Mpungilu wa Distrike wa Bantemu ba Yehowa wa 2008
1. (a) Bua tshinyi mubelu uvua Paulo mupeshe bena Kristo bena Ebelu udi utamba kutukumbanyina lelu eu? (Bala Ebelu 10:24, 25.) (b) Ndiakalenga kayi dituapeta kumpala eku mu ditumikila mubelu wa Paulo eu?
1 Mupostolo Paulo wakambila bena Kristo bena Ebelu bua kudisangisha bua kukankamijangana ne ‘kutamba kuenza nunku’ bu muvuabu bamona dituku dia Mukalenge disemena pabuipi. (Eb. 10:24, 25) Kudi malu adi aleja ne: ‘dituku’ divua Paulo wakuila adi ndisemene pabuipi bikole. Ke bualu kayi tudi tukeba mushindu wa kudisangisha ne bena Kristo netu bua kupeta mibelu ya kudi Nzambi idi mua kutulombola mu ‘matuku a ku nshikidilu’ mabi aa. (2 Tim. 3:1) Netupete mushindu wa kudisangisha eu mu mpungilu ya distrike ya 2008 ikadi pabuipi.
2. (a) Bua tshinyi mbimpe kubuela mu mpungilu matuku onso asatu? (b) Ndîba kayi ditudi ne bua kutuadija kudilongolola bua kubuelamu?
2 Ubuele matuku onso asatu: Tudi tukukankamija bua ubuele mu mpungilu eu matuku onso asatu. Tuetu ‘katuyi tulekela disangisha dietu pamue’ netupete malongesha afilabu mu mpungilu eu. (Eb. 10:25) Tuadija kudilongola anu ku mpindieu. Pikalabi bikengela, udi mua kulomba mfumuebe wa mudimu kumpala kua dîba bua akebe muntu udi mua kuenza mudimu pa muaba webe mu matuku awikala mu mpungilu. Mpungilu yeye wenzeka tshikondo tshidi bana bebe mu tulasa, umanyishe balongeshi babu. Ubamanyishe ne: mpungilu ntshitupa tshinene tshia ntendelelu wetu. Ikala mujadike ne: Yehowa neabeneshe bionso biudi wenza bua kuteka malu a Bukalenge buende pa muaba wa kumpala.—Mat. 6:33.
3. Mmishindu kayi itudi mua kuleja mutudi tuditatshisha bua bakuabu?
3 Ambuluishe bakuabu bua kubuelamu: Paulo wakalomba kabidi bena Kristo nende bua ‘badielelangane meji muntu ne muntu.’ (Eb. 10:24) Kudiku bana betu badi mu kasumbu kenu ka dilonga dia mukanda badi dijinga ne diambuluisha bua kubuela mu mpungilu anyi? Udiku mua kuambuluisha balongi bebe ba Bible bua nubuele nabu mu mpungilu nansha bobu baluemu anu dituku dimue anyi? Paudi wambila balela bebe badi kabayi Bantemu bua mpungilu eu, balombe bua balue pabu. Bionso biwenza ne dinanga dionso bidi mua kukupetesha masanka auvua kuyi mutekemene.
4. Bua tshinyi tudi ne bua kubuela mu mpungilu udibu batume tshisumbu tshietu?
4 Buela mu mpungilu udibu batume tshisumbu tshienu: Kunyima kua Tshisangilu tshia Mudimu tshinuakonkonona tshisakidila etshi, nebalamike dibeji didi dileja miaba yonso yenzekela mpungilu ku tshibasa tshia mamanyisha. Tudi tunulomba bua kuela meji bimpe menemene kumpala kua kusungula mpungilu unuikale ne bua kubuela mu 2008. Bua kumonabu mua kulongolola bungi bukumbane bua miaba ya kusomba, bua mikanda, bua miaba ya kulala ne malu makuabu, tudi tunulomba bua kubuela mu mpungilu udibu batume tshisumbu tshienu. Kadi koku malu kampanda adi akupangisha bua kubuela mu mpungilu udibu batume tshisumbu tshienu, udi mua kubuela mu mpungilu mukuabu.
