TSHIENA-BUALU TSHINENE | BANTEMU BA YEHOWA MBANGANYI
Bua tshinyi tutu tuyisha?
Pamuapa kakuena tshintu tshidi tshitamba kutuvuija bashilangane ne bantu bakuabu bu mudimu wetu wa kuyisha ku nzubu ne ku nzubu, mu njila ne miaba idi bantu ba bungi bakunguila to. Bua tshinyi tutu tuenza mudimu eu?
Bantemu ba Yehowa badi bayisha bua kutumbisha Nzambi ne kumanyisha dîna diende (Ebelu 13:15) Tudi kabidi basue kutumikila Yezu Kristo wakatuelela mukenji eu: “Nunku, ndayi nuvuije bantu ba mu bisamba bionso bayidi. Nubalongeshe mua kutumikila malu onso amvua munuambile.”—Matayi 28:19, 20.
Bualu bukuabu mbua ne: tudi banange muntu netu. (Matayi 22:39) Bushuwa, tudi bamanye ne: bantu ba bungi batu ne malu atubu bitabuja mu bitendelelu biabu ne ki mmuntu yonso utu witaba mukenji wetu to. Tutu bamanye kabidi ne: malongesha a mu Bible adi asungila bantu. Ke bualu kayi tudi ‘tutungunuka ne kulongesha ne kuamba lumu luimpe lua Kristo’ anu bu bena Kristo ba mu bidimu lukama bia kumpala.—Bienzedi 5:41, 42.
Antonio Cova Maduro mumanyi wa malu a mu nsombelu wakafunda bua “madikolela adi Bantemu ba Yehowa benza ne ntatu idibu batuilangana nayi, badipangisha too ne amue malu bua dîyi dia Nzambi difike too ne ku ntengu ya buloba.”—Tshikandakanda tshia El Universal, mu Vénézuéla
Bantu ba bungi batu babala mikanda yetu ki mbatemu ba Yehowa to. Bantu ba bungi batudi tulonga nabu Bible badi mu bitendelelu bikuabu. Kadi batu ne dianyisha dia bungi patu bantemu ba Yehowa baya kubatangila ku mbanza yabu.
Bushuwa, udi mua kuikala ne nkonko mikuabu idi itangila Bantemu ba Yehowa. Tudi tukulomba bua kumanya mandamuna adibu bafila wewe:
Muebeje umue wa ku Bantemu ba Yehowa.
Mubuele mu site wetu wa ku Enternete wa www.jw.org.
Mubuele mu bisangilu bietu bitu bantu bonso babuela kabayi bafuta makuta to.