Longa Bible ne bantu bimanyine kulu anyi ku telefone
1. Ntshipatshila kayi tshitudi natshi patudi tulonga Bible ne muntu?
1 Bitu bienza disanka dia bungi patudi tutuadija kulonga Bible ne muntu. Kadi kupeta muntu udi musue kulonga Bible kudi anu ntuadijilu patupu. Tshipatshila tshia dilonga edi ntshia kuambuluisha muntu au bua kulua muyidi mulelela wa Yezu. (Mat. 28:19, 20) Kadi ntshinyi tshiatuambuluisha bua kukumbaja tshipatshila etshi?
2. Dilonga dia Bible dia bimanyine kulu anyi ku telefone ndilonga dia mushindu kayi, ne bua tshinyi ndimpe?
2 Bantu badi ne malu a bungi a kuenza: Bantu ba bungi lelu kabena ne dîba nansha dikese to. Mu mikuabu miaba, bantu ba bungi kabatu bitaba bua kulonga nabu Bible munkatshi mua dîba dijima patudi tutuilangana nabu bua musangu wa kumpala to. Bua kuyisha bantu ba mushindu eu, bavua batulombe bua kutuadija kulonga nabu bimanyine kulu anyi ku telefone. Dilonga edi didi ne bua kuanji kuikala dîpi ne tudi mua kukonkonona anu mvese mikese anyi tshikoso tshimue peshi bibidi bia mu mukanda bu mudi wa Bible ulongesha. Bidi bienza disanka dia bungi bua mukadi bamanyishi ba bungi batuadije kulonga Bible ne bantu bimanyine kulu anyi balongela ku telefone.
3. Bua tshinyi tudi ne bua kulua kuvudija minite patudi tulonga Bible ne bantu bimanyine kulu?
3 Bituku bikuenza disanka bua kutungunuka ne kulonga Bible ne muntu bimanyine anu kulu kashidi anyi? Tòo. Kabitu bimpe kunenga kumbelu kua muntu mutantshi mule patudi tufikaku musangu wa kumpala to. Nansha nanku, mu Mudimu wetu wa Bukalenge wa Tshisua-munene 1990, mu dibeji dia 8 badi bamba ne: “Padi anu dilonga dishindama ne mulongi upeta dijinga dia kumanya malu a bungi, tudi mua kusakidila ndambu mukuabu wa minite.” Bualu ebu budi ne mushinga. Tshilejilu: Padi muana wamba kufua ne nzala, batu banji kumupesha biakudia bikese nansha yeye kayi mubiukute. Kadi mbikole bua muana eu kuikalaye ne makanda ne kukola bimpe bikalaye mutungunuke amu ne kudia biakudia bikese nunku munkatshi mua ngondo mivule. Bia muomumue, bua mulongi wa Bible kuluaye musadidi wa Nzambi udi mukole mu nyuma, bidi bikengela kulonga nende misangu ya bungi basombele panshi.—Eb. 5:13, 14.
4. Kulongela ne muntu Bible basombele panshi kudi kuambuluisha ku tshinyi?
4 Kulonga ne bantu ku nzubu yabu: Mbimpe kulonga ne muntu basombele panshi pa nkayenu. Nudi mua kulongela mu nzubu anyi pambelu muaba udi mukumbane. Nunku dilonga didi mua kulengela ne kuambuluisha mulongi bua kumvua bimpe tshidi Dîyi dia Nzambi diamba. (Mat. 13:23) Bidi mua kuambuluisha kabidi mulongeshi bua kulongesha bilondeshile majinga a mulongi. Kabidi, kulonga ne muntu mutantshi mule nekumuambuluishe bua kulonga Dîyi dia Nzambi mu buondoke ne kukolesha ditabuja diende.—Lomo 10:17.
5. Mmushindu kayi utudi mua kumbuka ku dilonga dia bimanyine kulu kuya ku dia basombele panshi?
5 Mmushindu kayi utudi mua kutuadija kulonga basombele panshi ne muntu utuvua tulonga nende bimanyine kulu? Tuetu bamane kulonga ne muntu bimanyine kulu misangu ya bungi, tudi mua kumulomba bua kulonga nende basombele panshi mu minite ya bungi. Anyi udi mua kumuebeja ne budimu ne: “Udiku ne dîba dia tuetu kusombela panshi lelu ne kuyukila bualu ebu anyi?” anyi ne: “Udi musue bua tuyukile nebe lelu bualu ebu munkatshi mua mêba anga?” Padi muntu kayi musue bua nuenu kusombela panshi, tungunukayi nende amu ne dilonga bimanyine kulu. Pawapeta kabidi mpunga, teta bua kumulomba tshiakabidi bua nulonge basombele panshi.
6. Ntshipatshila kayi tshitudi natshi patudi tuyisha, ne mmunyi mudi ngenyi idibu bafile mu tshiena-bualu etshi mua kutuambuluisha bua kutshikumbaja?
6 Patudi eku tutungunuka ne kudienzeja bua kuambuluisha bantu, katupu muoyo tshipatshila tshietu patudi tutuadija kulonga nabu Bible. Tshipatshila tshietu ntshia kuambuluisha bantu badi banange malu makane bua kudilambula kudi Yehowa, kutambula ne kulua bantu bende. Tudi batekemene se: Yehowa neabeneshe mudimu wetu utudi tuenza ne tshisumi bua kuambuluisha bantu mushindu eu.—2 Tim. 4:5.