MANDAMUNA A NKONKO YA MALU A MU BIBLE
Bua tshinyi kusambila bua Bukalenge bua Nzambi bulue?
Udiku musue kumanya malu a bungi bua Bukalenge bua Nzambi ne tshikalabu mua kuenza anyi?
Bukalenge bua Nzambi mbulamatadi wa mu diulu. Yezu wakambila bayidi bende bua kusambila bua dilua dia Bukalenge ebu bualu nebufile buakane ne ditalala pa buloba. Kakuena mbulamatadi wa bana ba bantu udi mua kujikija kashidi tshikisu, kansungansunga anyi masama, kadi Bukalenge bua Nzambi bobu nebujikije malu aa. Nzambi mmusungule Muanende Yezu bua kuikalaye Mukalenge wa Bukalenge ebu. Yehowa mmusungule kabidi tshisumbu tshia bayidi ba Yezu bua kukokesha pamue ne Yezu mu Bukalenge.—Bala Luka 11:2; 22:28-30.
Mu katupa kîpi emu, Bukalenge bua Nzambi nebubutule bantu bonso badi baluisha bukokeshi bua Nzambi. Nunku, kusambila bua Bukalenge bua Nzambi bulue nkulomba bua mbulamatadi wa Nzambi apingane pa muaba wa mbulamatadi yonso ya bantu.—Bala Danyele 7:13, 14; Buakabuluibua 11:15, 18.
Ntshinyi tshidi tshileja ne: Bukalenge bua Nzambi nebuambuluishe bantu?
Yezu Mmukalenge muimpe bualu udi uditeka pa muaba wa bantu. Bu mudiye muana wa Nzambi, udi kabidi ne bukole bua kuambuluisha bantu bonso badi balomba Nzambi diambuluisha.—Bala Musambu 72:8, 12-14.
Bukalenge bua Nzambi nebuambuluishe bantu bonso badi basambila ne muoyo mujima bua bulue ne badi benza malu mu diumvuangana ne disua dia Nzambi. Kuakunyingalala nansha kakese bua kumanya tshidi Bible wamba bua Bukalenge bua Nzambi.—Bala Luka 18:16, 17; Yone 4:23.