Tutuku Tumvuija Biakane Dîyi Dia Nzambi Anyi?

¹ Yezu Kristo mmulongeshi mutambe bunene wa katshia ne katshia. Uvua wakula mu mushindu wa kulenga mitshima ya bantu, kujula nyanji (sentiments) yabu ne uvua ubakankamija bua kuenza midimu mimpe. (Mat. 7:28, 29) Uvua misangu yonso washila dilongesha diende pa Dîyi dia Nzambi. (Luka 24:44, 45) Wakeyekela Yehowa bunême bua bionso bivuaye mumanye ne bivuaye mukumbane mua kulongesha. (Yone 7:16) Yezu wakashiila bayidi bende tshilejilu tshimpe tshitambe ku mushindu wende wa diumvuija biakane Dîyi dia Nzambi.​—⁠2 Tim. 2:15.

² Mupostolo Paulo udi pende tshilejilu tshia kubambisha pa bidi bitangila diumvuija dia Dîyi dia Nzambi mu mushindu mulenga. Kavua amu ubadila bantu Mifundu; uvua umvuija bivuaye ubala ne welelapu meji, ujadika ku diambuluisha dia Dîyi dia Nzambi ne: Yezu uvua Kristo. (Bienz. 17:2-4) Bia muomumue, Apolo, muyidi wa ludimi lupepele, ‘uvua mumanye mukanda wa Nzambi bimpe bitambe’; uvua umvuija Mifundu biakane, uleja bulelela ne dishindika dionso.​—⁠Bienz. 18:24, 28, Muanda Mulenga Lelu.

³ Tuikale balongeshi ba Dîvi dia Nzambi: Mu matuku etu aa, bamanyishi ba Bukalenge batu bapatula bipeta bimpe bitambe padibu balongesha bantu ba muoyo muimpe pa kuelela meji pa Bible ne pa kumutela. Muanetu wa balume kampanda wakatumika ne Yehezekele 18:4 ne mvese mikuabu ìdì yumvuangana ne eu bua kuelesha pastere kansanga meji pamue ne basatu ba ku bena mu tshitendelelu tshiende pa tshiafikila bantu babi ne bantu bakane. Pashishe bena mu Ekleziya bakatuadija dilonga, ne umue wa kudibu wakafika ku ditaba bulelela. Dimue dituku, muntu kampanda úvuá ne dijinga dia kumanya bivule wakalomba muanetu wa bakaji kansanga bua kumvuijaye bayende, uvua kayi muanyishi wa bulelela, bua tshinyi Bantemu ba Yehowa kabatu basekelela Nowele ne mifikilu ya diledibua. Muanetu wa bakaji wakabala mu mukanda wa Comment raisonner mvese idi itokesha muanda eu, ne muntu au wakanyisha. Mukajende wakasanka bikole bitambe bua dianyisha dia bayende ne wakamba ne: “Netubuele mu bisangilu bienu.” Ne mulume wakitaba!

⁴ Tutumikayi ne diambuluisha ditupetesha: Mudimu wetu wa Bukalenge ne programe wa tshisangilu tshia mudimu bidi bitupesha mibelu mimpe mitambe bua kutuambuluisha bua kumvuija Dîyi dia Nzambi. Bamanyishi bavule mbaleje dianyisha diabu bua disungula dia maleja a tshitembelu adibu batupatuila ne menza bu manaya bua kutuambuluisha, ne adi makanyine ne malenga. Mukanda wa Comment raisonner à partir des Écritures mmûle ne ngenyi ìdì ileja mushindu wa kumvuija biakane biena-bualu bia mushinga bia mu Dîyi dia Nzambi bipite pa 70. Mukanda wa Dimanya didi difikisha ku muoyo wa kashidi udi tshikepeshilu tshia malongesha onso a nshindamenu a mu Bible adi bapiabapia ne bua kumanya. Malonga a 24 ne 25 a mu mukanda wa Manuel pour l’École du ministère théocratique adi atuleja mushindu utu balongeshi bazanzamuke benza bua kubueja mvese ya mu Bible mu muyuki, kubala ne kutumika nayi biakane. Tudi ne bua kutumika biakane ne biamu ebi bionso bitupetesha.

⁵ Bitumvuija biakane Dîyi dia Nzambi, netumone se: ‘didi ne muoyo ne bukole . . . ne didi mua kujingulula lukasa meji ne malu adi mutshima musue kuenza’ a aba batudi tuyisha. (Eb. 4:12) Bipeta bituapatula mu ditumika ne Dîyi dia Nzambi nebitusake bua kumanyisha bulelela ne dikima divule!​—⁠Bienz. 4:31.