuleja ne: mutshima webe udi muakane kumpala kua Yehowa ngua kuambila bakuabu malu ende. Ukadiku mupete mushindu wa kuyisha bamue ba ku balongi benu anyi? Kumpala, kuenza nunku kudi mua kukutekesha mu mikolo, ne meji a kuyisha adi mua kufila buôwa ndambu. Pamuapa udi mua kudiambila ne: ‘Kadi nebikale munyi buobu banseke? Kadi buobu bele meji ne: tshitendelelu tshianyi ntshibi?’ Yezu uvua mumanye ne: muntu yonso kavua mua kuitaba mukenji wa Bukalenge to. (Yone 15:20) Kadi abi kabiena bisua kumvuija ne: nebikale anu bakuseka anyi babenga kukuteleja to. Bantemu ba bungi batshidi bansonga mbapete bantu bavua babateleje, bibapeteshe ne kanêmu ka bungi kudi binabu, anu bualu bavua batumikila malu a Nzambi.

“Yehowa neakuambuluishe”

6, 7. (a) Mmunyi muvua nsongakaji mukuabu wa bidimu 17 mufike ku diyisha balongi babu? (b) Muyuki wa Jennifer udi ukulongesha tshinyi?

⁶ Kadi mmunyi muudi mua kupeta dikima dia kuakula bua malu a tshitendelelu tshienu? Bua tshinyi kubenga kupangadika bua kuamba diakamue bulelela padi bantu bakukonka malu adi atangila tshitendelelu tshienu? Teleja muyuki wa Jennifer, nsonga wa bidimu 17. Udi wamba ne: “Tuvua tudia mu tulasa. Bansongakaji batuvua tudia nabu ku mesa bakabanga kuakula bua bitendelelu, ne umue wa kudibu wakangebeja tshitendelelu tshintu.” Jennifer wakumvua buôwa bua kufila diandamuna anyi? Udi wamba ne: “Ee tshia bushuwa ngakatshina bualu tshivua mumanye tshivuabu mua kungamba to.” Kadi wakenza tshinyi? Udi utungunuka ne: “Ngakambila bansongakaji abu ne: ndi Ntemu wa Yehowa. Bakanji kukema. Bidi bimueneka ne: bavua bela meji se: Bantemu ba Yehowa mbantu ba wabu mushindu. Diandamuna adi diakabasaka bua kungela nkonko, ne ngakatokesha imue ngenyi mibi ivuabu nayi. Nansha kunyima kua dituku adi, bamue bansongakaji bavua balua kundi misangu ne misangu bua kungela nkonko.”

⁷ Jenniffer wakanyingalala bua muvuaye mumvuije malu a tshitendelelu tshiabu anyi? Tòo. Udi wamba ne: “Ngakumvua bimpe menemene patuakajikija kudia. Mpindieu bansongakaji aba mbamanye bimpe menemene Bantemu ba Yehowa.” Mubelu wa Jennifer udi mupepele: “Biobi bikukolele bua kuyisha balongi anyi balongeshi benu, usambile diakamue. Yehowa neakuambuluishe. Newikale ne disanka bua muuvua kuyi muyishe mpunga wa kuyisha uuvua mupete.”​—1 Petelo 3:15.

8. (a) Mmunyi muvua disambila diambuluishe Nehemiya pavuaye mu nsombelu uvuaye kayi muelele meji? (b) Ngamue malu kayi a mu tulasa audi ne bua kuenzela disambila dia tshikoso mundamunda?

