Tuenzayi disua dia Nzambi lelu
‘[Kristo] wakafuila bonso bua badi ne muoyo kabikadi nawu bua bualu buabu nkayabu.’—2 KOLINTO 5:15.
1. Londa bualu buvua misionere mukuabu mupete mu mudimu wende.
MISIONERE mukuabu diende Aaron udi uvuluka wamba ne: “Mashinyi etu ke avua a kumpala akabuela mu umue musoko wa kule wa mu Afrike pakajika mvita ivuamu.a Katuvua ne mushindu wa kuyukila ne bena tshisumbu tshikese tshia mu musoko au to, pabi tuvua basue kutuadila bana betu bintu bivuabu nabi dijinga. Pa kumbusha biakudia, bilamba ne mikanda yetu, tuvua babatuadile kabidi bande wa video wa Les Témoins de Jéhovah: un nom, une organisation.b Bena mu musoko au bapite bungi bakatshimuka bua kulua kumona bande eu mu tshitanda tshinene tshia nsona muvuabu balejila manaya muvua tshisanji tshia kuelela bande ya video ne televizion, ke bua tshinyi tuakabaleja bande eu misangu ibidi. Bantu ba bungi bakatuadija kulonga Bible pakamonabu bande eu. Bushuwa, bionso bituvua benze kabivua biye mu mâyi to.”
2. (a) Bua tshinyi bena Kristo mbadisuike bua kufila mioyo yabu mu mudimu wa Nzambi? (b) Nnkonko kayi ituandamuna mpindieu?
2 Bua tshinyi Aaron ne bena diende bakadikuatshisha mudimu mukole nunku? Bualu, bu mudibu ne dianyisha bua mulambu wa kutupikula nawu udi Yezu Kristo mufile, mbalambule Nzambi mioyo yabu ne mbasue kuenza malu umvuangana ne disua diende. Anu bu bana betu aba, bena Kristo bonso badi badilambule kudi Nzambi mbadisuike bua ‘kabikadi ne muoyo bua bualu buabu nkayabu,’ kadi bua kuenza bionso bidibu mua kuenza “bua lumu luimpe.” (2 Kolinto 5:15; 1 Kolinto 9:23) Mbamanye ne: pafika bukua panu ebu ku ndekelu, makuta onso ne mianzu ya panu kabiakuikala ne mushinga to. Nunku bu mudibu ne muoyo ne ndambu wa bukole bua mubidi, mbasue kuenza nabi malu adi umvuangana ne disua dia Nzambi. (Muambi 12:1) Mmunyi mutudi mua kuenza nunku? Nkuepi kutudi mua kupeta bukole ne dikima bia kuenza nabi bualu ebu? Ne mmishindu kayi ya midimu itudi mua kuenza?
Enda wenza malu adi akengela bua kuya kumpala
3. Mmalu kayi manene atutu tutuadija nawu bua kuenza disua dia Nzambi?
3 Bua bena Kristo balelela, kuenza disua dia Nzambi mbualu budibu ne bua kuenza mu matuku abu onso a muoyo. Pa tshibidilu, batu batuadija ne malu manene bu mudi kudifundisha mu Kalasa ka Mudimu wa Nzambi, kubala Bible dituku dionso, kuyisha ne kufika too ne ku ditambula. Patudi tuenda tuya kumpala, tudi tuvuluka mêyi a mu mupostolo Paulo aa: ‘Unanukile kuikala mu malu aa, udifile ne mutshima webe wonso kudiwu, bua kudiunda kuebe kumueneke kudi bonso.’ (1 Timote 4:15) Katuena tudiunda mushindu eu bua kuditumbisha to, kadi mbua kuleja mutudi badisuike bua kuenza disua dia Nzambi kumpala kua bionso. Patudi tuenza malu aa tudi tuleja ne: tudi bitabe bua Nzambi atulombole mu malu etu onso, ne udi utulombola nunku bimpe menemene kupita mutudi mua kudiludika.—Musambu 32:8.
