MANDAMUNA A NKONKO YA MU BIBLE

Nzambi utuku uteleja masambila onso anyi?

Nzambi utu uteleja bantu ba bisamba bionso. (Musambu 145:18, 19) Bible, Dîyi diende didi ditulomba bua kumuambila bualu buonso butudi nabu. (Filipoyi 4:6, 7) Kadi amue masambila kaena asankisha Nzambi to. Tshilejilu, diambulula dia masambila makuate ku muoyo kadiena dimusankisha nansha kakese.​—Bala Matayi 6:7.

Yehowa kena kabidi wanyisha masambila a bantu badi babenga kutumikila mikenji yende ku bukole. (Nsumuinu 28:9) Tshilejilu, mu bikondo bivuabu bafunda Bible, Nzambi wakabenga kuteleja masambila a bena Isalele bavua bashipangana. Bushuwa, tudi ne bua kukumbaja malu kampanda bua Nzambi kutelejaye masambila etu.​—Bala Yeshaya 1:15.

Ntshinyi tshitudi ne bua kuenza bua Nzambi kuteleja masambila etu?

Katuena ne bua kusambila Nzambi katuyi ne ditabuja to. (Yakobo 1:5, 6) Tudi ne bua kuikala batuishibue ne: udiku ne udi ututabalela. Tudi ne bua kukolesha ditabuja dietu patudi tulonga Bible, bualu ditabuja dilelela ndishindamene pa dituishibua ne bijadiki bidi mu Dîyi dia Nzambi.​—Bala Ebelu 11:1, 6.

Tudi ne bua kusambila Nzambi ne muoyo mujima ne budipuekeshi. Nansha Yezu Muana wa Nzambi uvua ne budipuekeshi pavuaye usambila. (Luka 22:41, 42) Nunku, pamutu pa kuambila Nzambi tshidiye mua kuenza, tudi ne bua kubala Bible bua kumvua tshidiye utulomba bua kuenza. Pashishe tudi ne bua kusambila mu diumvuangana ne disua dia Nzambi.​—Bala 1 Yone 5:14.