⁸ Kupu muoyo ne: Jennifer udi ukulomba bua ‘kusambila Yehowa diakamue’ padi mpunga wa kuyisha umueneka. Ke tshiakenza menemene Nehemiya (uvua mutuadi wa lupanza lua Atashasete, Mukalenge wa bena Pelasa) pavua bualu kampanda buvuaye kayi muelele meji buenzeke. Nehemiya uvua ne dibungama ku mêsu bualu bavua bamulondele lutatu luvua nalu bena Yuda ne kabidi uvua mumvue ne: lumbu ne biibi bia Yelushalema bivua binyanguke bibi. Mukalenge wakamona Nehemiya umueneka muikale ne dibungama dikole, ke kumukonkaye tshivua tshimutonda. Kumpala kua Nehemiya kuandamuna, wakasambila bua kupeta meji. Pashishe wakalomba ne dikima dionso dianyisha dia kupingana mu Yelushalema ne kuambuluisha bua kuibakulula tshimenga tshivua tshinyanguke atshi. Atashasete wakitaba dilomba dia Nehemiya. (Nehemiya 2:1-8) Bidi bikulongesha tshinyi? Wewe mumvue buôwa padi mpunga wa kuyisha umueneka, kupu muoyo bua kuenza disambila mundamunda to. Petelo wakafunda ne: ‘Upuilayi [Yehowa] ntatu yenu yonso bualu bua yeye ke udi unulama.’​—1 Petelo 5:7, MMM; Musambu 55:22.

‘Badilongolole bua kukudimuna dîyi’

9. Mmunyi muvua Leah (uvua ne bidimu 13) mufike ku diabanya mikanda ya Les jeunes s’interrogent 23?

⁹ Tangila muyuki mukuabu. Leah (uvua ne bidimu 13) uvua ubala mukanda wa Les jeunes s’interrogent​—Réponses pratiquesa pavuabu banji kupatuka mu kalasa bua kuikisha ne kudia. Udi wamba ne: “Bakuabu bavua bantangile, ne diakamue ngakamona tshisumbu tshia bantu bangunguile. Bakabanga kunkonka malu avua mu mukanda au.” Patuakamba kufika ku ndekelu kua dituku adi, bansongakaji banayi bakavua balombe Leah mukanda wa Les jeunes s’interrogent. Bansongakaji aba bakabala mukanda eu ne bakuabu, abu pabu bakajinga bua kuupeta. Mu mbingu mikese yakalonda, Leah wakabanya mikanda ya Les jeunes s’interrogent 23 kudi balongi babu ne balunda babu. Bivua bipepele bua Leah kuakula pavua bakuabu bakeba bua kumanya malu avua mu mukanda uvuaye ubala anyi? Tòo. Udi wamba ne: “Kumpala, ngakumvua buôwa. Kadi, ngakasambila, ne mvua mumanye ne: Yehowa uvua nanyi.”

10, 11. Mmunyi muvua munga nsonga muena Isalele muambuluishe mfumu mukuabu wa basalayi muena Sulia bua kumanya malu a Yehowa, ne mmalu kayi akashintululaye pashishe?

¹⁰ Muyuki wa Leah udi mua kukuvuluija bualu bua muomumue buakapeta muana wa bakaji mukuabu muena Isalele uvua mupika mu Sulia. Nâmana, mfumu wa basalayi muena Sulia uvua ne nsudi. Pamuapa mukajende uvua mua kuikala mutuadije muyuki wakasaka muana mukese wa bakaji eu bua kuakula bua malu a Nzambi. Wakamba ne: ‘Bu mukalenge wanyi muikale ne muprofete mu Samalea, yeye wakadi kumuondopa disama diende dia nsudi.’​—2 Bakelenge 5:1-3.

