Mandamuna Ku Nkonko Yenu

◼ Padi tshisumbu kampanda tshilombibue bua kulongolola dijiika dia muntu, bidi mua kuenzeka ne: nkonko idi ilonda eyi ijudibue:

Nnganyi wenza muyuki wa lufu? Dipangadika edi badi ne bua kudiangata kudi bena dîku. Kudi mushindu wa kusungulabu muanetu wa balume kampanda mutambule udi ne lumu luimpe. Bialombabu ngamba-malu mu kasumbu ka bakulu, nebasungule mukulu mukumbane tshishiki bua kuenzaye muyuki muashila pa plan wa Société. Kabakutendakena muntu mufue, kadi nebikale bimpe pamu’apa bua kukoka ntema pa ngikadilu ya tshitembelu ivuaye uleja.

Badi mua kutumika ne Nzubu wa Bukalenge anyi? Kudi mushindu wa kuenza nanku bikala kasumbu ka bakulu kanyishe ne bikalabi kabiyi binyanga programe wa pa tshibidilu wa bisangilu. Badi mua kutumika ne Nzubu wa Bukalenge bikala muntu mufue uvua ne lumu luimpe ne uvua muena mu tshisumbu, peshi bikalabi bua muana mutekete wa muena mu tshisumbu. Bikalabi bimanyike kudi bonso ne: muntu mufue eu kavua ne tshikadilu tshia Buena-nkristo, peshi bikalabi bua tubingila tukuabu tudi mua kunyangishisha lumu lua tshisumbu, bakulu kabakuanyisha pamu’apa bua kutumikabu ne Nzubu wa Bukalenge.​—⁠Tangila mukanda wa Mudimu wetu, dib. 62.

Pa tshibidilu, kabatu batumika ne Nzubu wa Bukalenge bua muyuki wa lufu lua bantu bakena Bantemu ba Yehowa ba mu dîku kampanda dia bena nkristo. Bidi mua kuenzeka nanku pa kumbusha anu bikalabi ne: bena dîku dia mufue mbamanyishi batambule bazanzamuke, ne bikala mufue eu uvua mumanya biakane kudi bana betu ba bungi bu muntu uvua ne mmuenenu wa dianyisha bulelela ne muendeshila lumu lua tshikadilu tshimpe, ne bikala tshibilu katshiyi ne bilele bia mu bulongolodi ebu.

Bianyisha bakulu bua kutumikabu ne Nzubu wa Bukalenge, nebikale mua kudiebeja né bidi ne mushinga bua kulua ne mushete bua tshibilu tshia dijiika muntu. Bikalabi nanku, badi mua kuanyisha bua kuluabu nawu mu Nzubu wa Bukalenge.

Bidi munyi bua dijiika dia bantu bakena Bantemu ba Yehowa? Bikala muntu udi mufue uvua muendeshila lumu luimpe muaba uvuaye musombele, kudi mushindu wa muanetu kampanda kuenzaye muyuki wa dikankamija mushindamene pa Bible ku nzubu kudi tshitalu peshi ku lukita. Tshisumbu katshiakuanyisha bua kutangila dijiika muntu uvua mumanyike bua tshikadilu tshiende tshia buendenda peshi tshibengangane ne mikenji, peshi kabidi uvua ne nsombelu mubengangane ne mêyi-maludiki a mu Bible. Bushuwa, muanetu kampanda kêna mua kuanyisha bua kudisangisha pamue ne muntu kampanda wa mu kasumbu ka bamfumu ba bitendelelu bua kusekelela tshibilu tshia didisangisha anyi kulombola malu a dijikangana mu ekleziya ya mu Babilone Munene.

Tshia kuenza ntshinyi bikala muntu mufue uvua muipata mu tshisumbu? Pa tshibidilu, tshisumbu katshiakutangila malu a dijiikibua diende, ne kabakutumika ne Nzubu wa Bukalenge. Bikala muntu uvua uleja dinyingalala ne dijinga dia kupingana mu tshisumbu, kuondo ka muoyo ka muanetu kampanda nekamulombole pamu’apa bua kuenza muyuki muashila pa Bible ku nzubu kudi tshitalu peshi ku lukita mu tshipatshila tshia kufila bumanyishi kudi bateleji bakena Bantemu ne kukankamija dîku. Kadi, bangabanga ne kuangata dipangadika edi, nebikale bia meji bua muanetu eu kuyukilaye ne kasumbu ka bakulu ne kutabalelaye mibelu yabu. Mu mishindu mikuabu, bikalabi kabiyi bia meji bua muanetu eu kuenzaye muyuki, pamu’apa nebikale biakanyine bua muanetu muena mu dîku dia mufue kuenzaye muyuki bua kusamba balela bende.

Nenupete makuabu mêyi-mashidimunyi mu nimero ya Tshibumba tshia Nsentedi tshia dia 15 Kasuamansense 1990, mab. 30-1; tshia dia 15 Tshisua-munene 1981, mab. 29-30; tshia dia 15 Kabalashipu 1980, mab. 5-7; tshia dia 1 Kabitende 1978, mab. 5-8; tshia dia 1 Kabitende 1977, mab. 539-40; tshia dia 1 Tshiongo 1971, mab. 31-2; ne Réveillez-vous ! wa dia 8 Kabitende 1990, mab. 22-3; wa dia 22 Kashipu 1977, mab. 12-15.