Bayishayi ne nubamanyishe malu bimpe menemene
1 Anu bu ‘mukokeshi ne kapitene ka bantu,’ Yezu wakalongolola bayidi bende bua mudimu munene wa diyisha uvua mubindile. (Yesh. 55:4; Luka 10:1-12; Bien. 1:8) Mupostolo Petelo wakumvuija mudimu uvua Yezu mubapeshe wamba ne: ‘Wakutupa mukenji wa kuambila bantu bualu buende ne kumanyisha [malu bimpe menemene] ne: yeye ke Udi [Nzambi] mujadike bua kulumbuluisha badi ne muoyo ne bafue.’ (Bien. 10:42, Muanda Mulenga Lelu) Mmushindu kayi utudi mua kumanyisha malu onso bimpe menemene?
2 Tudi mua kumanya malu a bungi tuetu bikale tuelela meji pa tshilejilu tshia Mupostolo Paulo. Pakamonanganaye ne bakulu ba mu tshisumbu tshia ku Efeso, wakabavuluija ne: ‘Tshiakatshina bua kunuambila malu onso akamanya mua kunukuatshisha ne bua kunuyisha padi bantu bunguile ne ku nzubu ne nzubu, ngambila bena Yuda ne bena Gelika [malu bimpe menemene] bua kukudimunabu mitshima kudi Nzambi ne bua kuitabujabu Mukalenge wetu Yezu Kristo.’ Nansha muakatuilanganaye ne mateta yeye muine, Paulo wakakeba mushindu wa kumanyisha bantu ba bungi menemene lumu luimpe. Kakasanka bua kumanyisha bantu anu malu a bulelela a nshindamenu patupu to, kadi wakakeba bua kubambila “malu onso adi Nzambi musue.” Bua kukumbaja tshipatshila etshi, uvua mudiakaje bua kuenza muende muonso ne kudifila bikole. Wakamba kabidi ne: ‘Tshiena mbala muoyo wanyi bu tshintu tshia mushinga mukole kundi, bingamanya mua kujikija tshidikijilu tshianyi tshia lubilu ne mudimu ungakuangata kudi Mukalenge Yezu wa kumanyisha bantu [malu a] lumu luimpe lua ngasa wa Nzambi [bimpe menemene].’—Bien. 20:20, 21, 24, 27.
3 Mmunyi mutudi mua kuidikija tshilejilu tshia Paulo lelu’eu? (1 Kol. 11:1) Mpa kukeba bantu badi mua kuitaba bulelela nansha dîba mene ditudi tuetu bine batuilangane ne mateta, pa kuenza muetu muonso bua kuyisha bantu ba bisa bionso ne ba miakulu yonso lumu luimpe ne pa kuikala ne tshisumi tshia kuambuluisha bantu batudi tupeta badi banyisha bulelela. (Mat. 10:12, 13) Bidi bitulomba dîba, kudienzeja muetu muonso, ne kunanga bantu.
4 Udiku mua kulua mpanda-njila muambuluishi anyi? Ngondo muisatu ne muinayi idi mua kuikala tshikondo tshiakanyine bua wewe kumanyisha malu bimpe menemene pa kuikala mpanda-njila muambuluishi. Tshidimu tshishale biakatukankamija bikole pa kumona bamanyishi ba bungi benza bukole bua pa buabu bua kulua bampanda-njila bambuluishi!
5 Muanetu wa bakaji mukuabu wa bidimu 80 uvua utamba kusamasama wakapeta dijinga dikole dia kuenza bumpanda-njila anu bua mushindu uvuabu batukankamije kudi bulongolodi bua Yehowa. Wakafunda ne: “Dikankamija edi divua dimbishe dijinga dimvua nadi mu mutshima wanyi kukavua matuku a bungi ne dimpeshe meji a meme kulua mpanda-njila muambuluishi kabidi nansha musangu umue.” Wakangata dipangadika dia kulua mpanda-njila mu ngondo muisatu. Wakamba ne: “Bualu bua kumpala bungakenza, ngakanji kusomba ne kuela meji bua bujitu bua mudimu eu. Tuakayikila ne muananyi wa bakaji bualu mvua njinga ne: angambuluishe. Wakankemesha pakangataye dibeji dia bumpanda-njila e kudiuwuja pende.” Mu ngondo muine au, muanetu wa bakaji mununu au wakenza mêba 52 mu buambi. Wakamba ne: “Misangu mivule mvua nsambila Yehowa, mmulomba bua amvudijile makanda pamvua ndiumvua muzengele. Ku ndekelu kua ngondo, mvua ne disanka dia bungi be, meme kuela Yehowa tuasakidila njila ne njila bua muvuaye mungambuluishe. Ndi musue kuteta kabidi.” Disanka diakapetaye adi didi mua kukankamija bakuabu badi ne dijinga menemene dia kulua bampanda-njila bambuluishi nansha bikale batata ne masama.