¹¹ Bua dikima dia nsongakaji eu, Nâmana wakalua kujingulula ne: ‘kakuena Nzambi mukuabu pa buloba buonso anu mu Isalele.’ Wakafika ne ku diangata dipangadika dia se: ‘kavua ne bua kufila mulambu kudi nzambi mukuabu, anu kudi Yehowa.’ (2 Bakelenge 5:15, 17) Yehowa uvua ne bua kuikala mubeneshe muana wa bakaji au bua dikima diende. Udi mua kuenzela bansonga ne neabenzele kabidi bia muomumue lelu. Ke tshiakenzekela Leah. Mu bule bua matuku, bamue ba ku balongi babu bakaya kudiye ne kuambabu ne: mukanda wa Les jeunes s’interrogent uvua ubambuluisha mu bikadilu biabu. Leah udi wamba ne: “Mvua ne disanka bualu mvua mumanye ne: mvua ngambuluisha bakuabu bua kulonga malu a bungi pa bidi bitangila Yehowa ne mbambuluisha bua kushintululabu nsombelu wabu.”

12. Mmunyi muudi mua kupeta bukole bua kuakuila tshitendelelu tshiebe?

¹² Udi pebe mua kuenza bu muakenza Jennifer ne Leah. Londa mubelu wa Petelo, wakafunda ne: wewe muena Kristo udi anu ne bua kuikala ‘mudilongolole misangu yonso, bua kukudimuna dîyi kudi muntu yonso udi ukukonka bua muanda wa ditekemena didi munda muebe; kadi wenza nunku ne kalolo ne ditshina.’ (1 Petelo 3:15) Mmunyi muudi mua kuenza nanku? Idikija bena Kristo ba kumpala bakalomba Yehowa bua abambuluishe bikale ne “dikima dikole.” (Bienzedi 4:29) Ikala ne dikima dia kuambila bakuabu malu a Nzambi. Udi mua kukema bua bipeta biamueneka. Neusankishe kabidi mutshima wa Yehowa.

Tusete tua video ne midimu ya pa buayi

13. Mpunga kayi idi bamue bansonga bapetela mushindu wa kuyisha? (Bala tuzubu tudi mu dibeji dia 20 ne dia 21.)

¹³ Bansonga ba bungi mbapete bipeta bimpe mu diyisha balongi ne balongeshi babu ne bande ya video. Midimu ya mu kalasa mmipeteshe bakuabu mpunga wa kutumbisha Yehowa. Tshilejilu, bansonga babidi Bantemu ba Yehowa ba bidimu 15 bakapeta mudimu uvua muikale tshitupa tshia dilongesha dia malu a kale a pa buloba bua kuakula malu adi atangila tshimue tshia ku bitendelelu. Bubidi buabu bakangata mukanda wa Les Témoins de Jéhovah: Prédicateurs du Royaume de Dieub bua kufunda malu avua atangila Bantemu ba Yehowa. Bavua kabidi ne bua kuanji kuakula amue malu mukana minite itanu. Pashishe, mulongeshi wabu ne balongi babu bakela nkonko mipite bungi, kufikishabi bansonga babidi abu bua kuimanabu kuenzabu minite mikuabu 20. Kunyima kua mbingu ya bungi, balongi babu bakatungunuka ne kuela nkonko pa bidi bitangila Bantemu ba Yehowa!

14, 15. (a) Bua tshinyi kutshina muntu kudi njiwu? (b) Bua tshinyi udi ne bua kuikala ne dikima paudi wambila bakuabu malu a mu Bible?

¹⁴ Anu mudi miyuki itudi bamone eyi ileja, paudi uyisha bantu kuyi utshina ne kabidi ubambila patoke ne: udi Ntemu wa Yehowa, neupete masanka mavule. Kulekedi buôwa bukupangisha diakalenga ne disanka dia kuambuluisha bantu bakuabu bua kumanyabu Yehowa. Bible udi wamba ne: “Padi muntu umona bantu uzakala, udi udikebela njiwu, muntu udi mutekemene kudi [Yehowa] udi ne dikima.”​—Nsumuinu 29:25, MMM.