4. Mmunyi mutudi mua kumbusha buôwa budi kabuyi ne bualu bua nsongo?
4 Kadi dielakana anyi ditamba kuelangana meji bua bualu buetu bidi mua kutupangisha bua kuya kumpala mu mudimu wa Nzambi. (Muambi 11:4) Nunku, kumpala kua tuetu kupeta disanka dilelela mu disadila Nzambi ne bakuabu, tudi ne bua kuanji kujikija buôwa. Tshilejilu, Erik uvua musue kuya kuambuluisha mu tshisumbu tshia muakulu muenyi. Kadi uvua udiebeja ne: ‘Bana betu ba mu tshisumbu atshi nebangitabe anyi? Nembanange anyi? Bobu pabu nebannange anyi?’ Udi wamba ne: “Ndekelu wa bionso ngakamona ne: mvua ne bua kuditatshisha bikole bua bana betu pamutu wa kuditatshisha bikole buanyi meme. Ngakalekela kudiela nkonko eyi ne meme kuditua diakamue malu atuvua mua kuenza ne bana betu aba. Ngakalomba Yehowa diambuluisha ne meme kuya mu tshisumbu atshi. Mpindieu ndi ne disanka dia bungi mu mudimu wanyi.” (Lomo 4:20) Bushuwa, netupete disanka dia bungi tuetu tusadila Nzambi ne bakuabu kumpala kua bionso.
5. Bua tshinyi tudi ne bua kulongolola malu etu bimpe bua kumona mua kuenza disua dia Nzambi? Fila tshilejilu.
5 Bua kuenza disua dia Nzambi bimpe tudi kabidi ne bua kulongolola malu etu bimpe. Mbimpe tuetu kubenga kuangata mabanza adi mua kutuvuija bapika ba bukua panu ebu adi mua kutupangisha bua kuenza mudimu wa Nzambi badilekelele. Bible udi utuvuluija ne: ‘Musombi wa bintu udi mupika wa mumusombeshi.’ (Nsumuinu 22:7) Kueyemena Yehowa ne kuteka malu a mu nyuma pa muaba wa kumpala kudi kutuambuluisha bua kushala bavuluke malu adi ne mushinga. Tshilejilu, Guoming ne bana babu ba bakaji babidi mbasombele ne mamuabu muaba udi nzubu mikale mushinga mukole ne udibi bikole bua kupeta mudimu mushindame. Nansha mudibu bonso kabayi benza mudimu, badi bapeta bintu bidibu nabi dijinga bualu yonso wa kudibu utu ufila kende kadiye naku ne balaminyina bimpe mfranga idibu nayi. Guoming udi wamba ne: “Imue misangu tuetu bonso tutu tupangila mfranga. Kadi tudi anu tutungunuka ne bumpanda-njila ne tuambuluisha mamuetu. Tudi ne dianyisha dia bungi bua mudi mamu kayi musue bua tulekele midimu yetu ya mu nyuma bua kumona mua kumukebela bintu bia kondolokaye nabi.”—2 Kolinto 12:14; Ebelu 13:5.
