Bantu badi bakeba bua kusankisha Nzambi

“KAKUTU kuanji kuikala nsangilu wa bantu mudi Nzambi kayi ne muaba, muikale nangananga mufuki ne mutangidi wa malu onso. Bidi kabidi nunku bua bantu badi kabayi bitaba malu a Nzambi.” Ke mudi John Bowker wamba mu mukanda wende kampanda. (God​—A Brief History) Mu mushindu kampanda anyi kansanga, bienzedi bia bantu bitu bishindamena pa dijinga dia kukeba mua kusankisha Nzambi. Bantu ba bungi badi ne dijinga dilelela dia kusankisha Nzambi. Tshidibi, mishindu idibu bakeba bua kumusankisha idi ishilangana bilondeshile malu adibu bitabuja.

Bamue badi bela meji ne: tshintu tshidi ne mushinga bua Nzambi kubanyishaye nkuikala ne nsombelu mulenga. Bakuabu badi bamona ne: Nzambi udi ubanyisha padibu bambuluisha bapele. Kabidi, bilele ne mikiya bia ekeleziya bidi ne mushinga ku mêsu kua bantu ba bungi.

Ku lukuabu luseke, kudi bantu badi bela meji ne: kabena mua kupeta Nzambi nansha bia munyi bualu Nzambi udi kule menemene anyi udi ne bia bungi bia kuenza, kayi ne dîba dia kutangila bantu ba tshianana to. Badi bamba muvua Épicure (muena nkindi wa Grèce wa kale) wela meji ne: ‘nzambi idi kule menemene, kayena mua kuenzela bantu malu mimpe anyi mabi to.’ Nansha nanku, ba bungi badi bitaba malu aa mbatendeledi. Bakuabu badi mene mua kuikala bafila milambu ne benza mikiya kampanda bua kusankisha bankambua babu bakadi bafue.

Kadi wewe pebe udi wela meji kayi? Nzambi udiku umona malu atudi tuenza bua yeye kutuanyisha anyi? Kudiku mushindu wa tuetu kulenga mutshima wa Nzambi ne kumusankisha anyi?

[Mêyi a dianyisha bua tshimfuanyi mu dibeji 2]

TSHIZUBU: Courtesy of ROE/​Anglo-Australian Observatory, photograph by David Malin