TSHIENA-BUALU TSHINENE | MASHIMI ADI ASAKA BANTU BUA KUBENGA KUNANGA NZAMBI
Bua tshinyi mbikolele bantu bua kunanga Nzambi?
Yezu Kristo wakamba mu tshidimu tshia 33 bikondo bietu ebia mêyi aa: “‘Udi ne bua kunanga Yehowa Nzambi webe ne muoyo webe wonso ne anyima webe yonso ne lungenyi luebe luonso.’ Eu ke mukenji munene ne wa kumpala.”
Mbikolele bamue bantu bua kunanga Nzambi. Buabu bobu mbikole bua kumvua tshidi Nzambi, bamumona muikale kule anyi mene muena tshikisu. Tumonayi bidi bamue bamba:
Marco wa mu Italie udi wamba ne: “Mvua nsambila Nzambi bua angambuluishe, kadi eku mmumona muikale kule tshiyi mua kusemena pabuipi nende. Buanyi meme, tshivua mmona Nzambi bu muntu mulelela udi uditeka pa muaba wa bantu to.”
Rosa wa mu Guatemala udi wamba ne: “Nansha mumvua ne dijinga dikole dia kusadila Nzambi ne muoyo mujima, mvua mmumona muikale kule, ne bu muntu wa malu makole udi musue anu kutunyoka. Tshivua ngitaba ne: uvua uditeka pa muaba wa bantu to.”
Raymonde wa mu Canada udi wamba ne: “Pantshivua muana, mvua ngela meji ne: Nzambi uvua ukeba bilema bietu ne yeye mutupete nabi, uvua utunyoka. Pashishe, mvua mmumona bu udi kule ne bantu. Mvua mfuanyikija Nzambi bu kavula-mbedi udi ulongolola malu a bantu badiye ulombola, kadi kayi uditatshisha bua bualu buabu to.”
Udi wela meji ne: kakuena mushindu wa kunanga Nzambi anyi? Kukadi bidimu bia bungi bidi bena Kristo badiela lukonko elu. Bushuwa, mu bikondo bia kale, bantu ba bungi ba mu bukua buena Kristo kabavua nansha kabidi basambila Nzambi wa Bukole Buonso to. Bua tshinyi? Bantu bavua ne ditshina dibi dia Nzambi. Will Durant mumanyi wa malu a kale udi umvuija bualu ebu mushindu eu: “Mmunyi mudi masambila a muenji wa mpekatu mua kufika kudi Nzambi mubi udi kule ne bantu?”
Bua tshinyi bantu mbatuadije kumona Nzambi bu muntu “mubi udi kule nabu”? Ntshinyi tshidi Bible ulongesha menemene bua Nzambi? Kulonga bulelela pa bidi bitangila Nzambi kudiku mua kukuambuluisha bua kumunanga anyi?