6. Ntshilejilu kayi tshidi tshileja mutudi mua kushintulula nsombelu wetu bua kuenza disua dia Nzambi?
6 Wewe mudifile bikole mu dikeba dia bubanji anyi bintu bikuabu, nebikulombe pamuapa bua kushintulula malu a bungi bua kuteka disua dia Nzambi pa muaba wa kumpala. Pa tshibidilu dishintulula dia malu aa kaditu mua kuenzeka dituku dimue to, ne kuena mua kuamba ne: wapangidi anu bualu udi mupete ntatu ku ntuadijilu to. Tangila tshilejilu tshia Koichi, uvua upitshisha dîba diende dionso anu ku manaya. Koichi ukavua mulonge Bible patshivuaye muana, kadi munkatshi mua bidimu bia bungi wakashadila anu dinaya manaya a ku video. Dimue dituku Koichi wakadiambila ne: ‘Tshiudi wenza ntshinyi? Ukadi ne bidimu 30 ne bia mu njila, kadi kuenaku ne bualu bua nsongo nansha bumue buudi wenza ne muoyo webe.’ Koichi wakatuadijilula kulonga Bible ne kuitabaye diambuluisha dia mu tshisumbu. Nansha muvuaye wenda ushintuluka ku kakese ku kakese, uvua anu musuminyine. Ku diambuluisha dia masambila a bungi akenzaye ne dikankamija divua bana betu bamupesha ne dinanga dionso, wakafika ndekelu wa bionso ku dilekela tshilele tshiende tshibi atshi. (Luka 11:9) Koichi udi musadidi wa mudimu patudi tuakula apa.
Longa mua kuikala ne nkatshinkatshi
7. Bua tshinyi tudi ne bua kuikala ne nkatshinkatshi mu mudimu wa Nzambi?
7 Bua kuenza disua dia Nzambi bidi bitukengela kudienzeja ne muoyo wetu mujima. Katuena ne bua kuelakana anyi kuikala ne lulengu mu dienza disua dia Nzambi to. (Ebelu 6:11, 12) Kadi tumanye ne: Yehowa ki mmusue bua tuetu kudizengeja ku mubidi anyi mu lungenyi to. Kuitaba ne budipuekeshi ne: katuena mua kuenza mudimu wa Nzambi ku bukole buetu nkayetu kudi kumutumbisha ne kuleja kabidi mutudi ne nkatshinkatshi. (1 Petelo 4:11) Yehowa mmulaye bua kutupesha bukole butudi tukengela bua kuenza disua diende, kadi katuena ne bua kudienzeja mudimu mutupite makanda, tukeba bua kuenza malu adiye kayi mutulombe. (2 Kolinto 4:7) Bua tuetu kutungunuka ne kuenzela Nzambi mudimu katuyi tupungila, tudi ne bua kulobelela bukole buetu.
8. Ntshinyi tshiakenzekela nsonga muena Kristo uvua udienzeja bua kudifila ne muoyo mujima mu mudimu Nzambi ne wa bianza kabidi? Ne mbualu kayi buakashintululaye?
8 Tshilejilu, munkatshi mua bidimu bibidi Ji Hye (udi musombele ku Est kua Asie) wakenza mudimu uvua umuangata dîba dionso eku pende muikale mpanda-njila. Udi wamba ne: “Mvua ndienzeja bua kudifila muanyi muonso mu mudimu wa Yehowa ne mu mudimu wanyi wa bianza, kadi mvua ndala anu mêba atanu patupu butuku. Ndekelu wa bionso tshivua ne bukole nansha bukese mu lungenyi bua kutangila nabu malu a bulelela to, ne tshivua kabidi ne disanka dia bungi mu mudimu wa Yehowa to.” Bua kumona mua kuenzela Yehowa mudimu ne ‘mutshima wende wonso ne muoyo wende wonso ne lungenyi luende luonso ne bukole buende bonso,’ Ji Hye wakakeba mudimu uvua umushilaku ndambu wa dîba. (Mâko 12:30) Udi wamba ne: “Nansha muvua bena mu dîku dianyi bansaka bua kukeba bubanji bua bungi, ngakadienzeja bua kuenza disua dia Nzambi kumpala. Ntshidi anu mpeta mfranga mikumbane bua kusumba bintu bindi nabi dijinga bu mudi bilamba bimpe. Ne ndi ndiumvua mupetulule makanda a bungi. Mpindieu ndi ne disanka mu mudimu wa buambi ne ndi mukole mu nyuma. Ndi mupete bionso ebi bualu tshiena mpitshisha dîba dia bungi mu malu a pa buloba ebu adi alobesha ne afila ditanaji nansha.”—Muambi 4:6; Matayo 6:24, 28-30.
