Ndongamu mupiamupia wa mpuilu wa pa buende

Dîsu ntshintu tshimpe tshitambe. (Mus. 139:14) Kadi didi mua kutuishila anu pa tshintu tshimuepele. Bidi nanku bua dîsu diena dîna ne dia mu tshimfuanyi. Bua lumonu luetu lua mu nyuma kuikalalu luimpe, tudi ne bua kutuma ntema yetu yonso ku dienza anu dia disua dia Nzambi. Bu mudi malu a mu buloba bua Satana adi akeba ditanaji enda avulangana, mbiakanyine bua mpuilu wa pa buende wa tshidimu tshia mudimu tshia 2006 kuikalaye ne tshiena-bualu etshi: “Tuikale ne dîsu dimpe.”​—Mat. 6:22.

Ntshinyi tshitudi mua kuenza bua kupeta masanka a kudi Yehowa? (Nsu. 10:22) Muyuki wa “Ikala ne dîsu dimpe bua upete mabenesha” newandamune lukonko elu. Nkonko yelabu bantu ne mandamuna afilabu nebileje mushindu utudi mua kupeta masanka patudi tutumikila mêyi a mu Bible. Muyuki wa kumpala wa ngamba-malu mukumbudi wa “Tuikale ne dîsu dimpe mu buloba bua malu mabi” neutudimuije bua kulekela bintu bidi mua kukutakaja nsombelu wetu ne kutupangisha bua kunanga malu a mu nyuma. Netumanye kabidi tshidi kusungula “luseke ludi luimpe” kumvuija.​—Luka 10:42.

Mmunyi mudi baledi ne bantu bakuabu mua kuambuluisha bansonga bena Kristo bua kutuishila mêsu pa bipatshila bia mu nyuma? Baledi ne bansonga nebakuile pa bualu bua mushinga ebu mu muyuki wa “Baledi badi baludika mikete yabu bimpe” ne wa “Bansonga badi bipatshila malu a mu nyuma.” (Mus. 127:4) Muyuki wa ndekelu wenzabu kudi ngamba-malu mukumbudi neuleje mushindu utudi mua kuya kumpala pamue ne bulongolodi bua Yehowa muntu pa nkayende, mu dîku ne mu tshisumbu.

Nansha tuetu bikale tutshimanyinaku bulelela anyi bikale basadile Yehowa bidimu bivule, bidi bikengela tuetu ‘kuikala ne dîsu dimpe.’ Mpuilu wa pa buende neatuambuluishe mu bualu ebu.