Bushuwa, etshi ke Tshibumba tshia Nsentedi tshia kulonga!
Tudi benzulule Tshibumba tshia Nsentedi tshia kulonga bua tshikale tshimpe kumona ne tshinuambuluisha panudi nulonga Dîyi dia Nzambi.—Mus. 1:2; 119:97.
Kukadi bidimu binayi bitudi tupatula mishindu ibidi ya Tshibumba tshia Nsentedi, tshimue bua bantu bonso ne tshikuabu buetu tuetu Bantemu ba Yehowa ne balongi betu ba Bible badi balubuluka.
Muanetu wa balume kampanda ukadi muenzele Yehowa mudimu munkatshi mua bidimu bia bungi wakafunda bua tshibejibeji tshia kulonga wamba ne: “Ngakamona ne: Tshibumba tshia Nsentedi tshia kulonga tshimvua mupete bua musangu wa kumpala tshivua tshilenga tshitambe ne tshivua tshindenge bikole. Mushindu uvua tshibejibeji etshi tshiakula bua malu malelela a mu Bible patoke wakandenga ku muoyo bikole. Ndi nnuela tuasakidila wa bungi bua tshibejibeji tshipiatshipia etshi.” Muanetu wa balume mukuabu wakafunda pende ne: “Mvua musue kuanji kupeta dîba dia bungi dia kulonga Tshibumba tshia Nsentedi etshi ne Bible wa note ku luseke.” Tudi bajadike ne: ke muudi pebe udiumvua.
Anu munudi bamanye, Tshibumba tshia Nsentedi ntshituadije kupatuka katshia ku tshidimu tshia 1879, nunku bu kabuyi bua nyuma wa Yehowa, kabivua mua kuikala bipepele bua kutungunukabu ne kutshipatula too ne lelu to. (Zek. 4:6) Mu bidimu bionso 133 ebi, mbashintulule tshizubu tshia pa mutu pa Tshibumba tshia Nsentedi misangu ya bungi. Bua tshidimu tshia 2012, tshibejibeji tshionso tshia kulonga netshikale ne foto wa bantu bayisha pa mutu bua kutuvuluija mudimu udi Nzambi mutupeshe wa kuyisha Bukalenge buende ne muoyo mujima. (Bien. 28:23) Mu dibeji dibidi neusangane foto ne diumvuija dikese kuinshi dia tshidi bantu badi mu foto au benza ne muaba udibu. Mu tshidimu etshi tshijima, tshibejibeji etshi netshikale tshituvuluija ne: batendeledi ba Yehowa badi bayisha lumu luimpe ‘pa buloba bujima.’—Mat. 24:14.
Mmalu kayi makuabu adibu bashintulule mu tshibejibeji etshi? Mbateke kazubu katu ne nkonko ya diambulula ku ntuadijilu kua tshiena-bualu tshionso tshia kulonga. Nkonko eyi neyikuambuluishe bua kuvuluka malu manene audi ne bua kutabalela paudi wenda ubala anyi udilongolola ku tshiena-bualu. Kabidi, balombodi ba dilonga dia Tshibumba tshia Nsentedi nebenze mudimu ne nkonko eyi bua kuenza diambulula dia malu onso ku ndekelu kua dilonga. Neumone imue misangu bashiye muaba munene ku mielelu kua dibeji ne badiundishe kabidi nimero ya dibeji ne ya nkonko bua ikale mimueneke bimpe.
Anu mudibi bileja mu tshibejibeji etshi, mbasakidile tshiena-bualu tshipiatshipia tshia ne: “Mu bintu bietu bia kale,” bua kuleja mudi mudimu wa Bantemu ba Yehowa ba matuku etu aa wenda uya kumpala mu mushindu wa dikema. Nebikale kabidi bapatula ku misangu malu malelela a mu nsombelu mu tshiena-bualu tshia ne: “Bakadifila ne muoyo mujima.” Biena-bualu ebi nebiumvuije bimpe mudi bana betu ba balume ne ba bakaji bapete disanka ne malu malenga pavuabu benzele Yehowa mudimu mu teritware idibu ne dijinga dinene dia bamanyishi ba Bukalenge.
Utambe kusanka bua kudisumbila dîba dia kulonga Dîyi dia Nzambi ku diambuluisha dia tshibejibeji etshi.
Bapatudi
[Tshimfuanyi mu dibeji 3]
1879
[Tshimfuanyi mu dibeji 3]
1895
[Tshimfuanyi mu dibeji 3]
1931
[Tshimfuanyi mu dibeji 3]
1950
[Tshimfuanyi mu dibeji 3]
1974
[Tshimfuanyi mu dibeji 3]
2008