“Dimue dia ku matuku anyi malenga”

TSHISUMBU kampanda tshia mbulamatadi tshia mu ditunga dia Australie tshidi tshitangila masama a mitu tshidi tshiamba ne: “Dibungama ke disama dinene dia mu lungenyi didi ditamba kukuata bansonga.” Makebulula adi aleja ne: bansonga batue ku 100 000 ba mu Australie badi basama disama edi tshidimu tshionso.

Dibungama ki ndishiye bansonga bena Kristo nansha. Kadi kuikala ne ditabuja kudi Yehowa kudi kubambuluisha bua kulekela didielela ngenyi mibi ne kuikala ne nsombelu mulenga. Padibu benza nunku, badi bakemesha bantu bakuabu. Mushindu kayi?

Angata tshilejilu tshia Claire, nsongakaji wa bidimu 18. Yeye ne mamuende batu mu tshimue tshisumbu tshia Bantemu ba Yehowa mu tshimenga tshia Melbourne. Biakasamisha Claire lungenyi bikole dîba divua tatuende munyeme ku nzubu. Kadi ditabuja dia Claire kudi Tatuende wa mu diulu Yehowa diakashala anu dikole. Dimue dituku, Lydia munganga wa dîku diabu, wakalua bua kumona mamuende wa Claire bualu uvua usama. Pashishe, yeye kulomba bua aye kufila Claire mu disumba dia bintu. Yeye kuebeja Claire pavuabu mu njila ni uvua ne mulunda wa balume. Claire kumuambila ne: bu muvuaye Ntemu wa Yehowa, kavua upatuka ne bansongalume to. Lydia wakakema bikole. Ke Claire kumuleja muvua Bible mumuambuluishe bua kuangata mapangadika mimpe mu nsombelu wende. Claire kulaya Lydia bua kumutuadila mukanda wa malu a Nzambi uvua mumuambuluishe bikole. Mukanda uvua ne tshiena-bualu tshia Les jeunes s’interrogent​—Réponses pratiques.

Lydia wakela mamuende wa Claire nshinga panyima pa matuku asatu bua kumuleja muvuaye muanyishe mukanda au. Ke kumulombaye mikanda mikuabu isambombo bua bena mudimu nende. Dîba divua Claire muye kufila mikanda, Lydia wakamuambila muvua ditabuja diende dimulenge ku muoyo bikole. Claire kumulombaye bua kulonga nende Bible, yeye kuitaba.

Claire wakalonga Bible ne Lydia ngondo ya bungi mu mêba avua Lydia mu dikisha. Dikuabu Lydia kuebeja Claire ni uvua mua kuakula mu tshisangilu kampanda tshivua ne bua kuakula bua bansonga badi dibungama dibasamisha. Nansha muvua Claire utshina, wakitaba anu kuitaba. Bantu bapite pa 60 bakabuela mu tshisangilu atshi. Bantu banayi batu batangila masama a mu lungenyi (bonso bantu bakulumpe) bakenza miyuki. Tshikondo tshia Claire kuakula tshiakafika. Wakaleja mudibi ne mushinga bua bansonga kudia bulunda ne Nzambi. Kumvuijaye ne: Yehowa Nzambi udi utabalela bansonga bikole ne udi wambuluisha aba bonso badi balua kudiye bua kubasambaye. Wakaleja kabidi muvuaye mushindike ne: mu katupa kîpi emu, Yehowa neajikije masama onso a ku mubidi ne a mu lungenyi. (Yeshaya 33:24) Ntshinyi tshiakenzeka panyima?

Claire udi wamba ne: “Bantu ba bungi bakalua kundi panyima pa tshisangilu atshi bua kundeja muvuabu bakeme bua kumvua nsonga wakula bua Nzambi. Ngakabanya mikanda 23 ya Les jeunes s’interrogent. Bansongakaji basatu bavua pabu mu tshisangilu amu bakampesha nimero yabu ya telefone. Umue wa kudibu udi ulonga Bible mpindieu. Divua dimue dia ku matuku anyi malenga.”