¹⁵ Ikala mumanye ne: wewe nsonga muena Kristo udi ne tshintu kampanda tshidi bansonga nebe bakeba kabayi bapeta, tshintu atshi nnsombelu mutambe buimpe mpindieu ne muoyo wa tshiendelele mu matuku atshilualua. (1 Timote 4:8) Tudi ne disanka bualu mulubu kampanda udi luleja ne: pamue ne tshia bibidi tshia bansonga mu États-Unis (muudi mua kuikala pamuapa wela meji ne: bantu mu kabujima badi bena kalengu ne baditue bikole mu malu abu nkayabu) badi bangata tshitendelelu ne mushinga wa bungi, ne tshia bisatu tshimue badi bamba ne: ntendelelu “ntshintu tshidi ne bukole butambe” mu nsombelu wabu. Nsombelu eu udi mua kuikala wa muomumue mu matunga makuabu. Bidi mua kuikala ne: balongi benu badi ne disanka dia kuteleja malu a mu Bible.

Nsonga wetu, semena kudi Yehowa

16. Pa kumbusha diambila bakuabu malu a mu Bible, kusankisha Yehowa kudi kulomba tshinyi tshikuabu?

¹⁶ Bushuwa, kusankisha mutshima wa Yehowa ki ng’anu kuakula malu ende to. Ngikadilu webe udi kabidi ne bua kuikala mu diumvuangana ne mikenji yende. Mupostolo Yone wakafunda ne: ‘Edi ndinanga dia Nzambi, bua tuetu tutumikile mikenji yende; ne mikenji yende kayena itunemena bujitu.’ (1 Yone 5:3) Neumone se: mêyi aa mmalelela biwasemena pabuipi ne Yehowa. Kadi mmunyi muudi mua kusemena pabuipi nende?

17. Mmunyi muudi mua kusemena pabuipi ne Yehowa?

¹⁷ Ikala ne dîba dia kubala Bible ne mikanda ya kumulonga nayi. Paudi ulonga malu a Yehowa a bungi, nebikale bipepele bua wewe kumutumikila ne kuambila bantu bakuabu malu ende. Yezu wakamba ne: ‘Muntu muimpe udi upatula tshintu tshimpe mu tshibutshilu tshimpe tshia mutshima wende, bua mukana muende mudi muamba anu malu adi matambe kuvulangana mu mutshima wende.’ (Luka 6:45) Nunku uuja malu mimpe mu mutshima webe. Bua tshinyi kubenga kudifundila bipatshila bia kukumbaja mu bualu ebu? Tshilejilu, udi mua kuakaja mushindu wa kulongolola bisangilu lumingu ludi lulua elu. Tshipatshila tshiebe tshikuabu tshidi mua kuikala tshia kubanga kufila nansha diandamuna dimue dîpi, kadi didi difumina mu mutshima. Bushuwa, wewe udi kabidi ne bua kutumikila malu audi ulonga.​—Filipoi 4:9.

18. Nansha buobu bakukengesha mushindu kampanda, ntshinyi tshiudi ne bua kuikala mujadike?

¹⁸ Mabenesha adi afumina ku disadila Yehowa adi a kashidi ne tshiendelele. Bulelela, badi mua kukuluisha misangu mikuabu anyi badi mua kukufuisha bundu bualu udi Ntemu wa Yehowa. Kadi vuluka Mose. Bible udi wamba ne: “Mesu ende avua atangila amu difutu divuaye muindile kumpala.” (Ebelu 11:24-26, Mukanda wa Mvidi Mukulu [Mishonyi, MMV]) Wewe pebe udi ne bua kuikala mujadike ne: Yehowa neakufute bua mushindu uudi udienzeja bua kulonga malu ende ne kuambila bakuabu. Bushuwa, ‘kakupua muoyo wa mudimu webe ne wa dinanga diwakaleja bua dîna diende’ to.​—Ebelu 6:10.

[Mêyi adi kuinshi]

Udi muvuluke anyi?

• Bua tshinyi udi ne bua kuikala mujadike ne: Yehowa udi wangata mudimu webe ne mushinga?

• Mmishindu kayi ya diyisha mu kalasa idi mipatule bipeta bilenga?

