Semena pabuipi ne Nzambi
Yehowa mmusue bua tusungule
MUANETU wa bakaji kampanda wakamba ne: “Misangu mivule, mvua anu ne buôwa bua patupu bua ne: mvua mufuane kulua kulekela Yehowa.” Muanetu au uvua wela meji ne: malu mabi avua mamufikile patshivuaye mupuekele avua pamuapa mamuvuije muena diakabi. Kadi ke mutubi anyi? Malu adi atufikila adi bulelela atuvuija bakengi badi kabayi ne tshikuabu tshia kuenza anyi? Ki mmuomu to. Yehowa Nzambi mmutupe bukokeshi bua kudisunguila malu, nanku tudi anu mua kudisunguila tshitudi mua kuenza ne nsombelu wetu. Yehowa mmusue bua tusungule njila muimpe, kabidi mu Dîyi diende udi utuleja mutudi mua kuenza nanku. Tangila Dutelonome nshapita wa 30, umvue tshidi Mose wambamu.
Mbikole bua kumanya tshidi Nzambi ujinga bua tuetu kuenza ne kutshienza kabidi anyi?a Mose wakamba ne: ‘Mikenji eyi ingakunuambila lelu kayena minupite bukole bua nuenu kuyenza; kayena kule.’ (Mvese wa 11) Yehowa kena utulomba malu atudi katuyi mua kutua tshiadi to. Malu adiye utulomba ki mmapitshidile to, ngatudi mua kukumbaja. Tudi kabidi mua kuamanya bipepele. Katuena ne bua kubanda “mu diulu” anyi kusabuka ‘dishiya dia mâyi manene’ bua kushisha kumanya tshidi Nzambi ujinga ne: tuenze to. (Mvese wa 12 ne 13) Bible udi utumvuija patoke nsombelu utudi ne bua kuikala nende.—Mika 6:8.
Tshidibi, Yehowa kena utuenzeja bua kumutumikila to. Mose wakamba kabidi ne: ‘Ngakuteka muoyo ne malu mimpe, ne lufu ne malu mabi kumpala kuenu lelu.’ (Mvese wa 15) Tudi ne budikadidi bua kusungula muoyo anyi lufu, buimpe anyi bubi. Tudi mua kusungula bua kutendelela Nzambi ne kumutumikila ne kutekemena masanka anyi bua kubenga kumutumikila ne kulua kupeta diakabi. Malu aa onso, tuetu nkayetu ke badi ne bua kudisunguila.—Mvese 16-18; Galatia 6:7, 8.
Tshituasungula atshi, Yehowa udiku natshi bualu anyi? Eyowa! Nyuma wa Nzambi wakasaka Mose bua kuamba ne: “Nudisunguile muoyo.” (Mvese wa 19) Kadi mmunyi mutudi mua kudisunguila muoyo? Mose wakaleja ne: tudi ne bua ‘kunanga Yehowa Nzambi wetu, ne kutumikila dîyi diende, ne kumulamata.’ (Mvese wa 20) Tuetu bafike ku dinanga Yehowa, netuanyishe bua kumutumikila ne kumulamata nansha bia munyi. Patudi tuenza nanku, tudi tusungula muoyo, bualu awu ke nsombelu mutambe yonso buimpe lelu udi ne ditekemena dia muoyo wa kashidi pa buloba bupiabupia budi Nzambi mutulaye.—2 Petelo 3:11-13; 1 Yone 5:3.
Mêyi a Mose aa adi alongesha bulelela budi mua kukupa disulakana. Nansha malu a mushindu kayi makufikile pa buloba ebu bubi, kuena mukengi udi kayi ne tshikuabu tshia kuenza to; kuena muela mulawu anyi muena diakabi to. Yehowa mmukupeshe bukokeshi bua kudisunguila malu. Nunku, udi mua kusungula bua kunanga Yehowa, kumutumikila, ne kushala mumulamate. Wewe muenze nanku, Yehowa neakubeneshe.
Pakamanya muanetu wa bakaji utudi batele ku ntuadijilu ne: tudi ne bukole bua kudisunguila malu, bu mudi kunanga Yehowa ne kumuenzela mudimu, wakakola ku muoyo. Udi wamba ne: “Ndi munange Yehowa bikole. Mvua misangu mikuabu mpua muoyo ne: tshidi ne mushinga mukole ntshia mundi munange Yehowa. Ke bualu kayi ndi anu mua kushala mumulamate.” Yehowa udi mua kukuambuluisha pebe bua wewe kushala mumulamate.
[Mêyi adi kuinshi]
a Bala tshiena-bualu tshia ne: “Semena pabuipi ne Nzambi: Ntshinyi tshidi Nzambi utulomba?” mu Tshibumba tshia Nsentedi tshia dia 1 ngondo wa dikumi 2009, mu Mfualansa.