6 Muanetu mukuabu uvuabu bumushe ku mudimu mu tshimpitshimpi wakalua mpanda-njila muambuluishi mu tshikondo tshine atshi. Mu ngondo uvuaye mpanda-njila au, wakapeta lukunukunu mu buambi ne ku ndekelu kua ngondo kutuadijaye dilonga dia Bible dipiadipia. Pavuaye wela meji ku bualu abu, wakamba ne: “Au uvua ngondo muimpe be!” Uvua ne disanka dia bungi bua muvua Yehowa mumulombole ne mumuambuluishe! Bushuwa, Yehowa wakavudijila muanetu eu mabenesha a bungi bua bukole buakadifilaye nabu mu mudimu eu; nenku neakubeneshe pebe bia muomumue.—Mal. 3:10.
7 Bua bana betu ba bungi, bumpanda-njila buambuluishi ki mbupepele to. Kadi nansha bana betu ba bungi bikale ne majitu a mu mêku ne a ku mudimu ne ntatu yabu buobu bine nkayabu, bavua benze mudimu eu. Kumanyisha kua malu onso adi atangila lumu luimpe kudi misangu mivule kutulomba kudifila tuetu ne dîba dietu ditudi tulobelela, kabidi ne makanda etu; kadi tumanye ne: mabenesha atuapeta kaena kufuanyikija.—Nsu. 10:22.
8 Ngondo muisatu ne muinayi ntshikondo tshiakanyine tshia kuenza bumpanda-njila buambuluishi. Mu ngondo muisatu mudi matuku a Disambombo ne a Dia lumingu atanu atanu. Bamue bamanyishi batu ne midimu ibangata dituku dijima, nunku bobu bangate matuku aa ne mêba a ku dilolo a matuku makuabu, bidi mua kuambuluisha bua kuenzabu bumpanda-njila buambuluishi. Kabidi mu matuku a ngondo muinayi atu bantu kabayi baya ku mudimu, muntu udi mua kuya mu buambi. Bakuabu badi mua kuikala ne matuku adibu kabayi baya mu kalasa ta kabayi benza mudimu to, bidi mua kubambuluisha bua kukumbajabu mêba 50 malomba bampanda-njila. Bua ndongamu wa kukumbaja mêba 50 mu buambi mu ngondo muisatu anyi muinayi, udiku mua kulonda programe ya tshilejilu idibu bafile mu tshiena-bualu etshi anyi? Yikila ne ba mu dîku dienu ne bamanyishi bakuabu bua programe webe au; kakuyi mpata, nebikankamije bamue ba kudibu bua kudituabu munyima muebe mu mudimu eu. Pawikala kuyi ne mushindu wa kuenza bumpanda-njila buambuluishi, udifundile tshipatshila kampanda tshisunguluke bua ngondo ayi, nenku wikale upatuka mu buambi ne bamanyishi badi bampanda-njila. Dilongolola kutuadijila ku mpindieu bua kuvudija mudimu webe mu ngondo muisatu ne muinayi.
9 Leja dianyisha diebe bua Tshivulukilu: Tshidimu tshionso mu tshikondo tshia Tshivulukilu, dianyisha ditu nadi bantu bua tshia-bupikudi ditu disaka ba bungi ku ‘didisumbila tshikondo’ bua kuikala bampanda-njila bambuluishi. (Ef. 5:15, 16) Mu Congo-Kinshasa tshidimu tshishale muvua bampanda-njila bambuluishi 5 879 mu ngondo muisatu ne 6 507 mu ngondo muinayi. Biakenza muayene wa bantu 6 193 bua ngondo yonso ibidi eyi. Muayene eu mmupite wa bantu 3 298 bavua bampanda-njila bambuluishi mu ngondo yonso ikavua mipite ya tshidimu tshia mudimu atshi. Mu Congo-Brazzaville tshidimu tshishale muvua bampanda-njila bambuluishi 424 mu ngondo muisatu ne 199 mu ngondo muinayi. Biakenza muayene wa bantu 312 bua ngondo ibidi eyi. Muayene eu mmupite muayene wa bamanyishi 129 bavua bampanda-njila bambuluishi mu ngondo yonso ikavua mipite ya tshidimu tshia mudimu atshi. Tshikondo tshia Tshivulukilu tshia musangu eu ntshikondo tshikuabu tshiakanyine tshia kuleja dianyisha dietu dia muoyo mujima bua mulambu wa tshia-bupikudi wa Kristo pa kuvudija mudimu wetu mu buambi.