9. Mmunyi mudi mudimu wetu mua kuambuluisha bantu mu buambi?
9 Ki mmuntu yonso udi mua kuenzela Nzambi mudimu wa bumpanda-njila to. Wewe ne ntatu ya bukulakaje, muikale usama anyi muikale ne ntatu mikuabu, umanye ne: Yehowa udi wanyisha bikole lulamatu luebe ne mudimu wonso uudi umuenzela ne muoyo mujima. (Luka 21:2, 3) Bua nanku, muntu nansha umue kêna ne bua kupepeja mushindu udi mudimu wetu wambuluisha bakuabu nansha wowu mukese. Tshilejilu, tufuanyikijabi ne: tudi baye bua kuyisha ku nzubu ndambu, kadi katuena bapete bantu badi bamueneka basankidila mukenji utudi tumanyisha. Tuetu bamane kuya, bena ku nzubu ayi badi bashala bayukila mutantshi mule bua mutuvua baye bua kubayisha, nansha muvua muntu nansha umue kayi mutuakidile. Katuena batekemene bua se: muntu yonso udi uteleja lumu luimpe nealuitabe, kadi bamue nebaluitabe. (Matayo 13:19-23) Bakuabu badi mua kulua kuluitaba padibu bamona malu ashintuluka pa buloba anyi mu nsombelu wabu. Mu mishindu yonso, patudi tuenza tshitudi bakokeshe mu buambi, tudi tuenza mudimu wa Nzambi. Tudi ‘benzejanganyi ba mudimu ne Nzambi.’—1 Kolinto 3:9.
10. Mmidimu kayi idi muntu yonso mua kuenza mu tshisumbu?
10 Pa kumbusha bualu ebu, tuetu bonso tudi mua kuambuluisha bena mu mêku etu ne bena Kristo netu mu tshisumbu. (Galatia 6:10) Tshilejilu tshietu tshimpe tshidi mua kulenga bakuabu bikole ne bobu kushala batshilonda. (Muambi 11:1, 6) Padi bakulu ne basadidi benza midimu yabu ne tshisumi, badi bambuluisha tshisumbu bua kuikalatshi bimpe mu nyuma ne kushalatshi tshishindame, ne mudimu wa bena Kristo udi uya kumpala. Tudi bajadike ne: patudi ‘tukumbaja mudimu wa Mukalenge,’ mudimu wetu ‘kawena patupu.’—1 Kolinto 15:58.
Tuenzayi disua dia Nzambi bu mudimu wetu
11. Mmidimu kayi mikuabu itudi mua kuenza pa kumbusha ya mu tshisumbu tshietu?
11 Tuetu bena Kristo tudi banange muoyo ne tudi basue kutumbisha Nzambi mu malu onso atudi tuenza. (1 Kolinto 10:31) Patudi tudifila ne tshisumi mu diyisha lumu luimpe lua Bukalenge ne tulongesha bantu bua kutumikilabu malu onso avua Yezu muambe, tudi tupeta mishindu ya bungi ya kuenzela Nzambi mudimu udi utupetesha disanka. (Matayo 24:14; 28:19, 20) Pa kumbusha mudimu utudi tuenza mu tshisumbu tshietu, tudi mua kupeta mpunga ya kuya kuambuluisha miaba idibu dijinga ne bamanyishi ba bungi idi mua kuikala mu teritware mukuabu, mu tshisumbu tshia muakulu muenyi anyi mu ditunga dikuabu. Bakulu ne basadidi ba mudimu bakumbane batshidi bajike badi mua kubabikila bua kubuela mu Kalasa ka Dilongesha Mudimu, pashishe badi mua kuya kuambuluisha mu bisumbu bidibu dijinga ne bena Kristo bakole mu nyuma, mu matunga abu anyi mu matunga menyi. Bampanda-njila bakadi mu dibaka kadi kabayi ne bana badi mua kukumbaja malu adibu balomba bua kuya kulonga kalasa ka bamisionere ka Gilada ne pashishe kuya kuambuluisha muaba mukuabu. Kabidi, badi anu dijinga ne bena budisuile bua kuenza midimu mishilangane ku Betele ne bua kuibaka ne kulama miaba itutu tuenzela bisangilu ne nzubu ya Betele.
