“Butoke buenu bukenke”
1 Bukua-panu ebu budi mu mîdima ya mu nyuma ne bikadilu bia badimu mbia mîdima. Nsese ya bulelela idi yela patoke ‘midimu [ya mîdima] idi kayiyi ikuama mamuma mimpe’ bua bantu bamone mua kuepuka mabue a tshilenduishi adi ashipangana aa. Ke tshivua mupostolo Paulo mukankamijile bena Kristo ne: ‘Endayi bu bana ba munya.’—Ef. 5:8, 11.
2 “Mamuma a munya” mmashilangane kule ne kule ne mîdima mikole ya mu bukua-panu ebu. (Ef. 5:9) Kadi bua kupatula mamuma aa, mbimpe tuikale bena Kristo ba tshitembu, bantu badi Yezu wanyisha. Tudi kabidi ne bua kuikala tudifila, tuenza anyi tuamba malu ne muoyo mujima, ne tuanyisha bulelela ne disanka. Malu aa adi ne bua kumueneka mu nsombelu wetu wa matuku onso ne mu mudimu wetu wa diyisha.
3 Tukenkeshe butoke buetu dîba dionso: Yezu wakambila bayidi bende ne: “Butoke buenu bukenke kumpala kua bantu.” (Mat. 5:16, NW) Patudi tuyisha Bukalenge bua Nzambi ne malu adiye mulongolole, tudi tukenkesha butoke bua Yehowa anu bu muakenza Yezu. Tudi tukenka bu bimunyi patudi tuya kutangila bantu ku nzubu yabu ne patudi tumanyisha bulelela ku mudimu, mu kalasa, kudi bena mutumba netu peshi muaba wonso utudi ne mushindu wa kuyisha.—Filip. 2:15.
4 Yezu wakamba ne: bamue bantu nebakine butoke. (Yone 3:20) Nanku kabiena bitutekesha mu maboko padi bantu ba bungi kabayi bananga bua ‘dikenke dia lumu luimpe lua butumbi bua Kristo’ dibakenkeshe. (2 Kol. 4:4) Yehowa mmumanye malu adi mu mitshima ya bantu ne ki mmusue bua benji ba malu mabi bikale munkatshi mua bantu bende to.
5 Patudi tulonda njila ya Yehowa ne tuanyisha bua butoke bua mu nyuma butukenkeshe, tudi mua kubukenkeshila petu bakuabu. Padi bantu bajingulula ne: ‘tudi ne butoke bua muoyo’ nangananga padibu bamona bikadilu bietu, nebibasake bua kuakajabu bikadilu biabu mudibi bikengela, pashishe kuluabu pabu bakenkeshi ba butoke.—Yone 8:12, Mukanda wa Mvidi Mukulu.
6 Patudi tukenkesha butoke buetu, tudi tutumbisha Yehowa ne tuambuluisha bantu ba muoyo muakane bua bamumanye ne bikale ne ditekemena dia muoyo wa tshiendelele. (1 Pet. 2:12) Bu mutudi ne butoke, tuambuluishayi nabu bakuabu bamone mua kupatuka mu mîdima ne bikale ne bienzedi bia butoke.