Difundila tshipatshila tshia kulonga Bible ne muntu
1 ‘Bandulukayi, numone madimi, adi matoke katataka bua kunowabu.’ (Yone 4:35) Mêyi akamba Yezu Kristo aa adi bushuwa umvuangana ne tshidi bena Kristo benza lelu eu.
2 Tutshidi tutungunuka ne kupeta bantu ba muoyo muimpe badi basue kulonga njila ya Yehowa. Bidi nanku, bualu kutu bayidi bapiabapia batu batambula tshidimu tshionso etshi. Kadi ntshinyi tshiudi ne bua kuenza biwikale ukeba bua kulonga Bible ne bantu ne muoyo mujima?
3 Difundila tshipatshila: Tshia kumpala, difundila tshipatshila tshia kutuadija kulonga Bible ne muntu pa tshibidilu. Kupu tshipatshila tshiebe etshi muoyo paudi mu buambi to. Mudimu udibu batupeshe tuetu bena Kristo ngua kulongesha ne kuyisha, ke bualu kayi tudi ne bua kukeba mishindu ya kulonga Bible ne bantu.—Mat. 24:14; 28:19, 20.
4 Amue malu atudi katuyi mua kupua muoyo: Bamanyishi ba Bukalenge badi ne bua kusambila ne muoyo mujima. Imue misangu tutu tupeta bantu bavua balombe Nzambi bua abambuluishe bua bamumanye. Padi Yehowa utuambuluisha bua kupeta bantu ba mushindu eu ne kubalongesha Bible, ndiakalenga dinene be!—Hag. 2:7; Bien. 10:1, 2.
5 Muanetu wa bakaji mukuabu wakalomba Yehowa bua amuambuluishe bua kupetaye muntu udiye mua kulonga nende Bible ne pashishe kutekaye trakte ya Aimeriez-vous en savoir plus sur la Bible? pa muaba wende wa mudimu. Mamu mukuabu kuambulaye trakte umue, kumubalaye, pashishe pakatuadijaye kuuja muaba utu kuinshi ku trakte au, muanetu au kuyukila nende ne kutuadija kulonga nende Bible.
6 Bena Kristo netu badi bamanye mua kutuadija kulonga Bible ne bantu bimpe badi mua kukuambuluisha bua wewe kukumbaja tshipatshila tshiebe tshia kulonga Bible ne bantu. Lomba diambuluisha kudi Yehowa ne tumikila mibelu yonso idibu bakupesha bua kukumbaja tshipatshila etshi. Pamuapa mu matuku makese emu neutuadije kulonga Bible ne muntu.