12, 13. (a) Mmunyi muudi mua kusungula mudimu uudi mua kuenza? (b) Umvuija mushindu udi dimanya didi muntu mupete mu mudimu kampanda mua kumuambuluisha mu mikuabu.
12 Mmudimu wa mushindu kayi uudi ne bua kuenza? Bu muudi mudilambule kudi Yehowa bua kumuenzela mudimu, ikala misangu yonso unyemena kudiye ne kudi bulongolodi buende bua kupeta mibelu ya kulonda. ‘Nyuma wende muimpe’ neakuambuluishe bua kuangata dipangadika dimpe. (Nehemiya 9:20) Pa tshibidilu, mudimu umue utu ufikisha ku mukuabu, ne dimanya ditudi tupeta mu mudimu kampanda ditu mua kulua kuambuluisha mu mukuabu pashishe.
13 Tshilejilu, Dennis ne mukajende Jenny batu ne tshibidilu tshia kuambuluisha mu luibaku lua Nzubu ya Bukalenge. Pakenzeka tshipepele tshikole tshivuabu babikila ne: Katrina ku Sud kua États-Unis, bakaya bua kuambuluisha bana betu bavua mu lutatu. Dennis udi wamba ne: “Kuambuluisha bana betu ne dimanya dituvua bapete mu dibaka dia Nzubu ya Bukalenge nkutupeteshe disanka dia bungi. Dianyisha didibu baleje kudi bana betu batudi bambuluishe didi ditulenga ku muoyo bikole. Bisumbu bikuabu bia bungi bia bambuluishanganyi kabivua bikokeshe menemene bua kuibakulula nzubu bimpe to. Bantemu ba Yehowa bakadi balongolole ne bibakulule nzubu ya bantu mipite pa 5 300 ne Nzubu ya Bukalenge bungi tshianana. Bantu badi bamona bualu ebu ne mpindieu badi basankidila lumu luimpe bikole menemene.”
14. Ntshinyi tshiudi mua kuenza biwikala ujinga kuenza mudimu wa ku dîba ne ku dîba?
14 Udiku mua kuenza disua dia Nzambi pa kusungula bua kuenza mudimu wa ku dîba ne ku dîba bu mudimu webe anyi? Biwitaba bua kuenza nanku, umanye ne: neupete masanka a bungi. Bikala nsombelu uudi nende mpindieu kayi ukupesha mushindu wa kuwenza, pamuapa udi mua kushintulula amue malu. Sambila anu muvua Nehemiya muenze pavuaye ukeba kuenza mudimu wa mushinga mukole, wakamba ne: ‘Mukalenge, ndi nkusengelela ne: upe muntu webe diakalengele.’ (Nehemiya 1:11) Pashishe, bu muudi weyemena Nzambi ‘udi umvua milombu,’ enza malu umvuangana ne milombu yebe. (Musambu 65:2) Bua Yehowa kubeneshaye mudimu uudi umuenzela ne muoyo mujima, udi ne bua kuanji kuenza mudimu eu. Diakamue paudi wangata dipangadika dia kuenza mudimu wa ku dîba ne ku dîba, ushale mudilamate. Mu bungi bua matuku neupete dimanya dia bungi ne disanka diebe nedivule padi.
Nsombelu wa nsongo
15. (a) Ntshinyi tshitudi tupeta patudi tuyukila ne bantu badi benzele Nzambi mudimu bidimu bia bungi anyi tubala miyuki yabu? (b) Mmuyuki kayi wa malu a mu nsombelu uvua mukukankamije bikole?