5. Mmalu kayi a mushinga atudi katuyi mua kupua muoyo patudi dijinga ne kaba ka kulala? Bua tshinyi?
5 Miaba ya kulala: Wewe musue kusombela kua muena Kristo nebe anyi ku Nzubu wa Bukalenge, tudi tulomba sekretere wa tshisumbu tshienu bua afunde mêna a bamanyishi bonso badi dijinga ne miaba ya kulala ne kuatumina Tshibambalu tshia miaba ya kulala tshia muaba unuenzela mpungilu kumpala kua dîba. Afunde dîna dia mumanyishi, aleje bikala mumanyishi muntu mulume anyi mukaji, mujike anyi musele, bidimu biende ne bena mu dîku badiye nabu. Bualu ebu nebuambuluishe bana betu badi batangila malu a miaba ya kulala bua kumona mua kulongoluela bantu bonso miaba bimpe. Komite wa Mudimu wa Tshisumbu neanji kukonkonona ngikadilu ya bamanyishi bonso badi balomba kaba ka kulala kumpala kua kutuminabu bena mu tshibambalu etshi mabeji adi ne mêna abu. Bobu bamane kukupesha muaba wa kulala, ki mbimpe wewe kushintulula muaba bua kuya kusombela kua mulela webe anyi kua mulunda webe to. Wewe muenze nanku, nebitatshishe bena mu tshibambalu tshia miaba ya kulala. Kadi bikala muntu ujinga kusombela kua mulela wende udi kayi Ntemu mu tshikondo tshia mpungilu, kêna ne bua kufila dîna diende kudi sekretere nansha.
6. (a) Mmalu kayi adibu ne bua kuenza bikalabu ne bua kuladika bana betu ku Nzubu wa Bukalenge? (b) Ngamue malu kayi atudi ne bua kukonkonona bua tuetu kumona mua kubuela mu mpungilu wa distrike? (Tangila kazubu ka “Amue malu a kukonkonona . . . ”)
6 Amue malu anudi mua kuenza bua kuladika bantu ku Nzubu wa Bukalenge ngowu aa: Komite wa Mpungilu wa Distrike neasungule mukulu umue bua kutangila muenzeka malu aa. Neikale ne muntu wamuambuluisha, ikale pende mukulu anyi musadidi wa mudimu udi mukumbane. Nebakosolole Nzubu wa Bukalenge mu bitupa bibidi. Tshitupa tshimue netshikale tshia bana betu ba bakaji ne bana babu ne bansongakaji. Tshikuabu netshikale tshia bana betu ba balume ne bansongalume. Nzubu wa Bukalenge neikale anu bua kulala. Nusungule bana betu ba balume badi ne ngikadilu mimpe bua kuikala bashintakanangana ku Nzubu wa Bukalenge bua kulama bintu bia bana betu padibu mu mpungilu. Kabena ne bua kulambila munda mu Nzubu wa Bukalenge nansha. Nudi mua kuasa katanda kakese mu lupangu bua kulambilamu anu bua matuku adi mpungilu wenzeka. Padi mpungilu ujika, nupule katanda aku. Mbimpe bua Nzubu wa Bukalenge ne lupangu luende bikale ne mankenda ne bulongame. Nuenze muenu muonso bua tshintu nansha tshimue katshinyanguki to. Bana betu balalamu benze muabu muonso bua kulejangana ngikadilu ya buena-Kristo bulelela ne bayileje kabidi bena mutumba.—1 Kol. 10:31.
7. (a) Mmunyi mutudi mua kutumbisha Yehowa patudi mu mpungilu? (b) Mmalu kayi avua bantu bambe bua bienzedi bimpe bia bana betu?
