Kalasa ka Mudimu wa Teokrasi mu 1998

Tudi mua kumvuija kalasa bu muaba udibu bapetela mamanya ne makokeshi mapiamapia. Ku diambuluisha dia Kalasa ka Mudimu wa Teokrasi, tudi bashidimuja dîba dionso mu dimanya dia Nzambi. Dienza dietu dia midimu mu kalasa aka didi ditupetesha kabidi mushindu wa kulubuluja makokeshi etu mu ndongeshilu ne mu ngakuilu. Mu 1998, programe wa kalasa udi utupesha kabidi mpunga munene wa kulubuluka mu nyuma.

Wewe mutangile programe, neumone se: mudimu No. 3 udi ukonkonona imue misangu muntu kampanda wa mu Bible udi mukanda wa Auxiliaire wakula bualu buende. Neubambishe kabidi ne: mukanda wa Disanka mu dîku mmubueja mu programe eu; nebaukonkonone ku kakese ku kakese mu mudimu No. 3 ne No. 4. Bikala mudimu No. 4 ushindamena pa mukanda wa Disanka mu dîku, muanetu wa balume udi ne bua kuwenza bu muyuki. Tuvuluke se: muntu nansha umue udi ne mudimu mu kalasa kêna ne bua kupitshisha dîba dimufundila.

Bualu bupiabupia: Bua disanka dietu, “Programe musakidila wa dibala dia Bible” mmuleja mu tuboko panyima pa musambu wa dimba. Tudifundile tshipatshila tshia kumulonda, nansha mudi tshitupa nansha tshimue tshia programe wa ku lumingu wa kalasa katshiyi tshishindamenapu. Neatuambuluishe bua tupete tshibidilu tshia kubala Bible dituku dionso, bituikala katuyi tuenza nanku.

Bua mamanyisha a pa mutu pa midimu, mibelu ne diambulula difunda, tubale ne ntema mêyi-mashidimunyi adi mu “Programe wa Kalasa ka Mudimu wa Teokrasi bua 1998” ne mu dibeji 3 dia Mudimu wetu wa Bukalenge wa Kasuabanga 1996.

Biwikala kuyi muanji kudifundisha dîna mu Kalasa ka Mudimu wa Teokrasi, tudi tukulomba bua se: udifundishe mpindieu. Kalasa aka ka pa buaku mu ngikadilu waku kadi katungunuka ne kuenza mudimu wa mushinga mu dishidimuna basadidi ba Yehowa bena budipuekeshi ne didifila, kabambuluisha bua kuikala dîba dionso ba-ministre bakumbane.​—1 Tim. 4:13-16.