Bana, sankishayi baledi benu

MUPOSTOLO YONE wakafunda pakavuaye mukulakaje ne: ‘Tshiena ne disanka didi dipita edi bunene, bua meme kumvua ne: Bana banyi badi benda mu bushuwa.’ (3 Yone 4) Nansha mudi bana badibu batele mu mvese eu bikale bena Kristo, muledi muena Kristo udi pende mua kuambulula mêyi aa. Anu mudi baledi bambuluisha bana babu, ke mudi kabidi bana bambuluisha baledi babu bikole.

Mukalenge Solomo uvua mumone mudi bana mua kusankisha anyi kubungamija baledi babu. Uvua mufunde ne: ‘Muana mulume udi ne meji udi usankisha tatuende, kadi muana mupote udi unyingalaja mutshima wa mamuende.’ (Nsumuinu 10:1) Nunku bana bonso, nansha aba bakadi bakole, badi ne bua kuela meji ku tshidi malu abu mua kuenzela baledi babu. Bua tshinyi bidi ne mushinga?

Anji ela meji ku malu onso adi baledi bebe bena Kristo benze bua kukukolesha! Bavua babangishe kutangila malu ebe ne kusambila buebe kumpala kua wewe kuledibua. Pauvua muledibue, baledi bebe bonso bavua basanke bikole ne pamuapa bavua bele Nzambi tuasakidila bua diakalenga dinene ne bujitu bua kuikala baledi. Bavua mpindieu ne bua kutangila muana uvuabu bapete, ne bu mudibu batendelela Yehowa bavua bangate bujitu ebu ne mushinga.

Bu mudi baledi bebe bikale bena Kristo balelela, bavua bakeba mibelu mu Bible ne mu mikanda mikuabu ya bena Kristo. Bavua kabidi bayilomba kudi bantu bakavua bakoleshe bana. Ne bavua batungunuka ne kusambila Nzambi bua bualu buebe. (Balumbuluishi 13:8) Pauvua wenda ukola, baledi bebe bavua bamanye ngikadilu yebe mimpe ne mibi. (Yobo 1:5) Pawakakumbaja bidimu 10 ne bia mu njila, ntatu mikuabu yakamueneka. Uvua mua kuikala mutomboke ne baledi bebe bavua basambila, babala ne bela meji bikole bua mushindu wa kukuambuluisha bua utungunuke ne kutendelela Yehowa Tatuebe wa mu diulu.

Baledi bebe kabatu banji kulekela kukunanga. Nansha wewe mumane kukola, mbasue bua wikale amu ne makanda a mubidi, ne lungenyi, udiumvua mudibu bakunange ne bua wikale muena Kristo muimpe. Tshidibi munkatshi mua bidimu bionso ebi, baledi bebe mbamanye ne: udi ne bua kudiangatshila mapangadika ne ki mbamanye tshiwalua to. Wewe ke wasungula tshiwalua.

Nunku tuetu bambe ne: Kakuena ‘disanka didi dipite’ didi baledi bumvua padi bana babu ‘benda mu bushuwa’; tudi mua kuamba kabidi ne: bana badi benza malu mabi badi banyingalaja baledi babu. Solomo wakamba ne: ‘Muana mulume mupote udi uvuija tatuende kanyinganyinga, udi bu tshintu tshia bululu kudi mamu wakamulela.’ (Nsumuinu 17:25) Baledi batu bumvua bibi menemene padi bana babu balekela kutendelela Nzambi mulelela.

Nunku bana wetu, malu anudi nuenza adi ne mushinga wa bungi bua baledi benu. Adi abalenga ku muoyo bikole. Nuenu bele Yehowa Nzambi ne mikenji yende nyima, baledi benu nebanyingalale. Kadi nuenu numutumikila ne bashale bamulamate, baledi benu nebasanke. Disuikayi bua kusankisha baledi benu. Ntshintu kayi tshikuabu tshia mushinga tshinudi mua kupesha baledi badi banukoleshe, banulame ne banunange? Nansha tshimue!