• Mmunyi muudi mua kupeta bukole bua kuyisha balongi benu?

• Mmunyi muudi mua kusemena pabuipi ne Yehowa?

[Kazubu/Bimfuanyi mu dibeji 20]

Nansha bana batekete batu batumbisha Yehowa!

Nansha bana batekete batu bafika ku diyisha bimpe mu kalasa. Tangila tu-malu tua mu tshikoso tudi tulonda etu.

Amber, muana wa bidimu dikumi udi mu kalasa kitanu uvua ubala mukanda uvua wakula bua mushindu uvua bena Nazi bakengeshe bena Yuda mu Mvita Mibidi ya Buloba bujima. Amber wakapangadika bua kutuadila mulongeshi wabu bande wa video wa Les triangles violets. Mulongeshi au wakakema pakamanyaye ne: bavua bakengeshe kabidi ne Bantemu ba Yehowa kudi bukalenge bua bena Nazi. Mulongeshi wakela bande au bua kalasa kende kajima kamumone.

Pavua Alexa ne bidimu muanda-mukulu, wakafundila balongi ba mu kalasa kabu mukanda uvua umvuija tshivuaye kayi ubuelela mu difesto dia Nowele. Mulongeshi wabu wakakema bikole, yeye kufika too ne ku diambila Alexa bua kubadila balongi ba mu kalasa kabu ne ba tulasa tukuabu tubidi mukanda wende au ne dîyi dikole. Wakamba ku ndekelu kua mukanda au ne: “Mbandongeshe bua kunemeka bantu bakuabu badi kabayi bena tshitendelelu tshietu; ne ndi nnuela tuasakidila bua munudi banemeke dipangadika dianyi dia kubenga kusekelela Nowele.”

Matuku makese kunyima kua Eric mumane kubuela mu kalasa ka kumpala, wakaya ne mukanda wa Miyuki ya mu Mukanda wa Nzambi mu kalasa ne kulombaye dianyisha bua kuuleja balongi babu. Mulongeshi wabu wakamuambila ne: “Ndi ne lungenyi luimpe lua kukupesha. Bua tshinyi kuenaku ubadila balongi nansha muyuki umue?” Ke tshiakenza Eric. Kunyima, wakalomba muntu yonso uvua musue kupeta mukanda au bua kuela tshianza kuulu. Balongi 18, kusangisha ne mulongeshi wabu bakela tshianza kuulu! Mpindieu Eric udi umona ne: udi ne wende muaba wa pa buawu wa kuyishila.

Whitney, muana wa bidimu tshitema udi ne dianyisha bua broshire wa Les Témoins de Jéhovah et l’instruction.c Udi wamba ne: “Mamu utu upesha balongeshi betu broshire eu tshidimu tshionso, kadi tshidimu etshi meme nkayanyi ndi mumupeshe mulongeshi wetu. Bua broshire au, mulongeshi wetu wakanginyika dîna ne: ‘mulongi wa pa buende.’”

[Mêyi adi kuinshi]

[Kazubu/​Bimfuanyi mu dibeji 21]

Imue mishindu ivua bakuabu bafike ku dilongesha malu adibu bitabuja

Padibu bakulomba bua kulonda nansha kufunda bualu kampanda anyi mudimu kansanga mu kalasa, sungula tshiena-bualu tshikala mua kukufikisha ku diyisha

Bansonga bavule batu bapeshe balongeshi babu bande wa video kampanda anyi mukanda kansanga udi upetangana ne bualu kankenge budibu balonge mu kalasa

Patu bamue bansonga babala Bible anyi mikanda ya Bantemu mikuabu dîba dia dikisha, batu babela nkonko kudi bansonga nabu bakuabu

[Tshimfuanyi mu dibeji 18]

Badi bamonemone malu badi mua kuambuluisha bansonga bua basadile Yehowa