15 Mmalu kayi audi mua kutekemena paudi wenza disua dia Nzambi? Yukila ne bantu badi benzele Yehowa mudimu kukadi bidimu bia bungi, nangananga aba badi benze bidimu bia bungi mu mudimu wa ku dîba ne ku dîba. Badi ne nsombelu udi usankisha bikole! (Nsumuinu 10:22) Nebakuambile ne: Yehowa katu muanji kupangila bua kubambuluisha bua kupeta bidibu nabi dijinga ne bikuabu bia bungi nansha pavuabu mu ntatu mikole. (Filipoi 4:11-13) Kutuadijila mu 1955 too ne mu 1961, bavua bapatule mulongolongo wa biena-bualu mu Tshibumba tshia Nsentedi bivua biakula bua nsombelu wa bena Kristo ba lulamatu aba bivua ne mutu wa bualu ne: “Ndi nkumbaja tshipatshila tshianyi mu nsombelu.” Kubangila anu pinapu, mbapatule miyuki mikuabu ya malu a mu nsombelu nkama ne nkama. Muyuki wonso udi utusaka bua kuikala ne lungenyi lua tshisumi ne disanka ludi lutuvuluija ludi mu mukanda wa Bienzedi. Kubala miyuki mimpe ya mushindu eu nekukufikishe ku diamba ne: ‘Eu ke nsombelu undi musue kuikala nende.’
16. Ntshinyi tshidi tshivuija nsombelu wa muena Kristo muimpe ne wa disanka?
16 Aaron utudi batele ku ntuadijilu eku udi uvuluka ne: “Mu Afrike, mvua misangu mivule nsambakena ne bansonga bavua benda batambakana mu ditunga benda bakeba nsombelu muimpe. Ba bungi ki mbapete nsombelu eu to. Kadi tuetu tuvua tuenza disua dia Nzambi pa kuyisha lumu luimpe lua Bukalenge ne tuvua ne nsombelu wa lutatu, kadi muikale nsombelu uvua ne tshipatshila. Tudi badimuene ne etu abidi ne: kupa kudi kutamba kuangata kusankisha muntu.”—Bienzedi 20:35.
17. Bua tshinyi tudi ne bua kuenza disua dia Nzambi lelu?
17 Bidi munyi buebe wewe? Mbipatshila kayi biudi nabi? Wewe kuyi ne tshipatshila kampanda tshisunguluke mu mudimu wa Nzambi, bipatshila bikuabu nebikuangate dîba ne bukole buebe ne lukasa. Bua tshinyi kunyangakaja matuku ebe a muoyo mu malu adi bena mu buloba bua Satana ebu batumbisha bu malelela? Mu katupa kakese emu penzeka “dikenga dinene,” bubanji ne lumu lua panu kabiakuikala ne mushinga nansha mukese to. Malanda etu ne Yehowa ke ikala ne mushinga wa bungi. Dîba adi netuikale ne disanka dia bungi bua mutudi basadile Nzambi ne bantu bakuabu ne bua mutudi benze disua dia Nzambi ne muoyo mujima mu nsombelu wetu.—Matayo 24:21; Buakabuluibua 7:14, 15.
[Mêyi adi kuinshi]
a Tudi bashintulule amue mêna.
b Mupatula kudi Bantemu ba Yehowa.
Udi mua kumvuija anyi?
• Mmunyi mudi Yehowa umona mudimu utudi tumuenzela?
• Mmunyi mudi didilongolola ne nkatshinkatshi mua kutuambuluisha bua kusadila Nzambi ne bantu bakuabu?
• Mmidimu ya mishindu kayi itudi mua kuenzela Nzambi?
• Mmunyi mutudi mua kuikala ne nsombelu udi menemene wa nsongo lelu eu?
[Bimfuanyi mu dibeji 23]
Tudi ne bua kuikala ne nkatshinkatshi bua kumona mua kuenzela Yehowa mudimu ne muoyo mujima
[Bimfuanyi mu dibeji 24]
Mudimu wa tshijila udi mishindu ya bungi