MANDAMUNA A NKONKO YA MALU A MU BIBLE
Bubi mbufumine penyi?
Nnganyi uvua mutete kufikisha Yezu ku dienza malu mabi?—Matayi 4:8-10
Mu kuamba kuimpe, bantu batu basue kuikala bena ditalala, bamba anu bulelela ne bena malu malenga. Kadi, bua tshinyi tudi tumona misangu ya bungi tshikisu, malu mabi ne dienzelangana bibi? Ngumu idi yenza bûowa mmivulangane bikole. Kudiku muntu kampanda udi ufikisha bantu ku dienza malu mabi anyi?—Bala 1 Yone 5:19.
Nzambi uvuaku mufuke bantu ne dijinga dia kuenza malu mabi anyi? Tòo, Yehowa Nzambi uvua mufuke bantu mu tshimfuayi tshiende, bikale ne dijinga dia kuidikija dinanga diende. (Genese 1:27; Yobo 34:10) Kadi, bua kutua bantu mushinga menemene, Nzambi wakabapesha kabidi tshipedi tshia kudisunguila malu. Pavua baledi betu ba kumpala benze bubi ku bukole, bavua babenge kulonda tshilejilu tshia Nzambi, kuluabu bantu bapange bupuangane. Tudi bapetele dijinga dia kuenza bubi kudibu.—Bala Dutelonome 32:4, 5.
Netuikale anu ne bubi kashidi ne tshiendelele anyi?
Nzambi mmusue bua tuetu kukandamena dijinga ditudi nadi dia kuenza malu mabi. (Nsumuinu 27:11) Ke bualu kayi udi utulongesha mushindu wa kuepuka kuenza malu mabi ne utuleja mushindu wa kupeta disanka dia bushuwa. Kadi mpindieu katuena anu mua kuidikija dinanga dia Nzambi bimpe menemene to.—Bala Musambu wa 32:8.
Nansha mudi bubi buvule lelu, Nzambi mmubulekele bua tshitupa tshîpi tshianana bua bonso bamone bipeta bibi bia bubi. (2 Petelo 3:7-9) Kadi, mu katupa kîpi emu, buloba nebuwule tente ne bantu badi batumikila Nzambi ne disanka.—Bala Musambu wa 37:9-11.