Badi nebe dijinga
1 “Tuasakidilayi bua bionso binudi batuenzele. Mudimu unudi nuenza udi utukuatshisha menemene.” Mêyi a dianyisha nawu a mushindu eu adi aleja mutudi tumvua bua bakulu ne basadidi ba midimu batudi nabu. Bu mudi bulongolodi bua Nzambi buenda anu budiunda, kudi dijinga dikole dia bantu balume badi bakole mu nyuma badi mua kuambuluisha bisumbu bitua ku 100 000 pa buloba bujima. Biwikala muanetu wa balume mutambule, badi nebe dijinga.
2 ‘Biwasua’: Mmunyi muudi mua kulua mukulu anyi musadidi wa midimu? (1 Tim. 3:1) Nangananga pawikala tshilejilu tshilenga mu nsombelu webe yonso. (1 Tim. 4:12; Tito 2:6-8; 1 Pet. 5:3) Tshilejilu, udifile bikole mu buambi ne wambuluishe bantu bakuabu bua kuyisha pabu bikole. (2 Tim. 4:5) Wikale uditatshisha bua diakalenga dia bena Kristo nebe bakuabu. (Lomo 12:13) Wikale ubala Dîyi dia Nzambi bikole ne umanye mua kulongesha bimpe. (Tito 1:9; 1 Tim. 4:13) Enza ne tshisumi tshionso midimu idi bakulu bakupesha. (1 Tim. 3:10) Wewe muikale tatu wa dîku, ‘ukokeshe ba mu nzubu webe bimpe.’—1 Tim. 3:4, 5, 12.
3 Kuikala musadidi wa midimu anyi mukulu kudi kulomba kuenza mudimu bikole ne kuikala ne lungenyi lua didipangisha amue masanka. (1 Tim. 5:17) Bua nunku, paudi musue kuenza midimu eyi, uditue mu dienzela bakuabu mudimu ne budipuekeshi buonso. (Mat. 20:25-28; Yone 13:3-5, 12-17) Ukebe bua kumanya lungenyi luvua nalu Timote ne ukebe mushindu wa kumuidikija. (Filip. 2:20-22) Anu bu yeye, lekela bikadilu biebe bilenga bikuakuile. (Bien. 16:1, 2) Wewe ne mamuma a nyuma malomba bua kuambula majitu mu tshisumbu ne utumikila mubelu kayi wonso muimpe udibu bakupesha, ‘kudiunda kuebe nekumueneke kudi bonso.’—1 Tim. 4:15.
4 Baledi, longeshayi bana benu bua kuenza pabu midimu: Bana badi mua kulonga bua kuenza midimu kubangila anu ku buana buabu. Balongeshayi bua kusomba ne ntema mu bisangilu, bua kuyisha, ne bua kuikala tshilejilu tshilenga ku Nzubu wa Bukalenge ne mu tulasa. Nubambuluishe bua kuikalabu pabu benza midimu bu mudi: kukomba mu Nzubu wa Bukalenge, kuambuluisha bakulakaje, ne makuabu malu. Enzayi bua bobu kumvua disanka didi difumina ku didifila bua bakuabu. (Bien. 20:35) Nuenu benze nunku, bana benu nebalue basadidi ba midimu anyi bakulu ba makelela.