Tshitupa 4: Tulombolayi malonga a Bible mimpe

Kulongesha balongi bua kudilongolola

¹ Mulongi udi ubala tshiena-bualu tshia dilonga kumpala kua dîba, wela tulongo ku mandamuna ne wela meji pa mushindu wa kuandamuna mu ende mêyi neadiunde mu nyuma ne lukasa. Bua nunku, wewe mumane kumona mudi dilonga dishindamene, nulongolole pamue ne mulongi dilongesha dimue bua kumuleja mushindu wa kudilongolola. Bua balongi ba bungi, bitu bimpe kulongolola nabu dilonga anyi nshapita mujima.

² Kuela kalongo ne kufunda tumue tu-miaku: Umumvuije mushindu wa kupeta diandamuna ku lukonko ludi lufunda mu mukanda. Leja mulongi webe mukanda bua amone muudi muele tulongo ku miaku idi ne mushinga anyi ku biambilu bîpi. Paudi wenda umuleja apu, alonde tshilejilu tshiebe, ele tulongo mu wende mukanda ku miaba yamuambuluisha bua kuandamuna. (Luka 6:40) Pashishe umulombe bua kuandamunaye mu ende mêyi. Kuenza mushindu eu nekukuambuluishe bua kumanya ni udi umvua bimpe binudi nulonga.

³ Dikonkonona ne ntema mvese idi kayiyi ne mêyi matela mu tshikoso ntshitupa tshia didilongolola tshidi mulongi ne bua kuenza. (Bien. 17:11) Umuambuluishe bua kumona mudi mvese yonso udi kayi ne mêyi ende mu tshikoso ushindika lungenyi kampanda. Muleja mushindu wa kufunda imue miaku mikese mu miaba idi mishale ku nseke mu mukanda wende. Umuleje misangu yonso mudi Bible muikale tshishimikidi tshia malu adiye ulonga. Umukoleshe bua ikale wela mêyi adi mu mvese idi kayiyi ne mêyi ayi mu tshikoso mu mandamuna ende panudi nulonga.

⁴ Kutapa dîsu dia lukasa ne kuambulula: Kumpala kua mulongi kutuadija kulongolola dilonga diende tshikoso ku tshikoso, nebikale bimpe bu yeye mua kuanji kupeta lungenyi lua mu kabujima lua tshiena-bualu. Muleja ne: udi mua kupeta lungenyi mu kabujima lua tshiena-bualu bu yeye mua kukonkonona mutu wa bualu munene, mitu ya bualu mikese ne bimfuanyi. Umumvuije ne: kumpala kua yeye kujikija didilongolola, ambulule mu minite mikese ngenyi minene, pamuapa ku diambuluisha dia kazubu ka diambulula bu bikalaku mu mukanda. Kuenza mushindu eu nekumuambuluishe bua kukuata malu.

⁵ Kulongesha mulongi mua kudilongolola bimpe nekumuambuluishe bua yeye kuikala ufila mandamuna mimpe mu bisangilu bia tshisumbu. Nekumuambuluishe bua kumanya mua kudilongela: kudilongela eku nekumukuatshishe paku panyima pa matuku a bungi yeye mumane kulonga Bible mujikije.