Longesha bana bebe
Samuele uvua wenza anu malu mimpe
UKATUKU mumone bana bakuabu benza malu mabi anyi?—a Samuele uvua mubamone. Muaba uvuaye mubamuene nguudi kuyi mua kuela meji bua kubapetapu to. Bavua ku ntenta wa Nzambi, anyi nzubu wa kutendelela uvua mu tshimenga tshia Shilo. Kadi tuanji tuakula muvua Samuele mufike ku ntenta wa Yehowa. Kukadi mpindieu bidimu bipite pa 3 000 katshia bualu ebu buenzeka.
Kumpala kua Ana kulelaye muanende Samuele, uvua ukeba muana ne muoyo mujima. Musangu mukuabu pavuaye ku ntenta wa Yehowa, wakasambila ulomba Nzambi muana. Uvua usambila ne muoyo mujima, kadi anu mishiku yende ke ivua inyungana nkayayi. Pavua muakuidi munene Eli mumone mishiku inyunga nunku, wakela meji ne: uvua mukuatshike maluvu. Kadi pakamanya Eli ne: kavua mukuatshike to, kadi uvua ne malu avua mamutonde ku muoyo, wakamubenesha ne: ‘Nzambi wa Isalele umvue biende kulomba kuwakumulomba.’—1 Samuele 1:17.
Matuku mamane kupita, Ana kulela Samuele, uvua ne disanka dia bungi, ke kuambilaye bayende Elekana ne: ‘Padi Samuele ulekela kuamua dibela, nemmufile ku ntenta wa kusambakena bua yeye kuenzelaku Nzambi mudimu.’ Pakayabu ne Samuele ku ntenta, uvua mua kuikala ne bidimu 4 anyi 5 tshianana.
Eli wakakulakaja, muanende Hofeni ne mukuabu Pinehasa kabavua batendelela Yehowa mu mushindu mulenga to. Bobu bavua benda bundumba ne bakaji bavua benza mudimu ku ntenta wa kusambakena! Udi wela meji ne: tatuabu uvua mua kuenza tshinyi?— Uvua ne bua kubapesha mibelu ne kubakandika bua kuenza malu mabi onso au.
Samuele uvua mua kuikala mumanye bienzedi bibi bionso bia bana ba Eli bualu uvua mukolele ku ntenta eku. Samuele uvua mulonde dikasa diabu anyi?— Tòo, uvua wenza anu malu mimpe bu muvua baledi bende bamulongeshe. Yehowa mumvuile Eli tshiji; kadi kabiena bitukemesha to. Wakatuma kabidi ne muprofete mukuabu bua kuambila Eli mushindu uvuaye mua kunyoka dîku diende nangananga bana bende bavua bantomboji.—1 Samuele 2:22-36.
Samuele wakatungunuka ne kuenza mudimu ne Eli ku ntenta wa kusambakena. Pashishe, Samuele uvua mulale butuku bukuabu kumvuaye dîyi dimubikila. Kuyaye kuitaba Eli, kadi Eli kumuambila ne: ki nyeye uvua umubikila to. Dîyi kumubikiladi kabidi misangu isatu, yeye uya anu kudi Eli. Nunku Eli kuambila Samuele bua kuitaba ne: ‘Yehowa, ambaku, bualu bua muntu webe udi mumvue.’ Pavua Samuele muandamune nunku, Yehowa wakayikila nende. Udi mumanye bivua Yehowa muambile Samuele anyi?—
Nzambi wakambila kabidi Samuele dijinga diende dia kunyoka dîku dia Eli. Pakatshiabu mu dinda, Samuele uvua ne buôwa bua kuambila Eli malu avua Yehowa mumuambile. Kadi Eli wakambila Samuele ne: ‘Ndi nkusengelela ne: kubunsokoki to.’ Ndekelu wa bionso Samuele wakambila Eli malu onso avua Yehowa muambe bua kuenza, anu bu muvua muprofete mudianjile kuambila Eli amu. Eli wakandamuna ne: ‘Yehowa, enze biende malu adi mimpe ku mêsu kuende.’ Ndekelu wa bionso, bakashipa Hofeni ne Pinehasa, Eli pende wakafua.—1 Samuele 3:1-18.
Mu tshikondo atshi, ‘Samuele wakadiunda, Yehowa wakadi nende.’ Samuele uvua kabidi mua kuikala ne bidimu dikumi ne bia mu njila, tshikondo tshitu basonga ne lutatu lua bungi. Udi wela meji ne: bivua bipepele bua Samuele kutungunuka ne kuenza malu mimpe pavua bakuabu kabayi baenza anyi?— Nansha muvuabi kabiyi bitekete, Samuele wakenzela Yehowa mudimu ne muoyo umue matuku ende onso a muoyo.—1 Samuele 3:19-21.
Kadi wewe? Newikale pebe bu Samuele pawakola anyi? Newikale wenza anu malu mimpe anyi? Neutunguke amu ne kulonda malongesha a mu Bible ne malu adi baledi bebe bakulongeshe anyi? Wewe muenze nanku, neusankishe Yehowa ne baledi bebe.
a Wewe ubala tshiena bualu etshi ne muanebe, kalongo kale kadibu bela kadi kakuvuluija ne: anji imana, umuele lukonko alu.