Mmapangadika Kayi Atudi Bangate Bua Tshikondo Tshia Diikisha Dia Kalasa?
Patudi tuela meji ku ngondo eyi: Kashipu, Tshimungu ne Kabitende, tudi tuela meji ku ndongoluelu ya kuenza bua kubuela mu mpuilu wa distrike, ne ku mapangadika a kupitshisha diikisha dietu bilenga peshi kuenza dikumbula dilenga kudi baledi anyi kudi balunda. Tangila amue mavuluija ikala mua kutuambuluisha bua kuteka Bukalenge pa muaba wa kumpala patudi tupangadija bia kuenza mu tshikondo etshi:
◼ Tuangate mapangadika makanyine bua kubuela mu mpuilu wa distrike. Bua kuepuka ntatu kayi yonso, tudianjile kulama mfranga ya kufuta njila ne muaba utuikala ne bua kulala.
◼ Bituenza luendu mu diikisha, tudiakaje bua kubuela mu bisangilu bia mu tshisumbu tshia muaba’au ne kupatuka mu buambi. Tuvuluke bua kutuma luapolo yetu ya mudimu wa buambi; pikalabi bikengedibua, tuyitumine sekretere wa tshisumbu tshietu mu bianza bia muntu anyi njila mujalame udiyi mua kufika pa lukasa.
◼ Dikumbula dia baledi bakena mu bulelela nedikale imue misangu tshikondo tshia kufila bumanyishi bua mu mpukapuka buapatula bipeta bilenga. Tuvulukayi bua kuambula Bible ne mikanda mikuabu.
◼ Netuandamune munyi ku dikengedibua dia kufila diambuluisha dietu mu tshisumbu tshia pabuipi tshidi tshikengela diambuluisha bua kukumbaja mudimu mu teritware watshi? Bakulu peshi mutangidi wa tshijengu nebikale mua kutumanyisha majinga adi mikala asanganyibua mu rejon wetu.
◼ Matuku a diikisha dia kalasa ntshikondo tshilenga tshitambe bua bansonga kuvudijabu mudimu wabu wa buambi. Nsonga, neusanke bua kuikala mpanda-njila muambuluishi anyi?
◼ Mu mêba malenga a dituku, kakuyi mpata netudimuene bipeta bimpe bitambe bituapeta bituikala tupatuka mu buambi nangananga ku mêba a dilolo, padi bantu ba bungi bikala ku mabu.
◼ Bakulu badi nangananga ne bua kubatabalela bua kulama ndongoluelu mulenga wa midimu ya mu tshisumbu, pa kuangata mapangadika bua midimu ivua mipeshibue aba badi benza luendu mu diikisha yenjibue kudi bakuabu.
Tuvuluke se: “Malu adi muntu wa tshisumi ujinga kuenza adi akumbana.” (Nsum. 21:5, MMM) Tuakaje mêba etu mushindu wa kubabidila bia bungi bikondo bia kusadila teokrasi.