Tutabalelayi bakuabu: Pa kuikala kutangilangana nabu bimpe
1 Misangu yonso itudi tuyisha miaba idi bantu ba bungi anyi ku nzubu ne ku nzubu, mbimpe tuikale tutangila bantu kumpala kua tuetu kutuadija kuakula. Patudi tubatapa dîsu nunku, mpala yabu idi mua kutuleja mudibu badiumvua padibu batumona, ne kumona kabidi mudi tshilunji tshiabu. Bobu pabu badi mua kumona tshitudi. Tshilejilu, mamu mukuabu wakamba tshivuaye mumone kudi Ntemu uvua mulue kumuyisha dimue dituku ne: “Ntshidi muvuluke muvuaye ne mimuemue ne lutulu. Biakandenga ku muoyo bikole be!” Bualu ebu buakafikisha mamu eu ku diteleja lumu luimpe.
2 Kutangilangana ne bantu mmushindu muimpe udi mua kutufikisha ku diyukila nabu patudi tuyisha mu misesu ne mu mikuabu miaba idi bantu ba bungi. Tshilejilu, muanetu mukuabu wa balume utu ne tshibidilu tshia kutangila bantu badiye usambakena nabu. Padi muntu umutangila, udi utua mimuemue ne umupesha bibejibeji. Mushindu’eu mmumuambuluishe bua kuyukila bimpe ne bantu.
3 Jingulula mudi bakuabu badiumvua: Kushala mutangile bantu batudi tuyukila nabu kudi kutuambuluisha bua kumanya mudibu badiumvua. Tshilejilu, mpala wa muntu udi mua kutuleja ne: kêna umvua bimpe bitudi tuamba, kêna ubitaba, udi ne mudimu wa bungi anyi mmusue ne: tukoseshe muyuki. Nunku tudi mua kuakaja muyuki anyi kuwipidija bilondeshile malu aa. Kuenza malu bilondeshile mudi bakuabu badiumvua mmushindu muimpe wa kuleja mutudi tubatabalela.
4 Kuamba bulelela ne dituishibua: Mu matunga a bungi, paudi utangila muntu mu mpala udi uleja ne: udi wamba bulelela. Tangila tshiakenza Yezu pakamukonka bayidi bende ne: ‘Udi mumanye mua kusungidibua nnganyi?’ Bible udi wamba ne: ‘Yezu wakabajoja talalaa, wakabambila ne: Bantu kabena bamanye mua kuenza bualu ebu, kadi Nzambi udi mumanye mua kuenza malu onso.’ (Mat. 19:25, 26) Kakuyi mpata, malu akamba Yezu akabalenga ku muoyo bua mushindu uvuaye mubatangile. Tuetu tutangila petu bantu bimpe, netubambile lumu luimpe lua Bukalenge bua Nzambi ne muoyo mujima ne dituishibua dionso.—2 Kol. 2:17; 1 Tes. 1:5.