Udiku pebe mua kuambuluishangana anyi?

¹ Mupostolo Paulo wakabela bena mu tshisumbu bua ‘bambuluishangane muomumue.’ (1 Kol. 12:25) Nunku, tudi ne bua kuleja mutudi tutabalelangana ne kuikala ne muoyo wa kuambuluishangana ne dinanga padibi bikengela. Tshilejilu, bamue bana betu ba bakaji munkatshi muetu badi badikoleshila nkayabu bana babu mu bulelela. Bana betu aba badi bambula bujitu bunene bua dikolesha bana babu mu nyuma. Bushuwa mbakanyine bua tuetu kubakankamija ne bulenga ne kubambuluisha ‘ne bintu bidibu bakengela.’ (Lomo 12:13a) Udiku pebe mua kubambuluisha anyi?

² Mishindu iudi mua kuambuluishangana: Kuambula mu mashinyi ebe aba batu anu bafuta njila bua kuya mu bisangilu ne mu mpuilu kudi mua kubepula ku ditula mfranga ya bungi. Kuambuluisha mamu kampanda bua kutabalela bana bende batekete mu bisangilu kudi mua kumupetesha mushindu wa kulonda programe bimpe. Bia muomumue kabidi, kumuambuluisha padiye upatuka ne bana bende mu buambi kudi mua kumupetesha ndambu wa disulakana. Kusankidila bana ne muoyo umue​—kudia nabu bulunda—​kudi mua kuikala ne buenzeji bukole ne buimpe pa bana. Kubikila imue misangu dîku didi ne muledi umuepele bua kubuela mu dilonga dienu dia dîku nekufile diambuluisha dia mu nyuma didi dikanka mija.

³ Ikala ne budimu: Tudi ne bua kuikala badimuke bua ne: katuenzeji muntu udi kayi dijinga ne diambuluisha dietu bua kuditabaye. Anyi katuena ne bua kubuelakana mu malu a mu dîku dia muntu patudi tufila diambuluisha didi dikengedibua. Bushuwa, bena dibaka ne bana betu ba bakaji ke badi mua kuikala bakumbanyine bua kuambuluisha muanetu wa bakaji udi ne dijinga kampanda.

⁴ Bena Kristo bonso mbakankamija bua ‘kulonda njila wa diakidilangana.’ (Lomo 12:13b, NW) Kuambuluisha bana betu ba mu nyuma ng’umue wa ku mishindu mivule itudi tuleja dinanga dia buena dia Kristo ditudi nadi munkatshi muetu.​—Yone 13:35.