Bikale ne dikima, kadi bikale bena ditalala
1 Bantu ba bungi batutu tuyisha batu banyisha abu malongesha ne muoyo mujima nansha mudiwu kaayi umvuangana ne tshidi Bible wamba. Nansha mutudi ne bua kuyisha ne dikima, mbimpe tuikale kabidi “mu ditalala ne bantu bonso,” tubenga kubalenduisha mu malu a patupu. (Lomo 12:18; Bien. 4:29) Mmunyi mutudi mua kuyisha lumu luimpe ne dikima eku bikale anu mu ditalala ne bantu bonso?
2 Tukebe malu atudi mua kupetelangana: Muntu muena ditalala utu wepuka dikokangana ne bakuabu. Kuelangana mpata ya tshianana ne muntu pa malongesha adiye mulamate kakuakumufikisha ku dituteleja to. Yeye muambe bualu bua dishima, pamuapa tudi mua kukeba ne budimu mua kubueja kabualu katudi mua kupetelangana. Tuetu bimanyine anu pa malu atudi tuetu nende tuitaba, tudi mua kufika ku dimumbusha ngenyi yonso mibi, malu atudi tumuyisha kumutuilawu ku muoyo.
3 Tuetu banji kulekela muntu utuambila luende lungenyi nansha luolu lubi, abi bidiku bisua kuleja ne: tudi balekele bulelela anyi babubondakaje ne mashimi anyi? Kabiena nanku to. Mudimu wetu tuetu bena Kristo ki ngua kuleja bantu bonso batudi tuyisha mudi malongesha abu mikale a dishima to, kadi ngua kuyisha lumu luimpe lua Bukalenge bua Nzambi. (Mat. 24:14) Pamutu pa kunyingalala bua bualu kampanda bua dishima budi muntu wamba, tubuangate bu mushindu muimpe wa kumanya meji adi munda muende.—Nsu. 16:23.
4 Tuikale ne kanemu: Kudi misangu itubi bitulomba bua kuleja muntu utudi tuyisha ne dikima dionso mudi malongesha abu a dishima. Kadi bu mutudi basue kuikala mu ditalala ne bantu bonso, tudi tuepuka bua kupuekesha bantu badi bitaba anyi balongesha malongesha a dishima milongo anyi bua kubamba mêyi a dibapepeja nawu. Tuetu tudileja mutudi babapite, kabakututeleja kabidi to; kadi tuetu tudipuekesha tuakula nabu ne lutulu, bidi biunzulula lungenyi lua badi banange bulelela, bobu kubuitaba. Patudi tunemeka bantu ne malongesha adibu bitaba, badi bamona ne: tudi tubatua mushinga, bifuane kubafikisha ku ditaba bitudi tubambila.
5 Mupostolo Paulo uvua wangata malongesha a bantu bavuaye uyisha ne mushinga, ke pakakebaye mua kubayisha lumu luimpe mushindu uvua ubasankisha. (Bien. 17:22-31) Wakitaba bua kulua ‘muena malu onso kudi bonso’ bua kumona ‘mua kusungila bakuabu.’ (1 Kol. 9:22) Ke mutudi petu mua kuenza, tuyisha ne dikima kadi bikale kabidi bena ditalala.