Bionso Bidi Bienda Bimpe Bitambe Mu Nyuma!
1 Bantu bavule badi balota dituku dikalabu mua kuamba ne: “Bionso bidi bienda bimpe bitambe!” Buabu bobo, dituku adi nedilue papetabu bintu bia bungi bia ku mubidi, ke biabambuluisha bua ‘kusombabu mu ditalala, bua kudia, bua kunua ne kuikisha biakane.’ (Luka 12:19) Bishilangane, tudi mua kuamba bituadije ku mpindieu ne: katuena bapange tshintu nansha tshimue tshia mu nyuma. (Mus. wa 34:10) Mushindu kayi?
2 Tudi tubala mu Nsumuinu 10:22 (NW) ne: “Dibenesha dia Yehowa—ke ditu divuija muntu mubanji.” Tuetu badi bababidila dianyishibua ku mêsu kua Nzambi, tudi mua kuamba ne: Nzambi udi “utupetesha bintu bionso mushindu wa kuvua babanji, bua tuetu kusanka nabio.” (1 Tim. 6:17) Ebi bidi bituvuija babanji kutamba bonso pa buloba!
3 Tutumayi lungenyi ku masanka atudi nawu: Bakese ba kutudi ke badi ne bintu bivule bia ku mubidi. Kadi, tudi babeneshibue bualu katuena tusumpakana mushindu munekesha bua majinga etu a dituku dionso. Yehowa mmumanye bintu bitudi tukengela ne udi utulaya bua kutupeteshabi. (Mat. 6:31-33) Dilaya edi didi ditupetesha ditalala dia mu nyuma dikena kupima mushinga wadi.
4 Kadi masanka a mu nyuma atudi tulabula ki mmimanyine amu apa nansha. Muoyo wetu mmusuikakaja ku biakudia bia mu nyuma bidi bifumina kudi Yehowa. (Mat. 4:4) Aba badi bakeba biakudia bia mu nyuma mu bulongolodi ebu badi bafua ne nzala patudi tuetu tunua ne tudia tuukuta. (Yesh. 65:13) “Mupika wa lulamatu” udi utupetesha dimanya divule didi difikisha ku muoyo wa kashidi ne dikena kufuanyikija ne dikuabu.—Mat. 24:45; Yone 17:3.
5 Buena-muntu buetu bua mpatshi pa buloba bujima budi butupetesha mushindu wa kubabidila malanda a musangelu ne bana betu buule tente ne dinanga pa buloba bujima. (Yone 13:35) Tshisumbu tshietu mmuaba wa ditalala, utudi mua kupetela disambibua ne dikoleshibua. Bakulu badi bakuba anyima yetu ne badi batuambuluisha bua kuakama ntatu mishilashilangane. (Eb. 13:17) Pa kuikala pabuipi ne bana betu, tudi tukankamijangana bamue ne bakuabu, ke bidi bitukolesha ne bituambuluisha bua kunanukila.—Lomo 1:11, 12.
6 Mudimu wetu kabidi ndibenesha. Midimu mivule itu itondangana ne kayitu ipetesha disanka nansha. Pa kumanyisha bakuabu lumu luimpe, tudi tubapetesha disanka, ne ebi bidi bitusankisha. (Bienz. 20:35) Nenku netuikale mua kusankisha anyima wetu bua mudimu wetu mukole.—Muambi 2:24, NW.
7 Kupita bionso, tudi ne ditekemena dia dikema. (Lomo 12:12) Tudi bindile bulongolodi bupiabupia bupuangane ne buakane, mutuikala ne nsombelu wa diakalenga ne ditalala bia kashidi popamue ne banangibue betu. Ditekemena edi ndia mushinga mukole kupita bionso bidi bulongolodi ebu mua kutupetesha.—1 Tim. 6:19.
8 Mmunyi mutudi mua kuleja dianyisha dietu? Katuena mua kupingajila Yehowa bionso bidiye mutuenzele nansha. Tudi anu mua kuleja dianyisha dietu (1) pa kumuela tuasakidila dituku dionso bua bulenga buende bukena butuakanyine, (Ef. 5:20), (2) pa kuleja dinanga dietu ku butumike buetu, (1 Yone 5:3), (3) pa kuzangika bunsantu bua Dîna diende ku bumanyishi bua lumu luimpe (Mus. wa 83:18) ne (4) pa kukuatshisha tshisumbu tshia bena nkristo ku dieleshangana maboko mu mudimu.—1 Tim. 3:15.
9 Tudi ne tubingila tuonso bua kuikala bantu ba disanka kutamba bonso pa buloba. (Mus. wa 144:15b) Tudiku mua kuleja disanka ditudi tulabula ku ngikadilu wetu, nsombelu wetu ne mudimu wetu mu mparadizu wetu wa mu nyuma! Bionso bidi bienda bimpe bitambe!