Nkonko ya babadi
Bua tshinyi kuenza mudimu ne dîna dia Nzambi patudi katuyi bamanye bua kudishindumuna bimpe menemene?
Kakuena muntu nansha umue lelu udi mumanye muvuabu bashindumune Dîna dia Nzambi mu tshiena Ebelu tshia kale to. Pabi Dîna dia Nzambi didi mu Bible misangu mitue ku 7 000 mijima. Yezu wakaleja bantu Dîna dia Nzambi patshivuaye pa buloba ne uvua mulongeshe bayidi bende bua kusambila bua banemeke dîna edi. (Matayo 6:9; Yone 17:6) Nunku, bidi bimueneke ne: bua bena Kristo balelele kuenza mudimu ne dîna dia Nzambi kudi ne mushinga wa bungi. Bua tshinyi mbikole lelu bua kumanya mushindu uvuabu bashindumune dîna edi kale? Kudi malu manene abidi.
Bua kumpala, panyima pa bidimu bitue ku 2 000, kuvua bamue bena Yuda bakabueja buôwa mu munkatshi muabu bambe ne: kabivua bimpe bua kuikale kutela dîna dia Nzambi. Pavua mubadi ufika muaba uvuabu betele dîna edi mu Bible, uvua mua kutela muaku “Mukalenge” pa muaba wadi. Nunku, panyima pa bidimu nkama ne nkama bimane kupita kabatshiyi batele dîna dia Nzambi, bantu bakapua muoyo mushindu uvuabu bashindumune dîna edi.
Bualu buibidi, bavua bafunde tshiena Ebelu tshia kale katshiyi ne maleta majikuke to, bienze anu bu mutubu bakosela miaku mu Anglais ne mu miakulu mikuabu amu. Pavua mubadi ubale, uvua wela dileta dijikuke divuaye umone mu lungenyi luende dikumbane bua muaba au. Nunku, bakenza mushindu wa se: kabajimiji nshindumuinu wa miaku ya mu tshiena Ebelu ikavua bantu benda bapue muoyo yonso. Bakela maleta majikuke ku muaku wuonso wa tshiena Ebelu udi mu Bible. Kadi bua dîna dia Nzambi, bavua mua kuela maleta majikuke a muaku “Mukalenge” bua kuvuluija mubadi mudiye mua kubala muaku udi upingana pa dîna edi anyi bavua babenga bua kusakidila dileta dijikuka nansha dimue.
Nunku, tshivua tshishale tshivua anu maleta anayi matshintamane adi nkonga miaku kapanda umvuije ne: “maleta anayi a tshiena Ebelu adi mu Bible adibu bakudimune ne: YHWH adi enza dîna dia Nzambi.” Mbipepele bua kushindumune dîna edi patudi tuela maleta majikuke ne: “Yehowa” mushindu eu wa dishindumune ke udi bantu ba bungi bamanye ne muanyishe mu Tshiluba.
Kadi, bilondeshile bamue bamanyi ba malu a mu Bible, mbimpe kudibikila ne: “Yahweh.” Nshindumuinu eu mmufuanangane ne wa ku ntuadijilu au anyi? Kakuena muntu udi mujadike. Kadi kudi bakuabu bamanyi ba malu a mu Bible badi baleja bua tshinyi ki mbimpe kudishindumuna nanku. Nansha mudiku mêna a bungi a mu Bible makudimuke mu miakulu ya bungi ya buena lelu kaayi bu muvuawu mu tshiena Ebelu, anu bantu bakese ke batu babenga kuitaba. Bantu ba bungi badi bitabe mêna aa bualu mmashale a tshibidilu mu muakulu ne bitu bipepele bua kuamanya. Ke mudibi kabidi bua dîna Yehowa.
Bavua babikila bena Kristo ba kumpala ku dîna dia Nzambi. Bavua bayisha bantu dîna edi ne babakankamija bua kuikala kudibila. (Bienzedi 2:21; 15:14; Lomo 10:13-15) Nanku biamueneki patoke ne: bua Nzambi, tshia mushinga ntuetu kuenza mudimu ne dîna diende mu muakulu wonso utudi tuakula, kumanya mushinga wadi ne kutumikila malu adiye utuambila.
[Lungenyi lunene lua mu dibeji 32]
Dîna dia Nzambi didi mu Bible misangu mitue ku 7 000 mijima