‘Ndi mua kusakidila tukuabu’

ALLEN wakabanga kukuatshika maluvu pavuaye ne bidimu 11.a Uvua ne tshilele tshia kuya kunaya ne balunda bende mu tshisuku, bidikija malu avua bantu bavuabu bamona mu filme benza. Malu a mu filme aa kaavua malelela to, kadi Allen ne balunda bende bavua banua maluvu a bushuwa.

Tony uvua unua vere umue anyi ibidi, kadi ku kakese ku kakese pakavuaye ne bidimu 40 ukavua unua itanu anyi isambombo dilolo dionso. Ndekelu wa bionso, kavua kabidi mumanye bungi bua milangi ivuaye unua ku dituku to.

Allen wakalomba diambuluisha bua kulekelaye maluvu. Kadi Tony yeye wakabenga diambuluisha dia kudi bena mu dîku diabu ne balunda bende. Bu mutshidi Allen ne muoyo, neatulondele muyuki wende; Tony yeye wakafua mu njiwu ya mashinyi mukuatshike maluvu, kukadi bidimu ndambu.

Nansha muntu udinuina maluvu ende ukuatshika, dikuatshika diende didi mua kukebela bantu bakuabu ntatu, ne ntatu eyi idi mua kumukebela diakabi.b Dikuatshika ditu misangu ya bungi difikisha muntu ku buakulavi ne buenzavi, ku dibundangana ne dishipangana, ku dipeta njiwu mu diendesha mashinyi anyi ku mudimu, nansha ku dipeta masama bungi tshianana. Dikuatshika dia maluvu didi ditudishisha makuta mapite bungi tshidimu tshionso etshi, kusakidila ku malu mabi adidi dikebela munu wa maluvu, bantu bakuabu, balela ne bana bende.

Tshibambalu kampanda tshia makanda a mubidi tshia mu États-Unis tshidi tshiamba ne: ‘Muntu yonso utu ne tshibidilu tshia kunua maluvu katu kanuayi to. Ba kanuayi bonso kabatu banua maluvu dituku dionso to.’ Bantu ba bungi mbabange kunua bikole kabayi bamanye to. Bamue batu banua ku misangu, kadi banua vere mipite pa itanu musangu umue.

Wewe musue kunua maluvu, mbungi kayi buudi umona ne: buapitshi? Mmunyi muudi mua kumanya dîba diudi kuyi ne mua kusakidila maluvu makuabu? (Nsumuinu 23:29, 30) Biena-bualu bidi bilonda nebileje malu mimpe adi mua kuambuluisha bantu.

[Mêyi adi kuinshi]