Ngikadilu utu nende bantu mu Nowele

batu bashala nende tshidimu tshijima anyi? ‘Butumbi buikale kudi Nzambi mu diulu, ditalala dikale panshi pa buloba munkatshi mua bantu [ba muoyo muimpe anyi] badi basankisha Nzambi.’​—Luka 2:14.

BANTU ba bungi mbamanye mêyi aa avua banjelu ba Nzambi bambile balami ba mikoko bavua balame mikoko yabu pambelu butuku bua kubamanyisha diledibua dia Yezu. Pabuipi ne dituku ditu bitendelelu bia bungi biamba ne: ke diakaledibua Yezu, benamu ba bungi batu benza muabu muonso bua kulengeja ngikadilu yabu. Mu tshikondo tshia Nowele bantu batu bakeba kuikala ne disanka ne ditalala ne muoyo muimpe bualu ke ngikadilu ivua banjelu batele. Nanku batu bamba ne: disanka ne ditalala ne muoyo muimpe nngikadilu ya Nowele.

Ngikadilu mimpe eyi itu mene ikoka too ne bantu batu kabayi bamona Nowele bu fete udi bena Kristo ne bua kuenza. Bobu pabu badi banyisha bikole bua ngikadilu mimpe eyi itu difesto edi disaka bantu bua kuikala nayi. Mu dia Nowele bantu batu bapeta dikisha: balongi kabayi baya mu tulasa, bena mudimu kabayi baya ku mudimu, bantu bapeta mushindu wa kujikijaku mukodi, kusombaku ne balela anyi balunda babu, anyi bapetaku patupu mpunga wa kusanka. Bushuwa, bantu ba bungi ba muoyo mulenga batu nangananga bamona dia Nowele bu tshikondo tshia kutumbisha Yezu Kristo.

Nansha bobu bangata tshikondo tshia Nowele ne mushinga wa munyi, tshidibi bantu ba bungi mbajadike ne: ngikadilu kayi yonso mimpe idi difesto edi disaka bantu bua kuikala nayi itu anu ya tshitupa tshîpi. Bantu kabatu banenga ne kupingana muabu mua kale. Malu akebejabu bantu avuabu binyike ne: “Ngikadilu utu nende bantu mu Nowele” akapatulabu mu mukanda kampanda akaleja ne: “Bantu ba bungi batu badiamba mudibu bena Kristo batu benza malu bu bena Kristo anu bua mbingu mikese tshidimu tshionso, benzela bantu nabu malu mimpe too ne padibu bajikija kudia Bunane, mpindieu bapingana mu malu abu a kale kabatshiyi kabidi bavuluka bua kuenzela bakuabu malu malenga to.” Mukanda eu wakamba kabidi ne: tshidi “tshibi menemene,” mbualu bantu kabena bashala ne ngikadilu ivuabu nayi mu Nowele “tshidimu tshijima.”​—Royal Bank of Canada.

Ngelelu wa meji eu udi ujudija nkonko minene nansha wewe umuitaba anyi kuyi umuitaba. Dimue dituku bantu nebikalaku ne mushindu wa kuditeka pa muaba wa bakuabu ne kuenzelangana malu malenga matuku onso anyi? Tudiku mua kutekemena se: mukenji wakamanyisha banjelu butuku buakaledibua Yezu neukumbaneku dimue dituku anyi? Ditalala dietu dia bushuwa edi didi anu bu tshilota patupu anyi?