Mua kuvuija dilonga diebe dia Bible dimpe didi disankisha bikole

Yoshua ubala Mikenji; bimanu bia Yeliko biupuka, nzubu wa Lahaba kayi upuka yeye to; Yoshua usambila muele bianza muulu

YOSHUA uvua kumpala kua lutatu lukole. Uvua ne bua kulombola tshisamba tshia Isalele mu Buloba Bulaya mu ntatu mikole. Kadi Yehowa wakamujadikila ne: uvua ne bua kukumbana, kumukankamijaye ne: ‘Ikala ne dikima ne bukole. Utumikile Mikenji yanyi. Uyibale munya ne butuku, bua utumikile ne muoyo mujima malu onso adibu bafundamu. Dîba adi malu ebe neende bimpe ne newenze malu ne meji.’—Yosh. 1:7, 8.

Mu “bikondo bia malu makole bidi bikole mua kupita nabi” ebi, tudi petu tutuilangana ne ntatu mikole. (2 Tim. 3:1) Anu bu Yoshua, tudi mua kuyitantamena tuetu tutumikila mibelu idi Yehowa utupesha. Tudi ne bua kubala Bible pa tshibidilu, ne kutumikila mêyi manene adimu ne muoyo mujima patudi tutuilangana ne ntatu.

Nansha nanku, ba bungi ba kutudi ki mbamanye mua kulonga, anyi kulonga mene kakuena kubasankisha. Kadi bu mudi kulonga Bible kuikale ne mushinga wa bungi, tangila kazubu ka “Teta ngenyi eyi” bua kumanya mua kuvuija dilonga diebe dimpe didi disankisha bikole.

Mufundi wa Misambu wakimba ne: “Ndombola mu njila wa mêyi ebe, bualu ndi nsankilamu.” (Mis. 119:35) Kubala Dîyi dia Nzambi kudi mua kukusankisha pebe. Neupete ngenyi mimpe ya bungi paudi utungunuka ne kubala Bible.

Nansha muudi kuyi ne bua kulombola tshisamba bu Yoshua, udi ne yebe ntatu. Nunku anu bu Yoshua, longa malu adibu bafunde bua kukuambuluisha ne uwatumikile. Paudi wenza nunku, malu ebe pebe neende bimpe ne newenze malu ne meji.

TETA NGENYI EYI

Sambila kumpala kua kudilongela. Mu Bible mudi ngenyi ya Nzambi wa bukole buonso idiye mufundishe bua diakalenga diebe. Nunku paudi ubala Bible, mulomba bua akuambuluishe bua umvue malu adimu, ushale nawu mu lungenyi, ne uwatumikile mu nsombelu webe.—Eze. 7:10.
Ikala udiela nkonko paudi ubala Bible anyi mikanda yetu. Udi mua kudiebeja ne: ‘Ntshinyi tshidi mvese eu undongesha bua Yehowa? Mmunyi mudiyi upetangana ne mukenji munene udi mu Dîyi diende? Mmunyi mundi mua kuambuluisha bakuabu ne malu aa?’
Elelangana meji a malu audi ulonga. Paudi wenda ubala, anji imana ne ela meji. Udiebeje ne: Mmunyi mundi ndiumvua bua bualu ebu? Bua tshinyi ndi ndiumvua nanku? Mmunyi mudi bualu ebu bupetangana ne nsombelu wanyi wa kale, wa mpindieu, anyi pamuapa wa matuku atshilualua? Mmunyi mundi mua kutumikila mêyi manene a mu Bible aa ne mubelu eu mu nsombelu wanyi? (Yobo 23:5; Mis. 49:3) Mona ni udi mua kumvuija bua tshinyi Yehowa udi usengelela bantu bende bua kuepuka imue ngenzelu ya malu, anyi bipeta bibi bidi muntu mua kupeta padiye kayi ulonda tshidibu bamuambile.—Dut. 32:28, 29.
Ikala umona malu mu lungenyi paudi wenda ubala. Tshilejilu, kuenaku mua kudifuanyikijila mu lungenyi muvua bana babu ne Jozefe bamupana kudi bena Yishemaele anyi? (Gen. 37:18-28) Ntshinyi tshiudi umona anyi uteleja? Mmupuya kayi uudi umvua? Diteka pa muaba wa bantu badi mu muyuki uudi ubala. Ntshinyi tshidibu bela meji ne bumvua? Ngenyi ya nunku neivuije malu audi ubala malelela ne mikale ne mushinga wa bungi.
Enza mudimu ne bintu bia kudilongela nabi bidibu bapatule bua upete malu a bungi mu makebulula ebe. Ibidilangana ne bintu bia kukebulula nabi malu bidi mu muakulu wenu, bia ku Enternete anyi bidi pa mabeji. Kuelakanyi bua kulomba bakuabu bua bakulongeshe mua kuenza nabi makebulula bimpe to. Tshilejilu, mukanda wa Index des publications des Témoins de Jéhovah ne Mukanda wa makebulula wa Bantemu ba Yehowa nebikuambuluishe bua kumanya mudibu bumvuije biena-bualu bia bungi anyi mudibu bumvuije mvese ya bungi ya mu Bible. Bala bisakidila bidi mu Bible, Nkudimuinu wa Bulongolodi bupiabupia bikalaye mu muakulu uudi mumanye. Bidi bikupetesha malu a mushinga mukole adi atangila bitupa bia buloba, dîba divua malu menzeke, bujitu bua bintu ne bipiminu, ne malu makuabu.
Patula ngenyi minene bua uvuluke malu audi ufuma ku dilonga. Bualu bua mushinga bua kuenza nkuambila bakuabu malu au. Kudiku bualu buudi mua kuambila muntu mu buambi anyi? Wewe wenza nunku, neushale mulame malu manene mu lungenyi luebe ne newambuluishe bakuabu ne malu audi mulonge.