7 Bienzedi bimpe: Kutumikila mukenji wa Yehowa wa kudisangisha bua kumutendelela kudi kutuambuluisha bua ‘tuikale ne diakalengele.’ Kadi kudi nangananga kutupesha mushindu wa kutumbisha dîna diende. (Yesh. 48:17) ‘Bienzedi [bietu] bimpe bidi bimueneka patoke’ kudi bantu ba bungi mu mpungilu ne bifikisha bamue ku diamba bidibu bamone. (1 Tim. 5:25) Tshilejilu, muntu mukuabu wakatangila muvua bana betu balengeja muaba wa kuenzela mpungilu wakamba ne: “Pantu mmona foto ya mparadizu mu mikanda yenu, ntu ndiambila ne: ‘Bantemu badi balotakana.’ Kadi mpindieu ngamonyi ne: badi mua kushintulula buloba ne kubuvuija mparadizu.” Pashishe kubapeshaye bisumbu bibidi bia bilongo wamba ne: “Angatayi, bienze bu ne: ndi muenza panyi mudimu eu.” Muena ku nzubu wa tshilala benyi wa mu tshimenga kampanda tshivuabu benzele mpungilu wakamba ne: “Bantu ba bungi mu tshimenga etshi badi bakula anu bua Bantemu ba Yehowa ne bua tshidi mpungilu wabu mutuenzele. Tudi bamone munudi balame tshipalu etshi ne miaba ya kumanyikila mashinyi ne mankenda. Bivua bituenze disanka dia kuikala nenu mu matuku aa. Tudi batekemena ne: ke mutuasomba kabidi musangu udi ulonda.” Bienzedi bimpe bia bana betu bivua bifikishe bantu ku diamba mêyi aa ne makuabu a buena aa bidi bisankisha mutshima wa Yehowa Nzambi wetu.
8. Mmunyi mudi Matayo 4:4 uleja ne: kuteleja bimpe malu onso alongeshabu mu mpungilu kudi ne mushinga?
8 Yezu wakamba ne: bua tuetu kuikala ne muoyo bulelela, tudi ne bua kuteleja ‘mêyi onso adi apatuka mukana mua Nzambi.’ (Mat. 4:4) Mu mpungilu itutu tuenza tshidimu tshionso, Yehowa utu utupesha ‘biakudia [bia mu nyuma] pa dîba diabi’ ku diambuluisha dia ‘mupika wa lulamatu ne wa budimu.’ (Mat. 24:45, NW) Batu benza mudimu wa bungi bua kulongolola biakudia ebi ne kutupeshabi. Tulejayi dianyisha dietu kudi Yehowa bua dinanga diende pa kubuela mu mpungilu eu matuku onso asatu ne kuteleja bionso biambabu ne muoyo mujima.
[Kazubu mu dibeji 3]
Mêba:
Mu Ditanu ne mu Disambombo
9:20 - 16:55
Mu Dia lumingu
9:20 - 16:00
[Kazubu mu dibeji 4]
Amue malu a kukonkonona bua kubuela mu mpungilu:
1. Biwikala ne bua kuenza luendu lule bua kubuela mu mpungilu, tuadija kulama mfranga ya kufuta njila ne ya biakudia buebe wewe ne bua bena dîku diebe bonso.
2. Kupu muoyo bua kuya ne mapa ebe a ku budisuile bua kukuatshisha nawu midimu ya mpungilu. Bible udi wamba ne: ‘Muntu kamueneki ku mêsu kua Yehowa bianza bitupu’ kadi ‘atumbishe Yehowa ne biuma biende.’—Dut. 16:16; Nsu. 3:9.
3. Mu mpungilu, tudi tutumbisha dîna dia Yehowa ku bienzedi bietu bimpe ne ku mankenda ne mvuadilu wetu muimpe.—1 Kol. 10:31.
4. Wikale mudilongolole bua kueleshangana diboko ne bakididianganyi ne bana betu bakuabu badi ne bujitu bua kufila bulongame. Kukuatshidi bakuabu bantu miaba ya kusomba to, anu bena mu dîku dienu anyi bantu banudi bende nabu.
5. Bua wewe kuteleja bimpe tshitupa tshia mu mapingaja, udie bintu bipepele panudi mu dikisha. Biakudia bia bungi anyi bidi mua kukukutshisha bikole bidi mua kukuladika tulu.—Luka 8:18.
6. Mankenda adi atumbisha Yehowa. Ku ndekelu kua tshitupa tshionso tshia mpungilu, muntu yonso udi mua kuangulaku mabeji ne bintu bikuabu bua kubiela muaba udi mulongolola bua kubimansha bua kushiya muaba wa mpungilu ne mankenda.—1 Pet. 1:15, 16.