Batangidi badi balombola​—Balombodi ba Dilonga dia Mukanda dia Tshisumbu

¹ Bidi disanka dia pa buadi bua mukulu mukumbane peshi musadidi wa mudimu mukumbane kuikala mulombodi wa Dilonga dia Mukanda dia Tshisumbu. Kutabalela majinga a mu nyuma a bantu ba mu kasumbu kende mbujitu bunene. Majitu ende adi mu bitupa bisatu.

² Dilongesha dikumbane: Bidi bikengela ne: mulombodi wa Dilonga dia Mukanda dia Tshisumbu ikale udilongolola bimpe menemene bua kulongesha kasumbu lumingu luonso. Udi ukeba mushindu wa kusonsola dianyisha bua malu adibu balonga. Pamutu pa kuikalaye wela nseka ya bungi yeye nkayende mu dilonga, udi mua kuela nkonko ya pa mutu idi yumvuangana ne malu malonga bua kuela kashonyi pa malu manene a mu dilonga. Lutatu ludiye nalu ndua kuvuija dilonga dikale dishidimuna ne dikoka ntema ne lua kuenza ne: muntu yonso akule. Tshipatshila tshiende ntshia kukolesha mu nyuma, kushindika mushinga wa dilonga mu nsombelu, ne kuenza ne: malu malonga alenge lungenyi ne mutshima wa bantu.​—1 Tes. 2:13.

³ Bulami budi buambuluisha: Mulombodi wa dilonga dia mukanda udi ‘bu tshisokomenu ku tshipepele, ne tshinyemenu tshia ku tshipupu.’ (Yesh. 32:2) Udi bushuwa ukuba muntu yonso mu kasumbu kende ne utabalela bua kufila diambuluisha dia mu nyuma padi umue ku badi ku butangidi buende mutekeshibue ku muoyo.​—Yeh. 34:15, 16; 1 Tes. 2:7, 8.

⁴ Diamba lumu luimpe ne lukunukunu: Mulombodi wa dilonga dia mukanda udi uditatshisha bua kuenza malongolola makanyine bua bantu bonso ba mu kasumbu kende badifile bikole mu mudimu wa budimi. Udi upita kumpala yeye muine mu mudimu wa dimuangalaja evanjeliyo, mumanye se: padiye uleja tshisumi, lukunukunu ne musangelu mu mudimu eu, badi bashale bonso nebalonde tshilejilu tshiende. (Kolos. 4:17; 2 Tes. 3:9) Ku misangu udi udienzeja bua kupatuka mu mudimu ne muntu yonso wa mu kasumbu kende. Bituikala basue kulengeja nzanzu yetu ya diyisha ne dilongesha mu buambi, mulombodi wa dilonga dia mukanda udi mua kutuambuluisha bua kuyilengeja.​—1 Tim. 4:16; 2 Tim. 4:5.

⁵ Bushuwa tudi babenesha ne mapa a bantu badi badiakaje bua kutupetesha diambuluisha dia mu nyuma ne badi batukuatshisha ne dinanga. (1 Tes. 5:14) Dibuela dietu pa tshibidilu mu dilonga dia mukanda ne didifila dietu ne lulamatu mu mudimu wa dimuangalaja lumu luimpe dilejeku dianyisha ditudi nadi bua dilongolola dia dikema edi dia Yehowa.​—Eb. 10:25.