10 Bu mudi dituku dia 16 dia ngondo muinayi dienda disemena, ela meji bua mushinga udi nawu Tshivulukilu buebe wewe. Ela meji ku malu akafikisha ku lufu lua Kristo ne malu avuaye mutambe kuteka mu lungenyi bikole. Ela kabidi meji bua disanka divua ditekela Yezu kumpala ne mushindu wakamuambuluishadi bua kutantamena dikenga adi. Anji tshinkabi bua muaba udiye nawu mpindieu wa Mfumu wa tshisumbu, utangila mudimu wa diyisha ne dienza bayidi. (1 Kol. 11:3; Eb. 12:2; Buak. 14:14-16) Pashishe uleje dianyisha diebe bua bionso bidi Kristo muenze pa kudifila muebe muonso mu mudimu wa diyisha bilondeshile muudi mukokeshile.
11 Kankamija bakuabu bua kuyisha bikole: Padi bakulu ne basadidi ba mudimu benza pabu bumpanda-njila buambuluishi, badi bapeta mushindu muimpe wa kukankamija bena mu tshisumbu bakuabu. Padibu bapatuka ne bamanyishi mu buambi ne baya mu makumbula a bulami, badi bapeta mushindu wa kuambuluisha bakuabu bua kudifilabu bikole mu mudimu wa pa buawu eu. Tuetu bonso tusambilayi bua bualu ebu, nebikoleshe makanda atudi tuenza mu buobumue bua kumanyisha malu onso adi atangila lumu luimpe bimpe menemene.
12 Nansha muikala bakulu bonso ne basadidi ba mudimu mua kukuatshishangana bua mapangadika adibu bangate mu tshisumbu bua kuvudija mudimu mu ngondo muisatu ne muinayi, mutangidi wa mudimu ke udi bualu bua dilongolola mudimu wa buambi butangila menemene. Udi ne bua kulongolola miaba ya dienzela bisangilu bia mudimu wa buambi, matuku ne mêba adi makanyine bua bamanyishi ba bungi, ne pashishe kubimanyisha misangu ya bungi mu bisangilu. Badi mua kulongolola bua kupetangana misangu bungi kampanda pa mêba mashilangane a mu dituku bua kupetesha bantu bonso mu tshisumbu mushindu wa kudifila mu bitupa bishilashilangane bia buambi. Bidi mua kuikala buambi bua mu miaba itu bangenda bendela mushinga, bua mu misesu, bua ku nzubu ne ku nzubu, bua dipinganyina bantu, ne bua dibayishila ku telefone. Kabidi nealongolole bua bikale ne bungi bukumbane bua mikanda, ne bibejibeji ne teritware ya diyishila mu ngondo ibidi ayi.
13 Mukanda wa kufila mu ngondo muisatu newikale wa Dimanya, kuufila ne tshipatshila tshia kutuadija kulonga Bible ne bantu. Ngenyi mimpe ya mushindu wa kufila mukanda wa Dimanya idi mu tshisakidila tshia Mudimu wetu wa Bukalenge wa Tshiongo 2002. Mu ngondo muinayi netufile Tshibumba tshia Nsentedi ne Réveillez-vous! Tutetayi kuenza mudimu ne ngenyi idibu bafile mu tshiena-bualu tshia “Mushindu wa kufila bibejibeji.” Bantu bonso badilongolole bimpe bua kumonabu mua kuenza mudimu wa dimanyisha malu onso bimpe menemene.
14 Tudi ne disanka dia bungi mutudi tuenza mudimu ku bulombodi bua Mfumu wa tshisumbu Yezu Kristo, ne mutudi ne diakalenga dia kumanyisha bakuabu lumu luimpe! Bu mudi ngondo muisatu ne muinayi yenda isemena, tuenzayi kabidi muetu muonso bua kuyivuija tshikondo tshimpe menemene pa kutumikila dîyi didi Kristo mutume bua kuyisha ne kumanyisha malu onso.
[Kazubu mu dibeji 4]
Mishindu mishilangane ya programe wa mua kuikala mpanda-njila muambuluishi mu ngondo muisatu ne muinayi 2003
Dituku Mêba
Dimue 1 2 — — 2 —
Dibidi 1 — 3 — — —
Disatu 1 2 — 5 — —
Dinayi 1 — 3 — — —
Ditanu 1 2 — — — —
Disambombo 5 4 3 5 6 7
Dia lumingu 2 2 3 2 2 3
Luabanya 56 56 54 55 50 50
Tshisanga 50 50 51 53 — —
Kudiku programe wikala mukuakanyine ku idi muaba eu anyi?